Read West Ambae A Bolokiana 22 Bible Online

A Bolokiana 22 - West Ambae bible

A Bolokiana 22

¹Mo viti “Karea ratua, ramama, tulu rongoau na matangwasarakiau lo nakomiu.”

²Ramo rongoa mo kwaha maira kina leo nona gwaloana noi Isrel aira rau hugu butu vohoki. I Pol mo vano nga lo leoki.

³Aia mo viti “I nau a gwaloana noi Isrel, nu vora lo gwatuivanua Tasas lo vanua Silisia, vae i nau nu ngwarasea hake takwahike lo gwatuivanua lakua Serusalem tavuti na huhuiana nona tangaloi huhui lakua hi i Gameliel. Aia u huhui tabetabekiau lo hala na Tangwata* noi ratubuda, vae i nau nu huira lo boloki noi God hokikamu savikamu hika karagwa.

⁴Tuai i nau nu vai bulabulakiki a tangaloi hinea rau huri na Hala noi Jisas, nu kwohi mateira. I nau nu kwiribibi a ngwera maira mana ravavine nu taura tilolo ingwa na gwarugwaru.

⁵A hugwe na tangaloi* lingilingi mana noda Tangaloi* Tovotovo Lalakua doluakinira vake rana viti lai kwara i nau nu viti kareaki. I nau nu lai a leo tiura rau uli lakwai ratuada a gwaloana noi Isrel lo gwatuivanua lakua Damaskes. Hokinia i nau nu vano takwa-hi kwara na kwiribibi a tangaloi rau huri na Hala noi Jisas, na lavira mule taliku vaki Serusalem mana gwarugwaruga kwara rana kwali na kakadiki.”

⁶Vunu i Pol mo vano nga mo viti kwara, “Lo taro hi nomo vano mo garagarani mana gwatuivanua Damaskes kwara te lo mataniaho kaheata, heheriki mo vila vanamai tina taetae mo kwaka dalidaliau.

⁷Nu sovi hivo tilo tano nomo rongo na dilao mo kwaha maiau mo viti ‘!Sol, Sol! ?Kworoho komo vai bulakikiau?’

⁸Nomo uduhuri nomo viti ‘?Hugwe*, i nigo ihe?’ Aia mo daraki mo viti lakweau ‘I nau i Jisas a ngwera Nasaret hinea i nigo komo toko vai bulakikiau.’

⁹A tangaloi aira hi ramo huriau rau tagai na vavarama hi vae rahe rongo na dilao na tangaloi tea hinea mo kwaha maiau.

¹⁰I nau nu uduhuri kinia nu viti ‘?Hugwe, na vai kworoho?’ Vae a Hugwe mo viti lakweau kwara, ‘Ko maraka ko vano vaki Damaskes, a tangaloi neri viti na leoki lakwako takwa-hi savisavi na kinau hinea i God u domi terekaki ba huriko kwara kona vai.’

¹¹A matagu mo dodo kina huirana na vila hi, hikani i rabuluigu vano hi ramo hago kabagu ramo tagaokiau vaki Damaskes.

¹²“A tangaloi takwahini a hinana i Ananaeas, aia a tangaloi bakoto u mavaki God, u rongohuri noda Tangwata*. A gwaloana noi Isrel* savia ramo toka takwa-hi Damaskes rau mavakinia.

¹³Aia mo vanamai vaki maiau, mo tu maiau mo viti ‘Tua Sol, ko tagataga taliku.’ Lo taro aia hi vohoki nomo tagataga taliku nomo tagaia.

¹⁴Aia mo kwaha maiau mo viti ‘I God noi ratubuda u mataiko kwara kona kikilai na domina, kwara kona tagai na bulana Tangaloi Boloki Bakoto, kona rongoa ne kwaha kina dilaona bakotoki,

¹⁵huri i nigo kona hago leo huria kwara kona viti lakwa na tangaloi savia a havakinau hi komo taga komo rongo.

¹⁶?Vae hikani, kworoho komo hugu mo tuai? Ko maraka ko matangwasaraki lakwai Jisas kwara aia a nomu Hugwe, ko lai bavtaes, vae ko tirakinia ne kwasuki na nomu doridori hati leletiu.’ ”

¹⁷Vunu i Pol mo hena nga mo viti kwara, “I nau nomo mule taliku vaki Serusalem, vae lolona nomo toko tiutangaroa lolo Vanua* Kokona noi God a vakatabobo mo vaiau.

¹⁸Nomo tagai na nogu Hugwe* mo kwaha maiau mo viti kwara, ‘!Heheri! Ko vano tina gwatuivanua Serusalem hika lai nga, huri a tangaloi vano hikani ranahe lai tabetabeki na nomu hagoleo te huriau.’

¹⁹Nu daraki nomo viti ‘Hugwe, aira rau kikilai tabetabekiau ba kwara i nau nu vano vaki lolo vale* na tiutangaroa na kwalibibira, vake nu kwohira hinea rau hauhuri lumu.

²⁰Vake lolona hi a nomu hagoleo hi i Steven ramo voho mateia, i nau takwa-hi maira, nu masinge lo leoki kwara ne va mate. Nu tagahuri tabetabeki a lugwaga aira hinea ramo kwohia.’

²¹Vae a Hugwe u viti lakweau kwara, ‘Ko vano, huri nu domikinia kwara na horako vaki vakahao vaki mana tangaloi tavalavarea tina gwaloana noi Isrel*.’ ” [NOTE TO TYPESETTER: Please put thinspace only between the single and double quotes.]

²²A tangaloi rau rongohuri i Pol tarisaki takwa-hi, vunu aira ramo tinakaki ramo kwaha karakara ramo viti “!Tulu kwohi mateia! !He taritarisa tea kwara ne hugu maikita!”

²³Hikani ramo kwaha karakara ramo iriiriki lugwaga ramo kaburaki gwia tilo mahaleki u vosangi kwara rau rongo hati haburu.

²⁴A kaitovo na vuro Rom takwa-hi mo viti lakwa na nona tangaloi kwara rana lavi Pol vaki lolo ingwaga, rana takwilia kwara vae i Pol ne viti lakwara kwara kworoho a gwaloana noi Isrel ramo kwaha karakara, ramo kwaha bulakikinia hokinia hi.

²⁵Vae lolona ramo gwarua kwara rana takwilia, i Pol mo kwaha mana kaitomuaki na tangaloi na vuro katukwale u tu takwa-hi mo viti “?Kworohokinia? I nau tavuti na gwatuivanua lakua Rom. ?U taritarisa lo nomiu tangwata kwara tulu ne takwiliau hi tulu he hagwe na hatiki te lugu radu nga?”

²⁶Vae a kaitomuaki hi mo rongo hokinia hi, mo vano vaki mana kaitovo na vuro hi, mo uduhuri kinia mo viti “?Ku vai na havakinau? A tangaloi hikani aia tavuti na gwatuivanua lakua Rom.”

²⁷Hikani a kaitovo na vuro hi mo vano vaki mai Pol mo uduhuri kinia mo viti “Ko viti lakweau. ?I nigo tavuti na gwatuivanua lakua Rom?” I Pol mo daraki mo viti “Io.”

²⁸A kaitovo na vuro hi mo viti “I nau nu hugu tavuti na gwatuivanua lakua Rom nomo voli a mane* u lakua.” Vae i Pol mo daraki mo viti “I nau nu vora tavuti na gwatuivanua lakua Rom bakotoki.”

²⁹Hikani a tangaloi vano hi hinea ramo vai kwara rana uhia kina ngwasa ramo maruti ramo susu taliku. A kaitovo na vuro hi mo rongo kikilaki kwara i Pol aia tavuti na gwatuivanua lakua Rom bakotoki mo mataku, huri aia u gwarua ba kina seni.

³⁰A kaitovo na vuro hi u lengaia kwara ne kikilai kwara a gwaloana noi Isrel* ramo kwaha bulakiki i Pol huri na havakinau. Hokinia mavukona mo teri na gwarugwaru i Pol mo viti lakwa na tangaloi* lingilingi lalakua mana Tangaloi* Tovotovo Lalakua nona gwaloana noi Isrel doluaki kwara rana bulu tabulutaki. Vunu mo lavi Pol, mo taua mo tu koro na nakoga.