Read West Ambae A Bolokiana 19 Bible Online

A Bolokiana 19 - West Ambae bible

A Bolokiana 19

¹Lolona hi i Avolos aia lolo gwatuivanua Korin, i Pol mo lakao lalahi na vanua Vrisia auta vunu mo duvule hivo mo maravuti lo gwatuivanua Evesas. Takwahini u hagwe na ngwalagelo ratuaki noi Jisas,

²mo uduhuri kinira mo viti kwara, “?Kworohokinia? ?Lolona hi i kamu tulu mo hauhuri lui Jisas, tulu lavi na Tanungwe Kokona diko hetea?” Ramo daraki ramo viti kwara, “I kami kehe rongo na duduhaki na Tanungwe Kokona te vohoki.”

³Hikani i Pol mo uduhuri kinira taliku mo viti “?Vae i kamu tulu lavi na hava bavtaes?” Ramo daraki ramo viti “A bavtaes hi i Sione mo vai.”

⁴Vunu i Pol mo viti “A bavtaes noi Sione hurira hi rau halebohi tina noga hatiana. Vae i Sione mo viti lakwa na gwaloana noi Isrel* kwara rana hauhuri luna aia hi vae ne huria takuni. Aia hi i Jisas.”

⁵Ramo rongo hokinia hika, ramo lai bavtaes lo hina na Hugwe* i Jisas.

⁶Vunu i Pol mo tatagao lo gwatuga a Tanungwe Kokona mo hivo tiluga, ramo kwaha kina leo mataroi, vake rau duruki na leo ti God.

⁷Doluakinira kwara aira te hangavulu dongwana kairua.

⁸Hikani i Pol mo vano vaki lolo vale* na tiutangaroa nona gwaloana noi Isrel. A vula kaitolu mo kwaha mana tangaloi rusa, he mataku tea. Mo kwaha maira, u lengaia haburu kwara ne vaira rana kikilai bakotoki kwara i God u hugwe korora, vae u taritarisa kwara rana domi mavakinia.

⁹Vae tuaki a gwatuga rau madi rahe hauhuri tea, rau viti a kinau rau hati huri na Hala na noda Hugwe lolo nako na noga bulubulu doluaki. Hokinia i Pol mo tirakinira mo lavi na ngwalagelo noi Jisas ramo huria. Vataha na rani rau tuku kwahakwaha tabulutaki lolo ingwa na huhuiana noi Tiranas.

¹⁰Mo vanovano vae a hukao kairua, hokinia a tangaloi savia ramo toka lo vanua Esia*, aira hi a gwaloana noi Isrel maira hi tavalavarea tina gwaloana noi Isrel, ramo rongo na leo nona Hugwe i Jisas.

¹¹Hikani i God u vai na vaisea lalahi i Pol u dolua vohoki.

¹²A tangaloi ramo lavi na kaikweti na gwatu tina gwatuna mana lugwa na boloki tiua, vunu ramo lavira vaki mana tangaloi hinea rau lenga, vae ramo rongo karea tina kaga lengeana, a tanungwe hati ramo vano tiura.

¹³Takwa-hi a gwaloana noi Isrel* tuaki rau tuku vano dali na vanua kwara rana livu a tanungwe hati leletiu. Vae ramo vaivai rongo kwara rana vai na boloki hika lo hina na Hugwe* i Jisas. Ramo viti lakwa na tanungwe hati kwara, “Nu horakamu lo hina i Jisas hinea i Pol mo heretuva kinia.”

¹⁴Hikani a raranatu na hugwe na tangaloi* lingilingi katukwale nona gwaloana noi Isrel a hinana i Skeva aira kaibitu, rau vai rongo kwara rana livu a tanungwe hati leletiu hokinia hi.

¹⁵Vae a tanungwe hati hi mo viti lakwara kwara, “Nu kikilai i Jisas, vake nu kikilai i Pol, vae nahe kikilai tea kwara i kamu ihe.”

¹⁶Hikani a tangaloi hi a tanungwe hati luna mo vai vuro maira, vae mo guira. Mo vai hokotira mo gae savi na lugwaga tiura ramo kwalao aira vunu tina ingwana.

¹⁷A gwaloana noi Isrel savira mana tangaloi tavalavarea tina gwaloana noi Isrel hinea rau toka lolo gwatuivanua Evesas ramo rongo hokinia hi, rau mataku haburu, ramo domi mavaki na hina na Hugwe i Jisas haburu.

¹⁸Hikani a tangaloi hauhuri rusa ramo vanamai, ramo maraka ramo matangwasaraki noga vaivai hati lo nako na tangaloi rusa huri ramo vai a novo.

¹⁹U rusa tiura hini, tuai rau tuku vai a vaiana, vae hikani ramo vileki tabulutaki na noga buku* na novo, ramo huraira letiu lo nako na tangaloi vunuhia. Ramo hariki tabulutaki na mane* na noga buku, ramo hagwea kwara a maneki doluaki a vatu u tari mulemule vakangavu kailima.

²⁰Hikani lo huirana lakua hokinia hi, a leo na noda Hugwe, a tangaloi ramo kwalahakinia mo matala mo mulemai mo huira vakevake.

²¹Takuni tina kinau vano hi, i Pol mo domi utuhia kwara ne vano lalahi na vanua Masetonia mana vanua Gris, vunu kwara ne mule taliku vaki Serusalem. [20] I Pol mo viti “Na vano takwa-hi vunu takuni tiua hi na vano na tagai na gwatuivanua lakua Rom vake.”

²²Hikani mo hora i Timoti mai Erastas, a nona kaihago kairua, vaki lo vanua Masetonia vae aia u hugu takwa-hi radu lo vanua Esia*.

²³Lo taro aia hi a viroroa lakua lo gwatuivanua Evesas huri na Hala na noda Hugwe*.

²⁴A tangaloi katukwale a hinana i Demetrius aia a tangaloi na kihi silva. Lo vanua hi a tangaloi rusa rau tiutangaroa lakwa na takaro vuroki a vavine i Atemis*. Vae i Demetrius u tuku kihi a ingwa kwaririgi kina silva hoki na ingwa kokona nona takaro vuroki hi. Aia mana nona tangaloi boloki ramo hokakinira vae rau seme haburuki na konata tiura.

²⁵Hokinia mo kware tabulutakinira maira hinea tuaki a noga boloki hokinira, mo viti lakwara kwara, “Ngwera. Tulu kikilai kwara a noda mane* u tuku rusa kina boloki aia hika.

²⁶I kamu sibomiu tulu taga, tulu rongo na havakinau hini a mahao vuroki hi i Pol mo viti diko mo vai. U viti kwara a takaro hi a tangaloi rau kihi, a takaro vuroki. Hikani lo gwatuivanua hika Evesas, hike laliki maikita lo vanua Esia, u reve kareaki na tangaloi vae a domiga ramo bohi.

²⁷Hika a leona u garagarani kwara ne vai a tangaloi rana domi bulakiki na noda boloki hika kwara u hati. Hete aia hini kehekeheki vae a leona hi ne vai na tangaloi rana taga hibahibaki na ingwa kokona na noda takaro i Atemis aia hi u lakua haburu. Lo gweregwereki diko a leo noi Pol ne lavi na hina i Atemis letiu ne mulemai kina kinau vuroki, ne hati vohoki, huri lo vanua hika Esia, vake vataha na mahagweki, a tangaloi savia rau tuku sovi hivo kina domi mavakiana vovohi na takaro hi.”

²⁸Lolona a vao ramo rongo na leo vano hi rau vai nakara haburu, ramo vingaraki ramo viti “!Mo karea haburu lakwai Atemis lo gwatuivanua Evesas!”

²⁹Mo roro kinira doluaki na gwatuivanua hini. A bulubulu hi ramo kwalibibi na ngwera Masetonia kairua hinea raru mo toko huri laliki i Pol, a hinagaru i Gaeas mai Aristakas, ramo kwalao mairarua vaki lo ingwa lakua na vileki tabulutakiana.

³⁰I Pol sibona u lengaia kwara ne vano ne kwaha mana tangaloi vano hi, vae a tangaloi hauhuri rahe tirakinia tea.

³¹Vunu a ngwera Esia lalakua tuaki aira hinea a nona buluana, ramo hokaki na leo vaki maia ramo tu koroa kwara ne hatu soro vaki lolo ingwa lakua hi.

³²Lo taro aia hi, a huguhugu tabulutaki ramo vikwahaki karakara mo roro kinira. Tuaki rau viti a kinau katukwale, ratuaki rau viti a kinau dolua vake, huri u rusa tiura rahe kikilai tea kwara rau vanamai tabulutaki huri na havakinau.

³³A gwaloana noi Isrel* tuaki ramo susunia katukwale tiura a hinana i Aleksada vaki tomua, vae a tangaloi tuaki rau domi kwara a gwatakiki luna. I Aleksada mo tarutaru lima kinira mo vai rongo kwara ne viti matangwasaraki lakwara kwara a gwatakiki hete luna.

³⁴Vae lolona ramo kikilai kwara i Aleksada aia a gwaloana noi Isrel ramo vingaraki tabulutaki, ramo viti kwara, “!Mo karea haburu lakwai Atemis lo gwatuivanua Evesas! !Mo karea haburu lakwai Atemis lo gwatuivanua Evesas!” Ramo vingaraki hokinia hi u lavi na aoa kairua.

³⁵Rovonaki a tangaloi lakua na tovotovo na gwatuivanua lakua hini mo kwaha suri na domi na vao mo viti “Ngwera Evesas. A tangaloi savia rau kikilai kwara a gwatuivanua Evesas, a nona boloki hi kwara ne tagahuri na ingwa kokona nona takaro lakua hi i Atemis vake mana vatu kokona hi u sovi tina taetae.

³⁶A tangaloi nehe haro lavi na kinau te vano hika. Hokinia i kamu a domimiu ne masuri. He karea tea kwara tulu ne vai a domi madi hokinia hi.

³⁷Tulu lavi na tangaloi kairua hika vaki hikeni. Raru he balu te kinau lolo ingwa kokona nona takaro, diko raru he kwahakwaha hati te vovohi na noda takaro vavine hi.

³⁸Diko i Demetrius mana nona tangaloi boloki hini a noga leo hati te eia vovohi na tangaloi, a taroki eia, vae aira vunu rana kwahakwaha luna lo tanotano na arekiana. A tangaloi na kwaheki leo bakotoki rau hugu. U karea kwara rana tau na leo lakwa na tangaloi aira vano hi vunu ranari kwaheki na leoga.

³⁹Vae diko te kinau vake eia tulu lengaia, tanari vai tabetabekinia lo taro na kwahakwaha lakua lo gwatuivanuada.

⁴⁰Hika tau vaivai sarai. Kwara a ngwera Rom rana rongo, rana arekikita rana viti kwara tamo vikwali lo kinau hi mo vai hika karagwa. A tutu na noda leo tikei huri na viroroa hika. Tanahe vai lai tea kwara tana viti na kaimaloki.”

⁴¹Mo viti hokinia hika mo rovo, vunu mo hora girigiriki na tangaloi mule.