Read West Ambae SIONE 15 Bible Online

SIONE 15 - West Ambae bible

SIONE 15

¹Hikani i Jisas u viti kwara, “I nau hoki na vikai kareaki, i Tamagu aia a kaitagahuri na vikai hi.

²Vunuhi na rangaki hini lugu rahe kwai tea, ne taira leletiu, vae vunuhi na rangaki hini rau kwai karea ne tai vakahakinira kwara rana kwai vakevake.

³I kamu tulu ngwasara ba kina leo hinea nomo vitira lakwakamu.

⁴Tulu hariki lugu, hokinia i nau nomo hariki lumiu. Diko i kamu tulu nehe hariki te lugu, tulu nehe kwai lai tea, hoki na ranga nehe kwai lai tea sibona, diko he hariki tea lo viuki.

⁵“I nau a viuki, i kamu a rangarangaki. Aira hi rau hariki lugu, i nau luga, ranari kwai ne bulu. Diko tulu he hariki te lugu tulu nehe vai lai te kinau vohoki.

⁶Aira hi rahe hariki te lugu aira hoki na rangai-vikai vuroki hinea a tangaloi rau vohokinira leletiu, ra va goru. A tangaloi rana vileki tabulutaki na rangai-vikai hinea rau goru, rana vohoki tabulutakinira tilolo kabu rana va kao.

⁷Diko tulu hariki lugu, vake a leogu ne eno lumiu, vunu i kamu tulu ne uduhuri na havakinau tea hi tulu lengaia, vae tulu ne lavia.

⁸Tulu ne mulemai kina nogu ngwalagelo luna hi, i kamu tulu ne kwai ne bulu. Lo halaki aia hi a hina i Tamagu ne tabe hakekiana.

⁹I nau nu lagwa maikamu hoki i Tamagu u lagwa maiau. Tulu hariki ne madi lo nogu lagwaana.

¹⁰Diko i kamu tulu rongohuri na nogu tulikileo, tulu neri hariki ne madi lo nogu lagwaana, hokinia i nau nu rongohuri na tulikileo noi Tamagu nu hariki lo nona lagwaana.

¹¹“I nau nu viti na leo vano hi lakwakamu kwara a nogu hahavutiana ne eno lumiu, vae ne havutikamu haburu.

¹²A nogu tulikileo aia hika, kwara tulu ne lagwalagwa maikamu, hokinia hi i nau nu lagwa maikamu.

¹³Hete lagwaana kwara u lakua siletia hika, kwara a tangaloi ne tiraki na mamaurianana huri rabuluina.

¹⁴Diko i kamu tulu vai a havakinau hi nomo tuliki lakwakamu, i kamu i rabuluigu.

¹⁵I nau nahe kwarekikamu tea kwara a tangaloi boloki taliku, huri a tangaloi boloki he kikilai tea a havakinau hi a nona masi mo vai. Vae nu kwarekikamu kwara i rabuluigu, huri nu viti lakwakamu vatavataha na kinau hi nomo rongora ti Tamagu.

¹⁶I kamu tulu he mataiau tea, vae i nau nu mataikamu, nu rivukikamu kwara tulu ne vano tulu ne boloki, tulu ne kwai ne bulu, vae a kwaimiu ne eno vaki tuai. Vunu tulu ne uduhuri a havakinau hi ki Tamagu lo hinagu, vae ne bete lakwakamu.

¹⁷A nogu tulikileo hika lakwakamu kwara, ‘Tulu lagwalagwa maikamu.’ ”

¹⁸Vunu i Jisas mo viti kwara, “Diko a tangaloi na varamana [27] rau vai taratarakikamu, tulu ne domihagwe kwara aira rau vai taratarakiau tomua ba.

¹⁹Kwara vae diko tulu huri na domiana nona tangaloi na varamana aira vano hi rana lagwa maikamu huri tulu ne bulu maira. Vae i nau nu mataikamu tina tangaloi na varamana, vae tulu he bulu te maira. Huri hi a tangaloi na varamana rau vai taratarakikamu.

²⁰Tulu domidomi-bibi a leo hika nomo viti lakwakamu. ‘A tangaloi* boloki vuroki he lakua tea sileti na nona masi.’ Diko aira rau vai bulabulakikiau, rana vai bulabulakikikamu vake. Kwara vae diko rau rongohuri na nogu leo, rana rongohuri na nomiu leo vake.

²¹Vae aira rana vaikamu kwehini huri i kamu a nogu. Rana vai kwehi huri aira rahe kikilaia te hinea mo horeau.

²²Kwara vae diko nahe vanamai tea, vake nahe kwaha te maira, kwara vae a noga hatiana ne tikei. Vae hika ranahe viti lai tea kwara kworoho ramo vai na hatiana hika.

²³Ihe u vai taratarakiau, u vai tarataraki i Tamagu vake.

²⁴Kwara vae nahe vai na boloki lalakua te hika lo livukaga, hinea a tangaloi vake dolua ranahe vai lai tea, kwara vae a noga hatiana ne tikei. Vae rau tagai na nogu boloki lalakua, vunu ramo vai tarataraki-kamirua mai Tamagu.

²⁵U mule luna hokinia hi kwara a havakinau u uliana ba lo noga Tangwata* ne kworo, hi mo viti kwara, ‘Aira rau vai taratarakiau haro vuroki vohoki.’

²⁶“A Kaihago ne vanamai neri hago leo huriau. Aia a Tanungwe u matangwasaraki na vitikareaki huri God, hinea u vanamai ti Tamagu, vae i nau nari horae vanamai ti Tamagu vaki maikamu.

²⁷I kamu vake tulu neri hago leo huriau, huri i kamu tulu hugu maiau tina tinatinakakiki vaki na hika.