Read West Ambae SIONE 19 Bible Online

SIONE 19 - West Ambae bible

SIONE 19

¹Vunu i Paelet mo lavi Jisas mo taua tilo kaba na tangaloi ramo takwilia.

²A tangaloi na vuro ramo vai na kaikwokwori na gwatu kina karo hohokoti, ramo kwokworia lo gwatuna. Rau lugwae kina lugwa u kara dodoka,

³ramo toko vanamai vaki maia, ramo viti kwara, “!I nigo a Hugwe Lakua nona gwaloana noi Isrel! !Keu vai mavakinigo!” Hi ramo maraka ramo toko rabae.

⁴I Paelet mo ngwalua taliku vaki mana vao mo kwaha maira mo viti “!Tulu tagaia! Nana lavia tivarea vaki maikamu, vae tulu ne kikilai kwara nohe hagwe na hatiki te luna vohoki.”

⁵Hokinia i Jisas mo ngwalua tivarea, u huni na karo hohokoti, u lugwaki na lugwa u kara dodoka. I Paelet mo kwaha maira mo viti “A tangaloi aia hika. !Tulu tagaia!”

⁶Vunu a tangaloi* lingilingi lalakua mana kaitagahuri ramo tagaia, ramo koleki ramo viti “!Durua tilo kaibetu! !Durua tilo kaibetu!” I Paelet mo viti lakwara kwara “Tulu lavia, tulu durua tilo kaibetu. I nau nohe hagwe na hatiki te luna.”

⁷A vao ramo daraki taliku lakwae ramo viti kwara, “A nomai tangwata eia vae lo tangwata hi ne mate, huri u viti kwara aia i Natu i God.”

⁸I Paelet mo rongora ramo viti hokinia hi mo mataku vakevake.

⁹Aia mo mule taliku vaki lo ingwa lakua nona kavman mo kwaha mai Jisas, mo viti “?I nigo ku vanamai ave?” Vae i Jisas he darakinia tea.

¹⁰I Paelet mo uduhuri kinia mo viti “?Konahe kwaha tea maiau? I nigo ko kikilai kwara i nau nu hago huirana kwara nana tirakinigo. Vunu vake nu hago huirana kwara nana duruko tilo kaibetu.”

¹¹I Jisas mo daraki mo viti kwara, “I nigo ku hago huirana koroau huri na kinau katukwale vohoki, huri i God aia u beteko kinia. Vae a tangaloi hi mo tauau tilo kabamu, aia u vai na vaivai hati u lakua seletiko.”

¹²Vae i Paelet mo rongoa mo viti hokinia hi aia u lengaia kwara ne tirakinia. Vae a vao ramo madimadi ramo kwaha karakara taliku ramo viti kwara, “Diko i nigo kona tirakinia ne lakao, i nigo hete buluana nona hugwe lakua i Sisa*. Te katukwale ne viti aia a Hugwe Lakua aia a tavaluivuro noi Sisa.”

¹³I Paelet mo rongo na leoga hokinia hini, mo lavi Jisas tivarea. I Paelet mo hugu lo hagehagele na arekiana. A tanotano hi u kwareki “A Tanovi Lakua u Kihiana kina Vatu.” A gwaloana noi Isrel lo noga leo Hibru* rau kwarekinia “Gabata.”

¹⁴Hikani kwara te mataniaho aulu lo Rani na Vai Raraiana huri na Kanikani* na Tivekiana. I Paelet mo kwaha mana gwaloana noi Isrel mo viti kwara, “!A nomiu Hugwe Lakua aia hika!”

¹⁵Aira ramo koleki lakwae ramo viti kwara, “!Kwohia! !Kwohia! !Durua tilo kaibetu!” I Paelet mo viti lakwara kwara, “?Na duru na nomiu Hugwe Lakua tilo kaibetu?” A tangaloi lingilingi lalakua ramo daraki ramo viti kwara, “I Sisa kehekeheki aia a nomai hugwe lakua.”

¹⁶Vunu i Paelet mo tiraki Jisas lakwara kwara rana durua tilo kaibetu. Hokinia ramo lavi Jisas tiua.

¹⁷I Jisas aia sibona u kwali na betuna, mo soro tivarea tina vanua hi. Ramo vanamai vaki lo tanotano hi u kwareki “A Tanotano na Hui na Gwatu na Tangaloi.” A gwaloana noi Isrel* lo noga leo Hibru* rau kwarekinia “Golgota.”

¹⁸Ramo durua tilo kaibetu takwa-hi. Ramo duru na tangaloi kairua vake tilo kaibetu kairua, kairuaki tavaluki kairuaki tavaluki, i Jisas aia lo livukagaru.

¹⁹I Paelet* mo uli na leo, ramo taua lo betu i Jisas. U viti kwara, “I Jisas a ngwera Nasaret, a Hugwe Lakua nona gwaloana noi Isrel.”

²⁰A gwaloana noi Isrel rusa rau valukia huri a tanotano hi ramo duru i Jisas tilo kaibetu eia he vakahao tea tina vanua Serusalem. A leoki u uliana lo leo nona gwaloana noi Isrel, lo leo nona ngwera Rom, vake lo leo nona ngwera Gris.

²¹A tangaloi* lingilingi lalakua ramo kwaha mai Paelet ramo viti kwara, “Hatu uli kwara, ‘A Hugwe Lakua nona gwaloana noi Isrel,’ vae ko viti hokinia hikani. ‘A tangaloi hikani aia u viti sibona kwara, “I nau a Hugwe Lakua nona gwaloana noi Isrel.” ’ ”

²²I Paelet mo daraki mo viti “Nu uli kworohokinia u eno kwehi.”

²³A tangaloi na vuro ramo duru i Jisas tilo kaibetu mo rovo, vunu ramo lavi na lugwana ramo kwahekinira gwatu kaivati, huri a tangaloi na vuro aira kaivati. Vunu rau lavi na lugwana vake lolona, a lugwa vatuvatu, a tangaloi rau tinakakinia lo uaki rau vatukia vaki lo gweregwereki, a hokehokeki tikei. [32]

²⁴A tangaloi na vuro vano hi ramo kwahakwaha kinira ramo viti kwara, “Ta hatu dare vurivuria, ta tatiki na taes, ta tagaia kwara ihe ne lavia.” Hokinia a Uliuli* Kokona mo kworo, hi mo viti “Rau kwaheki na lugwagu vatahakinira, rau tatiki na taes huri na lugwagu kwara ihe ne lavia.” Hokinia a tangaloi na vuro vano hi rau vai luna.

²⁵A tangaloi rau tu garagarani mana betu i Jisas aira hika. I retahina, i tua i retahina, i Meri i vavinehi i Klovas, i Meri a vavine Maktala.

²⁶I Jisas mo tagai retahina mana nona ngwalagelo katukwale aia hi u lagwa maia, raru mo tu, i Jisas mo kwaha mai retahina mo viti “I natumu hi.”

²⁷Vunu mo kwaha mana nona ngwalagelo, mo viti “I retahimu hi.” Kwahaia hi vohoki a ngwalagelo hi mo lavi retahi i Jisas vaki tatana, mo toko tagahuria hoki retahina vohoki.

²⁸I Jisas u kikilai kwara hikani vatavataha na kinau rau taritarisa u rovo ba. Vunu kwara a leo na Uliuli* Kokona ne kworo, aia mo viti “I nau nu madoku.”

²⁹A laha takwa-hi, u kukwere kina waen u kakarati. Hikani ramo lavi na koten ramo vulukinia lo waen hi, vunu ramo taua lo ranga na rivurivu hi a hisov*, ramo hokakinia hake ramo taua lo ringo i Jisas.

³⁰I Jisas mo inumi na waen mo rovo, mo viti “U rovo.” Vunu mo tangwaduku mo tiraki na tanungwena lakwai God, mo mate.

³¹Hikani a rani hi a Rani na Vai Raraiana huri na Rani* na Mabuana, vae mavukona a Rani na Mabuana hinea a rani lakua vohoki. Vae a kaitomuaki nona gwaloana noi Isrel* rahe lengaia tea kwara a tarabehi vano hi rana dule lo kaibetu vaki lo rani hi. Vae huri hi, ramo vano ramo kwaha mai Paelet* kwara ne viti lakwa na nona tangaloi na vuro kwara rana vili volovolo garuga aira hinea ramo dule, kwara rana mate heheri, vunu rana surira tegetano tina kaibetu.

³²Vunu a tangaloi na vuro vano hi ramo vanamai ramo vili volohi na garu na tangaloi kairuaki mo rovo, vunu ramo vili volohi na garuna kairuaki, i rarua hinea ramo dururarua mai Jisas.

³³Ramo lakao huri Jisas ramo tagaia, vae hetea, u mate ba. Vae rahe vili volohi na garuna tea.

³⁴Vae a tangaloi na vuro katukwale mo haria kina hari lo ngwarasana, bulu maia hi a daina mo huki tivarea mana kwai.

³⁵Aia hini mo tagai na kinau hi mo hago leo huria kwara vae i kamu vake tulu ne hauhuri. A nona hagoleo u bakoto vae u kikilai kwara aia u viti kareaki.

³⁶Hikani mo vaiana kwara a Uliuli* Kokona ne kworo, hi mo viti kwara, “Hete huina kwara te katukwale ne mavolo.”

³⁷Vunu lo Uliuli Kokona vake mo viti “Vae a tangaloi rana tagai na tangaloi hinea ramo haria.”

³⁸Vunu takuni tiua i Sosev a ngwera Arimatia, mo uduhuri ki Paelet* kwara ne lavi na tarabehi i Jisas. I Sosev aia a ngwalagelo noi Jisas tavuniki, huri u mataku kina kaitomuaki nona gwaloana noi Isrel*. I Paelet u viti lakwae kwara ne lavi na tarabehi hi. Vunu i Sosev mo vano mo lavia.

³⁹I Nikotimas, aia hinea mo vano tomua halaradu mo tagai Jisas bongi, mo vano vake, mo lavi na kinau* boniboni kairua rau kwareki a mir* mana alos*, ramo gevukirarua tabulutaki, a mavaki u garagarani kwara ne gilo ngavu kaitolu.

⁴⁰A tangaloi kairua hi raru mo lavi na tarabehi i Jisas raru mo lugwatia kina lugwa lotu mana kinau rau boniboni, huri a gwaloana noi Isrel rau vai rarai a tarabehi na tangaloi mate hokinia hi kwara rana tanomira.

⁴¹A talutalu na violev takwahini ramo duru i Jisas tilo kaibetu eia. Lo talu hi a gwaru-malanga* karagwa rahe tau te tangaloi lolona radu nga.

⁴²A gwaru-malanga hi u garagarani hokinia raru mo tau i Jisas lolona huri mavukona a Rani* na Mabuana nona gwaloana noi Isrel.