Read West Ambae A Bolokiana 14 Bible Online

A Bolokiana 14 - West Ambae bible

A Bolokiana 14

¹A kinau hokinia hini mo vaiana vake lo gwatuivanua Ikoniam. I Pol mai Banabas raru mo vano vaki lolo vale* na tiutangaroa nona gwaloana noi Isrel raru mo kwahakwaha lo halaki hokinia hi, a gwaloana noi Isrel* mana tangaloi tavalavarea rusa ramo mulemai kina tangaloi hauhuri.

²Vae a gwaloana noi Isrel ratuaki hinea rau bega hauhuri ramo vai na tangaloi tavalavarea tina gwaloana noi Isrel ramo rongo hati, ramo bohi na domiga mo hati vovohi na tangaloi hinea rau hauhuri lui Jisas.

³Vae a kaihora* kokona kairua hi raru mo hugu takwa-hi mala tuatuaika. Raru mo kwaha raru he mataku tea, raru mo viti huri na noda Hugwe*. A Hugwe hi u vosangi kwara a leogaru huri na nona domi tabetabe lakua u kareaki, mo bete a huirana lakwararua raru mo vai na kaivosangi mana idilakiana.

⁴Hikani a vao lo gwatuivanua lakua hini ramo makwahe. Tuaki ramo huri na gwaloana noi Isrel, ratuaki ramo huri na kaihora kokona kairua.

⁵Vunu a tangaloi tavalavarea tina gwaloana noi Isrel, mana gwaloana noi Isrel, mana noga kaitomuaki haragoki, ramo tovoki kwara rana vai bulakiki na kaihora kokona rana kosomirarua ki vatu.

⁶Vae a kaihora kokona raru mo rongo na tovotovo hini, raru mo kwalao vaki lo gwatuivanua lalakua Listra maia Debe, lo vanua Likaonia, vake laliki takwa-hi lo duvi na vanua hi.

⁷Hikani raru mo heretuvaki na Roro Karea huri i Jisas takwahini.

⁸A tangaloi katukwale u hugu lo gwatuivanua Listra u luku, u vora maia vae he lakao lai te vohoki.

⁹Hikani u rongohuri na leo noi Pol. I Pol mo tagaia kwara u hauhuri kwara vae ne ahi, hokinia mo taga vovohia,

¹⁰mo viti karakara kwara, “Ko tu bakoto kina garumu.” Hikani a tangaloi hi mo rovo hake mo tinakaki mo lakao laliki.

¹¹A vao ramo tagai na kinau hi i Pol mo vai, ramo tinakaki ramo koleki kina noga leo, a leo hi Likaonia, ramo viti “!A noda takaro raru bohi ki tangaloi raru mo hivo vaki maikita!”

¹²I Banabas ramo kwarekinia i Sus hinea a hugwe na noga takaro. Vae huri i Pol u tuku heretuva, ramo kwarekinia i Heremes hinea aia a tangaloi na leo na noga takaro maira.

¹³A tangaloi lingilingi nona takaro vuroki hi i Sus, hinea a nona ingwa kokona u tu varea tina gwatuivanua hi, mo lai a buluki mana vira vinuvinu vaki mana matakihala na titiba na gwatuivanua hi. Aia mana vao rau lengaia kwara rana kwohi mate a kairoroi* lakwa na kaihora* kokona kairua hi.

¹⁴I Banabas mai Pol, raru mo rongo na kinau hi kwara rana vai, raru mo dare lugwagaru huri raru vosangi kwara raru rongo hati, raru mo kwalao vaki lolo livuka na vao raru mo koleki

¹⁵raru mo viti “!Ngwera! ?Kworohokinia tulu mo vai kwehini? I kamirua a tangaloi vohoki, a tangaloi hokikamu. Keru hugu hikeni kwara keru ne viti na Roro Karea tivarea lakwakamu. Keru lengaia kwara tulu ne bohi na domimiu tina takaro vuroki hinea a noga huirana tikei, vae tulu ne kaluhaki God Tatoka, hinea mo tau na taetae, a varamana, a tahi, mana kinau savia lologa.

¹⁶Tuai u tiraki savi na tangaloi kwara rana lakalakao lo doridoriga siboga.

¹⁷Vae tigwaravu u vosangia sibona kina kinau karekarea hi mo vai, mo bete na uha vanamai aulu, mana rivurivu lo taroki bakotoki. U bete na hinaka mo vai na domimiu ramo lagwalagwa.”

¹⁸A kaihora kokona kairua hi raru kwaha hokinia hi, vae garagarani kwara raru nehe tu koro lavi na vao tea hinea rau lengaia kwara rana kwohi mate na kairoroi lakwararua.

¹⁹Hikani a gwaloana noi Isrel* ratuaki rau vanamai tina gwatuivanua Antiok takwa-hi Pisitia, vake tina gwatuivanua Ikoniam, ramo vai lavi na vao ramo bulu maira, ramo vohoi i Pol kina vatu ramo reveia tivarea tina gwatuivanua, rau domi kwara u mate.

²⁰Vae lolona a tangaloi hauhuri lui Jisas ramo vileki tabulutaki dalidalia, mo maraka mo mule taliku vaki lo gwatuivanua lakua. Mavukona i rarua mai Banabas raru mo vano vaki lo gwatuivanua Debe.

²¹I Pol mai Banabas raru heretuvaki na Roro Karea lo gwatuivanua Debe, raru mo lai lavi na tangaloi rusa ramo mulemai ki ngwalagelo noi Jisas. Vunu raru mo mule taliku vaki lo gwatuivanua Listra, vaki lo gwatuivanua Ikoniam, vunu vaki lo gwatuivanua Antiok takwa-hi lo vanua Pisitia.

²²Raru mo kwahabibi na tangaloi hauhuri raru mo kwaha rakati na domiga kwara rana toka ne madi lo noga hauhuriana. Raru mo huhuira raru mo viti “I kita tana huri na hala kwara tana soro tilolo Vanua Karagwa hinea i God u hugwe koroa, vae lo hala hi tana hagwe na rongoana hati rusa.”

²³Raru mo rivuki na ngwarasea* vatavataha na bulubulu na kwarelua* noi Jisas. Raru tiutangaroa, raru mo rete, raru mo taura lo kaba na noda Hugwe* hinea rau hauhuri luna.

²⁴Hikani raru mo mule utuhi na vanua Pisitia, vunu raru mo duvule hivo vaki lo vanua Pamvilia.

²⁵Raru mo heretuvaki na leo i God lo gwatuivanua Peka, vunu raru mo vano tegetano vaki lo gwatuivanua Atalia.

²⁶Raru mo tiraki takwa-hi Atalia, raru mo mule taliku lo aga vaki lo gwatuivanua lakua Antiok lo vanua Siria. Lo vanua takwa-hi aira hi a kwarelua noi Jisas ramo tau kabaga lugaru eia tomua, ramo tiutangaroa kwara i God ne hago mairarua kina nona domi tabetabe lakua lo nogaru bolokiana hinea raru mo vai.

²⁷Raru mo maravuti lo gwatuivanua lakua Antiok taliku, raru mo kware vileki na kwarelua noi Jisas, raru mo viti lakwara huri na kinau savia i God mo vai lalahirarua, vake kwara i God mo takahi na hala lakwa na tangaloi tavalavarea tina gwaloana noi Isrel* kwara rana hauhuri lui Jisas.

²⁸Vunu raru hugu maira u tuai takwa-hi mana ngwalagelo noi Jisas.