Read West Ambae A Bolokiana 21 Bible Online

A Bolokiana 21 - West Ambae bible

A Bolokiana 21

¹Kemo kwaha dudulira, kemo tirakinira. Vunu kemo galo tilolo aga, kemo kwalao utu, kemo vanamai vaki lo vanua Kos. Mavukona kemo maravuti lo vanua Ros, vunu tiua takwahini kemo vano vaki lo gwatuivanua Patara kemo galo hake.

²Takwahini kemo hagwe na aga vake kwara ne vano vaki lo vanua Vonisia, hokinia kemo galo tiluna kemo kwalao taliku.

³Kemo vanamai kemo tagai na vanua Saevras, kemo kwalao lokibeo vaki lo vanua Siria. Kemo galo hake takwahini lo gwatuivanua Taea kwara a aga ne tau hakeki a vivilagoki takwa-hi.

⁴Keu hagwe na ngwalagelo noi Jisas takwa-hi, kemo hugu maira a kwiki katukwale. Hikani a Tanungwe Kokona mo bete na huirana lakwara, ramo viti lakwai Pol kwara ne hatu vano vaki lo gwatuivanua lakua Serusalem.

⁵Vae a nomai taro mo rovo maira, kemo tirakinira kwara kena vano lo halamai taliku. Aira vunu mai ravavinehiga mai raranatuga ramo hurikami tina gwatuivanua hi. I kami vunu kemo vano haragoki hivo vaki lo one na tahi kemo titiugwao hivo kemo tiutangaroa.

⁶Vunu kemo kwaha dudulira kemo galo tilo aga, vae aira ramo mulemule taliku vaki tataga.

⁷Hikani kemo vano lo halamai taliku, keu kwalao tina gwatuivanua Taea vaki lo gwatuivanua Tolemaes. Takwahini kemo galo hake, kemo hagwe na rabela kemo hugu maira a rani katukwale.

⁸Mavukona kemo tiraki na gwatuivanua hi kemo maravuti lo gwatuivanua lakua Sisaria, kemo galo hake. Takwahini kemo vano vaki lolo ingwa na tangaloi na kwalahaki Roro Karea hi i Viliv, kemo hugu maia. Aia hi katukwale tina tangaloi kaibitu hi ramo mataira lo gwatuivanua Serusalem. [24]

⁹I raranatuna a ravavine kaivati rahe laki te radu nga rau tuku duruki na leo ti God.

¹⁰Keu hugu takwahini a rani he rusa tea, vunu a tangaloi* duruduruki katukwale a hinana i Akavas mo maravuti, u vanamai tina vanua Sutia.

¹¹Mo vanamai vaki maikami, mo lavi na kwahi i Pol, mo gwaru na kabana mana garuna sibona kinia, mo viti kwara, “Hikani a leo na Tanungwe Kokona. U viti ‘A kaitomuaki nona gwaloana noi Isrel lo gwatuivanua Serusalem rana gwaru na tangaloi hi a kwahina hika, rana taua lo huirana nona tangaloi tavalavarea tina gwaloana noi Isrel*.’ ”

¹²Lolona kemo rongo na leo hokinia hi, i kami mana tangaloi takwa-hi kemo suri Pol kwara ne hatu vano vaki Serusalem.

¹³Vae i Pol mo daraki mo viti kwara, “?Kworoho tulu mo vai kwehi, tulu mo ngara hokinia hi, tulu vai na domigu mo boloki? I nau nahe rarai te kehekeheki kwara rana gwaruau Serusalem, vae kwara na mate vake takwa-hi huri na hina na noda Hugwe* i Jisas.”

¹⁴Vae i kami kehe suri lavi na domina tea. Hokinia kemo tiraki keu hugu butu, kemo viti kwara, “A domiana na noda Hugwe ne mule luna.”

¹⁵Keu hugu takwa-hi u tuai kelekele, vunu kemo vai rarai nomai vivilagoki kemo vano vaki Serusalem.

¹⁶A ngwalagelo noi Jisas tuaki tina gwatuivanua lakua Sisaria rau hurikami vake, ramo lavikami vaki mana ingwa na tangaloi katukwale aia a tangaloi hauhuri tuai, a hinana i Nason tina vanua Saevras. Vae kemo hugu maia.

¹⁷Lolona kemo maravuti lo gwatuivanua lakua Serusalem a rabela takwahini rau lai tabetabekikami haburu.

¹⁸Hikani mavukona i Pol u hurikami kwara ne tagai i Semis. A ngwarasea* tina kwarelua* noi Jisas takwa-hi aira eia vake.

¹⁹I Pol mo viti nona lagwaana lakwara vunu mo viti vunuhi na kinau lakwara hinea i God mo vai lo livuka na tangaloi tavalavarea tina gwaloana noi Isrel* lalahi na nona boloki.

²⁰Ramo rongo na leo noi Pol, aira vunu rau kaluhaki God. Vunu ramo kwaha mai Pol ramo viti “Tua, i nigo ku kikilai na gwaloana noi Isrel hike kwara rau toka kworohokinia. Rau taritarika rau mulemai ki tangaloi hauhuri lui Jisas, vae aira vunu rau kwiribibi na Tangwata* u huira radu.

²¹Aira rau rongo na roromu kwara komo toko huhui na gwaloana noi Isrel hinea ramo toka lo vanua rusa nona tangaloi tavalavarea tina gwaloana noi Isrel kwara rana halebohi tina Tangwata noi Mosis. Vake rau rongo kwara ku huhuira kwara rana hatu vai na kaimatai lo siosio lui raranatuga diko kwara rana hatu huri na doridori nona gwaloana noi Isrel.

²²Hikani rana rongo kwara ku maravuti. ?Vae hika tana vai aha?

²³Ko vai hokinia kena viti lakwako. A tangaloi kaivati hike ramo vai na tulikileo huira mai God. [25]

²⁴Vae mavuko kona hurira kona buluira lo bohiana hinea rana vai kwara rana ngwasara koro na nako i God. Vunu u karea kwara kona voli na noga kairoroi* na hura boniboni hinea rana kwohi mateira kwara rana kaluhaki i God kinira. Vunu a noga tulikileo huira ne kworo vae aira ranari bala vuluga ramo hiri a kumiga. Lo halaki hokinia hi a tangaloi savia ranari kikilai kwara a kareaki tikei lo kinau vano hikani ramo rongo kwara a tangaloi ramo toko vitiviti huriko luna. Vae i nigo sibomu ku toka u karea lo Tangwata noi Mosis.

²⁵Vae i kita tau hokaki a leo lakwa na tangaloi tavalavarea tina gwaloana noi Isrel u rovo ba, aira hinea rau mulemai ki tangaloi hauhuri. Tamo viti lakwara kwara i kita tau kwahakwaha luna ba kwara aira rana hatu kani na hinaka hinea a tangaloi rau betera lakwa na takaro vuroki maira. Rana hatu kani a dai diko te boboroa hinea rau likotira, huri a dai luga radu. Vake rana hatu vai a doridori hati mana vavine.”

²⁶Hikani i Pol mo lavi na tangaloi vano hi, vunu mavukona mo bulu maira lo bohiana hinea rau vai kwara rana ngwasara lo nako i God. Vunu mo vano tilolo Vanua* Kokona noi God mo viti lakwa na tangaloi* lingilingi kwara a rani kaivihe mo eno vunu a ngwera kaivati hi rana ngwasara lo nako i God. Lolona a taroki hi ne taritarisa, a tangaloi lingilingi rana ua a kairoroi na hura boniboni huri na tangaloi kaivati hi vatavatahakinira.

²⁷U garagarani kwara a rani kaibitu hi ne rovo, a gwaloana noi Isrel* ratuaki tina vanua Esia* ramo tagai Pol u hugu lolo Ara Kokona na Vanua* Kokona noi God. Ramo maraka ramo vai na vao ramo lologute ramo kwiribibi Pol.

²⁸Ramo kwaha karakara rau viti “!Ai! !Gwaloana noi Isrel! !Heheri! !Tulu hago! A tangaloi hikani u vano laliki vataha na mahagweki mo huhui na tangaloi kwara rana domi bulakikikita a gwaloana noi Isrel. Mo viti lakwara kwara rana domi bulakiki na Tangwata* noi Mosis mana Vanua Kokona noi God hika vake. Vae hikani u lavi na tangaloi tavalavarea tina gwaloana noi Isrel ratuaki vaki lolo Ara Kokona na ingwa Kokona noi God [26] kwara ne vai na tanotano kokona hi ne hogora.”

²⁹Aira rau viti kwehi huri rau tagai na ngwera Evesas katukwale i Trovimas mai Pol lolo gwatuivanua lakua. Vae aira rau tuku domi kwara i Pol u lavia vaki lolo Ara Kokona na Ingwa Kokona noi God.

³⁰A leo mo kwalao lalahi na gwatuivanua lakua takwa-hi, a tangaloi savia ramo kwalao tabulutaki, ramo kwiribibi Pol, ramo reveia tivarea tina Vanua Kokona noi God. Heheriki ramo hogoi koro na matakihalaki.

³¹A tangaloi vano hi rau vai kwara rana kwohi matei i Pol, vae a leo mo maravuti mana kaitovo na vuro nona ngwera Rom takwa-hi, kwara a ngwera Serusalem doluaki rau vikwali.

³²Heheriki a kaitovo na vuro hi mo lai a kaitomuaki na tangaloi na vuro ratuaki, mana tangaloi na vuro, ramo kwalao tegetano vaki mana vao lakua hi. A tangaloi ramo tagai na kaitovo na vuro mana tangaloi na vuro vano hi, vae rahe kwohi Pol te taliku ramo tiraki.

³³Hikani a kaitovo na vuro hi mo vano vaki mai Pol, mo kwiribibia. Vunu mo kwaha mana tangaloi na vuro kwara rana gwarua kina seni kairua. Vunu mo uduhuri mo viti “?Ihe tangaloi hika? ?U vai kworoho?”

³⁴Aira takwa-hi lolo vao rau kwaha karakara, tuaki rau viti a kinau katukwale, ratuaki rau viti a kinau dolua. Vae a kaitovo na vuro hi he hagwe bakotoki na leo te kwara kworohokinia. Hikani mo viti lakwa na nona tangaloi kwara rana lavi Pol vaki lolo ingwa na tangaloi na vuro.

³⁵I Pol mo lakao mo maravuti mana lata na ingwa hi, a tangaloi rau lologute haburu. Kwara a tangaloi na vuro rana lavia hake, hetea, vae ramo kwali halehalekinia ramo galo hake maia.

³⁶A tangaloi aira vunu ramo huria takuni ramo kwaha karakara ramo viti “!Kwohi mateia! !Kwohi mateia!”

³⁷A tangaloi na vuro vano hi rau vai kwara rana lavi Pol vaki lolo ingwaga, vae i Pol mo kwaha mana kaitovo na vuro mo viti “Ko tirakiau na kwaha maiko kelekele.” A kaitovo na vuro hi mo uduhuri kinia mo viti kwara, “!Ii! ?I nigo ku kikilai a leo nona ngwera Gris?

³⁸?I nigo hete a ngwera Isiv hinea tuai komo tinakaki na vuro vovohi na tangaloi na kavman, komo tomuaki na tangaloi u tari vakaivati hinea rau uaua tangaloi, tulu mo vano vaki lolo bubu vuroki?”

³⁹I Pol mo daraki mo viti kwara, “I nau a gwaloana noi Isrel*, nu vora lo gwatuivanua Tasas lo vanua Silisia, vae huri hi i nau a ngwera tavuti na gwatuivanua lakua hi. Kwara ku masinge kona tirakiau na kwaha mana tangaloi vano hi.”

⁴⁰A kaitovo na vuro hi mo tirakinia, hikani i Pol mo tu takwa-hi lo lata mo tarutaru lima kinira. Lolona ramo hugu butu i Pol mo kwaha maira lo leo nona gwaloana noi Isrel.