Read West Ambae A Bolokiana 3 Bible Online

A Bolokiana 3 - West Ambae bible

A Bolokiana 3

¹Lo rani katukwale i Pita mai Sione raru vano vaki lo Vanua* Kokona noi God lo mataniaho dori lakua lo taro na tiutangaroa.

²A ngwera katukwale u vora u luku. Vataha na rani a tangaloi rau kwalia vanamai vaki lo matakihala katukwale na loloiara* na Vanua Kokona noi God rau kwarekinia a Matakihala Karea. Mo toko longi a mane* tina tangaloi hi ramo toko vano vaki lolo Ara Kokona na Ingwa Kokona noi God. [5]

³Lolona mo tagai Pita mai Sione raru mo soro, mo uduhuri kirarua kwara raru ne bete te kinau lakwae.

⁴Raru mo taga vovohia, i Pita mo viti kwara, “Ko tagaikamirua.”

⁵Hokinia mo tagairarua, u domi kwara ne lai te kinau tirarua.

⁶Hikani i Pita mo viti lakwae kwara, “I nau a nogu mane tikei vohoki, vae nana bete lakwako a kinau hi a nogu eia. Lo hina i Jisas Kraes*, a ngwera Nasaret, ko maraka ko lakao.”

⁷Vunu mo tabea kina matuai kabana, mo hago maia kwara ne tu. Heheriki vake a garuna mana hokehoke na huina ramo huira taliku,

⁸mo rovo hake, mo tu bakotoki kina garuna mo tinakaki mo lakao laliki. Hikani mo vano vaki lolo Ara Kokona na Ingwa Kokona mairarua, mo lakao mo vai vidividi mo kaluhaki God.

⁹A vao doluaki ramo tagaia mo lakao mo kaluhaki God.

¹⁰Vae ramo taga kikilakinia kwara a tangaloi longilongi hi mo hugu lo Matakihala Karea na loloiara na Vanua Kokona, rau idila haburu kinia, rau tukutukui haburu lo kinau hi i God mo vai lakwae.

¹¹A tangaloi rau idila haburu ramo kwalao vaki mai Pita mai Sione mana tangaloi longilongi hi lolo varada na titiba na Vanua* Kokona noi God hinea rau kwarekinia a Varada nona hugwe lakua i Solomon. [6] Lo tanotano hi a tangaloi longilongi hi mo kwiribibirarua.

¹²Lolona i Pita mo tagai na vao, mo viti lakwara kwara, “!Gwaloana noi Isrel*! ?Kworoho tulu mo idila kina kinau hika, tulu mo tagataga hurikami? ?Tulu domi kwara keru vai na tangaloi hikani mo lakao kina nomaru huirana, diko huri kwara i kamirua a tangaloi kokona? !Hete vohoki!

¹³Vae a God noi Evraham, i Aesik mai Sekov, a God noi ratubuda, aia u bete na nona karekarea lakwa na nona Kaihora i Jisas, aia hi tulu mo tirakinia tilo kaba na tangaloi lalakua. I Paelet* mo domiki utu kwara vae ne tirakinia, vae takuni tiua tulu mo bemiu kinia koro na nako i Paelet.

¹⁴I Jisas aia u kokona, u bakoto, vae tulu bemiu kinia, tulu mo viti lakwai Paelet kwara ne huri na domimiu ne tiraki na tangaloi uaua tangaloi kwara ne mule tina ingwa na gwarugwaru.

¹⁵Hokinia tulu kwohi matei na gwataki na ahiana. Vae i God u rakatia tina mateana. I kami keu kwareki a hagoleo huria.

¹⁶Hikani a huirana na hina i Jisas hi mo vai na tangaloi lukuluku hikani mo huira. Tulu tagaia, tulu kikilaia ba. A kinau hi i God u vai lakwae huri keu hauhuri lo hina i Jisas. A nomai hauhuriana lui Jisas mo vai na tangaloi hi a garuna mo karea hikani hokinia i kamu vunu tulu tagaia.

¹⁷“Vae hikani ratua, i nau nu kikilai kwara a havakinau i kamu mana nomiu kaitomuaki tulu mo vai vovohi Jisas, tulu vai kwehini huri tulu he kikilai tea.

¹⁸Tuai lengalenga i God u vitia lalahi na tangaloi* duruduruki kwara i Vurae*, hinea i God ne hokakinia, vae ne rongo hati lo tarabehina, vae u mule luna.

¹⁹Hokinia u taritarisa kwara tulu ne bohi tina nomiu hatiana, tulu halebohi vaki mai God, vae ne kwasu na nomiu doridori hati leletiu.

²⁰Hokinia a taro na huirana karagwa ne vanamai tina Hugwe i God, ne rakatikamu taliku, vae ne hokaki i Jisas vaki maikamu, aia hi i Vurae hinea i God u mataia u rovo ba hurikamu.

²¹Vae ne hugu lolo taetae tarisaki lo taroki ne vanamai huri na kinau savia ne vaiana rana mulemai rana karagwa taliku, hokinia i God mo viti lalahi na bulana tangaloi duruduruki kokona hi tuai lengalenga.

²²I Mosis u viti kwara, ‘A Hugwe a nomiu God neri hora na tangaloi duruduruki katukwale tina nomiu vakabela vae ne venatu vaki maikamu hokinia mo horeau. [7] Tulu ne rongohuri na kinau savia hinea ne viti lakwakamu.

²³Ihe hi nehe rongohuri tea a havakinau hi a tangaloi duruduruki hi mo viti, vae i God ne kwahekinia tina bulana tangaloi ne taua letiu.’

²⁴Vae a tangaloi duruduruki savia u tinakaki lui Samuel, vaki maira hinea ramo vanamai takuni tiua, aira vunu ramo viti terekaki na leo, ramo toko viti huri na rani aira hika.

²⁵A tulikileo noi God hinea lalahi na bulana tangaloi duruduruki u tulikinira hurikamu, vunu vake a leo harikiana hinea i God mo vai mai ratubumiu tuai aia a nomiu vake. I God mo viti lakwai Evraham kwara, ‘Nari vai tabetabeki na tangaloi savia lalahi na nomu gwaloana.’

²⁶Hokinia i God mo matai na nona Kaihora mo horae vaki maikamu tomuaki, kwara ne vai tabetabekikamu, ne vaikamu tulu ne halebohi tina nomiu doridori hati.”