Read West Ambae SIONE 7 Bible Online

SIONE 7 - West Ambae bible

SIONE 7

¹Takuni tina kinau vano hi i Jisas u tuku lakalakao lo vanua Galili*. He lengaia tea kwara ne lakao lo vanua Sutia, huri a kaitomuaki nona gwaloana noi Isrel* takwa-hi rau lengaia kwara rana kwohi mateia.

²Hikani a taro na vileki tabulutakiana nona gwaloana noi Isrel, kwara rana kaluhaki God luna u garagarani. Rau kwarekinia a Kanikani* na Ingwa Haleki.

³Hikani i ratua i Jisas ramo viti lakwae kwara, “Ko salati na vanua hikeni ko vano vaki lo vanua Sutia, kwara vae a nomu ngwalagelo takwa-hi rana tagai na bolokiana hinea komo toko vaira.

⁴A tangaloi hinea u lengaia kwara a tangaloi rana kikilaia ne karea, nehe vai lai tea kwara ne vuniki na nona bolokiana kinira. Hokinia i nigo, a kinau vano hi komo toko vaira, u karea kwara kona vosangira tivarea lakwa na tangaloi na varamana doluaki rana kikilaiko ne karea luga.”

⁵I ratuana vake rahe hauhuri te luna.

⁶I Jisas mo kwaha maira mo viti kwara, “A tarogu bakotoki he vanamai te radu nga. I kamu tigwaravu a taro rau karea maikamu.

⁷A tangaloi na varamana ranahe vai taratarakikamu tea, vae rau vai taratarakiau, huri i nau nu matangwasaraki tigwaravu kwara a doridoriga rahe bakoto tea.

⁸I kamu tulu vano vaki lolo kanikani. I nau nahe vano tea vaki lo kanikani hika huri a tarogu he vanamai te radu nga.”

⁹Mo viti lakwara hokinia hi, vunu va hugu lo vanua Galili.

¹⁰I ratua i Jisas ramo vano vaki lolo kanikani*, vunu i Jisas mori hurihuri vaki takuni. He lakao te na ngwasara, vae u vano raraveki.

¹¹A kaitomuaki nona gwaloana noi Isrel* rau tuku soro haroa lolo kanikani hi. Ramo uduharoa kwara “?Aia te ave tea?”

¹²A vao rau tuku kwaha kamokamo huri i Jisas. Ratuaki ramo viti kwara, “Aia a tangaloi karea.” Ratuaki rau viti “Hetea, aia u tuku sinasina na tangaloi.”

¹³Vae hete katukwale kwara ne vitia tivarea, huri rau mataku kina kaitomuaki nona gwaloana noi Isrel.

¹⁴Lo livuka na taro na kanikani lo kwiki aia hi, i Jisas mo soro vaki lolo Vanua* Kokona noi God mo tinakaki mo huhuira.

¹⁵A kaitomuaki nona gwaloana noi Isrel rau idila haburu kinia, ramo viti kwara “?Kworohokinia a tangaloi hika mote kikikila haburu? Aia he vano te vohoki vaki lo sekulu lakua.”

¹⁶I Jisas mo viti “A havakinau hi i nau nomo huhui na tangaloi kinia hete nogu kehekeheki, vae u vanamai ti God, aia hi mo horeau.

¹⁷Ihe te hinea u lengaia kwara ne vai a havakinau hi i God u lengaia, neri kikilai na nogu huhuiana kwara u vanamai ti God, diko u vanamai tiau sibogu.

¹⁸A tangaloi hinea u viti huri na nona leo sibona u lengaia kwara ne revei na tangaloi rana domi mavakinia. Vae a tangaloi hinea u lengaia kwara a tangaloi rana domi mavakinia hinea mo horae, aia hi u bakoto, a kurakura tikei luna vohoki.

¹⁹I Mosis u bete na Tangwata* lakwakamu, vae hete kwara te katukwale tikamu u rongohuri na Tangwata hi. ?Kworoho tulu mo toko vai kwara tulu ne kwohi mateiau?”

²⁰A vao hi ramo daraki ramo viti kwara, “A tanungwe hati lolo gwatumu. ?Ihe u lengaia kwara ne kwohi mateiko?”

²¹I Jisas mo daraki mo viti “I nau nu vai na vaisea katukwale, vae i kamu savikamu tulu idila haburu.

²²I Mosis u tuliki lakwakamu kwara i raranatumiu a ngwera, a raniga ne kaikwalu vae tulu ne vai na kaimatai* lo siosio luga. Huri na kinau hi, tulu mo toko vai na kaimatai lo siosio lui raranatumiu a ngwera lo Rani* na Mabuana, vae tulu he galo te lo Tangwata. Vae hete i Mosis kwara u tinakaki na doridori hi, vae i ratubumiu.

²³I kamu tulu vai na kaimatai lo siosio lo natu ngwera lo Rani na Mabuana kwara tulu nehe galo te lo Tangwata noi Mosis. ?Vunu kworoho tulu mo lologutekiau huri nomo vakahiki na tangaloi mo rongo karea lo Rani na Mabuana?

²⁴Tulu hatu tagai na tangaloi luna tavalavarea tulu mo domi na kinau hinea u hati vovohia. Vae tulu domidomi ne taritarisa lo halaki hinea u bakoto.”

²⁵A ngwera Serusalem ratuaki ramo viti kwara, “A tangaloi hika aia hinea ramo toko soro haroa kwara rana kwohi mateia.

²⁶!Vae tulu taga! U kwaha lolo nako na tangaloi rusa, vae a tangaloi he kwaha vovohia te vohoki. ?Vae diko a noda tomutomuai-tangaloi rau kikilai bakotokinia kwara aia i Vurae*?

²⁷Vae i Vurae ne vanamai hete kwara te katukwale ne kikilaia kwara u vanamai ave. Aia i kita doluaki tau kikilai na tangaloi hika kwara u vanamai ave.”

²⁸Lolona i Jisas mo toko huhui lolo Vanua* Kokona noi God, mo kwaha karakara mo viti kwara, “Kareaki tulu kikilaiau, vake tulu kikilai kwara nu vanamai ave. Aia vae i nau nahe vanamai te sibogu. Aia hinea mo horeau u kareaki. Tulu he kikilaia tea,

²⁹vae i nau nu kikilaia, huri nu vanamai tiua, aia u horeau.”

³⁰Vunu aira ramo vai kwara rana kwiribibia, vae hete katukwale kwara ne tau na kabana luna, huri a tarona he vanamai te radu nga.

³¹Vae u rusa lolo vao hi rau hauhuri luna, ramo viti nga kwara “?Diko i Vurae ne vanamai ne vai lavi na vaisea kwara ne sileti na tangaloi hika mo toko vaira?”

³²A Varisi* rau rongo na vao hini ramo toko kwaha kamokamo rau viti na kinau aira vano hi huri i Jisas, vunu a Varisi vano hi mana tangaloi* lingilingi lalakua ramo hora na kaitagahuri na Vanua* Kokona noi God kwara rana kwiribibia.

³³I Jisas mo kwaha mo viti “I nau na hugu maikamu kelekele vake, vunu na mule vake maia hinea mo horeau.

³⁴Tulu ne soro haroau, vae tulu nehe hagweau tea, huri lo tanotano hinea na vano vaki eia, i kamu tulu nehe vano lai te vaki eia.”

³⁵A kaitomuaki nona gwaloana noi Isrel* ramo kwahakwaha kinira siboga ramo viti kwara, “?Aia ne vano ave hi kwara vae tana he hagwe lavia tea? ?Aia diko ne vano vaki lo gwatuivanua lalakua Gris hinea a gwaloana noi Isrel ramo toka eia, ne huhui na ngwera Gris?

³⁶Aia u tuku viti kwara, ‘I kamu tulu ne soro haroau vae tulu nehe hagwe laviau tea.’ Vake u viti kwara, ‘Tulu nehe vano lai tea vaki hinea i nau na vano eia.’ ?U tuku viti na havakinau kwehi?”

³⁷A rani na kanikani* ki rovonaki u kwareki a rani lakua. Lo rani aia hi i Jisas mo tu, mo kwaha karakara mo viti kwara, “Ihe hi u madoku ne vanamai vaki maiau ne inu.

³⁸Ne hoki na Uliuli* Kokona mo viti kwara, ‘Ihe tea hinea u hauhuri lugu, a kwai huki hi a ahiana luna ne huki tina domina hoki na kwai lakua hinea mo huki.’ [12] ”

³⁹I Jisas u viti kwehini huri na Tanungwe Kokona hini kwara ihe tea ne hauhuri luna vae ne lavia. Vae lo taro hi i God he hileki na Tanungwe Kokona te radu huri he tabe hakeki Jisas te radu, vake i Jisas he lavi na hina lakua lolo taetae te radu nga.

⁴⁰A tangaloi ratuaki rau hugu maira lolo vao hi ramo rongoa mo viti kwehi, ramo viti kwara, “A tangaloi hika aia a Tangaloi* Duruduruki kareaki hinea tamo toko hugu tarae.”

⁴¹Ratuaki vake ramo viti kwara, “Aia i Vurae*.” Vae ratuaki vake rau viti kwara, “I Vurae nehe vanamai tea tina vanua Galili*.

⁴²A Uliuli* Kokona u viti kwara i Vurae ne vanamai lo gwaloana noi Devit ne vora lo vanua Betlehem, a gwatuivanua hi i Devit mo toka eia.”

⁴³Hokinia hi a vao ramo makwahekwahe huria.

⁴⁴Ratuaki rau lengaia kwara rana kwiribibia, vae hete katukwale kwara mo tau na kabana luna.

⁴⁵A kaitagahuri na Vanua* Kokona noi God ramo mule taliku vaki mana tangaloi* lingilingi lalakua mana Varisi* maira. Aira ramo uduhuri kina kaitagahuri vano hi ramo viti “?Kworoho tulu he va lavia te vanamai?”

⁴⁶A kaitagahuri vano hi ramo daraki ramo viti kwara, “Hete tangaloi kwara te katukwale u kwahakwaha hoki na tangaloi hi mo toko kwaha.”

⁴⁷A Varisi ramo uduhuri kinira ramo viti “?Aia u tuku tiusinakamu vake?

⁴⁸Tulu taga. Hete katukwale tina noda tomutomuai-tangaloi diko te tina Varisi maira kwara u hauhuri luna.

⁴⁹A tangaloi domi vuroki vano hi rahe kikilai na Tangwata* noi Mosis tea, hokinia aira tavuti na lologute noi God.”

⁵⁰I Nikotimas aia katukwale tiura. Aia a tangaloi hinea mo vano tuai mo tagai Jisas. Mo kwaha maira kwara,

⁵¹“A noda Tangwata u viti kwara tana he areki lavi na tangaloi te tomuaki. Tana rongoa tomua tana hagwe na havakinau hinea mo vaia, vunu tanari arekinia.”

⁵²Ramo daraki lakwae ramo viti kwara, “?I nigo a ngwera Galili* vake? Ko kakahi lo Uliuli* Kokona, vae kona hagwe kwara a tangaloi* duruduruki nehe vanamai lai tea tina vanua Galili.” [13]

⁵³Vunu hika aira vunu ra va mulemule vaki tataga,