Read West Ambae A Bolokiana 1 Bible Online

A Bolokiana 1 - West Ambae bible

A Bolokiana 1

¹Nu kware mavakinigo Teovilas. Lo nogu buku* tomuaki nu uli huri na kinau savira i Jisas mo vai, vake mo huhui lo taroki hinea mo tinakaki na nona boloki,

²tarisaki lo raniki hini i God mo lavia vaki lolo taetae. U kwaha kina huirana na Tanungwe Kokona mo tuliki na leo lakwa na tangaloi hinea mo mataira, rau kwareki nona kaihora* kokona, vunu mori mule tagaulu.

³A rani ngavu kaivati takuni tina nona mateana, u vosangi vakarusa lakwara, lo halaki hini kwara vae rana kikilai vohoki kwara aia u ahi taliku. Ramo tagaia vunu mo huhuira kwara rana bohibohi kworohokinia tavuti i God hinea u hugwe korora.

⁴Lolona ramo vanamai tabulutaki, mo betera kina leo hika. Mo viti kwara, “Tulu hatu mule tina gwatuivanua lakua Serusalem ba, vae tulu hugu tara na hilehile hinea i Tamagu mo tuliki terekakinia, aia hi nomo viti huria lakwakamu.

⁵I Sione u bavtaes na tangaloi kina kwai, vae nehe tuai tea tulu ne lai bavtaes kina Tanungwe Kokona.”

⁶Lolona a kaihora* kokona ramo hugu tabulutaki mai Jisas, ramo uduhuri kinia ramo viti kwara, “?Hugwe*, kona vai na gwaloana noi Isrel* rana hugwe koro na tangaloi taliku hika lai nga diko hete radu?”

⁷I Jisas mo daraki lakwara mo viti “I Tamagu kehekeheki u hago huirana lo kinau aira vano hi. Aia u tau na taro mana rani hurira kwara rana mule luna lo taroki bakotoki. Vae i kamu tulu he taritarisa tea kwara tulu ne kikilaira.

⁸Vae lolona a Tanungwe Kokona ne hivo tilumiu, i kamu tulu neri kukwere kina huirana, vunu i kamu tulu neri hago leo huriau lolo gwatuivanua Serusalem, vunu lolo vanua Sutia savia maia Sameria*, vunu vaki lo gweregwere na varamana.”

⁹Mo viti hokinia hi mo rovo, vunu lolona ramo toko tagataga huria radu, mo mule hake vaki lolo taetae, vae a taenalangi mo vai koroa, rahe tagaia te taliku.

¹⁰Lolona mo vano tiura hi, rau tuku tagataga tagaulu vaki lolo taetae radu nga, vae heheriki nga a tangaloi kairua a lugwagaru rau lotu, raru mo tu maira.

¹¹Raru mo viti kwara, “?Ei, ngwera Galili*, kworoho tulu mo tu takwa-hi tulu mo toko tagataga tagaulu vaki lolo taetae? I Jisas hi i God mo lavia vaki lolo taetae, ne mulemai taliku hokinia hi tulu mo tagaia mo vano vaki lolo taetae.”

¹²Vunu a kaihora* kokona ramo mule taliku vaki Serusalem tina Vuti na Vikai* a Violev. He vakahao te tina gwatuivanua lakua. A dumuki kwara te kilometa katukwale vohoki.

¹³Ramo soro tilo vanua hi, ramo galo hake vaki lolo ingwa aulu rau tuku hugu eia tigwaravu, i Pita, i Sione, i Semis, mai Aduru, i Viliv mai Tomas, i Batolomiu mai Matiu, i Semis i natu i Alveas, i Saemon hinea aia katukwale tina tangaloi* aira hi ramo karohuri na vanua noi God, a vanua Isrel*, mai Sutas i natu i Semis.

¹⁴Ramo mule tabulutaki gwatu katukwale mana ravavine, i Meri i retahi i Jisas, vake mai ratua i Jisas, ramo tiutangaroa vataha na taroki.

¹⁵A raniki he rusa tea koroa, a tangaloi hauhuri aira kwara te vidolua eviki ngavu kairua ramo bulu tabulutaki, i Pita mo maraka hake mo kwaha maira.

¹⁶Mo viti kwara, “Rabela, tuai a Tanungwe Kokona mo lalahi Devit mo viti terekaki na leo huri Sutas. A leo hi u mule luna kareaki, huri savi na Uliuli* Kokona rana kworo. I Sutas aia hi a buluimai, i kami lo bulubulu katukwale hi i Jisas mo mataikami kwara kena boloki nona, vae aia hi mo tomuaki na tangaloi vano hi ramo kwiribibi i Jisas.”

¹⁸(A tangaloi aia hi i Sutas mo voli na vanua kina mane* hinea a kaivolina lo nona boloki hati. Vae mo huraki ngudu takwa-hi a lolona mo madare, a tagwangina ramo ngwangwaluaki.

¹⁹Doluaki na tangaloi hi ramo toka Serusalem ramo rongoa, hokinia lo noga leo rau kwarekinia kwara a Akeldama, a domianaki kwara “A Tano na Abeana.”)

²⁰I Pita mo vano nga mo viti kwara, “Lo buku* na bulada bolo hinea tau kwarekinia A Buku na Sam u viti kwara, ‘U karea kwara a ingwana ne eno vuroki, a tangaloi nehe toka tea lolona.’ Vake u uliana kwehi kwara, ‘U karea kwara te tangaloi dolua ne lavi na tanotanona.’

²¹“Vae huri hi u karea kwara te tangaloi ne buluikami ne kwareki a hagoleo lo marakaana nona Hugwe* i Jisas. A tangaloi hi te katukwale tiura hi ramo toko hurihurikami lo taro i Jisas mo hugu maikami. U hurikami vanamai evina lolona i Sione mo heretuvaki na nona bavtaes rovonaki lo raniki hinea i God mo lavi Jisas hake tikita vaki lolo taetae. [1]”

²³Hokinia ramo domiki na tangaloi kairua. I Sosev rau kwarekinia i Basabas, a hinana vake i Sastas, vunu a tangaloi kairuaki i Matias.

²⁴Vunu ramo tiutangaroa hokinia hika. Ramo viti “Hugwe i God. I nigo ku kikilai na domi na tangaloi doluaki. Ko vosangikami kwara aia makive hiki kairuaki i nigo komo mataia,

²⁵kwara ne lavi na tanotano na boloki na kaihora* kokona hinea i Sutas mo tirakinia mo vano vaki lo tanotanona hinea mo toko boloki huria.”

²⁶Vunu ramo vai* na matarongo mo hugwe lui Matias, ramo mataia mo kwareki a bului na kaihora kokona hangavulu dongwana katukwale.