Read West Ambae A Bolokiana 10 Bible Online

A Bolokiana 10 - West Ambae bible

A Bolokiana 10

¹A tangaloi katukwale lo gwatuivanua lakua Sisaria a hinana i Konilias. Aia a kaitomuaki na tangaloi na vuro vidolua nona ngwera Rom hinea rau kwarekinira a Bulubulu Itali.

²Aia a tangaloi bakoto u mavaki God vae aia mana nona vakabela savira tatana rau kaluhaki God kina domi mavakiana. U hago haburu mana gwaloana noi Isrel* hinea rau kakaravika vae aia tigwaravu u tiutangaroa lakwae God.

³Lo rani katukwale kwara te lo mataniaho dori u tagai na vakatabobo u matangwasara vohoki kwara a kaihora noi God tina taetae u vanamai vaki maia mo viti lakwae kwara, “Konilias.”

⁴Mo tagataga huri na kaihora tina taetae mo mataku, mo viti kwara, “?A havakinau?” A kaihora tina taetae mo viti “I God u lai tabetabeki na nomu tiutangaroa mana nomu boloki hi komo vai tabetabe lakwa na tangaloi, vae u domidomi-bibiko radu.

⁵Vae hikani ko hora te tangaloi rana vano vaki lo gwatuivanua Sova, rana kware na tangaloi katukwale takwa-hi a hinana i Saemon Pita.

⁶U hugu tata i Saemon kairuaki vake hinea u tuku kihikihi kinau lo vinu na boboroa. U toka garagarani mana tahi.”

⁷Hikani a kaihora tina taetae hi mo kwaha maia mo rovo, vunu mo vano tiua. I Konilias mo kware na nona kaihora kairua hi u matairarua, vake katukwale tina nona tangaloi na vuro rau tuku tagahuria. Aia a tangaloi bakoto u mavaki God. Mo kwarera vanamai vaki maia,

⁸mo viti na kinau hi lakwara, vunu mo horara vaki Sova.

⁹Mavukona lo mataniaho kaheata ramo vanamai vaki garagarani mana gwatuivanua Sova. Vae lo taro hi i Pita mo vano tagaulu vaki lo ingwa* hivoulu kwara ne tiutangaroa.

¹⁰U marakatia, u rongo kwara ne kanikani vae lolona ramo vai rarai na hinaka kwara ne kani mo tagai na vakatabobo.

¹¹Mo tagai na taetae mo matakahi a kinau mo hivo tegetano aia hoki na gwana lakua, a ngwahukuki kaivati, vae u taga hokinia kwara te tangaloi rau kwiribibia lo ngwahukuki vano hi, ramo hivokinia tilo varamana.

¹²Lolo gwana hi, a boboroa mataroi mana kinau vake hi rau tuku karaka, mana manu vatahae.

¹³Mo rongo na dilao mo kwaha maia mo viti kwara, “Pita, maraka, ko ua ko kani.”

¹⁴Vae i Pita mo viti “Hetea vohoki, Hugwe*. Nahe toko kani te kinau hinea rau hogora lo nakomu diko rahe taritarisa tea huri kanikani.”

¹⁵Mo rongo na dilao mo kwaha maia taliku vakairuaki mo viti “Ko hatu domi na kinau kwara rau hogora hinea i nau i God nu viti kwara rau ngwasara.”

¹⁶A leo hi mo vanamai vakaitolu hokinia hi, vunu a gwana hi ramo lavia hake taliku vaki lolo taetae.

¹⁷I Pita mo toko soro haro na domiana na nona vakatabobo hi mo tagaia, vae lolona hi a tangaloi vano hi i Konilias mo horara ramo uduhuri na tata i Saemon, vae aira rau tu lo matakihala ba.

¹⁸Ramo kware karakara, ramo uduhuri ramo viti kwara, “!Ai! ?A tangaloi a hinana i Saemon Pita aia hike diko hetea?”

¹⁹I Pita u tuku domidomi lo nona vakatabobo radu nga, a Tanungwe Kokona mo viti kwara, “!Ku rongo! A tangaloi kaitolu rau tuku soro haroko.

²⁰Ko maraka, ko vano tegetano, ko hatu domi kairua kwara vae konari va hurira, huri i nau nu horara.”

²¹Hikani i Pita mo vano tegetano, mo viti lakwa na tangaloi vano hi kwara, “I nau hika tulu mo toko soro haroau. ?Te kworohokinia tea tulu mo vanamai?”

²²Aira ramo viti kwara, “A kaitomuaki na tangaloi na vuro i Konilias aia u horakami. Aia a tangaloi bakoto u mavaki God, a gwaloana noi Isrel* savira rau domi mavakinia haburu. A kaihora kokona tina taetae katukwale u kwaha maia mo viti kwara, ‘Ko kware i Saemon Pita vaki tatamu kwara kona rongo te kinau hi ne viti.’ ”

²³Hikani i Pita mo kware na tangaloi vano hi tilolo ingwa vae bongi ramo maturu takwa-hi. Vunu mavukona i Pita mo maraka mo hurira. A ratua ratuaki Sova rau huria vake.

²⁴Lo rani kairuaki mo maravuti takwa-hi lo gwatuivanua lakua Sisaria, i Konilias mai rabelana mai rabuluina hinea mo kwarera vanamai, rau hugu tarae.

²⁵Lolona i Pita mo vai kwara ne soro tilolo ingwa, i Konilias mo hahavakinia mo sovi hivo koro na nakona kina domi mavakiana.

²⁶Vae i Pita mo vaia mo maraka, mo viti lakwae kwara, “Ko tu, huri i nau vake i nau a tangaloi.”

²⁷I Pita mo toko kwaha mai Konilias radu, i rarua vunu raru mo soro tilolo ingwa, i Pita mo tagai na tangaloi rusa ramo vileki tabulutaki.

²⁸Vunu i Pita mo viti lakwara kwara, “I kamu tulu kikilai u matangwasara kwara lo huhuiana nona gwaloana noi Isrel* he taritarisa tea kwara rana tiroki diko rana bulu mana tangaloi tavalavarea tina gwaloana noi Isrel. Vae i God u vosangiau kwara na hatu domi na tangaloi kwara he ngwasara tea diko u hogora lo nakona.

²⁹Hokinia tulu mo hora haroau nomo vanamai, vae nahe viti tea kwara hetea, vae nu maraka nomo vanamai. I nau nu uduhuri kikamu. ?Kworoho tulu mo hora haroau?”

³⁰Hikani i Konilias mo viti kwara, “A rani kaitolu koro ba lo mataniaho dori hokinia hika, nu tiutangaroa lolo ingwagu, vae heheriki hi a tangaloi u lugwaki na lugwa u kwaka, mo tu koro na nakogu

³¹mo viti kwara, ‘!Konilias! I God u rongo na nomu tiutangaroa, u domidomi-bibi na nomu boloki hi komo hago mana tangaloi.

³²Ko hora te tangaloi rana vano vaki lo gwatuivanua Sova rana kware na tangaloi a hinana i Saemon Pita. U hugu tata i Saemon, a tangaloi u tuku kihikihi kinau lo vinu na boboroa, u toka garagarani mana tahi.’

³³Hokinia nomo hora vaki maiko heheri, vae ku vanamai u karea. Hikani i kami vunu kemo hugu lo tanotano hike koro na nako na Hugwe i God, keu hugu tarako kwara kena rongo te havakinau hi mo horako kwara kona viti.”

³⁴Vunu i Pita mo tinakaki mo kwaha, mo viti kwara, “Hikani nu kikilai kwara kareaki i God u vai kinau lakwa na tangaloi vunuhira rau taritarisa.

³⁵Ihe te haro nga u mataku kinia, u vai a havakinau u bakoto, vae venaha diko aia te hava tangaloi, i God u lai tabetabekinia.

³⁶Tulu kikilai na leo hika mo hokakiana lakwa na gwaloana noi Isrel*, u viti huri na Roro Karea na magemuana lalahi Jisas Kraes*, aia a Hugwe* nona tangaloi vunuhira.

³⁷I kamu tulu kikilai na kinau lalakua hi rau vaiana ba. Tomuaki i Sione mo heretuvaki na bavtaes, vunu takuni tiua hi a kinau lalakua hi ramo tinakaki lo vanua Galili*, ramo vano lalahi na vanua Sutia doluaki.

³⁸Tulu kikilai kwara i Jisas aia a ngwera Nasaret hinea i God u vuraea kina Tanungwe Kokona mana huirana. U lakao vataha na mahagweki, u vai a kinau rau karea, vake u vakahikinira hinea rau hugu tavuti na huirana noi Setano*, huri i God aia maia.

³⁹I kami keu hago leo huri na kinau savia hi mo vai lo tata na gwaloana noi Isrel doluaki vake mana gwatuivanuaga lakua Serusalem. Ramo durua tilo kaibetu, mo mate.

⁴⁰Vae lo rani kaitoluki i God mo rakatia tina mateana. Mo vosangia lakwakami hinea u mataikami ba kwara kena kwareki a nona hagoleo. I God he vosangia tea lakwa na tangaloi savia, vae u vosangia lakwakami kehekeheki hinea takuni tiua hi mo maraka taliku tina mateana keu kanikani maia keu inuinu maia.

⁴¹

⁴²Vae i Jisas u horakami kwara kena kwalahaki na Roro Karea lakwa na tangaloi, kena hago leo kwara i God u matai Jisas kwara ne kwaheki na doridori na tangaloi hinea rau ahi maira hinea rau mate ba.

⁴³A tangaloi* duruduruki savira rau viti huria, kwara ihe hinea u hauhuri lui Jisas, i God ne domidomi koro na nona vaivai hati lalahi na huirana na hina i Jisas.”

⁴⁴Lolona i Pita mo toko kwaha radu nga, a Tanungwe Kokona mo hivo tiluga hinea rau rongo na leo.

⁴⁵A gwaloana noi Isrel* hinea rau hauhuri, aira hinea rau vanamai haragoki mai Pita tina gwatuivanua Sova, rau idila haburu huri i God mo didihi na nona hilehile hi a Tanungwe Kokona tilo tangaloi tavalavarea tina gwaloana noi Isrel vake.

⁴⁶Rau kikilai huri rau rongora ramo kwaha kina leo mataroi ramo tabe hakeki i God. I Pita mo kwaha

⁴⁷mo viti kwara, “A tangaloi vano hikani rau lavi na Tanungwe Kokona, hokikita tamo lavia. Hete tangaloi kwara ne vai lai ne tu korora kwara rana hatu lai bavtaes kina kwai.”

⁴⁸Hokinia mo tuliki lakwara kwara rana lai bavtaes lo hina i Jisas Kraes*. Vunu ramo uduhuri kinia kwara ne hugu kelekele vake maira.