Read West Ambae SIONE 21 Bible Online

SIONE 21 - West Ambae bible

SIONE 21

¹Takuni tiua hini, i Jisas u vosangia sibona vakatukwale vake lakwa na nona ngwalagelo. Mo vosangia lakwara lo Kwai Tokatoka Lakua Taebirias [33] hokinia hika.

²I Saemon Pita, i Tomas, aia hi u kwareki i Natu Malava, i Nataniel, aia hi a ngwera Kena lo vanua Galili*, vake i raranatu i Seveti mana ngwalagelo kairua vake noi Jisas, aira rau hugu tabulutaki.

³I Saemon Pita mo kwaha maira hi mo viti “I nau na va kwali ika.” Aira ramo viti lakwae kwara, “I kami vake kena huriko.” Hikani ramo vano ramo galo tilo aga, vae lolo bongi hi rahe kwali hoko te vohoki.

⁴Mo rani ngwasarasara, i Jisas u tu auta lo one, vae a nona ngwalagelo rahe kikilaia tea kwara aia i Jisas.

⁵Hikani mo kwaha maira mo viti “Sakwarigi. ?Tulu kwali hoko?” Aira ramo daraki ramo viti “Hete vohoki.”

⁶Mo kwaha maira mo viti kwara, “Tulu tuli na bulamiu kabe vaki lo ngwarasa na agamiu lo matuaki, vae tulu ne kwali hoko.” Hikani ramo tuli na bulaga kabe, vae rau reve loiloia tilolo agaga, huri a ika rau hola haburu, rau kwali kareakinia.

⁷A ngwalagelo hi katukwale i Jisas u lagwa maia mo viti lakwai Pita kwara “!A noda Hugwe* hi!” Lolona hi i Saemon Pita mo rongo hokinia hi kwara a Hugwe, mo lavi na lugwana hi tavalavarea hinea mo teri terekakinia ba, mo lugwakinia mo rovo tilolo kwai.

⁸Rahe vakahao tea tina vanua, kwara te ngava ngavu kailima. A ngwalagelo hi ratuaki ramo hua vaki auta lo aga, ramo reve hakeki na kabe hini a ika u kukwere lolona.

⁹Hikani ramo galo hake ramo tagai na ika rangarangae lolo kabu, vake a bereti* ramo saro.

¹⁰Hikani i Jisas mo kwaha maira mo viti kwara, “Tulu lai te ika hi vanamai tulu mori kwali hi nga.”

¹¹I Saemon Pita mo galo hake tilo aga taliku mo revei na kabe hi vaki auta u kukwere kina ika lalakua, a ika vidolua eviki ngavu kailima dongwaki kaitolu [34] lolo kabe hi. A ika u rusa haburu aia vae a kabe hi he madare tea.

¹²I Jisas mo viti lakwara kwara, “Tulu vanamai tulu takwahi ba.” A ngwalagelo vano hi hete kwara te katukwale ne uduhuri kinia kwara, “?I nigo ihe?” huri rau kikilai kwara a Hugwe.

¹³Hikani i Jisas mo lakao huri na bereti mo lavia mo bete lakwara, a ikaki hokinia nga.

¹⁴I Jisas u vosangia lo taro hi vakaitoluki lakwa na nona ngwalagelo takuni tiua hi mo maraka tina mateana.

¹⁵Ramo takwahi mo rovo, i Jisas mo uduhuri ki Saemon Pita mo viti kwara, “Saemon, natu i Sione. ?Ku lagwa maiau siletia hi a tangaloi aira vano hi rau lagwa maiau? [35]” I Saemon Pita mo daraki lakwae mo viti “Io, Hugwe*. I nigo ku kikilai kwara nu lagwa maiko.” I Jisas mo viti lakwae kwara, “Ko vangani na bulagu natu na sivsivi.”

¹⁶Vakairuaki i Jisas mo uduhuri kinia mo viti “Saemon, natu i Sione. ?Ku lagwa maiau?” Aia mo daraki mo viti kwara, “Io, Hugwe, i nigo ku kikilai kwara nu lagwa maiko.” Vunu i Jisas mo viti lakwae kwara, “Ko tagahuri na bulagu sivsivi.”

¹⁷I Jisas mo uduhuri kinia vakaitoluki mo viti “Saemon, natu i Sione. ?Ku lagwa maiau?” I Pita u rongo hati huri i Jisas mo uduhuri kinia hala na vakaitoluki kwara, “?Ku lagwa maiau?” Mo viti lakwae kwara, “Hugwe, i nigo ku kikilai vatavataha na kinau. Ku kikilai kwara i nau nu lagwa maiko.” I Jisas mo viti lakwae kwara, “Ko vangani na bulagu sivsivi.

¹⁸Kareaki na viti lakwako, lolona hinea komo ngwalagelo komo kwahikwahi sibomu kina kwahimu, komo lakao takwanahavaki hi komo lengaia kwara kona vano, vae lo taroki hinea kona ngwarasea lakua kona hokaki na kabamu a tangaloi dolua ne sanibibiko, ne laviko vaki lo vanua hinea i nigo kohe lengaia te kwara kona vano eia.”

¹⁹I Jisas u viti kwehi u vosangi kwara i Pita ne mate kworohokinia vae ne tabe hakeki na hina i God luna. Vunu i Jisas mo kwaha maia mo viti “!Ko huriau!”

²⁰I Pita mo halebohi mo tagai na ngwalagelo kairuaki vake mo hurihuri, aia hi i Jisas u lagwa maia haburu. Aia hi, lolona ramo kanikani tomua, mo olo vaki garagarani mai Jisas, mo uduhuri kinia mo viti “Hugwe*. ?Ihe vae ne tirakinigo tilo kaba na nomu tavaluivuro?”

²¹I Pita mo tagaia, mo uduhuri ki Jisas, mo viti “Hugwe. ?A tangaloi hika vae kworohokinia maia?”

²²I Jisas mo daraki lakwae mo viti kwara, “Diko i nau nu lengaia kwara ne toka tarisaki hi vae na mulemai taliku, i nigo a nomu tikei lolona. Ko huriau.”

²³Hikani a leoki mo kwalao laliki mana tangaloi noi Jisas kwara a ngwalagelo hika vae nehe mate tea. Vae i Jisas he viti te kwara vae nehe mate tea, vae u viti kwara, “Diko i nau nu lengaia kwara ne toka tarisaki hi vae na mulemai taliku, i nigo a nomu tikei lolona.”

²⁴A ngwalagelo hini aia u viti huri na kinau vano hi, vunu vake mo ulibibira, vae keu kikilai kwara a nona hagoleo rau bakoto.

²⁵A kinau u rusa lengalenga vake i Jisas mo vaira. Kwara vae diko a tangaloi rana ulibibi savi na kinau hi i Jisas mo vaira, nu domi kwara a buku* hinea rana ulira ne rusa haburu vohoki. A varamana hika ne kelekele vae a mahao ne tikei kwara a buku aira vano hi rana eno eia.