Read West Ambae A Bolokiana 2 Bible Online

A Bolokiana 2 - West Ambae bible

A Bolokiana 2

¹Lolona a Rani na Pentekos [2] mo maravuti, a tangaloi hauhuri savira ramo vileki tabulutaki lo tanotano katukwale.

²Heheriki a roro mo vanamai tina mahaleki u roro hoki na langi lakua, mo roro doluaki na ingwa hinea ramo hugu lolona.

³Vunu ramo tagai na kinau aira hoki na luamea na kabu ramo bulukao tiluga savira.

⁴Hikani aira vunu ramo kukwere kina Tanungwe Kokona ramo tinakaki ramo kwaha kina leo mataroi, huri a Tanungwe u vaira kwara rana kwaha kwehi.

⁵Hikani lo gwatuivanua lakua Serusalem a gwaloana noi Isrel* rusa rau toka takwa-hi hinea aira a tangaloi bakoto, rau domi mavaki God. Aira rau vanamai vataha na vanua lo varamana. [3]

⁶Lolona a vao ramo rongo na roro hika ramo vileki tabulutaki. Aira vunu rau tukutukui haburu huri vatavatahakinira rau rongora ramo kwaha kina noga leo.

⁷Hikani rau maruti, rau idila ramo viti “!Kwi, raka! A tangaloi aira vano hi ramo toko kwaha hokinia, aira vunu a ngwera Galili*.

⁸?I kita vunu tamo rongora kworohokinia ramo kwaha vatavataha na noda leo?

⁹Tau vanamai tina vanua rusa. Tuaki a ngwera Patia, tuaki a ngwera Mitia, tuaki a ngwera Elam, tuaki a ngwera Mesovotemia, tuaki a ngwera Sutia, tuaki a ngwera Kavatosia. Tuaki a ngwera Pontas, tuaki a ngwera Esia*,

¹⁰tuaki a ngwera Vrisia, tuaki a ngwera Pamvilia, tuaki a ngwera Isiv. Tuaki a ngwera Krit, tuaki a ngwera Arevia, vake tuaki a ngwera lo duvi na vanua Libia hinea garagarani mana gwatuivanua lakua Saerini, tuaki a ngwera Rom. I kita tuaki a gwaloana noi Isrel bakotoki, ratuaki a tangaloi tavalavarea tina gwaloana noi Isrel, ramo bohi tilo huhuiana nona gwaloana noi Isrel, vae i kita vunu tau rongora ramo kwaha vatavataha na noda leo ramo vitiviti huri na bolokiana lalakua hinea i God mo vai.”

¹¹

¹²Hikani aira vunu rau idila haburu, rau rongo lengalengakinia, ramo toko uduuduhuri kinira muleki ramo viti “?A kinau hika kworohokinia?”

¹³Vae tuaki ramo tiuvolohi na tangaloi hauhuri ramo viti “A tangaloi vano hikani rau reraka kina inuinu.”

¹⁴Hikani i Pita mo maraka hake mana kaihora* kokona hangavulu dongwana katukwale, mo kwaha karakara mo viti lakwa na vao kwara, “Rabela, i kamu hi a gwaloana noi Isrel*, maikamu hi tulu mo toka Serusalem vake, tulu rongo na viti lakwakamu, vae tulu ne kikilai kwara a havakinau.

¹⁵A tangaloi vano hika rahe reraka tea kina inuinu hokinia hi tulu mo domi. Hikani a mataniaho galo vohoki.

¹⁶Vae a kinau hika a tangaloi* duruduruki i Soel u viti ba tuai kwara,

¹⁷‘I God u viti “A taroki ne vanamai garagarani mana rani rovonaki, nari didihi na nogu Tanungwe tilo tangaloi savira. I raranatumiu a ngwera mana ravavine rana duruki na leo tiau. A nomiu ngwalagelo rana taga a vakatabobo, vunu a nomiu ngwarasea, nari vosangira kina kinau lo boborea.

¹⁸Io, vake a nogu tangaloi* boloki vuroki a ngwera mana ravavine, lo rani aira vano hi nari bete na nogu Tanungwe lakwara, rana duruki na leo tiau.

¹⁹Vae i nau na vai a idilakiana aulu lo taetae kwara ne vosangi na nogu huirana. Na vai a kaivosangi lo varamana evina vake, a dai, a kabu mana kabuiahu ngongota.

²⁰A mataniaho ne dodoka, a vula ne kara hoki na dai. Vunu a nogu Rani, [4] i nau a Hugwe i God, ne maravuti. Aia a rani lakua hinea u karea haburu.

²¹Lo taro hi, diko te tangaloi ne kware lo hinagu, vae ne ahi.” ’

²²“Gwaloana noi Isrel. Tulu rongo na leo vano hika. I Jisas aia a ngwera Nasaret, i God mo lalahia mo vai na vaisea mana idilakiana mana kaivosangi rusa kwara ne vosangi lakwakamu kwara i God u horae. I kamu tulu kikilai hika huri u vaiana lo livukamiu.

²³I God u kikilai, lo nona domiana sibona u domikinia ba kwara ne tau i Jisas tilo nomiu huirana. Tulu mo hago mana tangaloi doridori hati, ramo durua tilo kaibetu mo mate.

²⁴Vae i God u rakatia tina mateana, mo lavia tina huirana na mateana, huri a mateana he vai lai tea kwara ne kwiribibia.

²⁵A hugwe lakua i Devit u viti huria kwara, ‘Nu tagai na Hugwe i God aia koro na nakogu tigwaravu, huri aia tavaluki maiau lo matuagu, kwara vae na hatu rongo hati.

²⁶Huri na kinau hi a domigu u lagwalagwa, u havutiau haburu lo leogu nomo viti. A tarabehigu ne mabu, na domi tiluna hi,

²⁷huri i nigo konahe tiraki na tanungwegu tea kwara ne eno lo tanotano na tanungwe na tangaloi hinea rau mate, konahe tiraki na tarabehigu tea kwara ne madamada, huri i nau a nomu Tangaloi Kokona.

²⁸I nigo ku vosangiau kina hala vaki lo ahiana, vae ne havutiau haburu huri komo loli maiau.’

²⁹“Rabela. Na kwaha maikamu na matangwasaraki kwara a hugwe lakua i Devit a tubuki hini, u mate ramo tanomia. A tabuna u eno maikita vaki na hika.

³⁰Vae a hugwe lakua i Devit aia a tangaloi duruduruki, u kikilai kwara i God u tuliki na leo u huira lakwae kwara vae katukwale tina nona gwaloana ne kwareki a hugwe lakua hokinia.

³¹A hugwe lakua i Devit u tagaia kwara a havakinau hi i God ne vai, vae hokinia mo viti huri na marakaana noi Kraes* lolona mo viti ‘I God he tirakinia tea kwara ne eno lo tanotano na tanungwe na tangaloi hinea rau mate, a tarabehina he madamada tea.’

³²I God u rakati Jisas hi tina mateana, vae i kami vunu keu hago lo leoki luna.

³³I God u tabe hakekinia tilo matuana, vunu i Jisas mo lavi na Tanungwe Kokona tiua hokinia i Tamana mo tuliki, u didihia hika tilumai vae hokinia hi tulu mo taga tulu mo rongo.

³⁴A hugwe lakua i Devit sibona he vano tea vaki lolo taetae, vae aia u viti ‘A Hugwe i God u viti lakwa na nogu Hugwe* kwara, “Ko hugu hikeni lo matuagu, ku mabu.

³⁵tarisaki hi na vai na nomu tavaluivuro rana hugu tavutimu, rana kwareki a nomu tangaloi boloki vuroki.” ’

³⁶“I kita a gwaloana noi Isrel savikita kwara tana kikilai bakotoki kwara i Jisas hikani aia hini tulu mo durua tilo kaibetu, i God mo vaia mo kwareki a noda Hugwe, vake i Vurae*.”

³⁷Lolona ramo rongo na leoki hi mo hokoti na domiga, ramo viti lakwai Pita mana kaihora* kokona ratuaki kwara, “?Ratua, i kami kena vai kworoho?”

³⁸I Pita mo viti lakwara kwara, “I kamu vatavatahakikamu tulu ne halebohi tina nomiu hatiana, tulu lai a bavtaes lo hina i Jisas Kraes, vae i God ne domidomi koro nomiu doridori hati. Vunu i kamu tulu neri lavi na hilehile noi God a Tanungwe Kokona,

³⁹huri i God u tuliki na leo lakwakamu mai raranatumiu, vake lakwa na tangaloi rau vakahao radu. A tuliki leo hi u eno luga aira vunu hinea a Hugwe a noda God u tuku kwarera vaki maia sibona.”

⁴⁰I Pita mo heretuva lakwara kina leo rusa vake, mo kwahabibira, mo viti “Tulu vakahikikamu sibomiu vae tulu nehe rongo hati tea mana tangaloi hati lo vanua leia.”

⁴¹Hikani aira hini ramo hauhuri lo leona ramo lai a bavtaes, a valuvaluga hinea ramo bulu maira u tari vakaitolu lo rani hi.

⁴²A tangaloi hauhuri, tigwaravu lo doridoriga rau vileki tabulutaki kwara rana huhui tina kaihora* kokona. Rau bulubulu tabulutaki, rau kanikani vunu ramo kani a kanikani kokona, rau tiutangaroa tabulutaki. Tigwaravu rau huiratakinia.

⁴³Lo taro hi i God mo vai na idilakiana rusa mana kaivosangi lalahi na kaihora kokona, vae a tangaloi savia rau mataku haburu.

⁴⁴Doluaki na tangaloi hinea rau hauhuri ramo bulu tabulutaki vunu ramo hilehileki noga vivilagoki.

⁴⁵Ramo hokaki noga vivilagoki mana noga vanua ramo hileki maneki lakwara doluaki hokinia ramo lengaia.

⁴⁶Vataha na rani ramo vano tabulutaki vaki lo Vanua* Kokona noi God, vake ramo hileki kaga hinaka tabulutaki tataga, ramo kanikani lo lagwalagwa.

⁴⁷Ramo kaluhaki God, a tangaloi doluaki ramo domi mavakinira. Vataha na rani a Hugwe* u vakahiki na tangaloi, mo vaira ramo bulu lo bulubulu hi, vae ramo toko rusa vakevake.