Read West Ambae SIONE 14 Bible Online

SIONE 14 - West Ambae bible

SIONE 14

¹I Jisas u kwaha mana nona ngwalagelo mo viti kwara, “A domimiu ne hatu kwalao laliki. Tulu hauhuri lui God, vae tulu ne hauhuri lugu vake.

²Lolo ingwa i Tamagu a tanotano u rusa. I nau na vano na vai rarai a tanotano hurikamu. Kwara vae hete hokinia hi, nana viti lakwakamu. [24]

³Na vano na vai rarai a tanotano hurikamu, vunu nari mulemai na lavikamu vaki maiau. Vae na hugu ave, i kamu tulu neri hugu maiau eia.

⁴I kamu tulu kikilai na hala vaki lo vanua hi nana vano vaki eia.”

⁵I Tomas mo viti lakwai Jisas kwara, “Hugwe*. ?I kami kehe kikilai tea kwara vae kona vano vaki ave, vae kena kikilai kworohoki na hala hi kwara kena maravuti eia?”

⁶I Jisas mo daraki lakwae mo viti “A hala, i nau. A gwataki na vitikareaki, i nau. A gwataki na ahiana, i nau. Hete tangaloi kwara ne vano lai vaki mai Tamagu, vae kehekeheki ne vanamai vaki maiau, i nau nari lavia vaki maia.

⁷Hikani i kamu tulu kikilaiau ba, vae tulu ne kikilai i Tamagu vake, vae u tinakaki hika tulu kikilaia, tulu tagaia ba. [25]”

⁸I Viliv mo kwaha maia mo viti “Hugwe. Ko vosangi i Tamamu lakwakami vae ne taritarisa lakwakami, kena lagwa luna.”

⁹I Jisas mo viti “Viliv. ?I nau nu hugu maikamu tuai lengalenga, vae kohe kikilaiau te radu nga? Ihe hi u tagaiau u tagai Tamagu. ?Vunu kworoho komo viti ‘Ko vosangi Tamamu lakwakami’?

¹⁰?I nigo kohe hauhuri te kwara i nau lui Tamagu, i Tamagu aia lugu? A leo nomo toko vitira lakwakamu rahe vanamai te tiau sibogu. I Tamagu aia u toka lugu, aia u vai na bolokiana vano hika.

¹¹U taritarisa kwara tulu ne hauhuri lugu hinea nomo viti kwara i nau lui Tamagu, i Tamagu aia lugu. Vae diko hetea, tulu neri hauhuri lugu huri na bolokiana hinea nomo toko vaira.

¹²Kareaki na viti lakwakamu, ihe te haro nga ne hauhuri lugu neri vai na boloki rusa hokinia hika nomo vai. Vae aia neri vai na boloki lalakua vakevake u rusa siletira vano hika, huri i nau na vano vaki mai Tamagu.

¹³A havakinau hi tulu ne uduhuri lo hinagu, nana vai. Lo hala hokinia hi, a hina i Tamagu ne tabe hakekiana huri na nogu bolokiana, i nau i Natuna.

¹⁴Diko i kamu tulu ne uduhuri a havakinau hi kiau lo hinagu, i nau nana vai luna lakwakamu.”

¹⁵Vunu i Jisas mo vano nga mo viti kwara, “Diko i kamu tulu lagwa maiau, tulu ne rongohuri na nogu tulikileo.

¹⁶Vae i nau na uduhuri ki Tamagu, aia neri hile na Kaihago dolua vake lakwakamu, vae aia ne hugu maikamu vaki tuai.

¹⁷Aia a Tanungwe u matangwasaraki na vitikareaki huri God. A tangaloi na varamana [26] ranahe lai lavia tea, huri rahe tagaia tea, vake rahe kikilaia tea. Vae i kamu tulu kikilaia, huri u hugu maikamu vae ne toka lumiu.

¹⁸“Nahe tirakikamu tea kwara tulu ne hugu hoki na natu madua, vae nana mulemai taliku vaki maikamu.

¹⁹Nehe tuai tea a tangaloi na varamana ranahe tagaiau te taliku. Vae i kamu tulu ne tagaiau. I nau nu ahi, vae huri hi i kamu vake tulu ne ahi.

²⁰Lo taro a raniki hi ne maravuti tulu ne kikilai kwara i nau nu toka lui Tamagu, vake i kamu tulu toka lugu, hokinia i nau nu toka lumiu.

²¹“Ihe hi u lai tabetabeki na nogu tulikileo u rongohurira, aia hi u lagwa maiau. Aia hi u lagwa maiau, i Tamagu neri lagwa maia. I nau vake nari lagwa maia, na vosangi tabetabekiau lakwae.”

²²I Sutas hi, aia hete i Sutas Iskariot, mo kwaha maia mo viti “Hugwe*. ?Kona vosangi kworohokinigo lakwakami, vae konahe vosangiko tea lakwa na tangaloi na varamana?”

²³I Jisas mo daraki lakwae mo viti kwara, “Ihe hi u lagwa maiau ne rongohuri na nogu leo. I Tamagu neri lagwa maia, vunu i kamirua mai Tamagu keru neri vanamai vaki maia keru ne toka maia.

²⁴Ihe hi he lagwa te maiau he rongohuri na nogu leo tea. A leo hi tulu mo rongora hete leogu, vae rau vanamai ti Tamagu, aia hi mo horeau.

²⁵“I nau nu viti na kinau vano hi lakwakamu hokinia nu hugu maikamu radu nga.

²⁶Vae a Kaihago, hi a Tanungwe Kokona, hinea i Tamagu neri horae lo hinagu, neri huhuikamu kina kinau savia, vake ne vaikamu tulu neri domihagwe savi na kinau hinea nomo toko vitira lakwakamu.

²⁷“A magemuana nu tau lakwakamu, a nogu magemuana nu hilea lakwakamu. Nu betea lakwakamu, hete hoki na magemuana hinea tulu mo lai lo varamana. A domimiu ne hatu kwalao laliki, tulu hatu mataku.

²⁸I kamu tulu rongoau nu viti lakwakamu, kwara na vano tikamu vae na mulemai harokamu taliku. Kwara vae diko i kamu tulu lagwa maiau, vae ne havutikamu kwara i nau na vano vaki mai Tamagu, huri i Tamagu aia u lakua siletiau.

²⁹I nau nu viti lakwakamu hika tomuaki, vunu neri mule luna, vae ne mule luna tulu neri hauhuri.

³⁰A taroki tikei kwara na kwaha maikamu ne tuai, huri i Setano* aia hi a hugwe na varamana hika u vanamai. A nona huirana u tikei lugu.

³¹Vae a havakinau i Tamagu mo tuliki lakweau, i nau nomo vai luna, kwara a tangaloi na varamana rana kikilai kwara i nau nu lagwa haburu mai Tamagu. “Tulu maraka, ta vano tina vanua hike.”