Read West Ambae SIONE 12 Bible Online

SIONE 12 - West Ambae bible

SIONE 12

¹Hikani a rani kaiono koro na Kanikani* na Tivekiana, i Jisas mo vanamai vaki Betani. Betani aia a gwatuivanua i Lasaros, aia hi i Jisas mo rakatia tina mateana.

²Aira takwa-hi rau vai a hinaka kai Jisas. I Mata mo toko beteki na hinaka, vae i Lasaros aia eia maira hi ramo hugu lo tevo na kanikani mai Jisas.

³Hikani i Meri u lavi na vurae boniboni, a hinaki a nat*, a mavana a gilo duviki, a manena u lakua haburu. Mo vanamai vaki mai Jisas mo vurae na garuna kinia. Vunu i Meri mo kwasu mamahaki na garu i Jisas kina vuluna. A vurae hi u boniboni doluaki na ingwa.

⁴I Sutas Iskariot aia takwa-hi, aia katukwale tina ngwalagelo noi Jisas, aia hini kwara vae ne tovo kai Jisas.

⁵Mo kwaha mo viti kwara, “A vurae boniboni hikani u taritarisa mana vatu tari vakavidolua vakaitolu. [20] ?Kworoho a vavine hika he va hokakinia tea kwara ne lai mane* luna ne hile lakwa na tangaloi kakaravi?”

⁶I Sutas u viti kwehini, hete kwara u domi huri na tangaloi kakaravi. Vae u kwaha kwehi huri aia a tangaloi babalua, u kwali na tanga na mane, vae mo toko kwiri taveaki na noga mane duviki kwara ki nona.

⁷Vae i Jisas mo viti “!Tulu tirakinia! A natu vavine hika u kwiribibi na vurae boniboni vaki na hika vae mo vuraeau kinia terekaki huri kwara vae rana tau na tarabehigu tilolo gwaru-malanga*. [21]

⁸I kamu, a tangaloi kakaravi rau hugu maikamu tigwaravu, vae i nau nanahe hugu te maikamu tigwaravu.”

⁹A tangaloi rusa haburu rau rongo kwara i Jisas u hugu Betani, vae hikani ramo vano vaki takwa-hi. Rau vano hete kwara rana tagai Jisas kehekeheki, vae vake kwara rana tagai Lasaros, aia hi i Jisas mo rakatia tina mateana.

¹⁰Hikani a tangaloi* lingilingi lalakua a domiga u huira ramo tovotovo tabulutaki kwara rana kwohi matei Lasaros vake,

¹¹huri a gwaloana noi Isrel* u rusa haburu rau tirakinira, ramo hauhuri lui Jisas huri i Lasaros mo ahi taliku.

¹²Mavukona a vao lakua hinea ramo vanamai vaki lolo Kanikani* na Tivekiana rau rongo kwara vae i Jisas u tuku lakao vanamai vaki lo gwatuivanua lakua Serusalem.

¹³Hikani ramo tai a rangai-vikai aira hoki na rahere, ramo vano kwara rana tagaia. Ramo kaluhaki ramo viti kwara, “!Kaluhaki God! Hugwe i God. Ko vai tabetabekinia hi u vanamai lo hinamu. Ko vai tabetabeki na Hugwe Lakua nona gwaloana noi Isrel*.”

¹⁴I Jisas u hagwe na dogi ngwalageloki mo hugu luna, hoki na Uliuli* Kokona mo viti kwara,

¹⁵“I kamu a tangaloi na gwatuivanua lakua Saeon, tulu hatu mataku. Hikani a nomiu Hugwe Lakua u kwalao lo natu na dogi, u vanamai vaki maikamu.”

¹⁶A nona ngwalagelo rahe domi kikilaki na kinau te hi lo taro hi, vae vaki takuni lolona hi i Jisas mo mule hake, i God mo tabe hakeki na hinana, vunu ramo domihagwe kwara a Uliuli Kokona u viti hokinia hi, vae aira rau vai hokinia hi ba lakwae.

¹⁷A vao hinea ramo huri Jisas lolona hi mo kwareluahi i Lasaros tina tabuna mo rakatia tina mateana, aira ramori toko lai leoki lakwa na tangaloi dolua huri na kinau hi mo vaia.

¹⁸Vae huri hi, a tangaloi rusa ramo vano vaki mai Jisas kwara rana tagaia, huri ramo rongo mo vai na kaivosangi lakua hini.

¹⁹A Varisi* ramo toko kwahakwaha kinira ramo viti “Tulu taga. I kita hika tanahe vai lavi na kinau te vohoki. A tangaloi doluaki na varamana rau huria aira vunu.”

²⁰A ngwera Gris ratuaki aira maira hi ramo vano vaki Serusalem kwara rana kaluhaki God kina domi mavakiana lolo taro na kanikani* hi.

²¹Ramo vanamai vaki mai Viliv. Aia a ngwera Betsaeta, lo vanua Galili*. Ramo uduhuri kinia ramo viti “Keu lengaia kwara kena tagai Jisas.”

²²I Viliv mo vano mo viti lakwai Aduru, vunu raru mo vano raru mo viti lakwai Jisas.

²³I Jisas mo kwaha maira mo viti kwara, “I nau a Natu* na Tangaloi, a tarogu u vanamai ba, vae i God ne tabe hakeki na hinagu.

²⁴Kareaki na viti lakwakamu. Diko a tangaloi ranahe tanomi na biu na sila tea, a biu hi ne va eno kwehi, huri aia kahea vohoki. Vae diko rana tanomia vae ne tubu, neri kwai, a biuki ne rusa.

²⁵A tangaloi hinea u lengaia kwara ne kwiribibi na mamaurianana vae ne vakasalakinia, vae ihe hi he domi huri na mamaurianana tea hike lo varamana, vae ne kwiribibia vaki lo ahiana vaki tuai.

²⁶Ihe hi u lengaia kwara ne boloki lakweau ne huriau, huri kwara vae na hugu takwanahavaki vae nogu tangaloi boloki neri hugu eia maiau. I Tamagu neri vai mavakinira hinea rau boloki lakweau.”

²⁷Vunu i Jisas mo viti kwara, “?Hikani a domigu u rongo hati vae na viti kworoho? ?Nana viti ‘Mama, ko hatu tiraki na taro hika mo hivo tau lugu’? Hetea, nahe viti te kwehi, huri i nau nu vanamai kwara na vano lalahi na taro na rongoana hati hika.

²⁸!Mama, ko tabe hakeki na hinamu!” Vunu a dilao mo tatangi tina taetae, mo viti kwara, “I nau nu tabe hakekinia u rovo ba, vae nari tabe hakekinia taliku.”

²⁹A vao rau tu ramo rongo na dilao hi, ramo viti “!Ii! !A gwatuhari mo dadare!” Ratuaki ramo viti “!A kaihora tina taetae u kwaha maia!”

³⁰Vae i Jisas mo kwaha maira mo viti kwara, “A dilao hika he vanamai te lakweau, vae u vanamai lakwakamu kwara tulu ne rongo.

³¹Hika a taro kwara i God ne areki na tangaloi na varamana, vae hika, i God ne gui i Setano*, a hugwe na varamana.

³²Vae i nau, lo taro hi a tangaloi rana tabeau hake tina tano vaki lo kaibetu, nari revei na tangaloi vunuhira vaki maiau.”

³³U viti hokinia hi, u vosangi kwara vae ne mate kworohokinia.

³⁴A vao ramo kwaha maia ramo viti kwara, “A noda Tangwata* u viti lakwakita kwara i Vurae* ne toka vae vaki na tuai. ?Vunu kworoho komo viti hokinia hi, kwara a Natu* na Tangaloi ne tabe hakekiana? ?Ihe hi a Natu na Tangaloi?”

³⁵I Jisas mo daraki mo viti kwara, “Ne leleha maikamu nehe tuai tea. U leleha maikamu radu, tulu lakalakao luna kwara vae a dodoki ne mai guikamu, huri a tangaloi hinea u lakao lolo dodoki he kikilai tea kwara ne vano ave.

³⁶Lo taro hi u leleha radu maikamu, tulu hauhuri lo leleha hini kwara vae tulu ne kwareki a raranatu na leleha.” I Jisas mo viti hokinia hi vunu mo vano tiura mo hili.

³⁷I Jisas mo vai na kaivosangi lalakua rusa lo nakoga vae rahe hauhuri tea luna.

³⁸Hokinia a leo nona tangaloi* duruduruki i Aesaea mo viti u mule luna, hi mo viti “Hugwe i God. ?Ihe u hauhuri lo leo hi kemo viti? ?Ku vosangi na nomu huirana lakwai ihe?”

³⁹Vunu vake rahe hauhuri lai tea, huri i Aesaea u viti buluiki vake kwara i God u viti

⁴⁰“Nu kwiri koro mataga, nu kwiri koro domiga, kwara vae a mataga ranahe tagataga tea, vake a domiga ranahe kikilai utuhaki tea, vae ranahe halebohi tea vaki maiau, kwara na vakahikinira.”

⁴¹I Aesaea u kwaha hokinia hi huri aia u tagai na huirana noi Jisas, vae mo toko vitiviti huria luna.

⁴²Vae a kaitomuaki nona gwaloana noi Isrel*, u rusa rau hauhuri luna, vae rahe viti te tivarea huri rau mataku kina Varisi*, huri vae ramai taura tivarea tina vale* na tiutangaroa.

⁴³Rau lagwa kwara a tangaloi rana kaluhakinira u sileti kwara i God ne kaluhakinira.

⁴⁴I Jisas mo kwaha karakara mo viti kwara, “Ihe hi u hauhuri lugu, he hauhuri tea lugu kehekeheki, vae luna vake aia hini mo horeau.

⁴⁵Ihe hi u tagaiau, u tagaia vake hinea mo horeau.

⁴⁶I nau a leleha nu vanamai tilo varamana, kwara aira hinea rau hauhuri lugu ranahe hugu tea lolo dodoki.

⁴⁷Ihe hi u rongo na leogu vae he rongohuria tea, vae i nau nahe arekinia tea. Nahe vanamai tea kwara na areki na tangaloi na varamana, vae nu vanamai kwara na vakahiki na tangaloi na varamana.

⁴⁸Ihe hi u bena kiau, vake he lavi na nogu leo tea, a kaiareki katukwale eia vae neri arekinia. A leo vano hi nomo vitira, ranari arekinia lo rani ki rovonaki,

⁴⁹huri hika a leo vano hi nomo vitira, hete leogu sibogu, vae rau vanamai ti Tamagu hi mo horeau. Aia u viti lakweau kwara na kwaha, na viti hokinia hi lakwakamu.

⁵⁰I nau nu kikilai kwara a nona tulikileo hini, u lavi na ahiana vaki tuai vanamai. Vae a havakinau hi nomo viti, aia hi i Tamagu mo horeau kwara na viti.”