Read West Ambae SIONE 8 Bible Online

SIONE 8 - West Ambae bible

SIONE 8

¹vae i Jisas u vano vaki lo Vuti na Vikai* a Violev.

²Mavukona, sirovobongi bise, i Jisas mo mule taliku vaki lo Vanua* Kokona noi God. Doluaki na vao hi rau vileki dalidalia, aia mo hugu hivo mo tinakaki mo huhuira.

³Hikani a tangaloi* kikikila na Uliuli* Kokona mana Varisi* ramo lavi na vavine doridori hati, a tangaloi rau hagwea u tiutokakivanua mana ngwera dolua, ramo taua mo tu koro na nakoga.

⁴Hikani ramo kwaha mai Jisas ramo viti kwara, “Tisa, a vavine hika, a tangaloi rau hagwea u tiutokakivanua mana ngwera dolua.

⁵Lo noda Tangwata*, i Mosis u tau na leo kwara a vavine hokinia hika, u taritarisa kwara tana voho mateia ki vatu. ?Vae i nigo ku viti kworoho?”

⁶Rau viti hokinia hi rau tiusinae, kwara vae rana hagwe lavi na hatiki te luna. Vae i Jisas va tangwaduku toko va uliuli lo tano kina bihuna.

⁷Ramo tu takwa-hi ramo toko uhia kina leo uhiuhi rusa. Vae i Jisas mo hugu bakotoki mo kwaha maira mo viti “Ihe tea tikamu hinea a nona doridori hati tikei vohoki ne vohoia tomua.”

⁸Vunu i Jisas mo tangwaduku mo uliuli lo tano taliku.

⁹Vae lolona ramo rongo kwehi aira vunu ramo tirakinia, ramo lakao katukwale kehe nga tiua, a ngwaraseaki rau lakao tomua. I Jisas mo hugu kahea mana vavine hi u tu radu nga takwahini.

¹⁰Vunu i Jisas mo hugu bakotoki mo kwaha mana vavine hi mo viti “Tubui. ?A tangaloi vano hike aira ave? ?Hete kwara te katukwale u vaiko huri na doridori hati hi komo vaia?”

¹¹A vavine hi mo daraki lakwae mo viti “Hete kwara te katukwale.” I Jisas mo viti lakwae kwara, “Karea. I nau vake nanahe vaiko te huri na doridori hati hi. Ko mule, vae ko hatu vai doridori hati taliku.”

¹²Hikani i Jisas mo kwaha mana vao taliku mo viti kwara, “A leleha na varamana, i nau. A tangaloi ne huriau, ne hagwe na leleha na ahiana, nehe lakao te lolo dodoki.”

¹³A Varisi* ramo viti lakwae kwara, “Hika ku hago leo huriko sibomu, a nomu leo nehe tu lai tea.”

¹⁴I Jisas mo daraki mo viti kwara, “Kareaki, nu hago leo huriau sibogu, aia vae a nogu leo ne tu lai, huri nu kikilai kwara nu vanamai ave, vake nu kikilai kwara na vano vaki ave. I kamu tulu he kikilai tea kwara nu vanamai ave, vunu vake tulu he kikilai tea kwara na vano vaki ave.

¹⁵I kamu tulu domi kwaheki na doridori na tangaloi lo hala na varamana, vae i nau nahe domi kwaheki na doridori na tangaloi te vohoki.

¹⁶Vae diko nana domi kwaheki na doridori na tangaloi, a nogu domidomi ne bakoto, huri i nau nahe vaia te sibogu, vae i Tamagu hinea mo horeau aia maiau.

¹⁷U uliana ba lo nomiu Tangwata* kwara a hagoleo nona tangaloi kairua, vae raru taritarisa, a leogaru ne tu lai.

¹⁸Nu hago leo huriau sibogu, vae i Tamagu aia hi mo horeau aia u hago leo huriau vake.”

¹⁹Ramo uduhuri kinia ramo viti kwara, “?I Tamamu aia ave?” I Jisas mo daraki mo viti kwara, “I kamu tulu he kikilaiau tea, vae tulu he kikilai i Tamagu te vake. Kwara vae diko tulu kikilaiau tulu ne kikilai i Tamagu vake.”

²⁰I Jisas mo viti na leo vano hi lolona hinea mo toko huhuira lolo Ara Kokona na Ingwa Kokona noi God, lo mahigwaki katukwale hinea a tanotano na noga hilehile ramo eno eia. Vae hete tangaloi kwara te katukwale u kwiribibia huri a tarona he vanamai te radu nga.

²¹I Jisas mo kwaha mana vao taliku mo viti kwara, “Na vano tikamu, tulu ne soro haroau vae tulu ne mate, a nomiu hatiana ne eno lumiu. Tulu nehe vano lai tea vaki lo tanotano hinea na vano eia.”

²²Hikani a kaitomuaki nona gwaloana noi Isrel* ramo kwaha mulekinira, ramo viti “Aia u viti kwara, ‘Tulu nehe vano lai tea vaki lo tanotano hinea na vano eia.’ ?Hika a domianaki kwara ne kwohi mateia sibona?”

²³I Jisas mo viti “I kamu tulu vanamai hike evina, vae i nau nu vanamai aulu. I kamu tulu vanamai tina varamana hika, vae i nau nahe vanamai te tina varamana hika.

²⁴Vae huri hi, nu viti lakwakamu ba kwara tulu ne mate, a nomiu hatiana ne eno lumiu. Diko tulu nehe hauhuri tea kwara ‘I nau i Tatoka’, [14] vae tulu ne mate, a nomiu hatiana ne eno lumiu.”

²⁵Ramo uduhuri ki Jisas ramo viti “!Hi! ?Kwara i nigo ihe?” I Jisas mo daraki mo viti “I nau aia hi nu viti lakwakamu ba tina tinatinakaki.

²⁶A kinau hurikamu u rusa radu nga kwara na viti, vake kwara na arekikamu luna. Aia hi mo horeau, aia u bakoto. Vae i nau nu viti huri lakwa na tangaloi na varamana a havakinau hi kehekeheki nomo rongo tiua.”

²⁷Rahe rongo kikilaki tea kwara u tuku kwahakwaha maira huri i Tamana i God.

²⁸Hikani i Jisas mo viti lakwara kwara, “I nau a Natu* na Tangaloi, vae lo taroki hinea tulu ne tabeau hake vaki lo kaibetu, tulu neri kikilai kwara ‘I nau i Tatoka’, vunu tulu neri kikilai kwara i nau nahe vai te kinau vohoki sibogu, vae a havakinau hi nu viti, i Tamagu kehekeheki aia u huhuiau kinira.

²⁹Aia hi mo horeau aia maiau, he tirakiau te kwara na hugu kaheau, huri tigwaravu nu vai a havakinau hi u lagwa luna.”

³⁰U rusa ramo rongo i Jisas mo viti na kinau vano hi ramo hauhuri luna.

³¹Hikani i Jisas mo kwaha mana tangaloi hinea rau hauhuri luna mo viti kwara, “Diko tulu rongohuri na nogu huhuiana, i kamu a nogu ngwalagelo kareaki.

³²I kamu tulu ne kikilai na vitikareaki huri God, vae a vitikareaki hi neri vaikamu tulu mo materi.”

³³Ramo viti “I kami a gwaloana noi Evraham, vae a tangaloi rahe gwaru-bibikami te vohoki kwara kena boloki vuroki lakwara. ?A hava domiana kwehi komo viti kwara, ‘Tulu ne materi’?”

³⁴I Jisas mo viti lakwara kwara, “Kareaki na viti lakwakamu. Ihe hi u vai doridori hati, a nona doridori hati u hugwe koroa, u gwaru-bibia.

³⁵A tangaloi* boloki vuroki he taritarisa tea kwara ne hugu tigwaravu lolo ingwa na nona masi. Vae a natuki u taritarisa maia kwara ne hugu tigwaravu lolo ingwa i tamana.

³⁶Vae diko i nau a Natuki na terikamu, tulu ne materi kareaki.

³⁷I nau nu kikilai kwara i kamu a gwaloana noi Evraham. Aia vae tulu vai kwara tulu ne kwohi mateiau, huri tulu he lavi na nogu huhuiana tea.

³⁸I nau nu viti huri na kinau hinea i Tamagu mo vosangiau kinia, vae i kamu tulu vai a havakinau hinea i tamamiu mo huhuikamu kinia.”

³⁹Ramo viti lakwae kwara, “I kami keu gwalo vanamai lui Evraham.” I Jisas mo viti lakwara kwara, “Kwara vae diko i kamu tulu gwalo vanamai lui Evraham kareaki, tulu ne vai na boloki hokinia hi aia mo toko vai.

⁴⁰I nau nu viti lakwakamu a kareaki hinea nu rongo ti God. Aia vae hika tulu lengaia kwara tulu ne kwohi mateiau. I Evraham he vai te kinau hokinia hi.

⁴¹I kamu tulu vai a havakinau i tamamiu mo toko vai.” Aira ramo viti “I kami hete natu lo mahaoki. I Tamamai katukwale vohoki aia hi i God.”

⁴²I Jisas mo viti lakwara kwara, “Kwara vae diko i God i Tamamiu kareaki, vae tulu ne lagwa haburu maiau, huri nu vanamai ti God vohoki, vae hikani i nau hike. Nohe vanamai te sibogu, vae aia u horeau.

⁴³?Kworoho tulu he va rongo kikilaki na kinau te hi nomo toko viti? Tulu he rongo kikilaki na kinau te hi huri tulu he lengaia te kwara tulu ne rongohuri na nogu leo.

⁴⁴I tamamiu i Setano*, i kamu i raranatuna. Tigwaravu i kamu tulu lengaia kwara tulu ne vai kinau hokinia aia u lengaia. Tina tinatinakakiki aia a tangaloi uamate tangaloi. He tu te maira hinea rau kwaha lo kareaki vohoki, huri a kareaki tikei luna vohoki. Diko u kurakura, aia u vai lo hala na domina hi u taritarisa maia, huri aia a tangaloi kurakura, vae aia u kwareki a gwataki na kurakura.

⁴⁵I nau nu viti na vitikareaki lakwakamu, vae huri hi tulu he hauhuri te lo leogu.

⁴⁶?Ihe hi maikamu kwara ne viti lai kwara a nogu vaivai hati eia? ?Diko a leogu rau kareaki, kworoho tulu he va hauhuri te lugu?

⁴⁷Aia hi u ngwalua ti God u rongohuri tabetabeki na leona. Vae i kamu tulu he ngwalua tea ti God. Huri hi, tulu he rongohuri na leona te vohoki.”

⁴⁸A gwaloana noi Isrel* ramo kwaha mai Jisas ramo viti kwara, “!Ai! Kemo viti bakotokinigo. I nigo a ngwera Sameria*, a tanungwe hati lolo gwatumu.”

⁴⁹I Jisas mo viti kwara, “I nau a tanungwe hati tikei lugu. I nau nu vai mavaki Tamagu, vae i kamu tulu domi bulakikiau.

⁵⁰I nau nahe vai te kwara na tabe hakeki na hinagu sibogu. Katukwale aia eia u tuku tabe hakekinia, vae aia neri kwahekikita, ne vosangi kwara i nau nu bakoto.

⁵¹I nau nu viti bakotoki lakwakamu, ihe hi ne rongohuri na nogu leo nehe mate te vohoki.”

⁵²A gwaloana noi Isrel ramo kwaha maia ramo viti “Hika i kami keri kikilai bakotoki kwara i nigo a tanungwe hati lolo gwatumu. I Evraham u mate ba, a tangaloi* duruduruki rau mate ba vake, vunu i nigo ku viti kwara, ‘Ihe hi ne rongohuri na nogu leo nehe mate te vohoki.’

⁵³I tubuda i Evraham u mate ba. ?I nigo ku lakua sileti Evraham a? A tangaloi duruduruki rau mate ba vake. ?Vae i nigo ku tuku domi kwara i nigo a hava tangaloi?”

⁵⁴I Jisas mo daraki mo viti “Kwara vae diko i nau nu tabe hakeki na hinagu vae nehe mulemai tea kina kinau vohoki. Aia hi u tabe hakeki na hinagu aia i Tamagu vae i kamu tulu mo toko vitia kwara aia a nomiu God.

⁵⁵I kamu tulu he kikilaia te vohoki, vae i nau nu kikilaia. Kwara vae diko na viti kwara nahe kikilaia tea, i nau a tangaloi kurakura hokikamu. Vae i nau nu kikilaia, nu rongohuri na leona.

⁵⁶I tubumiu i Evraham u havutia kwara ne tagai na ranigu, vae u tagaia u havutia haburu.”

⁵⁷A gwaloana noi Isrel ramo kwaha maia ramo viti kwara, “?A hukaomu he ngavu kailima te radu nga, vunu ku viti kwara ku tagai Evraham?”

⁵⁸I Jisas mo daraki mo viti kwara, “Kareaki na viti lakwakamu. I Evraham he vora te radu nga, i nau eia ba. I nau i Tatoka.”

⁵⁹Ramo rakorako vatu kwara rana vohoia, vae i Jisas u tavunikinia sibona tina mataga, vunu va vano tina Vanua* Kokona noi God.