Read West Ambae A Bolokiana 25 Bible Online

A Bolokiana 25 - West Ambae bible

A Bolokiana 25

¹I Vestas u maravuti lolo vanua hi, vunu a rani kaitolu koro mo tiraki lo gwatuivanua lakua Sisaria mo vano vaki Serusalem.

²Takwa-hi a tangaloi lingilingi lalakua mana kaitomuaki nona gwaloana noi Isrel* ramo tau noga leo vovohi Pol lakwae. Vunu ramo uduhuri ki Vestas ramo seseaka

³kwara i Pol ne vano vaki Serusalem, huri rau tovo kana tavuniki kwara vae rana kwohi mateia lo mahaoi-hala.

⁴I Vestas mo daraki mo viti “I Pol u hugu lolo ingwa na gwarugwaru lo gwatuivanua Sisaria, vae i nau na mule taliku heheri vaki takwa-hi.

⁵U karea kwara a nomiu kaitomuaki rana huriau vaki Sisaria, vae diko a tangaloi hi u vai te kinau u hati, rana viti nona hatiana tivarea.”

⁶Hikani i Vestas mo hugu Serusalem taliku a rani kaikwalu diko hangavulu vunu mo vano vaki Sisaria. Mavukona u vano mo hugu lolo tanotano na arekiana mo viti kwara rana lavi Pol tilolo ingwa.

⁷Lolona i Pol mo maravuti, a gwaloana noi Isrel hinea rau vanamai tina gwatuivanua lakua Serusalem, ramo tu dalidalia, ramo toko vitiviti huria, rau viti “A tangaloi hika u vai a kinau rusa rahe karea tea.” Vae rahe matangwasaraki lavi na noga leo tea kwara rau kareaki.

⁸Vae i Pol u matangwasarakinia sibona mo viti “I nau nahe galo te lo Tangwata* nona gwaloana noi Isrel, vake nahe vai na kinau hati te vovohi na Vanua* Kokona noi God, diko vovohi na hugwe lakua, i Sisa* nona ngwera Rom.”

⁹I Vestas u lengaia kwara ne vai na gwaloana noi Isrel rana lagwa maia, vae hokinia mo uduhuri ki Pol mo viti “?Ku domi kwara kona masinge kona vano vaki Serusalem nari taga takwa-hi kwara a havakinau rau vitiviti huriko rau kareaki diko hetea?”

¹⁰Vae i Pol mo viti “I nau nu tu lo tanotano ne arekiana hi a hugwe lakua Rom mo taua. Vake u taritarisa kwara a tangaloi rana taga doridorigu lo tanotano hokinia hika. I nigo ku kikilai ba kwara nahe vai na kinau te kwara u hati vovohi na gwaloana noi Isrel.

¹¹Kwara vae i nau nu galo lo Tangwata, nu vai na kinau hi u taritarisa kwara na mate huri, u karea, i nau nahe viti tea kwara vae na kwalao tina mateana. Vae diko a leo hi ramo viti vovohiau rahe kareaki tea, hete tangaloi kwara ne tauau lo noga huirana. I nau nu lengaia kwara na tu koro na nako na hugwe lakua Rom, i Sisa.”

¹²Hikani i Vestas mo kwahakwaha mana nona tangaloi na tovotovo, vunu mo viti lakwai Pol kwara, “?Ku lengaia kwara kona tu koro na nako i Sisa? U karea, vae kona vano vaki mai Sisa.”

¹³A rani te kairua tiluna, a hugwe lakua i Akriva [30] mai hagwena i Benis raru mo vanamai vaki lo gwatuivanua lakua Sisaria raru tiroki i Vestas kwara raru ne hahavakinia vaki lo boloki na kavman.

¹⁴Raru hugu takwa-hi he tuai tea, i Vestas mo matangwasaraki i Pol lakwa na hugwe lakua hi, mo viti “A tangaloi katukwale hike, i Vilikis mo kwiribibia lolo ingwa na gwarugwaru.

¹⁵Lolona nomo vano vaki Serusalem, a tangaloi* lingilingi lalakua nona gwaloana noi Isrel* mana noga ngwarasea* ramo viti huria kwara u vai a kinau rahe karea tea, vunu ramo vitia lakweau kwara na kwohi mateia.

¹⁶Vae nu viti lakwara kwara i kami a ngwera Rom hete doridorimai kwehi kwara kena tiraki bulakiki na tangaloi tilo huirana na tangaloi ramo toko vitiviti huria. Tomuaki ne tu koro na nako na tangaloi aira vano hi kwara ne daraki na kana leo ramo toko lidua kinia ne matangwasarakinia sibona lo nakoga.

¹⁷A gwaloana noi Isrel ramo vanamai hike, nahe mahuki na taro te vohoki vae mavukona nomo hugu lolo tanotano na arekiana nomo viti kwara rana lavi Pol vanamai.

¹⁸A nona tavaluivuro ramo maraka hake, vae rahe vitia tea kwara u vai a kinau u hati hokinia nu tuku domidomi luna kwara vae rana viti. Vae hetea.

¹⁹Aira ramo toko viti huri na viroroa luna kehekeheki huri na doridori na noga sekulu*. Ramo toko viti huri na tangaloi u mate ba, a hinana i Jisas. Vae i Pol u viti huria kwara u ahi taliku.

²⁰Vae i nau nu lengalengakinia kwara na kikilai kworoho huri na kinau vano hika. Hokinia nomo uduhuri ki Pol nomo viti ‘?I nigo ku domi kwara kona masinge kona vano vaki Serusalem, nari taga takwa-hi kwara a havakinau rau vitiviti huriko rau kareaki diko hetea?’

²¹Vae i Pol he masinge tea. Mo uduhuri u seseaka kwara a hugwe lakua Rom ne tagaia huri na leo vano hi kwara rau kareaki diko hetea. Vae nu kwiribibia. Hokinia nomo tuliki lakwa na kaitagahuri kwara rana tagahuria ne karea tarisaki hi na hokaki lavia vaki mai Sisa*.”

²²I Akriva u viti lakwai Vestas kwara, “I nau vake nu lengaia kwara na rongo na tangaloi hika.” I Vestas mo daraki mo viti “Vae konari rongoa mavuko.”

²³Mavukona i Akriva mai Benis raru mo soro vaki lolo ingwa na kwahakwaha. A tomutomuai-tangaloi na vuro mana tangaloi tomutomuaki na gwatuivanua lakua ramo hurirarua, vae a tangaloi ramo vai mavakirarua. Hikani i Vestas mo hora kwara rana lavi Pol tilolo ingwa.

²⁴Vunu i Vestas mo kwaha mo viti “Hugwe Akriva, mana tangaloi savira hike tamo hugu tabulutaki. A tangaloi hika u tu koro na nakomiu, a gwaloana noi Isrel hike lo vanua leia maira hi Serusalem rau tuku viti huria tigwaravu lakweau. Rau seakinia maiau tigwaravu kwara ne mate. Rau viti ‘He taritarisa tea kwara kona tiraki na tangaloi hi ne hugu maikita.’

²⁵Vae nahe hagwe na kinau te vohoki luna kwara u hati kwara vae ne mate huri. Vake mo uduhuri u seseaka kwara ne vano vaki mai Sisa. Vae huri hi a domigu u mautu kwara na horae.

²⁶Vae a leoki tikei kwara na uli matangwasarakinia lakwai Sisa. Hokinia nomo lavia vaki hike tomuakikamu, vae silesiletia hi tomuakinigo, Hugwe Akriva. Nu lengaia kwara i nigo kona rongo na doridorina, vunu i nau nari hagwe te kinau luna nomo uli lakwai Sisa,

²⁷huri he taritarisa te lakweau kwara na hora na tangaloi gwarugwaru kwara ne vano, vae i nau nahe matangwasaraki lavi na kinau te ramo toko viti vovohia.”