Read West Ambae A Bolokiana 11 Bible Online

A Bolokiana 11 - West Ambae bible

A Bolokiana 11

¹A kaihora* kokona mana ratua lo vanua Sutia doluaki rau rongo kwara a tangaloi tavalavarea tina gwaloana noi Isrel* vake rau lavi na leo noi God.

²Lolona i Pita mo galo hake vaki Serusalem, aira hi a tangaloi noi Jisas hinea rau lengaia kwara rana vai na kaimatai* lo siosio lo tangaloi tavalavarea tina gwaloana noi Isrel, rau kwaha luna

³ramo viti kwara, “?Kworoho komo vano komo hugu mana tangaloi vano hi rahe lai te kaimatai lo siosio, vake komo kanikani maira?”

⁴Hokinia i Pita mo viti savi na kinau lakwara hinea u vaiana tina tinatinakakiki vaki lo gweregwereki.

⁵Mo viti kwara, “I nau nu tiutangaroa lo gwatuivanua Sova, vae lolona hi nomo tagai na vakatabobo. Nu tagai na kinau mo hivo tegetano tina taetae aia hoki na gwana lakua a ngwahukuki kaivati, vae nu taga hokinia kwara te tangaloi rau kwiribibia lo ngwahukuki vano hi ramo hivokinia, mo hivo mo maravuti maiau.

⁶Nomo taga tabetabeki tilolona nu tagai na boboroa mataroi, aira hi a boboroa na vanua mana boboroa na bubu mana kinau vake hi rau tuku karakaraka, mana manu vatahae.

⁷Vunu nomo rongo na dilao mo kwaha maiau mo viti kwara, ‘!Pita, ko maraka ko ua ko kani!’

⁸Vae nu viti ‘Hete vohoki, Hugwe*. A hinaka hinea rau hogora lo nakomu, diko rahe taritarisa te huri kanikani rahe kihi na kwakwagu te vohoki.’

⁹A dilao mo daraki tina taetae mo viti kwara, ‘Ko hatu domi na kinau kwara rau hogora hinea i nau i God nu viti kwara rau ngwasara.’

¹⁰A leo hi mo vanamai vakaitolu, vunu a kinau hi savia ramo revea hake taliku vaki lolo taetae.

¹¹Lo taro aia hi vohoki, a tangaloi kaitolu i Konilias mo horara vaki maiau tina gwatuivanua lakua Sisaria, ramo maravuti lo ingwa hi nomo hugu eia.

¹²A Tanungwe Kokona mo viti lakweau kwara na hurira na hatu domi kairua. A ratua vake hi kaiono tina gwatuivanua Sova ramo huriau vaki Sisaria, i kami vunu kemo soro tilolo ingwa i Konilias.

¹³Hikani mo viti lakwakami kwara u tagai na kaihora tina taetae mo tu lolo ingwana mo viti lakwae kwara, ‘Ko hora te tangaloi vaki lo gwatuivanua Sova ne kware na tangaloi hi a hinana i Saemon Pita.

¹⁴Aia neri viti na leo lakwako vae kona ahi kinia mana nomu vakabela.’

¹⁵Nomo tinakaki nomo kwaha, a Tanungwe Kokona mo hivo tiluga hokinia hi mo hivo tiluda lo tinatinakakiki.

¹⁶Vunu nomo domihagwe a havakinau hi a Hugwe mo viti tuai mo viti kwara, ‘I Sione u bavtaes na tangaloi kina kwai, vae i kamu tulu neri lai bavtaes kina Tanungwe Kokona.’

¹⁷U matangwasara luna hi kwara i God u bete a hilehile lakwa na tangaloi tavalavarea tina gwaloana noi Isrel u taritarisa maia hi mo bete lakwakita lolona tamo hauhuri lo noda Hugwe i Jisas Kraes*. !Kwara i nau a hava tangaloi kwara na tu koro na boloki noi God!”

¹⁸Lolona ramo rongo na leo hi, rahe kwaha luna te taliku, ramo kaluhaki God ramo viti kwara, “Hikani i God u vai na hala, mo bete na taro lakwa na tangaloi tavalavarea tina gwaloana noi Isrel vake kwara rana halebohi tina noga hatiana, rana ahi.”

¹⁹Lolona a tangaloi ramo kwohi matei i Steven, a tangaloi hauhuri ramo kwalao girigiri kina vaibulabula hi a noga tavaluivuro ramo vai. Ratuaki rau vano vaki lo vanua Vonisia mana vanua Saevras, vake mana gwatuivanua lakua Antiok, ramo viti na leo i God lakwa na gwaloana noi Isrel* kehekeheki.

²⁰Vae a tangaloi hauhuri tuaki, a ngwera lo vanua Saevras maira hi lo gwatuivanua lakua Saerini, ramo vano vaki lo gwatuivanua lakua Antiok ramo viti na leo i God tivarea lakwa na tangaloi tavalavarea tina gwaloana noi Isrel vake. Ramo heretuvaki na Roro Karea lakwara huri na Hugwe* i Jisas.

²¹A huirana nona Hugwe aia maira, vae a tangaloi rusa haburu ramo hauhuri ramo halebohi vaki mana Hugwe.

²²A roro huri na kinau hika mo maravuti mana kwarelua* noi Jisas Serusalem, hokinia ramo hokaki Banabas vaki Antiok.

²³Lolona mo maravuti mo taga kwara i God u vai tabetabeki na tangaloi rusa vano hi, u lagwa haburu, vake u rakati na domiga kwara rana karohuri kareaki lo Hugwe kina domiga savia.

²⁴I Banabas aia a tangaloi karea hinea u kukwere kina Tanungwe Kokona mana hauhuriana, vae a tangaloi rusa ramo huri na noda Hugwe.

²⁵Vunu i Banabas mo vano vaki lo gwatuivanua Tasas mo taga haro i Sol.

²⁶Lolona mo hagwea mo lavia vaki lo gwatuivanua lakua Antiok. Hokinia raru mo bulu mana kwarelua noi Jisas a hukao katukwale lo vanua hi, raru mo toko huhui na tangaloi rusa hinea ramo vileki tabulutaki tigwaravu. Lo gwatuivanua lakua hi Antiok a tangaloi tavalavarea ramo tau na hina hika Tangaloi noi Kraes* tomua halaradu tilo ngwalagelo noi Jisas.

²⁷Lo taro aia hi a tangaloi* duruduruki tuaki ramo duvule tegetano tina gwatuivanua lakua Serusalem vaki Antiok.

²⁸Katukwale tiura hi a hinana i Akavas mo tu hake, mo viti terekaki kina huirana na Tanungwe Kokona kwara vae nehe tuai tea vae ne gwakere doluaki na varamana. Mo mule luna lolona hi i Klotias aia a hugwe lakua nona ngwera Rom.

²⁹A ngwalagelo noi Jisas rau domiki kwara vatavatahakinira rana hokaki te mane* hokinia rau vai lai kwara ne hago mana rabela hinea rau toka lo vanua Sutia.

³⁰Rau vai luna hokinia hi, ramo bete na mane lakwai Banabas mai Sol raru mo kwalahaki lakwa na ngwarasea* na kwarelua* noi Jisas takwahinea.