Read West Ambae SIONE 3 Bible Online

SIONE 3 - West Ambae bible

SIONE 3

¹A tangaloi lakua nona gwaloana noi Isrel* katukwale a hinana i Nikotimas, aia katukwale tina Varisi*.

²Vakatukwale, lolo bongi, u vanamai vaki mai Jisas mo viti lakwae kwara “Tisa. Keu kikilai kwara i nigo a tisa, i God u horako. Hete tangaloi kwara ne vai lai a kaivosangi lalakua hokinira hi komo toko vai, kehekeheki i God aia maia.”

³I Jisas mo daraki mo viti kwara, “Kareaki na viti lakwako, diko a tangaloi he vora te taliku kwara ne mulemai kina tangaloi karagwa nehe kikilai na vaitabetabe te noi God lakwa na tangaloi aira hi u hugwe korora. [1]”

⁴I Nikotimas mo uduhuri mo viti kwara, “?A tangaloi u lakua ba, vae ne vora kworohokinia taliku? Nehe soro lai te taliku tilolo tirae i retahina kwara ne vora taliku vakairuaki.”

⁵I Jisas mo daraki mo viti kwara, “Kareaki na viti lakwako, diko a tangaloi he vora tea kina kwai mana Tanungwe Kokona nehe mulemai lai te kina tangaloi hinea i God u hugwe koroa. [2]

⁶Aia hi u vora tina tangaloi aia a tangaloi, vae a tanungwe na tangaloi u vora vanamai tina Tanungwe Kokona.

⁷Ko hatu idila huri nomo viti lakwako kwara, ‘U taritarisa kwara tulu ne vora taliku.’

⁸A langi mo here takwanahavaki hokinia u lengaia. Komo rongo na roroki vae kohe kikilaia tea kwara u vanamai ave, diko ne vano lokive. Aira hinea rau vora kina Tanungwe Kokona aira hokinia hi.”

⁹I Nikotimas mo uduhuri kwara, “?A kinau hi ne mule kworohokinia?”

¹⁰I Jisas mo daraki mo viti kwara, “I nigo a tisa lakua nona gwaloana noi Isrel. ?Kohe kikilai na kinau hika tea?

¹¹Kareaki na viti lakwako, keu kwaha keu kikilai. Keu hago leo lo kinau hi keu tagaia, vae hete katukwale tikamu kwara u hauhuri lo nomai hagoleo.

¹²Nu viti huri na kinau lo varamana hika lakwakamu, vae tulu he hauhuri tea lugu. ?Vae diko na viti huri na kinau na taetae lakwakamu tulu ne hauhuri kworoho lugu?

¹³Hete tangaloi kwara u vano vaki lolo taetae, vae kehekeheki i nau a Natu* na Tangaloi, nu vanamai tina taetae.

¹⁴“Tuai lo vanua vuroki i Mosis mo lavi na ngwata u kihiana kina bras, mo tabe hakekinia lo vikai. Vae i nau a Natu na Tangaloi ranari tabe hakekiau hokinia hi,

¹⁵kwara vae aira doluaki hinea rana hauhuri lugu rana hagwe na ahiana vaki tuai.

¹⁶I God u lagwa haburu mana tangaloi na varamana, mo tirakiau, i nau i Natuna, a Natu kwakehe, kwara vae aira doluaki hinea rana hauhuri lugu ranahe mate tea, vae rana hagwe na ahiana vaki tuai.

¹⁷I God u horeau, i nau i Natuna, vaki lo varamana, hete huri kwara na viti a tangaloi rau hati rana sala, vae u horeau kwara ne lalahiau na vakahikinira.

¹⁸“A tangaloi hinea u hauhuri lugu, i God he vitia tea kwara u hati ne sala, vae a tangaloi hinea he hauhuri te lugu, i God u vitia ba kwara u hati vae ne sala, huri he hauhuri tea lugu, i nau i Natu i God, a Natu kwakehe. [3]

¹⁹A kakadiki rana kwalia huri na kinau hika. A leleha u vanamai vaki lo varamana, vae a tangaloi rau lagwa mana dodoki u sileti na leleha, huri rau tuku vai kinau rahe taritarisa tea.

²⁰A tangaloi hinea u vai na hatiki u bena kina leleha, vae nehe vanamai lai te tilo leleha, huri he lengaia te kwara a leleha hi ne vosangi na kinau tivarea hinea mo toko vaira.

²¹Vae a tangaloi a nona bolokiana rau bakoto ne vanamai tilo leleha kwara vae a leleha ne vosangi na nona bolokiana tivarea kwara i God u lalahia luna mo vaira.”

²²Takuni tiua hi, i Jisas mana nona ngwalagelo rau vano vaki lo vanua Sutia. Mo hugu maira takwa-hi kelekele mo vai a bavtaes.

²³I Sione vake u vai a bavtaes lo gwatuivanua Aenon, garagarani mana gwatuivanua Salim, huri a kwai u rusa takwa-hi. A tangaloi rau tuku vanamai vaki maia mo bavtaesira.

²⁴Lo taro hi i Sione rahe taua te radu nga tilolo ingwa na gwarugwaru.

²⁵A ngwalagelo noi Sione tuaki ramo toko vaivai viroroa mana gwaloana noi Isrel* katukwale, kwara rana vai kworoho vae rana ngwasara lo nako i God.

²⁶Hokinia ramo vano vaki mai Sione, ramo viti lakwae kwara, “?Tisa, ku domihagwe na tangaloi hinea mo hugu maiko lo kwai Sotan tavaluki, aia hi komo toko viti huria? Hika u tuku vai a bavtaes, vae vunuhi na tangaloi rau vano vaki maia.”

²⁷I Sione mo daraki mo viti kwara, “A tangaloi nehe lai haro vuroki na boloki tea, vae kehekeheki i God ne bete lakwae.

²⁸I kamu a nogu kaihago na leo, tulu rongo ba nu viti lakwakamu kwara ‘I nau hete i Vurae* vae i God u horeau tomuakinia.’

²⁹A tangaloi hinea kwara ne laki ne lavi na vavine hinea ne laki maia. A tangaloi na tautau u tu u rongoa, vae mo rongo na leo na tangaloi na lakiana hi u havutia haburu. Hokinia hi i nau vake u havutiau. A kinau tikei vake kwara ne vaiau ne havutiau siletia hika.

³⁰U taritarisa kwara i Vurae hi ne toko hake, vae i nau na toko hivo. [4]

³¹“Aia hi u vanamai tina taetae u lakua sileti na tangaloi savia. Aia hi u vanamai tina varamana aia a tangaloi na varamana u kwahakwaha lo hala na tangaloi na varamana. Aia hi u vanamai tina taetae aia u aulu karakara sileti na tangaloi.

³²Aia u viti huri na kinau hi u taga vake u rongo, vae hete kwara te katukwale u lai tabetabeki na nona hagoleo.

³³A tangaloi rau lai tabetabeki na nona hagoleo rau vosangi kwara a leo hi i God u vitia u kareaki.

³⁴Aia hi i God u horae u kwahakwaha lo leo noi God, huri i God u vakakukwerea kina nona Tanungwe.

³⁵A Tama u lagwa mai Natuna mo tau na kinau doluaki tilo kabana.

³⁶A tangaloi hinea u hauhuri lo Natuki u hago a ahiana vaki tuai. A tangaloi he rongohuri na Natuki tea, nehe kikilai na ahiana tea, vae a lologute noi God ne eno luna vaki na tuai.”