Read West Ambae SIONE 11 Bible Online

SIONE 11 - West Ambae bible

SIONE 11

¹A tangaloi katukwale a hinana i Lasaros u toka lo vanua Betani vae u lenga. A gwatuivanua Betani aia a tata i Meri mai tuana i Mata.

²(I Meri aia hi, hinea mo didihi na vurae boniboni tilo garu na Hugwe* i Jisas, mo kwasu mamahakinia kina vuluna. Vae i hagwena i Lasaros aia hi mo lenga.)

³I rahagwe i Lasaros kairua raru mo hora leo vaki mai Jisas raru viti “Hugwe. I buluimu hinea ku lagwa maia haburu vae u lenga.”

⁴Lolona i Jisas mo rongo hokinia hi mo viti kwara, “A lengeana hika vae a gweregwereki hete mateana, vae ne vosangi na huirana noi God, vake kwara i God ne tabe hakekiau, i nau i Natuna.”

⁵I Jisas u lagwa haburu mai Mata mai tuana, mai hagwegaru i Lasaros vake.

⁶Aia u rongo kwara i Lasaros u lenga vae u hugu rani kairua vake takwa-hi mo hugu eia.

⁷Vunu mo kwaha mana nona ngwalagelo mo viti “Ta mule taliku vaki Sutia.”

⁸Vunu a nona ngwalagelo ramo kwaha maia ramo viti “Tisa. Nakwaiha, he tuai tea, a gwaloana noi Isrel* rau vai kwara rana vohoiko ki vatu takwa-hi. ?Vae kona mule vaki takwa-hi taliku?”

⁹I Jisas mo daraki lakwara mo viti kwara, “A aoa hangavulu dongwana kairua lo rani katukwale. Diko te tangaloi ne lakao lolo rani ne tagataga lai, nehe tatu tea, huri u tagai na leleha na varamana.

¹⁰Vae diko u lakao lolo bongi ne tatu huri he leleha tea kwara ne tagataga.”

¹¹I Jisas mo kwaha kwehi mo rovo, vunu mo hoke na leona vake, mo viti kwara, “I buluida i Lasaros u maturu, vae na vano na va vakaradae.”

¹²A nona ngwalagelo ramo viti “Hugwe. Diko u maturu, karea, a lengeana ne kata tiua, neri ahi.”

¹³I Jisas u viti na leo hokinia hi, a domianaki kwara i Lasaros u mate, vae a nona ngwalagelo rau domi kwara i Lasaros u maturu kareaki.

¹⁴Hikani i Jisas mo viti matangwasaraki lakwara mo viti “I Lasaros u mate ba.

¹⁵Vae nu lagwa nomo tikei maia, huri nu domi hurikamu kwara vae i kamu tulu neri hauhuri. Ta vano vaki maia.”

¹⁶I Tomas a hinana kairuaki i Natu Malava, mo kwaha mana ngwalagelo ratuaki mo viti “I kita vunu ta huria, ta va mate haragoki maia.”

¹⁷Lolona i Jisas mo maravuti, mo rongo kwara i Lasaros rau tanomia a rani kaivati koro ba.

¹⁸A gwatuivanua hi Betani u garagarani mana gwatuivanua lakua Serusalem kwara te kilometa kaitolu vohoki.

¹⁹A ngwera Sutia rusa rau vanamai kwara rana tagai Mata mai Meri, kwara rana amohi na domigaru huri na mateana noi hagwegaru i Lasaros.

²⁰I Mata mo rongo kwara i Jisas u vanamai, mo vano kwara ne vaki maia, vae i Meri u hugu na vanua.

²¹I Mata mo kwaha mai Jisas mo viti “Hugwe*. Kwara vae diko i nigo hike, i hagwegu nehe mate tea.

²²Vae nu kikilai hika kwara i God ne beteko kina havakinau hinea kona uduhuri kinia.”

²³I Jisas mo viti lakwae kwara, “I hagwemu ne maraka taliku.”

²⁴I Mata mo viti lakwae kwara, “Nu kikilai kwara neri maraka taliku lo taro na marakaana lo rani ki rovonaki.”

²⁵I Jisas mo kwaha maia mo viti kwara, “A gwataki na marakaana mana ahiana, i nau. Ihe hi u hauhuri lugu, vae diko ne mate, vae ne ahi taliku.

²⁶Vunu vake ihe hi u toka, u hauhuri lugu, vae nehe mate te vohoki. ?I nigo ku hauhuri luna hi?”

²⁷A vavine hi mo daraki mo viti “Io, Hugwe. Nu hauhuri kwara i nigo i Vurae*, i Natu i God, aia hinea kwara vae ne vanamai vaki lo varamana.”

²⁸I Mata mo kwaha mo rovo, mo mule taliku mo kware raraveki tuana i Meri mo viti “A Tisa aia hike ba. U uduharoko kwara kona tagaia.”

²⁹I Meri mo rongo kwehi mo vaivai heheri kwara ne vano vaki maia.

³⁰(I Jisas he maravuti te radu nga lo gwatuivanua hi, vae aia radu nga lo mahao hini i Mata mo maravuti maia eia.)

³¹A tangaloi aira lolo ingwa mai Meri, rau tuku amohi na domina. Vae ramo tagai Meri mo maraka mo lakao rururu tivarea ramo huria huri rau domi kwara ne vano vaki lo tabu ne va tangi takwa-hi.

³²Vunu i Meri mo maravuti mai Jisas, mo tagaia mo sovi hivo mana garuna mo viti “Hugwe*. Kwara vae diko i nigo hike, i hagwegu nehe mate tea.”

³³I Jisas mo tagaia u tuku tangi, a tangaloi aira hi ramo huria rau tangi maia vake. I Jisas a domina mo kilu mo rongo hati haburu.

³⁴Mo uduhuri kinira mo viti “?Tulu tanomia ave?” Ramo daraki lakwae ramo viti “Hugwe. Ko vanamai, ko tagaia.”

³⁵I Jisas mo tangi.

³⁶Hikani a tangaloi ramo viti “Tulu tagaia. U lagwa haburu maia kareaki.”

³⁷Vae ratuaki rau viti kwara, “A tangaloi hika u vai lavi na tangaloi matadodo mo tagataga lai. ?Vae kworoho he va tu koro na kinau te hika, kwara vae i Lasaros ne hatu mate?”

³⁸I Jisas a domina mo kilu taliku u rongo hati radu nga. Mo vano vaki mana tabu hi a malanga, rau rihi na vatu lakua koro na matakihalaki ba.

³⁹I Jisas mo kwaha maira mo viti “Tulu rihi na vatu hi tiua.” I Mata, i hagwena hini mo mate, mo kwaha mai Jisas mo viti “Hugwe*. Hika u boni ba huri keu tanomia a rani kaivati koro ba.”

⁴⁰I Jisas mo daraki lakwae mo viti kwara, “I nau nu viti lakwako ba kwara diko ku hauhuri lugu vae kona tagai na huirana noi God.”

⁴¹Hikani ramo rihi na vatu hi letiu. Vunu i Jisas mo lalangao hake mo viti “Mama, Nu lagwakinigo huri komo toko rongohuriau.

⁴²Nu kikilai kwara ku rongohuriau tigwaravu. Vae nomo viti kwehi huri na tangaloi hike, kwara vae rana hauhuri kwara i nigo ku horeau.”

⁴³I Jisas mo kwaha kwehi mo rovo, vunu mo kware karakara mo viti “!Lasaros! !Ku ngwalua tivarea!”

⁴⁴A mateana hi mo ngwalua tivarea, a kabana, a garuna, rau vivihiana kina lugwa, a nakona rau kweti koroa vake kina lugwa. I Jisas mo viti lakwara kwara, “Tulu teri na lugwa vano hi tiua, tulu tirakinia ne lakao.”

⁴⁵A tangaloi rusa rau vanamai kwara rana tiroki Meri, vae ramo tagai na kinau hi i Jisas mo vai, ramo hauhuri luna.

⁴⁶Vae ratuaki tiura rau mule taliku vaki mana Varisi* maira ramo viti lakwara huri na kinau vano hi i Jisas mo toko vaira.

⁴⁷Hikani a Varisi mana tangaloi* lingilingi lalakua ramo vileki tabulutaki mana Tangaloi* Tovotovo Lalakua, ramo kwaha ramo viti “?Tana vai kworoho? A tangaloi hika u vai na kaivosangi lalakua u rusa haburu.

⁴⁸Diko tana tirakinia ne vano hokinia hi nga, vae vunuhi na tangaloi rana hauhuri luna, vunu a ngwera Rom hinea rau hugwe korokita rana vanamai, rana vai ginaraki na Ingwa Kokona noi God, vake mana ngwera tatada doluaki.”

⁴⁹Katukwale tiura a hinana i Kaeavas aia a hugwe na tangaloi* lingilingi lo hukao aia hi, mo kwaha maira mo viti “!Tulu he kikilai na kinau te vohoki!

⁵⁰?I kamu tulu he kikilai tea kwara u taritarisa lakwakita kwara a tangaloi katukwale ne mate huri na tangaloi savia, kwara vae a tangaloi doluaki tatada ranahe mate tea?”

⁵¹Lolona mo viti na leo hi, hete leona sibona vae hokinia, aia a hugwe na tangaloi lingilingi lo hukao aia hi, mo duruki terekaki na leo ki tomuaki kwara vae vaki takuni i Jisas ne mate koro na gwaloana noi Isrel*.

⁵²Vae hete hurira kehekeheki, vae huri kwara ne lai tabulutaki i raranatu i God hinea rau hugu vataha na mahagweki rana mulemai ki tangaloi katukwale.

⁵³Vunu mo tinakaki lo rani aia hi, a kaitomuaki nona gwaloana noi Isrel vano hi ramo tovotovo tabulutaki kwara vae rana kwohi matei Jisas.

⁵⁴Vae huri hi, i Jisas he vano te na ngwasara lo vanua Sutia, vae mo tiraki takwa-hi, mo vano vaki lo gwatuivanua katukwale u kwareki Evrem garagarani mana vanua vuroki, mo hugu takwa-hi mana nona ngwalagelo.

⁵⁵A taro na vileki tabulutakiana nona gwaloana noi Isrel rau kwarekinia a Kanikani* na Tivekiana u garagarani. A tangaloi rusa ramo vano tina vanua laliki vaki Serusalem kwara rana vai ngwakutakinira rana ngwasara tomuaki vunu vari a kanikani.

⁵⁶Ramo toko soro haro i Jisas, vae ramo vileki tabulutaki lolo Vanua* Kokona noi God ramo uhiuhira ramo viti “?Tulu domi kworohokinia? ?Hika vae ne vanamai lai vaki lolo kanikani, diko hetea?”

⁵⁷A tangaloi lingilingi lalakua mana Varisi maira ramo tau na leo kwara diko te katukwale u kikilai kwara i Jisas aia ave ne vitia lakwara vae rana kwiribibia.