Read West Ambae A Bolokiana 24 Bible Online

A Bolokiana 24 - West Ambae bible

A Bolokiana 24

¹A rani kailima rau vano ba, vunu a hugwe na tangaloi* lingilingi i Ananaeas, mana ngwarasea* tuaki, mana tangaloi hi u kikilai na hala na tangwata nona ngwera Rom u karea, a hinana i Tetalas, rau vano vaki lo gwatuivanua lakua Sisaria. Ramo maravuti ramo tu koro na nako na kavman lakua hi i Vilikis, ramo tau noga leo lakwae huri i Pol.

²Ramo kware i Tetalas, aia mo viti na leoki lakwae mo viti “Hugwe. I nigo a tangaloi lakua kareaki. I nigo a kaitomuaki kikikila hokinia komo tomuakikami, a gwatuivanuamai u tangwatahakikami u tuai. Ku vai a bohibohi karea lo vanua leia, komo vai na bohibohimai mo karea vohoki.

³Tigwaravu kemo rongo karea haburu lo kinau aira vano hi, vae keu lagwakinigo haburu luna.

⁴Vae i nau nahe lengaia te kwara na vaivai-bibiko nomo tuku susuni na nomu taro, hokinia hika nu uduhuri kinigo kwara kona hakavikami kona rongohuri nogu leo hika kelekele.

⁵Keu hagwe u rovo ba kwara a tangaloi hika a tangaloi hati, aia a gwataki na hatiki. Aia hi mo toko tinakaki na lologute rusa mana gwaloana noi Isrel* doluaki na varamana. Aia a kaitomuaki katukwale na rera hinea ramo toko huri na ngwera Nasaret hi.

⁶Vae vake u vai rongo kwara ne vai na Vanua* Kokona noi God ne hogora koro na nakona vae kemo kwiribibia. Kemo vai na domi kwara kena arekinia lo hala na nomai Tangwata* sibomai,

⁷vae a kaitovo na vuro hi i Lisias mo vanamai mo magaraki na nomai domidomi mo lavia tikami kina huirana.

⁸Vunu i Lisias mo tau na leo kwara a tangaloi na leo rana vanamai vaki maiko rana vitiviti huri i Pol lakwako. [29] Diko kona uduhuri galiliki kina tangaloi hi, i nigo sibomu konari rongo bakotoki tiua kwara vunuhi na kinau kemo vitiviti huria luna rau kareaki.”

⁹A gwaloana noi Isrel vake rau hago lo leoki, rau viti kwara a leo vano hika vunuhira rau kareaki.

¹⁰A kavman lakua hi mo kware i Pol kwara ne kwaha. I Pol mo viti “I nau nu kikilai kwara i nigo a hukao u rusa ku tuku rongo a viroroa nona tangaloi na vanua hike, komo kwahekinira komo vai ngwakutakinira, vae i nau nu lagwa kwara na matangwasarakiau lo nakomu hika.

¹¹A rani hangavulu dongwana kairua vohoki rau vano ba, nomo vano kwara na kaluhaki God lo gwatuivanua Serusalem. Vae i nigo kona vai lai kona taga kwaheki na nogu leo hi kwara u bakoto diko hetea.

¹²A gwaloana noi Isrel* rahe hagweau tea kwara diko nomo viroro te mana tangaloi lolo Vanua* Kokona noi God. Vake rahe hagweau tea kwara diko te nomo vai na tangaloi te ramo lologute mo turihake kinira kwara rana vaiau lolo vale* na tiutangaroa nona gwaloana noi Isrel diko te laliki lolo gwatuivanua. Hete vohoki.

¹³Vake rahe matangwasaraki lavi na noga leo te hi ramo toko vitiviti huriau luna hika, kwara u kareaki.

¹⁴Vae nu matangwasaraki na kinau hika lakwako. Nu sovi hivo kina domi mavakiana vovohi God noi ratubumai, nu huri na Hala hi noi Jisas vae ramo vitia kwara he bakoto tea. Vae i nau vake nu hauhuri lo kinau savia hi mo uliana lo Tangwata* noi Mosis mana buku* nona tangaloi* duruduruki.

¹⁵Vake nu tau na nogu domidomi lui God kwara a kinau aia hika hinea aira siboga ramo domidomi luna vae ne kworo. A kinau aia hi, kwara a tangaloi savia hinea rau bakoto maira hi rau hati, vae aira vunu rana maraka taliku tina mateana.

¹⁶Hokinia tigwaravu nu vai rongo karakara kwara na toka ne taritarisa, nana rongo lo tarabehigu kwara nahe vakasile te koro na nako i God, koro na nako na tangaloi.

¹⁷“I nau nu hugu vakahao tina gwatuivanua Serusalem a hukao u rusa ba. Vunu nomo mule taliku kwara na lai te mane* lakwa na ngwera tatagu, vake kwara na hile a kairoroi* lakwai God.

¹⁸Vae lolona hi nomo vai hokinia hi ramo hagweau lolo Vanua Kokona noi God, i nau nu vaiau nu ngwasara ba lo nako i God. A tangaloi he rusa te maiau, a leo na viroroa tikei vake.

¹⁹Vae a gwaloana noi Isrel tuaki tina vanua Esia* aira takwa-hi. Kwara vae diko a noga leo eia vovohiau, u taritarisa kwara aira siboga rana vanamai ki nakoga vaki maiko, rana tau na noga leo hi lakwako.

²⁰Vae diko hetea u taritarisa kwara a tangaloi vano hi hike rana viti a havakinau hi u hati ramo hagwe lugu, lolona hinea nomo tu koro na nako na Tangaloi* Tovotovo Lalakua.

²¹Rau lologutekiau huri na kinau katukwale vohoki hinea nomo tu koro na nakoga, nomo kwaha karakara nomo viti ‘Tulu arekiau hika karagwa huri nu hauhuri kwara a mateana rana maraka taliku rana ahi.’ ”

²²I Vilikis u kikilai na Hala noi Jisas u karea ba, vae hikani mo gweregwerei na leo mo viti kwara, “Lolona a kaitovo na vuro hi i Lisias ne maravuti, nari viti lakwakamu kwara kworohokinia lo kinau hika.”

²³Mo kwaha mana kaitomuaki na tangaloi na vuro mo tagahuri Pol kwara ne tagahuria ne karea, vae ne tirakinia ne lagalaga kelekele, vake ne tiraki rabuluina rana tirokinia rana vai tabetabekinia.

²⁴A rani koroa he rusa tea, i Vilikis mai vavinehina i Durusila raru mo vanamai. A vavine hi aia a vavine Isrel*. I Vilikis u hora kwara rana lavi i Pol vanamai. Vunu i Pol mo maravuti, i Vilikis mo rongohuria mo toko viti huri na hauhuriana lui Jisas Kraes*.

²⁵Hikani i Pol mo kwaha vano nga mo viti huri na kinau kaitolu, a bakotoana, a nukuiana, vake a Rani na Arekiana noi God ne vanamai. I Vilikis mo rongo hokinia hi u mataku mo viti “Ko mule ba. A taroki mo eia lakweau nari kwareko taliku.”

²⁶Lo taro aia hi u tuku domi kwara i Pol ne bete te mane* lakwae vunu neri tirakinia tina ingwa na gwarugwaru. Vae huri na kinau hi, tigwaravu u tuku hora haro i Pol kwara ne vanamai ne toko kwahakwaha maia.

²⁷Mo vanovano a hukao kairua i Vilikis mo tiraki na boloki na kavman lakua. U lengaia kwara a gwaloana noi Isrel rana lagwa maia, vae mo kwiribibi Pol lolo ingwa na gwarugwaru. Hikani a tangaloi katukwale a hinana i Posias Vestas mo lavi na tanotanona.