Read West Ambae SIONE 17 Bible Online

SIONE 17 - West Ambae bible

SIONE 17

¹I Jisas mo viti na leo vano hi mo rovo, vunu mo lalangao hake vaki lo taetae, mo viti “Mama. A taroki u maravuti. Ko tabe hakekiau, i nau i Natumu, vae i nau i Natumu, na tabe hakeki na hinamu.

²I nigo ku rivukiau ku hile huirana lakweau kwara na hugwe koro na tangaloi doluaki, kwara i nau na hile na ahiana vaki tuai lakwara hinea komo hilera lakweau.

³A ahiana vaki tuai aia hika. A tangaloi ranari kikilaiko, i nigo kehekeheki a God kareaki, vake ranari kikilaiau, i nau hi i Jisas Kraes* hinea komo horeau.

⁴I nau nu tabe hakeki na hinamu lo varamana. Nu vai vunuhi na boloki hinea komo hile lakweau kwara na vai.

⁵Mama. Hikani ko tabe hakekiau maiko lo nomu karekarea hokinia hinea nomo hugu maiko lo nodaru karekarea tomua vunu a varamana mori tauana.

⁶“I nau nu matangwasarakinigo lakwa na tangaloi aira hinea komo betera lakweau tina varamana. Aira rau kwareki a nomu, vae i nigo ku betera lakweau. Rau rongohuri na leomu,

⁷vae hikani rau kikilai kwara vatavataha na kinau hi komo betera lakweau, rau vanamai tiuko.

⁸Nu hilera kina leomu komo betea lakweau, vae rau lavia. Vae rau kikilai bakotoki kwara i nau nu vanamai tiuko, vunu vake rau hauhuri kwara i nigo ku horeau.

⁹“I nau nu tiutangaroa hurira. Nahe tiutangaroa te huri na tangaloi na varamana [29] vae huri na tangaloi hinea i nigo komo betera lakweau, huri aira rau kwareki a nomu.

¹⁰Vunuvunuhira hi a nogu a nomu, vake vunuvunuhira hi a nomu a nogu, vae a tangaloi rana tabe hakekiau hurira.

¹¹Hikani nu vanamai vaki maiko. Nahe hugu te vakevake lo varamana, vae a tangaloi vano hika rau hugu lo varamana radu nga. Mama Kokona. Ko kwiribibira lalahi na huirana na hinamu hinea komo betea lakweau, kwara vae rana kwareki katukwale hokinia i nigo, i nau, taru katukwale.

¹²Lolona nomo hugu maira i nau nu kwiribibira kina huirana na hinamu, a hina hi komo betea lakweau. [30] Nu tuku tagahurira vae hete kwara te katukwale ne sala, kehekeheki a tangaloi aia hi u mataia kwara ne sala. Vae u mule luna hokinia kwara a Uliuli* Kokona ne kworo.

¹³Hikani nu vanamai vaki maiko. Nu viti na kinau vano hikani lo varamana hokinia kwara ne havutira haburu kina nogu hahavutiana.

¹⁴Nu hile na leomu lakwara. A tangaloi na varamana rau vai taratarakinira, huri aira vake hete tangaloi na varamana, hokinia i nau hete tangaloi na varamana.

¹⁵Nahe viti te lakwako kwara kona lavira tina varamana, vae nu viti lakwako kwara kona kwiribibira tina Tangaloi Hati hi i Setano*.

¹⁶Hokinia i nau hete tangaloi na varamana, vae aira vake hete tangaloi na varamana.

¹⁷A leomu a leo na vitikareaki. Kwara kona vai a leomu hi ne boloki lo mamaurianaga kwara rana kwareki a nomu tangaloi kokona.

¹⁸Nu horara tivarea tilo varamana, hokinia hi komo horeau tilo varamana.

¹⁹I nau nu hileau lakwako kwara na kwareki nomu tangaloi kokona kwara vae aira vake ranari mulemai kina nomu tangaloi kokona kareaki.

²⁰“I nau nahe tiutangaroa te hurira kehekeheki, vae vake hurira hi ranari hauhuri lugu lalahi na noga leo.

²¹Nu tiutangaroa kwara vae rana hariki katukwale. Mama. Nu lengaia kwara rana hariki katukwale ludaru, hokinia hi i nigo ku hariki lugu, i nau nu hariki lumu. Nu lengaia kwara rana hariki katukwale, kwara vae a tangaloi na varamana ranari hauhuri kwara i nigo ku horeau.

²²Nu tabe hakekinira, hokinia komo tabe hakekiau kwara vae rana hariki katukwale, hokinia i kitarua taru mo hariki katukwale.

²³I nau nu hariki luga i nigo ku hariki lugu. Vae nu tiutangaroa kwara lo hala hokinia hi aira rana hariki katukwale lo kinau savia, kwara vae a tangaloi na varamana rana kikilai kwara i nigo ku horeau, vake ku lagwa maira hokinia komo lagwa maiau.

²⁴“Mama. I nigo ku betera lakweau, vae i nau nu lengaira kwara rana hugu maiau lo vanua hi nana hugu eia, hokinia rana tagai na huirana na nogu karekarea. A karekarea hi komo betea lakweau, huri ku lagwa maiau tomua vunu a varamana mori tauana.

²⁵Mama. I nigo ku bakoto vohoki. A tangaloi na varamana rahe kikilaiko tea, vae i nau nu kikilaiko, vake a nogu tangaloi aira vano hi rau kikilai kwara i nigo ku horeau.

²⁶Nu matangwasarakinigo lakwara, vae nana vai kwehi vakevake, kwara vae a nomu lagwaana hi komo lagwa maiau kinia ne toka luga, vae i nau na toka luga vake.”