Read West Ambae SIONE 5 Bible Online

SIONE 5 - West Ambae bible

SIONE 5

¹Takuni tiua hini a vileki-tabulutakiana nona gwaloana noi Isrel* lo gwatuivanua Serusalem, vae huri hi i Jisas mo vano tagaulu vaki maira.

²Takwa-hi Serusalem, a kwai toka katukwale u garagarani mana matakihala u kwareki a Matakihala na Sivsivi. Takwa-hi a ingwa na hilihili kailima a tagwatagwaki tikei. Lo leo Hibru*, a leo nona gwaloana noi Isrel, rau kwareki na tanotano hi Betsata.

³A lengeana rusa rau ngwalulu tavuti na hilihili vano hi, a matadodo, a lukuluku, maira hi a tarabehiga rau mate. Rau hugu tara na kwai hi kwara ne kilukilu,

⁴huri lo taroki a kaihora tina taetae nona Hugwe u tuku hivo tilolo kwai toka hi mo kilukinia. A kwai hi mo kilukilu, vunu ihe te u hivo tomuaki tilolona vae a hava lengeana tea hinea mo eno luna ne rovo tiua. [7]

⁵A tangaloi katukwale takwa-hi u lenga a hukao ngavu kaitolu dongwaki kaikwalu.

⁶I Jisas mo tagaia mo ngwalulu takwa-hi u kikilai kwara u lenga u tuai ba. Hokinia mo uduhuri kinia mo viti kwara, “?Ku lengaia kwara kona ahi?”

⁷A tangaloi hi u lenga mo daraki mo viti kwara, “A kwai hika lo tarona mo kilukilu, a tangaloi tikei takwahini kwara ne tauau tilolona. Vae nomo toko vai kwara na hivo tilolona a tangaloi dolua va vano koroau.”

⁸I Jisas mo kwaha maia mo viti kwara, “Maraka, ko kwali heremu ko lakao.”

⁹A tangaloi hi mo ahi taliku bulu maia nga mo kwali herena mo lakao. Lo rani hi a Rani* na Mabuana.

¹⁰Hikani a kaitomuaki nona gwaloana noi Isrel ramo viti lakwa na tangaloi hi mo ahi taliku, rau viti “Hika a Rani na Mabuana. He taritarisa tea kwara kona kwali na heremu. Hi ku galo lo noda Tangwata*.”

¹¹Aia mo daraki lakwara mo viti kwara, “A tangaloi hi mo vaiau nomo ahi taliku, u viti lakweau kwara, ‘Ko kwali heremu ko lakao.’ ”

¹²Ramo uduhuri kinia ramo viti “?Ihe tangaloi hi mo viti lakwako kwara kona kwali heremu kona lakao?”

¹³Vae a tangaloi hi he kikilai tea kwara aia ihe. I Jisas u vano ba, huri a vao u rusa lo vanua takwa-hi.

¹⁴Takuni tiua, i Jisas mo hagwea lolo Vanua* Kokona noi God mo kwaha maia mo viti kwara, “!Ko rongo! Hika ku rongo karea taliku. Ko hatu vaivai hati taliku. Diko hetea, a kinau ne vaiko ne hati vakevake siletia hika.”

¹⁵A tangaloi hi mo vano tiua mo viti lakwa na kaitomuaki nona gwaloana noi Isrel kwara, “A tangaloi hi mo vakahikiau, i Jisas.”

¹⁶Hokinia a kaitomuaki nona gwaloana noi Isrel ramo tinakaki ramo vai bulakiki Jisas huri mo toko vai na kinau aira kwehi lo Rani na Mabuana.

¹⁷Hikani i Jisas mo viti lakwara kwara, “I Tamagu u boloki tigwaravu, vae i nau nana boloki vake.”

¹⁸Huri na leona hi a kaitomuaki nona gwaloana noi Isrel a domiga mo huira vakevake kwara rana kwohi mateia. Hete kehekeheki huri mo galo lo tangwata na Rani na Mabuana, vae vake huri mote kwareki i God ki Tamana vohoki. Hokinia hi mo viti kwara i rarua mai God, raru taritarisa.

¹⁹I Jisas mo daraki lakwara mo viti kwara, “Na viti bakotoki lakwakamu, i nau a Natuki nahe vai lai te kinau sibogu, kehekeheki hi nu tagai Tamagu mo vai, i nau nomo vai vake. A havakinau hi i Tamagu i God mo vai, i nau i Natuna nu vai hokinia vake.

²⁰I Tamagu u lagwa maiau haburu, u vosangiau kina kinau vatahae hinea mo toko vaira. Aia neri vosangiau kina kinau lalakua siletira hika kwara nana vaira, vae ne vaikamu tulu ne tukutukui kinira.

²¹Hokinia i Tamagu u rakati na mateana u bete na ahiana lakwara, vae hokinia hi i nau i Natuna nu bete na ahiana lakwara hinea nu lengaira kwara rana ahi.

²²Vake i Tamagu he kwaheki na doridori na tangaloi tea kwara te katukwale. Vae u tau na bolokiana hi doluaki tilo kabagu, i nau i Natuna,

²³huri vae rana domi mavakiau hokinia hi ramo domi mavaki i Tamagu. A tangaloi he domi mavakiau tea, i nau i Natuna, he domi mavaki i Tamagu te vake hinea mo horeau.

²⁴“Kareaki na viti lakwakamu, ihe hi u rongo na leogu, vunu u hauhuri luna hinea mo horeau, ne ahi vaki tuai. Nanahe arekinia tea, vae u kauutu ba tina mateana vaki lo ahiana.

²⁵Kareaki na viti lakwakamu, lo taro hika mo toko vanamai, a tangaloi hinea rau mate ba rana rongo na dilaogu, i nau i Natu i God, vae aira hinea rau rongoa rana ahi. A taro hi u maravuti ba, aia hika.

²⁶Hokinia i Tamagu aia sibona a gwataki na ahiana, vae hokinia hi mo tirakinia lakweau, i nau i Natuna, nomo kwareki na gwataki na ahiana vake.

²⁷I God u rivukiau kwara na kwaheki na doridori na tangaloi huri i nau a Natu* na Tangaloi.

²⁸Tulu hatu idila kina kinau hi, huri a taroki ne vanamai aira hinea lolo tabu rana rongo na dilaogu,

²⁹ranari maraka tina tabuga. Aira hinea rau vai kinau karea, rana maraka taliku vaki lo ahiana, aira hinea rau vai kinau hati, rana maraka taliku tilo arekiana.”

³⁰Vunu i Jisas mo viti vake kwara, “I nau nahe vai lai te kinau sibogu lo nogu bakotoana. I nau nu kwaheki na doridori na tangaloi kehekeheki lo halaki i God u viti lakweau. Vae a domidomigu u bakoto, huri nahe soro haro na nogu lengalengaiana tea, vae kehekeheki a lengalengaiana nona hinea mo horeau.

³¹“Diko nu hago leo huriau sibogu, a nogu leo hi nehe tu lai tea.

³²Vae a tangaloi dolua u hago leo huriau, vae nu kikilai kwara a nona hagoleo hi huriau u bakoto.

³³I kamu tulu hora nomiu tangaloi vaki mai Sione, vae i Sione u hago leo u viti huri na kinau hinea rau kareaki lakwara.

³⁴Kareaki i nau nahe domi te haburu lo tangaloi na varamana kwara rana hago leo huriau, vae i nau nu viti kwehi kwara vae i kamu tulu ne ahi.

³⁵I Sione aia hoki na laeti hi u sea u vavarama, vae lo taro gwanugwanu tulu rarai kwara tulu ne lagwalagwa lo nona vavarama.

³⁶Vae i nau a nogu hagoleo eia u lakua sileti na hagoleo noi Sione. A hagoleo hi aira a nogu boloki hinea i Tamagu mo tirakinira tilo kabagu kwara na vaira. A boloki hi nu vaira rau hago leo huriau, rau matangwasaraki kwara i Tamagu aia u horeau.

³⁷Vunu i Tamagu aia vake u hago leo huriau, vae tulu he rongo na leona te vohoki, tulu he taga na nakona te vohoki.

³⁸Tulu he kwiribibi na leona te lolo domimiu, huri tulu he hauhuri te lugu. Vae i Tamagu aia u horeau.

³⁹Tulu tuku kakahi lolo Uliuli* Kokona huri tulu domi kwara tulu ne hagwe na ahiana vaki tuai luga. Vae a Uliuli Kokona aira hi rau hago leo huriau.

⁴⁰Aia vae i kamu tulu he lengaia tea kwara tulu ne vanamai vaki maiau kwara vae tulu ne ahi.

⁴¹“I nau nahe taga vovohi na tangaloi tea kwara rana kalukiau.

⁴²Vae nu kikilaikamu kwara lolo domimiu tulu he lagwa te mai God vohoki.

⁴³Nu vanamai lo hina i Tamagu, vae i kamu tulu he lai tabetabekiau tea. Kwara vae diko te tangaloi dolua ne vanamai lo hinana sibona tulu ne lai tabetabekinia.

⁴⁴?I kamu tulu ne hauhuri kworohokinia? Tulu domi hurikamu sibomiu kwara tulu ne toko kalukikamu muleki vae tulu he domi huri i God tea, aia hi katukwale vohoki kwara ne kalukikamu.

⁴⁵Tulu hatu domi kwara i nau na viti na nomiu hatiana lakwai Tamagu. I Mosis aia hini tulu mo toko domidomi tiluna, aia ne vitikamu.

⁴⁶Kwara vae diko tulu hauhuri lui Mosis kareaki, vae tulu ne hauhuri lugu vake, huri i nau hi i Mosis mo uli huriau lo nona uliuli.

⁴⁷I kamu tulu he hauhuri tea lo nona uliuli, vae huri hi a hala tikei vohoki kwara tulu ne hauhuri lo nogu leo.”