Read West Ambae A Bolokiana 16 Bible Online

A Bolokiana 16 - West Ambae bible

A Bolokiana 16

¹Hikani i Pol mo vano taliku vaki lo gwatuivanua Debe maia Listra. A ngwalagelo noi Jisas katukwale a hinana i Timoti u toka takwa-hi. I retahina vake aia a tangaloi hauhuri lui Jisas, aia a gwaloana noi Isrel*, vae i tamana aia a ngwera Gris.

²A rabela savia takwa-hi lolo gwatuivanua Listra maia Ikoniam, rau kaluki Timoti.

³Hikani i Pol u lengaia kwara ne lavi Timoti ne hurira, hokinia mo vai na kaimatai* lo siosio luna. U vai hokinia hi kwara a gwaloana noi Isrel savia hi rau toka takwa-hi ranahe rongo hati tea huri rau kikilai kwara i tama i Timoti aia a ngwera Gris.

⁴I Pol maira ramo vano laliki lo gwatugwatui-vanua, ramo kwahakwaha mana tangaloi hauhuri lui Jisas, ramo toko viti huri a korokoro aira vano hi hinea a kaihora* kokona mana ngwarasea* lo gwatuivanua Serusalem ramo taura. Ramo kwahabibira kwara rana rongohuri na korokoro aira vano hi.

⁵Hikani a kwarelua* noi Jisas ramo huira lo hauhuriana, hokinia vataha na rani a gwiraga mo toko rusa vakevake.

⁶Ramo vano laliki takwa-hi lo vanua Vrisia maia Galesia huri a Tanungwe Kokona he tirakinira tea kwara rana kwalahaki na leo lo vanua Esia*.

⁷Ramo maravuti lo gweregwere na vanua Misia, rau vaivai rongo kwara rana soro vaki lo vanua Bitinia, vae a Tanungwe noi Jisas he tirakinira tea.

⁸Hikani ramo vano bakotoki lalahi na vanua Misia, vunu ramo vano tegetano vaki lo gwatuivanua Troas.

⁹Lolo bongi hini i Pol u tagai na vakatabobo. A tangaloi tina vanua Masetonia mo tu u lengaia haburu kwara i Pol ne vanamai vaki maira, mo kwaha maia viti “!Ko vanamai vaki lo vanua Masetonia, ko hago maikami!”

¹⁰I Pol mo tagai na vakatabobo hi mo rovo vunu kemo vai rarai kwara kena vano vaki lo vanua Masetonia huri keu kikilai i God u kwarekami kwara kena kwalahaki na Roro Karea lakwa na tangaloi takwa-hi.

¹¹Keu tiraki lo aga tina gwatuivanua Troas, kemo kwalao bakotoki utu vaki lo vanua Samotres. Mavukona kemo maravuti lo vanua Masetonia kemo galo hake lo gwatuivanua Neavolis.

¹²Kemo lakao tina vanua takwahini kemo maravuti lo gwatuivanua Vilivae lo mahigwaki tomua sea lo vanua lakua hi Masetonia. [16] Vake aia a gwatuivanua hinea a nona tangaloi tavuti na gwatuivanua lakua Rom. Keu hugu kelekele lo gwatuivanua hi.

¹³Lo Rani* na Mabuana, kemo ngwalua tina vanua hi, kemo vano vaki mana kwai. Keu domi kwara a tanotano na gwaloana noi Isrel* mana kwai hi rau tuku tiutangaroa eia. Kemo hugu takwa-hi kemo toko kwahakwaha mana ravavine hi ramo vileki tabulutaki eia.

¹⁴Katukwale tiura hi u rongokami a hinana i Litia, tina gwatuivanua Tuatira. U tuku hokaki a lugwa karekarea aira hi rau kara dodoka hinea a vulavula na hugwe lalakua. U tuku kaluhaki God kina domi mavakiana vae a Hugwe* i Jisas mo takahi na domina kwara ne rongo na leo noi Pol.

¹⁵Hikani aia mana tangaloi rusa hi tatana ramo lai bavtaes. Vunu mo kwarekami mo viti “Diko i kamu tulu taga kwara i nau kareaki nu hauhuri lo noda Hugwe, tulu vanamai tulu hugu tatagu.” Mo seseaka vae kemo masinge kemo huria.

¹⁶Lo rani katukwale i kami keu vano vaki lo tanotano na tiutangaroa. Kemo hagwe na vavine takwae lo hala, u boloki vuroki tavuti na masi, a tanungwe hati luna mo vaia mo toko viti na kinau kwara vae ne mule luna te taroki. Nona masi rau hagwe mane* lakua huria lo leona.

¹⁷Mo hurikami i kami mai Pol, mo toko kware karakara mo viti “A tangaloi vano hikani aira a tangaloi boloki noi God hi Aulu Karakara. Ramo viti na hala na ahiana lakwakamu kwara tulu ne ahi.”

¹⁸U vai kwehi a rani u rusa, tarisaki hi i Pol mo rongo hati mo halebohi mo kwaha lo tanungwe hati hi mo viti “Lo hina i Jisas Kraes* nu horako ko vano tiua.” A tanungwe hi mo vano tiua lo taro aia hi vohoki.

¹⁹Hikani a nona masi rau kikilai kwara ranahe bihubihu lai te lo leona taliku, vae ramo kwiribibi Pol mai Saelas ramo reveirarua vaki na sara mana tangaloi na kwaheki leo.

²⁰Ramo lavirarua vaki mana tangaloi na kwaheki leo kairua nona ngwera Rom, ramo viti “A tangaloi hika i rarua a gwaloana noi Isrel*, raru tuku vai na rongohati lo gwatuivanuada.

²¹Raru tuku huhui na doridori hinea rahe taritarisa tea vovohi na noda tangwata. I kita hi tavuti na gwatuivanua lakua Rom vae he taritarisa tea kwara tana huri na doridori aira vano hi.”

²²A vao ramo bulu tavaluki hurirarua, a tangaloi na kwaheki leo nona ngwera Rom hi kairua raru mo tukuri na lugwa i Pol mai Saelas tirarua, vunu raru mo viti kwara rana vilitirarua.

²³Ramo vilitirarua mo rovo, vunu raru mo taurarua tilolo ingwa na gwarugwaru, raru mo tuliki lakwa na kaitagahuri na ingwa na gwarugwaru hi kwara ne gwarubibirarua ne madi.

²⁴Mo rongo na leo hi raru mo tuliki lakwae, vunu mo tau i Pol mai Saelas tilolo ingwa radu, mo gwaru na garugaru tilolo kwakwanga na vikai u mava.

²⁵Lo livukai-bongi i Pol mai Saelas raru tiutangaroa raru mo toko kaho a bolo na kaluhakiana lakwai God. A tangaloi ratuaki vake eia hi rau hugu lolo ingwa na gwarugwaru ramo toko rongohurirarua.

²⁶Heheriki a ruru lakua mo vanamai, mo kiluki na ingwa na gwarugwaru hi u kilukinia vaki evina. Hikani a katama ramo matakahi, a tangaloi savia lolo ingwa na gwarugwaru hi a kaigwaruga ramo visoviki tiura.

²⁷A kaitagahuri na ingwa na gwarugwaru hi mo rada, mo tagai na katama na ingwa na gwarugwaru hi rau matakahi, u domi kwara a tangaloi hi ramo hugu lolo ingwa na gwarugwaru rau ahi vunu, mo hau ruruhi na nona bue na vuro u vai kwara ne ahi mateia sibona.

²⁸Vae i Pol mo suria karakara mo viti “Ko hatu vai bulakikinigo sibomu. I kami vunu hike radu nga.”

²⁹Hikani a kaitagahuri na ingwa hi mo kwarekware kwara rana lai te laeti vanamai, mo kwalao tilolo ingwa, a huina u ruru haburu, mo sovi hivo vaki lo garu i Pol mai Saelas.

³⁰Vunu mo tomuakirarua tivarea mo uduhuri kirarua mo viti “Rakairua. ?Na vai kworoho vae nana ahi?”

³¹Raru mo viti kwara, “Ko hauhuri lo Hugwe* i Jisas vae kona ahi, i nigo mana nomu vakabela vake.”

³²Vunu i rarua raru mo heretuvaki na leo na Hugwe lakwae maira doluaki hi lolo ingwana.

³³Lo taroki hi vohoki bongi a kaitagahuri na ingwa na gwarugwaru mo lavirarua mo kwasuki na mataikagaru, vunu heheriki aia, maira hi tatana mai raranatuna, ramo lai bavtaes.

³⁴Vunu mo lavi i Pol mai Saelas vaki tatana, mo bete hinaka lakwararua raru mo kani. Aira vunuhira hi tatana u havutira haburu, huri hikani rau hauhuri lui God.

³⁵Mavukona a tangaloi na kwaheki leo nona ngwera Rom raru mo hora na bulusman, raru viti “Tulu tiraki na tangaloi kairua hi raru ne vano.”

³⁶Hikani a kaitagahuri na ingwa na gwarugwaru mo viti lakwai Pol kwara, “A tangaloi na kwaheki leo nona ngwera Rom raru hokaki a leo lakwakamurua mai Saelas kwara kuru ne vano tabetabeki. Karea, kuru tiraki na vanua hi kuru vano, ne tangwata lolo domimiru.”

³⁷Vae i Pol mo viti lakwa na bulusman vano hi kwara, “!Ei! ?Kworohokinia? I kamirua tavuti na gwatuivanua lakua Rom. !Vae tulu tagaia! Raru he hagwe te hatiki lumaru, vae raru mo hora na tangaloi kwara rana vilitikamirua koro na nako na tangaloi rusa. Vunu raru mo taukamirua tilolo ingwa na gwarugwaru. ?Vunu hikani raru vai kwara raru ne horakamirua keru ne vano raraveki? !Hete vohoki! A tangaloi na kwaheki leo nona ngwera Rom i rarua sibogaru raru ne vanamai raru ne tirakikamirua.”

³⁸A bulusman vano hi ramo vano ramo viti na leo hika lakwa na tangaloi na kwaheki leo nona ngwera Rom. Vae raru mo rongo kwara i Pol mai Saelas i rarua tavuti na gwatuivanua lakua Rom raru mo mataku.

³⁹Hikani raru mo vano raru mo lai nogaru sovihivo lakwararua, vunu raru mo lavirarua tina ingwa na gwarugwaru raru mo horararua kwara raru ne vano tina gwatuivanua hi.

⁴⁰Hikani i Pol mai Saelas raru mo tiraki na ingwa na gwarugwaru hi, raru mo vano vaki tata i Litia. Raru mo bulu mana rabela, raru mo kwahabibira, vunu raru mo vano tiura.