Read West Ambae A Bolokiana 26 Bible Online

A Bolokiana 26 - West Ambae bible

A Bolokiana 26

¹I Akriva mo viti lakwai Pol kwara, “Nu tirakinigo kwara kona matangwasarakinigo sibomu.” I Pol mo hokaki kabana kwara rana hugu butu rana rongohuria, vunu mo matangwasarakinia sibona hokinia hika.

²Mo viti “Hugwe Akriva, nu domi a tangaroagu u karea hika karagwa, kwara i nigo kona rongoau na matangwasarakiau sibogu koro na nakomu huri na kagu leo a gwaloana noi Isrel* ramo toko liduau kinira.

³Hi kareaki vohoki huri i nigo ku kikilai kwahekwaheki vunuhi na doridorida mana bohibohida i kita a gwaloana noi Isrel, u karea. Nu seseaka huriko hika, kwara kona tiraki na domimu ne bua kona rongohuri a leogu.

⁴“A gwaloana noi Isrel savia rau kikilai na doridorigu lolona hi nomo ngwarasea hake. Rau kikilai tina tinatinakakiki hi nomo toka lo vanuagu vake lolo gwatuivanua lakua Serusalem.

⁵Kwara vae rau masinge, rana viti lai kwara aira rau kikilaiau tigwaravu. Vanamai evina kinia nomo bulu lo bulubulu hi a doridoriki u huira, nomo huri na doridori na Varisi*.

⁶Vae hika nu tu hikeni tulu soro haro na hatiki lugu huri nu tau na nogu domidomi lo tulikileo hi i God mo viti lakwai ratubuda.

⁷I kita lo gwatuidamu hangavulu dongwana kairua tamo tau na noda domidomi lo tulikileo hi kwara tana lavia, hokinia tamo kaluhaki God kina domi mavakiana vataha na rani vataha na bongi. Hugwe Akriva, huri nu tau nogu domidomi luna a gwaloana noi Isrel ramo vitiviti huriau lakwa na kavman lakua.

⁸?Kworoho hi i kamu a gwaloana noi Isrel tulu mo rongoa u madi haburu kwara tulu ne hauhuri kwara i God u rakati na tangaloi hinea u mate tina mateana?

⁹“Tuai i nau nu tuku domi kwara na vai savi na kinau kwara na tu koro na hina i Jisas a ngwera Nasaret.

¹⁰A doridorigu hi nu tuku vai Serusalem. Nu vano vaki mana tangaloi* lingilingi ramo tauau kwara na tau a tangaloi noi God tilolo ingwa na gwarugwaru. Lolona hi ramo viti kwara rana mate, i nau vake nu viti maira.

¹¹Vakarusa nu vai kadira lolo vale* na tiutangaroa, nu vai rongo kwara na vai surira tina noga hauhuriana lui Jisas. Nu rongo hati kinira, nu lologutekinira haburu, hi nomo hurira vaki lo gwatuivanua vakahao vake kwara na vai bulakikinira.”

¹²Vunu i Pol mo vano nga mo viti kwara, “Vae vakatukwale nomo vano vaki lo gwatuivanua Damaskes huri na doridori hi. A tangaloi* lingilingi lalakua rau tauau luna ramo horeau.

¹³Hugwe Akriva. Lolona hi nomo lakao lo hala vaki lo gwatuivanua Damaskes lo mataniaho kaheata, nomo tagai na vila u kwaka u sileti na mataniaho, u kwaka tina taetae dalidaliau maira hi ramo huriau.

¹⁴I kami vunu kemo sovi tilo tano, nomo rongo na dilao mo kwaha maiau lo noda leo Hibru*, mo viti ‘!Sol! !Sol! ?Kworoho komo vai bulakikiau? I nigo sibomu ku vai hokotiko huri ku vara vaki takuni, hoki na buluki hinea a tabulana mo toko kwohia vae mo vara vovohi na kana ngwasa.’

¹⁵Nomo uduhuri kinia nomo viti ‘?Hugwe*, i nigo ihe?’ A Hugwe mo viti ‘I nau i Jisas hi komo vai bulakikiau.

¹⁶Vae ko maraka ko tu. Nu vanamai vaki maiko hika kwara na mataiko ki nogu tangaloi boloki. Kona hago leo lakwara ratuaki kona viti kwara komo tagaiau hika karagwa. Vake kona haharaki lakwara a havakinau nanari vosangi lakwako te taroki.

¹⁷Nari vakahikinigo tina huirana nona gwaloana noi Isrel* mana tangaloi tavalavarea tina gwaloana noi Isrel, aira hi nari hokakinigo vaki maira.

¹⁸I nigo hika kona takahi na mataga kona lavira rana mulemai tina dodoki vaki lo leleha, vake tina huirana noi Setano* vaki mana huirana noi God. Hokinia nari domidomi koro noga hatiana huri rau hauhuri lugu, vake rana lai a tanotanoga mana tangaloi hinea i God u mataira rau kwareki a bulana tangaloi kokona.’ ”

¹⁹Vunu i Pol mo viti vake kwara, “Hugwe Akriva. I nau nahe rongo bulakiki na kinau te hi nomo tagaia tina taetae.

²⁰Tomuaki nu heretuva lolo gwatuivanua Damaskes vake lolo gwatuivanua Serusalem, vunu doluaki na vanua Isrel vake mana tangaloi rusa tavalavarea tina gwaloana noi Isrel*. Nomo heretuva kwara rana halebohi tina noga hatiana vaki mai God, vake rana vai a kinau hinea rana vosangi kwara rau halebohi tina noga hatiana ba.

²¹Vae huri na kinau hi, lolona hi i nau lolo Vanua* Kokona noi God lo gwatuivanua Serusalem, a gwaloana noi Isrel ramo kwalibibiau rau vai kwara rana kwohi mateiau.

²²Vae tigwaravu i God mo hago maiau vaki na hika. Hokinia nomo tu hike nomo hago leo huri i Jisas lakwa na tangaloi doluaki. Nu hago leo lakwa na tangaloi lalakua mana tangaloi haro nga lo hala katukwale. A havakinau hi nomo viti aia hokinia hi vohoki a tangaloi* duruduruki maira mai Mosis ramo vitia tomua kwara vae ne mule hokinia.

²³Ramo viti kwara i Vurae* ne rongo hati, ne mate, vunu vaki takuni ne maraka taliku, ne kwareki a kaitomuakiki halaradu lo marakaana tina mateana. Ne koleki na leleha na ahiana lakwa na gwaloana noi Isrel mana tangaloi rusa tavalavarea tina gwaloana noi Isrel.”

²⁴I Pol mo matangwasarakinia sibona hokinia hi, i Vestas mo kwaha karakara huria mo viti “!Pol, ku reraka! A nomu kikikila lakua mo vaiko komo reraka.”

²⁵Vae i Pol mo daraki lakwae mo viti “Vestas, i nigo a tangaloi lakua, vae nahe reraka tea. A leo vano hi nomo kwaha luga rau kareaki vake rau taritarisa.

²⁶I nau na vai lai na viti bakotoki lakwa na hugwe i Akriva huri u kikilai na kinau vano hika. Nu kikilai kwara u lai tabetabeki na kinau vano hika savira, huri a kinau hika he eno tea tavuniki, u saro na ngwasara.

²⁷Hugwe Akriva. ?I nigo ku hauhuri lo leo nona tangaloi duruduruki? !Nu kikilai kwara ku hauhuri!”

²⁸Hikani i Akriva mo viti lakwai Pol kwara, “?Lo taro hika gwanugwanu ku vai kwara kona vaiau na mulemai kina tangaloi noi Kraes*?”

²⁹Vae i Pol mo daraki lakwae mo viti “A taro gwanugwanu diko a taro gwaravu, vae nu tiutangaroa lakwai God kwara i nigo mai rabuluimu savia hi tulu mo rongohuri na leogu hika karagwa, tulu ne mulemai tulu ne kwareki a tangaloi noi Kraes hokiau. Vae nahe lengaia tea kwara rana gwarukamu lolo ingwa na gwarugwaru hokiau.”

³⁰Vunu a hugwe lakua, a kavman lakua, i Benis, mana tangaloi tuaki, aira vunu rau maraka,

³¹ramo tiraki na ingwa, ramo kwahakwaha maira muleki ramo viti “A tangaloi hika he vai na kinau te vohoki kwara diko ne mate diko ne hugu lolo ingwa na gwarugwaru huri.”

³²Vae a hugwe lakua i Akriva mo kwaha mai Vestas mo viti “Kwara vae a tangaloi hika he seseaka te kwara ne tu koro na nako i Sisa*, kwara vae kona tirakinia ne vano.”