Read West Ambae SIONE 4 Bible Online

SIONE 4 - West Ambae bible

SIONE 4

¹A Varisi* rau rongo kwara i Jisas u lavi na tangaloi mo bavtaesira u rusa siletira hinea i Sione mo bavtaesira.

²Vae i Jisas sibona he bavtaes na tangaloi tea kwara te katukwale, aia a nona ngwalagelo aira rau vai a bavtaes.

³I Jisas mo rongo na leo hi ramo toko vitiviti huri, mo tiraki na vanua Sutia mo vano taliku vaki Galili*.

⁴Lo halana hi vae ne vano lalahi na vanua Sameria*.

⁵Mo vanamai vaki lo gwatuivanua katukwale Sameria a hinaki Saeka, he vakahao tea tina talu hi i Sekov mo betea lakwai natuna i Sosev.

⁶A kwalu na kwai mei Sekov aia takwahini. Hikani i Jisas u lakao vae u ngwahia u rongo u keokeo, mo hugu mana kwalu na kwai hi. Lo taro hi a mataniaho aulu.

⁷Vae a nona ngwalagelo rau vano ba vaki lolo vanua kwara rana voli hinaka. Vunu a vavine Sameria u vanamai kwara ne utu kwai. I Jisas mo kwaha maia mo viti kwara, “Ko bete te kwai na inu.”

⁸

⁹A vavine hi mo daraki mo viti kwara, “I nigo a ngwera Sutia, i nau a vavine Sameria. ?Kworoho komo uduhuri a inuinu kiau?” U viti kwehi huri a ngwera Sutia rahe kanikani te lo laha katukwale mana ngwera Sameria.

¹⁰I Jisas mo daraki mo viti kwara, “Kohe kikilai na hilehile te hi i God mo toko bete, vake kohe kikilai tea kwara i nau ihe nomo uduhuri na inuinu kinigo. Kwara vae diko ku kikilai, kona uduhuri kiau vae nana bete na kwai na ahiana lakwako.”

¹¹Hikani a vavine hi mo kwaha mo viti kwara, “Kohe hago te kaiutu na kwai. A kwalu na kwai hika u bua. ?Vae i nigo kona hagwe na kwai na ahiana ave?

¹²I tubuda i Sekov aia u bete na kwalu na kwai hika lakwakita. Aia, i raranatuna, mana bulana boboroa rau inu luna aira vunu. ?Vae i nigo ku lakua sileti i tubuda i Sekov?”

¹³I Jisas mo daraki mo viti kwara, “Ihe hi ne inumi na kwai hika ne madoku taliku.

¹⁴Vae ihe hi ne inumi na kwai hi i nau nari betea lakwae, nehe madoku lai te taliku vohoki, huri a kwai hini na betea lakwae ne mule ki kwai mauri lolona, hokinia neri hile na ahiana vaki tuai lakwae.”

¹⁵A vavine hi mo kwaha maia mo viti kwara, “Ko bete na kwai hi lakweau, vae nahe madoku te taliku diko nahe vanamai te taliku kwara na utu kwai.”

¹⁶Hikani i Jisas mo kwaha maia mo viti kwara, “Ko vano ko kware i tuamu ngwarasea kuru vanamai hike.”

¹⁷A vavine hi mo viti lakwae kwara, “I nau tuagu ngwarasea tikei.” I Jisas mo daraki lakwae taliku mo viti “Ku viti kareaki. I tuamu ngwarasea tikei.

¹⁸Vae i nigo ku laki kina ngwera kailima ba, vae aia hika komo hugu maia, hete i tuamu ngwarasea bakotoki. Ku viti kareaki.”

¹⁹Vunu a vavine hi mo viti lakwae kwara, “Nu kikilai utuhakinigo kwara i nigo a tangaloi* duruduruki.

²⁰I ratubumai a ngwera Sameria rau kaluhaki God lo vuti hika, vae i kamu a ngwera Sutia tulu viti kwara Serusalem a tanotano bakotoki kwara tana kaluhaki God takwa-hi.”

²¹I Jisas mo viti lakwae kwara, “Tubui, ko hauhuri lo leogu. A taroki ne vanamai a tangaloi ranahe kaluhaki Tamada tea lo vuti hika diko lo gwatuivanua Serusalem.

²²I kamu a ngwera Sameria tulu he kikilai bakotoki tea kwara tulu kaluhaki ihe. I kami keu kikilai kwara keu tuku kaluhaki ihe, huri a hala na ahiana u vanamai tikami.

²³Vae a taro mo toko vanamai hika, aia hike ba, kwara a tangaloi na kaluhakiana bakotoki rana kaluhaki na Tamaki kina domi mavakiana, vunu vake kina huirana na Tanungwe Kokona lo hala hinea rau kikilai kwara aia i God kareaki, huri a Tamaki u soro haro na tangaloi hokinira hi kwara rana kaluhakinia.

²⁴I God aia a Tanungwe, vae u taritarisa kwara aira hi rau kaluhakinia kina domi mavakiana rana kaluhakinia kina huirana na Tanungwe Kokona lo hala hinea rau kikilai kwara aia i God kareaki.”

²⁵A vavine hi mo viti lakwae Jisas kwara, “I nau nu kikilai kwara i Vurae*, aia hi u kwareki i Kraes, [5] vae ne vanamai. Vake lo taro hi ne vanamai aia ne viti matangwasaraki na kinau vunuhia lakwakami.”

²⁶I Jisas mo daraki lakwae mo viti kwara, “I nau hika [6] nomo toko kwahakwaha maiko.”

²⁷Lo taroki hi a ngwalagelo noi Jisas ramo mulemai taliku ramo tagaia mo toko kwahakwaha mana vavine hi. Rau idila haburu vae hete kwara te katukwale tiura u kwaha mana natu vavine hi kwara, “?Ku lenga naha?” Vake hete kwara te katukwale u uduhuri ki Jisas kwara, “?Kworoho komo toko kwaha mana natu vavine hika?”

²⁸Vunu a vavine hi mo tau terekaki na nona laha na kwai, mo mule taliku vaki na vanua, mo viti lakwa na tangaloi maira takwa-hi kwara,

²⁹“Tulu vanamai tulu tagai na tangaloi hike, u viti vataha na kinau hinea nomo toko vaira. Diko aia i Vurae.”

³⁰Hikani ramo tiraki na vanua hini ramo vano vaki mai Jisas.

³¹Lo taroki aia hini a ngwalagelo noi Jisas ramo kwaha maia ramo seseaka luna ramo viti kwara, “Tisa, ko kani te kinau.”

³²Aia mo daraki lakwara mo viti “A kagu hinaka eia kwara na kani i kamu tulu he kikilai tea.”

³³Hokinia a nona ngwalagelo ramo uhiuhira ramo viti kwara, “?Diko te tangaloi rau bete hinaka lakwae ba?”

³⁴I Jisas mo viti lakwara kwara, “A kagu hinaka aia hi, kwara na rongohuri na lengalengaiana nona hinea mo horeau, kwara vae na vai vunuhi na boloki hi mo betera lakweau kwara na vai.

³⁵A nomiu leo katukwale u viti kwara ‘A vula kaivati radu vunu a taro na makuria.’ Na viti lakwakamu, tulu tagai na agoago*. A rivurivu rau sea ba, hika kwara ne makurikiana.

³⁶A tangaloi hini u makuriki u lai kaivolina ba, vae u vileki na hinaka huri na ahiana vaki tuai. Hokinia a tangaloi hini mo rivu, mana tangaloi hini mo makuriki, ne havutirarua tabulutaki.

³⁷A vitivitiki tuai hi u kareaki, hi mo viti kwara, ‘A tangaloi katukwale u rivu, a tangaloi dolua u makuriki.’

³⁸Nu horakamu kwara tulu ne makuriki na hinaka lolo agoago hinea i kamu tulu he boloki te luna. A tangaloi dolua aira rau boloki takwa-hi, vae i kamu tulu ne rongo karea tulu ne lai hinaka huri na noga bolokiana.”

³⁹A ngwera Sameria* u rusa lengalenga lolo vanua hini ramo hauhuri lui Jisas huri na leo na vavine hinea mo viti kwara, “Aia u viti vunuhi na kinau hinea i nau nomo toko vaira.”

⁴⁰Hokinia hini a ngwera Sameria ramo vanamai vaki maia ramo seseaka luna kwara ne hugu maira. I Jisas mo hugu maira a rani kairua.

⁴¹Hikani a tangaloi u rusa vake nga ramo hauhuri luna huri ramo rongo na nona leo.

⁴²Ramo viti lakwa na vavine hi kwara, “Hika keu hauhuri, hete huri hi komo viti lakwakami, vae huri hi i kami sibomai keu rongoa. Vae keu kikilai kwara aia kareaki a Kaivakahi na tangaloi na varamana.”

⁴³I Jisas u hugu a rani kairua takwa-hi vunu mo tiraki na vanua hi mo mule vaki lo vanua Galili*,

⁴⁴huri i Jisas aia u viti tomua ba kwara, “A tangaloi* duruduruki, a tangaloi rahe domi mavakinia tea lo vanuana.”

⁴⁵Lolona mo maravuti lo vanua Galili, a tangaloi takwa-hi ramo vai hahavakinia, huri aira rau vano vaki Serusalem huri na Kanikani* na Tivekiana, ramo taga vatavataha na kinau hinea mo toko vaira lo taro aia hi.

⁴⁶Hikani i Jisas mo mulemai taliku vaki lo gwatuivanua Kena lo vanua Galili, a gwatuivanua hi tuai mo bohiki na kwai mo mulemai kina waen eia. A tangaloi lakua nona kavman takwahini, i natuna a ngwera u lenga lo gwatuivanua Kavaneam.

⁴⁷Mo rongo kwara i Jisas u vanamai tina vanua Sutia vaki Galili, mo vano vaki maia mo uduhuri kinia kwara ne vano vaki lo gwatuivanua Kavaneam ne vakahiki natuna, huri u garagarani kwara ne mate.

⁴⁸I Jisas mo kwaha maia mo viti kwara, “Hete kwara te katukwale tikamu ne hauhuri, vae kehekeheki tulu ne tagai na kaivosangi lalakua mana idilakiana vunu tulu neri hauhuri.”

⁴⁹A tangaloi hi mo daraki lakwai Jisas mo viti kwara, “Ko huriau heheri vae i natugu ne mai mate.”

⁵⁰I Jisas mo kwaha maia mo viti kwara, “Ko mule, i natumu u ahi.” A tangaloi hi mo hauhuri lo leo noi Jisas, mo mule.

⁵¹Mo mule, vae aia lo mahaoi-hala radu nga, a nona tangaloi boloki ramo hagwea, ramo kwaha maia ramo viti kwara, “I natumu u ahi.”

⁵²Mo uduhuri kinira kwara lo hava taro hini i natuna mo rongo karea taliku. Aira ramo daraki lakwae, ramo viti kwara, “Noinoa lo mataniaho dori a mahakita mo tirakinia.”

⁵³Vunu i tamana mo domihagwe kwara lo taroki aia hini vohoki i Jisas mo viti lakwae kwara “I natumu u ahi.” Vae aia mana nona vakabela doluaki ramo hauhuri lui Jisas.

⁵⁴Hika a kaivosangi lakua noi Jisas vakairuaki mo vai lolona mo mulemai tina vanua Sutia vaki Galili.