Read West Ambae SIONE 9 Bible Online

SIONE 9 - West Ambae bible

SIONE 9

¹Lolona i Jisas mo lakao lo hala, mo tagai na tangaloi aia u vora a matana u dodo ba.

²A nona ngwalagelo ramo uduhuri kinia rau viti kwara, “?Tisa, a vaivai hati hika nohe mo vaia, mo vora a matana mo dodo? ?A nona sibona diko a noi retahina mai tamana?”

³I Jisas mo daraki mo viti kwara, “A matana u dodo, hete huri na nona vaivai hati, diko te noi retahina mai tamana. Vae a matana u dodo kwara vae i God ne vai matangwasaraki na nona huirana luna.

⁴Lo taro hika u rani radu nga, i kita tana toko va boloki nona, hinea mo horeau. Vae a bongi ne vanamai, hete tangaloi kwara ne boloki lai.

⁵Hokinia i nau nu hugu radu nga lo varamana, i nau a leleha na varamana.”

⁶I Jisas mo viti kwehini, vunu mo lido tilo tano mo gevuki na tano hi kina lidona. Vunu mo lavi na kekwa hi mo taua tavalavarea lo mata na tangaloi hi,

⁷mo viti lakwae kwara, “Ko vano ko rovi nakomu lolo kwai Saeloam.” A hina hi Saeloam a domianaki kwara “Rau revei na kwai.” [15] Hikani a tangaloi hi mo vano, mo rovi na nakona, vunu mo mulemai taliku u tagataga.

⁸Aira hi rau hugu valuvaluiara maia, mana tangaloi ratuaki hinea rau tuku tagaia tomua u tuku longilongi kinau, ramo uduuduhuri kinira rau viti kwara, “?A tangaloi hika hete aia hi mo toko hugu u longilongi kinau?”

⁹Ratuaki rau viti kwara, “Aia hi,” vae ratuaki vake rau viti kwara, “Eheo, hete aia hi, vae aia mala hokinia nga.” Hikani a tangaloi hi sibona mo kwaha mo viti kwara, “I nau hika.”

¹⁰Ramo uduhuri kinia ramo viti “?A matamu rau karea kworohokinia?”

¹¹Aia mo daraki mo viti “A tangaloi hi a hinana i Jisas u gevuki na kekwa, mo taua lo matagu, mo viti lakweau kwara, ‘Ko vano vaki Saeloam ko rovi nakomu.’ Hokinia nomo vano, nomo rovi na nakogu vae kwahaia hi nomo tagataga lai.”

¹²Aira ramo uduhuri kinia ramo viti “?Vae aia ave?” Aia mo daraki mo viti “Nahe kikilai tea.”

¹³A rani hi i Jisas mo gevuki na kekwa mo vai na mata na tangaloi hi mo tagataga, aia lo Rani* na Mabuana. Vunu ramo lavi na tangaloi hi hinea tomua a matana u dodo, ramo lavia vaki mana Varisi* maira.

¹⁵Hikani a Varisi ramo uduhuri kina tangaloi hi taliku ramo viti kwara, “?Ku tagataga lai kworohokinia?” A tangaloi hi mo viti lakwara kwara, “Aia u tau na kekwa lo matagu, vunu nomo rovi na nakogu, vae hika nomo tagataga lai.”

¹⁶A Varisi ratuaki ramo kwaha ramo viti kwara, “A tangaloi u vai na kinau hokinia hini aia hete tangaloi noi God, huri he kwiribibi na Rani na Mabuana tea.” Ratuaki vake ramo viti “Kwara vae diko aia a tangaloi vaivai hati vae nehe vai lavi na kaivosangi lalakua te hokinia hika.” Hokinia hini ramo makwahekwahe luna.

¹⁷Hikani a Varisi ramo uduhuri kina tangaloi hi taliku ramo viti kwara, “?I nigo ku viti kworoho huri na tangaloi hi huri mo vai na matamu mo karea? ?Aia a hava tangaloi?” A tangaloi hi mo daraki mo viti “Aia a tangaloi* duruduruki.”

¹⁸Vae a kaitomuaki nona gwaloana noi Isrel* rahe lengaia te kwara rana hauhuri luna hi kwara a matana u dodo, vunu mote tagataga lai. Hikani ramo kware i tamana mai retahina kwara ranaru vanamai.

¹⁹Ramo uduhuri kirarua ramo viti “?I natumiru hika hinea kuru mo toko vitia kwara u vora a matana u dodo? ?Diko kwehi vae hika u tagataga lai kworohokinia?”

²⁰I tamana mai retahina raru mo daraki raru mo viti kwara, “Keru kikilai kwara aia i natumaru, vake keru kikilai kwara lolona hi mo vora a matana u dodo.

²¹Vae keru he kikilai tea hika kwara u tagataga lai kworoho, vunu vake keru he kikilai te kwara ihe u vai na matana mo karea taliku. Tulu uduhuri kinia, huri u lakua ba, vae aia ne viti lai lakwakamu.”

²²I tamana mai retahina raru mo kwaha kwehini, huri raru mataku kina kaitomuaki nona gwaloana noi Isrel, huri rau masinge vunu ba kwara ihe ne matangwasaraki Jisas kwara aia i Vurae*, rana taua tivarea tina vale* na tiutangaroa, nehe soro lai te taliku.

²³Huri hi, i tamana mai retahina raru mo viti kwara, “Tulu uduhuri kinia huri u lakua ba.”

²⁴Hikani ramo kware na tangaloi hi taliku, aia hi mo vora a matana u dodo, ramo viti lakwae kwara, “Ko kwahakwaha ne bakoto hokinia i nigo ku tu koro na nako i God. Keu kikilai kwara a tangaloi hi aia a tangaloi vaivai hati.”

²⁵A tangaloi hi mo kwaha maira mo viti kwara, “Nahe kikilai te kwara a tangaloi hi aia a tangaloi vaivai hati diko hetea. Vae nu kikilaia hi kehekeheki kwara tuai a matagu u dodo, vae hika nu tagataga lai.”

²⁶Ramo uduhuri kinia ramo viti “?U vai kworohokinigo? ?U vai kworohoki na matamu mo karea?”

²⁷Aia mo daraki lakwara mo viti “I nau nu viti lakwakamu ba, vae tulu he rongohuriau tea. ?Kworoho tulu mo lengaia kwara tulu ne rongo na vevehuriki taliku? ?I kamu hika vake tulu lengaia kwara tulu ne kwareki nona ngwalagelo?”

²⁸Hikani ramo kwaha kadia ramo viti “U karea. I nigo a nona ngwalagelo, i kami a ngwalagelo noi Mosis.

²⁹I kami keu kikilai kwara i God u kwaha mai Mosis, vae a ngwera hika, kehe kikilai te vohoki kwara u vanamai ave.”

³⁰A tangaloi hi mo viti “!Raka! !Nu idila vohoki! A tangaloi hi mo vai na matagu mo karea, vae i kamu tulu he kikilai te kwara u vanamai ave.

³¹I kita vunu tau kikilai kwara i God nehe rongohuri na tangaloi tea hinea rau vaivai hati, vae u rongohuri na tangaloi hinea rau domi mavakinia, rau vai a kinau hi aia u lengaia.

³²U tinakaki lo tinatinakaki na varamana vae vaki na hika, a roro tikei vohoki kwara tana rongo te huri na tangaloi dolua, kwara mo vai na mata na tangaloi te hinea u dodo lolona mo vora, vae mo karea.

³³Kwara vae diko a tangaloi hika he vanamai te ti God nehe vai lavi na kinau te vohoki kwara te katukwale.”

³⁴Aira ramo kwaha luna ramo viti kwara, “?Kworoho komo vai kwara kona huhuikami? I nigo hi a tangaloi na vaivai hati tigwaravu, u tinakaki lolona hinea komo vora vae vaki na hika.” Hikani ramo taua tivarea tina vale* na tiutangaroa.

³⁵I Jisas mo rongo kwara rau tau na tangaloi hi tivarea. Hikani mo vano mo hagwea mo kwaha maia mo viti kwara, “?I nigo ku hauhuri lo Natu* na Tangaloi?”

³⁶A tangaloi hi mo daraki mo viti “Ko vitia lakweau kwara aia ihe, vae na hauhuri luna.”

³⁷I Jisas mo viti lakwae kwara, “I nigo ku tagaia ba. I nau hika nomo toko kwahakwaha maiko.”

³⁸A tangaloi hi mo kwaha mai Jisas mo viti “Hugwe*, nu hauhuri lumu.” Vunu mo sovi hivo vovohia kina domi mavakiana.

³⁹I Jisas mo tavalui leo mo viti kwara, “I nau nu vanamai vaki lo varamana kwara na kwaheki na doridori na tangaloi, kwara vae aira hi rahe tagataga lai tea rana taga lai, vae aira hi rau tagataga lai ranahe taga lai tea.”

⁴⁰A Varisi* ratuaki rau hugu maia takwa-hi, rau rongo na leo hi. Hika ramo uduhuri kinia ramo viti “?Kworohokinia? ?Ku tuku viti kwara i kami a matamai rau dodo vake?”

⁴¹I Jisas mo daraki mo viti kwara, “Kwara vae diko a matamiu rau dodo, a nomiu hatiana ne tikei. Vae tulu tuku viti kwara, ‘I kami keu tagataga lai.’ A leomiu hika u matangwasaraki kwara a nomiu hatiana u eno lumiu radu nga.”