Read West Ambae A Bolokiana 12 Bible Online

A Bolokiana 12 - West Ambae bible

A Bolokiana 12

¹Lo taro hi a hugwe lakua i Herot [12] mo tinakaki kwara ne vai bulakiki na kwarelua noi Jisas ratuaki.

²Mo lavi i Semis, i tua i Sione, ramo tai mateia kina bue.

³Lolona mo taga kwara a gwaloana noi Isrel* rau lagwa luna, mo hora tangaloi kwara rana kwiribibi i Pita lolo taro na kanikani lakua hinea rau kwarekinia a Kanikani* na Bereti* hi a Is Tikei Lolona.

⁴Ramo kwiribibi Pita, ramo taua lolo ingwa na gwarugwaru, ramo tirakinia lakwa na tangaloi na vuro gwatu kaivati aira kaivati kehe nga kwara rana tagahuria. I Herot u tovoki na halaki kwara vae ne lavia tivarea tina ingwa na gwarugwaru takuni tina Kanikani* na Tivekiana ne viti lo nako na tangaloi rusa kwara vae ne mate.

⁵Hokinia i Pita aia lolo ingwa na gwarugwaru, vae a kwarelua noi Jisas rau tiutangaroa karakara tigwaravu lakwai God huria.

⁶Lolo bongi tomua tiua hi i Herot* u domiki kwara ne lavi i Pita tivarea vaki mana tangaloi, i Pita u maturu lo livuka na kaitagahuri kairua. Rau gwarubibia kina seni kairua, a kaitagahuri tuaki vake lo matakihala na ingwa na gwarugwaru.

⁷Heheriki hi a kaihora nona Hugwe* tina taetae mo tu takwahini, a vavarama mo kwaka lolo ingwa na gwarugwaru hi. A kaihora tina taetae hi mo kiluki Pita lo tigwana, mo vakaradae mo viti kwara, “!Ko maraka! !Heheri!” A seni ramo sovi tina kabana vakatukwale.

⁸Vunu a kaihora tina taetae hi mo viti kwara, “Ko kwahikwahiki na kwahimu, ko tavu na kaikwokwori na garumu.” I Pita mo vai kwehi. Vunu a kaihora tina taetae mo viti lakwae kwara, “Ko lugwa vunu ko huriau.”

⁹I Pita mo huria tivarea tina ingwa na gwarugwaru. Vae he kikilai tea kwara a kinau hi a kaihora tina taetae mo vai u kareaki. Aia u domi kwara a vakatabobo.

¹⁰Raru mo lakao vaki mana kaitagahuri na ingwa na gwarugwaru hi tomua, raru mo lakao siletia, vunu raru mo lakao siletia kairuaki, vunu raru mo vanamai vaki lo katama rovonaki hi u kihiana kina aean, u matakahi tivarea vaki lolo gwatuivanua lakua. A katama hi u matakahi kahea, raru mo lakao tivarea. Raru mo lakao lo hala lakua vae heheriki hi a kaihora tina taetae mo tiraki i Pita.

¹¹Vunu i Pita mo kikilai a havakinau hi mo vai lakwae, mo viti kwara, “Hikani nu kikilai kwara u kareaki vohoki. A Hugwe u hora na nona kaihora tina taetae, mo vakahikiau tina huirana noi Herot mana kinau savia hinea a gwaloana noi Isrel* ramo domikinia kwara rana vai.”

¹²Mo kikilai hokinia hikani, vunu mo vano vaki tata i Meri i retahi i Sione Mak. A tangaloi rusa rau vileki tabulutaki takwa-hi rau tuku tiutangaroa.

¹³Hikani i Pita mo toko diridiri varea lo matakihala, vae a tangaloi boloki a vavine takwa-hi a hinana i Rota u vanamai kwara ne takahi katama.

¹⁴A vavine hi u kikilai na leo i Pita, u rongo u lagwa haburu, mo kwalao taliku vaki maira he takahi na katama tea, mo viti lakwara kwara i Pita aia varea.

¹⁵Aira ramo viti lakwae kwara, “Ku reraka.” Vae mo seseaka nga kwara kareaki. Vunu ramo viti kwara, “Te tamatena.”

¹⁶Lo taroki hini i Pita mo diridiri mo seseaka. Vunu ramo takahi na katama ramo tagaia, rau idila haburu.

¹⁷I Pita mo tarutaru lima kinira, mo viti huri lakwara kwara a Hugwe u lai kworohokinia tivarea tina ingwa na gwarugwaru. Vunu mo viti lakwara kwara, “Tulu viti na kinau hika lakwai Semis mana ratua savira.” Vunu mo tirakinira mo vano vaki lo vanua dolua.

¹⁸Lolo sirovobongi bise, a kaitagahuri na ingwa na gwarugwaru hi rau rongo lengalengakinia kwara a havakinau u vai i Pita.

¹⁹I Herot mo hora kwara rana soro haroa, vae rahe hagwea tea. Hokinia mo galili haroa kina kaitagahuri na ingwa na gwarugwaru vano hi, vae hetea, vunu mo hora kwara a nona tangaloi na vuro rana kwohi mateira. Takuni tiua hini i Herot mo duvule tegetano tina vanua Sutia mo hugu kelekele lo gwatuivanua lakua Sisaria.

²⁰Lo taro hi i Herot* u lologute haburu kina tangaloi lo gwatugwatui-vanua lalakua Taea maia Saeton, vae hokinia ramo vano tabulutaki kwara rana tagaia. Tomuaki ramo lai lavi i Blastas mo buluira, aia hi mo toko tagahuri na ingwa na hugwe lakua hi i Herot. Vunu ramo vano vaki mai Herot ramo uduhuri kinia kwara ne tau te leo vae ne tangwatahakinira taliku rana toka ne karea, huri lo vanuaga rau tuku lai kaga hinaka tina vanua nona hugwe lakua hi.

²¹I Herot mo tau na nona rani katukwale vae mo lavi na vulavulana a vulavula na hugwe mo vulavulakinia, mo hugu lo hagehagelena mo kwahakwaha mana tangaloi.

²²Ramo kolekoleki ramo viti kwara, “Hete tangaloi hi mo kwahakwaha, aia vae a takaro.”

²³Heheriki hi a kaihora nona Hugwe* tina taetae mo vai i Herot mo sovi, huri he tabehaheki na hina i God tea. Hikani a nuve ramo kani na tagwangina, mo mate.

²⁴Vae a leo noi God mo toko matala mo lakua.

²⁵Hikani i Banabas mai Sol raru mo vai nogaru boloki mo rovo, raru mo mulemai taliku tina gwatuivanua Serusalem, raru mo lavi Sione Mak mo hurirarua.