Read West Ambae A Bolokiana 15 Bible Online

A Bolokiana 15 - West Ambae bible

A Bolokiana 15

¹Hikani a tangaloi tuaki rau vanamai tina vanua Sutia vaki lo gwatuivanua lakua Antiok, ramo tinakaki ramo huhui na rabela ramo viti “Diko tulu he lavi na kaimatai* lo siosio tea hoki na Tangwata* noi Mosis mo viti tulu nehe ahi tea.”

²I Pol mai Banabas raru vireve maira lo leoki ramo kwaha haburu luna. Vunu a kwarelua* noi Jisas rau domi u taritarisa kwara i Pol mai Banabas maira ratuaki Antiok vake rana vano vaki Serusalem, rana tagai na kaihora* kokona mana ngwarasea* na kwarelua huri na leo hi.

³A kwarelua noi Jisas ramo hokakinira, vunu lo halaga vaki Serusalem ramo lakao lalahi na vanua Vonisia maia Sameria*, ramo kwaha mana rabela lui Kraes*, ramo viti huri kwara a tangaloi tavalavarea tina gwaloana noi Isrel* rau halebohi vaki mai God. A rabela vano hi aira vunu ramo rongo na roro hikani u havutira haburu.

⁴Lolona ramo maravuti Serusalem, a kwarelua noi Jisas, mana kaihora kokona, mana ngwarasea, ramo lai tabetabekinira. Vunu i Pol maira ramo viti savi na kinau hi lakwara hinea i God mo vai lalahira.

⁵Vae a tangaloi hauhuri tuaki, hinea ramo bulu mana Varisi* maira, ramo maraka hake ramo viti “A tangaloi tavalavarea tikita a gwaloana noi Isrel, hinea rau hauhuri lui Jisas, u taritarisa kwara rana lavi na kaimatai lo siosio, vake u taritarisa kwara tulu ne viti lakwara kwara rana huri na Tangwata noi Mosis.”

⁶Hikani a kaihora* kokona mana ngwarasea* ramo vileki tabulutaki kwara rana domidomi lo leo hi.

⁷Rau kwahakwaha luna u tuai, vunu i Pita mori maraka hake mo viti “Ratua. Tulu kikilai kwara tuai i God u mataiau tikamu kwara na heretuvaki na leo na Roro Karea lakwa na tangaloi tavalavarea tina gwaloana noi Isrel* kwara rana rongo, rana hauhuri.

⁸I God u kikilai na domi na tangaloi, mo vosangi kwara u lagwa, mo hile na Tanungwe Kokona lakwa na tangaloi tavalavarea hokinia hi mo vai lakwakita.

⁹He vai bohiki na kinau tea vohoki lakwara, vae u vakahaki na domiga mo ngwasara huri rau hauhuri, hokinia hi mo vakahaki na domida.

¹⁰?Hikani kworoho tulu mo vai kwara tulu ne kahi haro na domi i God? ?Kworoho tulu mo tau na hagohago na Tangwata* mava lo gula na tangaloi hauhuri? I kita mai ratubuda, tahe kwali lavia tea.

¹¹I kita tau hauhuri kwara tamo ahi hokinira kina domi tabetabe lakua nona Hugwe* i Jisas.”

¹²A leo hi mo vai na vao savia ramo hugu butu, ramo rongo i Banabas mai Pol raru mo viti savi na kaivosangi mana idilakiana hinea i God mo vai lalahirarua lo livuka na tangaloi tavalavarea tina gwaloana noi Isrel.

¹³Raru mo kwahakwaha mo rovo, vunu i Semis mo kwaha mo viti “Rabela. Tulu rongohuriau.

¹⁴I Saemon mori matangwasaraki hi nga, kwara i God u matai kworohoki na tangaloi ratuaki tina tangaloi tavalavarea tina gwaloana noi Isrel*, mo lavira kwara rana kwareki a bulana tangaloi.

¹⁵A leo na tangaloi* duruduruki u taritarisa vohoki mana leo hi, hoki na Uliuli* Kokona mo viti kwara

¹⁶a Hugwe i God mo viti ‘Takuni tiua hi na mulemai, nari tabe na ingwa na hugwe lakua i Devit hi mo sovi. I nau nari vai huri na ingwa hi mo matalatala, nari tabea taliku.

¹⁷Vunu savisavi na tangaloi tuaki lo varamana, aira hi a tangaloi tavalavarea tina gwaloana noi Isrel savira hinea nomo kwarera kwara ki nogu, ranari soro haroau i nau a Hugwe i God.

¹⁸Aia hi a nogu leo i nau a Hugwe i God, nu matangwasarakinia ba tuai.’ ”

¹⁹Vunu i Semis mo viti kwara, “Hikani a domigu. He karea tea kwara tana vai na tangaloi tavalavarea tina gwaloana noi Isrel rana rongo hati hinea rau halebohi ba vaki mai God.

²⁰I kita tana uli na leo tana viti lakwara kwara a hinaka hinea rahe taritarisa tea, huri a tangaloi rau betera ba lakwa na takaro vuroki maira, rana hatu kani. Rana hatu vai a doridori hati mana vavine. Rana hatu kani te kinau hinea rau likotira huri a dai luna radu. Vunu vake rana hatu kani a dai.

²¹Tana surira kwehini huri vanamai evina kinia a gwaloana noi Isrel rau valuki na Tangwata* noi Mosis lolo vale* na tiutangaroa maira vataha na Rani* na Mabuana, vake rau heretuvaki na leona vatavataha na gwatuivanua lalakua.”

²²Vunu a kaihora* kokona mana ngwarasea*, aira haragoki mana kwarelua* noi Jisas savira, ramo domi kwara rana matai te tangaloi tiura kwara rana hokakinira mai Pol mai Banabas vaki lo gwatuivanua lakua Antiok. Ramo matai i Sutas, u kwareki Basabas, mai Saelas, hinea a rabela rau domi mavakirarua haburu.

²³Hikani ramo uli na leta hika, ramo betea lakwara. [14] Lo leta hi ramo viti kwara, “I kami a kaihora kokona mana ngwarasea, i kami i ratuamiu keu hokaki nomai lagwaana lakwakamu, a tangaloi hauhuri tavalavarea tina gwaloana noi Isrel* hi tulu toka lolo gwatuivanua lakua Antiok, mana vanua Siria maia Silisia.

²⁴Keu rongo kwara a tangaloi tuaki hi lo nomai bulubulu ramo vano tivarea ramo vaikamu tulu mo rongo hati kina leoga hi ramo viti. Vae i kami kehe harara tea kwara rana vai hokinia hi.

²⁵Huri na kinau hi, keu bulu tabulutaki kemo kwahakwaha kemo masinge kwara kena matai na tangaloi kairua kwara kena hokakirarua vaki maikamu. Vae raru ne huri na rabelada hi kairua i Pol mai Banabas, i rarua a bela karea

²⁶hinea raru mo tiraki na mamaurianagaru huri na boloki na noda Hugwe* i Jisas Kraes*.

²⁷Hikani keu hokaki i Sutas mai Saelas vaki maikamu, kwara vae raru ne lavi na leo hika kemo ulia lakwakamu, raru ne viti huria taliku ki nakogaru bakotoki lakwakamu.

²⁸A domidomi nona Tanungwe Kokona, vae a nomai domidomi vake, kwara kenahe tau na korokoro te dolua vake lumiu hinea ne hoki na hagohago mava lumiu. Vae a korokoro aira hika kehekeheki u taritarisa kwara kena rivukira.

²⁹Tulu hatu kani a hinaka a tangaloi rau betera lakwa na takaro vuroki maira, tulu hatu kani a dai, tulu hatu kani te kinau hinea rau likotira huri a dai luga radu, tulu hatu vai a doridori hati mana vavine. Vae diko tulu nehe galo tea lo korokoro vano hi, u karea haburu. A leomai tarisaki hike.”

³⁰A kaitomuaki na kwarelua vano hi ramo hokaki na kailai na leo kaivati vano hi ramo vano tegetano vaki lo gwatuivanua lakua Antiok. Ramo vileki tabulutaki na tangaloi hauhuri ramo bete na leta hika lakwara.

³¹Lolona a tangaloi vano hi ramo valuki na leo hi, u havutira haburu kina leo hika, huri u vai na domiga mo huira.

³²I Sutas mai Saelas, i rarua a tangaloi* duruduruki, raru tuku kwahakwaha u tuai mana rabela, raru mo kwahabibira raru mo vaira ramo huira.

³³Raru mo hugu takwa-hi he tuai te haburu, vunu a rabela ramo kwaha dudulirarua, ramo uduhuri ki God kwara ne bete na magemuana lakwararua. Ramo hokakirarua mule taliku vaki maira hinea ramo hokakirarua tomua. [15]

³⁵I Pol mai Banabas raru mo hugu mala tuai lo gwatuivanua Antiok. Raru mo huhui haragoki mana tangaloi rusa vake, ramo heretuvaki na leo huri na noda Hugwe.

³⁶Takuni tiua hi i Pol mo viti lakwai Banabas kwara, “Taru va mule taliku taru va tiroki na bela vataha na gwatuivanua hinea taru mo heretuvaki na leo huri na noda Hugwe* eia. Taru va tagaira kwara rau toka kworohokinia.”

³⁷I Banabas u lengaia kwara ne lavi i Sione Mak ne hurirarua.

³⁸Vae i Pol he domi te kwara u karea kwara raru ne lavia, huri he hugu te mairarua vaki lo taroki hi a nogaru boloki mo rovo, vae mo halebohi mo tirakirarua lo vanua Pamvilia.

³⁹Hikani raru mo viroro huria, vae raru mo makwahe. I Banabas mo lavi i Mak, raru mo vano lo aga vaki lo vanua Saevras.

⁴⁰Vae i Pol mo lavi i Saelas mo huria. A rabela ramo tiutangaroa lakwa na noda Hugwe kwara ne tagahurirarua kina nona domi tabetabe lakua, vunu raru mo vano tiura.

⁴¹Raru vano laliki lo vanua Siria maia Silisia, raru mo kwahabibi na kwarelua* noi Jisas kwara rana huira vakevake.