Read West Ambae A Bolokiana 6 Bible Online

A Bolokiana 6 - West Ambae bible

A Bolokiana 6

¹Mo vanovano, lolona a valuvalu na ngwalagelo noi Jisas mo toko lakua, a gwaloana noi Isrel* hinea rau kwahakwaha lo leo Gris ramo viroro mana gwaloana noi Isrel hinea rau kwaha lo leo tataga bakotoki. Aira hi rau kwahakwaha lo leo Gris rau viti kwara a gwatiga, a tangaloi rahe tagahurira tea kwara ne karea, hinea ramo toko hilehile konata lakwara vataha na rani.

²Hikani a kaihora* kokona hangavulu dongwana kairua ramo kware tabulutaki na bulubulu nona ngwalagelo noi Jisas doluaki, ramo viti “Rabela. He taritarisa tea kwara kena tiraki na heretuva na leo noi God, kena va toko tagahuri na kinau aira vano hi.

³Vae huri hi rabela, tulu matai na tangaloi kaibitu tikamu, aira hi tulu kikilaira kwara rau kukwere kina Tanungwe Kokona mana lolorani na kikikila, vunu kena taura ranari tagahuri na kinau aira vano hi.

⁴Vae i kami sibomai kena tiutangaroa, vake kena heretuvaki na leo i God tigwaravu.”

⁵Aira vunu lo noga bulubulu rau lagwa lo domidomi nona kaihora kokona. Hokinia ramo matai i Steven, a tangaloi u kukwere kina hauhuriana mana Tanungwe Kokona. Vunu vake ramo matai i Viliv mai Prokoras mai Nikano mai Timon mai Pamenas, vunu i Nikolas a ngwera Antiok hinea mo bohi tilo huhuiana nona gwaloana noi Isrel.

⁶A bulubulu hi mo lavira ramo vano vaki mana kaihora kokona. A kaihora kokona ramo tiutangaroa maira ramo tatagao lo gwatuga.

⁷Hokinia ramo heretuvaki na leo noi God, mo matala vakevake. A valuvalu na ngwalagelo noi Jisas Serusalem mo toko rusa vakevake, vae a tangaloi* lingilingi vake u rusa ramo hauhuri lui Jisas ramo rongohuria.

⁸I Steven aia a tangaloi hinea i God u tuku bete huirana lakwae, vake u hago maia kina nona domi tabetabe lakua. Hikani aia u vai na idilakiana mana kaivosangi rusa lo livuka na tangaloi.

⁹Vae a tangaloi tuaki rau kwaha vovohia, aira rau vanamai tina bulubulu na vale* na tiutangaroa nona gwaloana noi Isrel*, u kwareki a vale na tiutangaroa nona tangaloi hinea aira a Tangaloi Materi. [9] Aira a gwaloana noi Isrel hinea rau vanamai tina gwatuivanua lalakua Saerini maia Aleksadria. Aira mana gwaloana noi Isrel tuaki tina vanua Silisia mana vanua Esia*, ramo tinakaki na viroroa mai Steven.

¹⁰Vae a Tanungwe Kokona u bete a lolorani na kikikila lakwai Steven, hini lolona mo kwaha hi, rahe vai lai tea kwara rana tu koroa.

¹¹Hokinia ramo voli na tangaloi kwara rana viti kwara, “I kami keu rongo u tuku kwaha bulabula vovohi Mosis mai God.”

¹²Lo doridori hika, ramo vai na tangaloi rusa mana ngwarasea* mana tangaloi kikikila na Uliuli* Kokona ramo rongo hati ki Steven. Ramo vanamai vaki maia ramo kwiribibia, vunu ramo lavia vaki mana Tangaloi* Tovotovo Lalakua.

¹³Hikani ramo lai a tangaloi kwara rana viti a leo kurakura vovohi Steven. Aira hi ramo maraka ramo viti “A tangaloi hika tigwaravu u kwaha bulabula vovohi na Ingwa Kokona noi God mana Tangwata* noi Mosis,

¹⁴huri keu rongo mo viti kwara a ngwera hi, i Jisas a ngwera Nasaret, ne revesuri na Ingwa Kokona hi. Vunu ne bohiki na doridori savia hi tamo kwiribibira vanamai evina ti Mosis.”

¹⁵A Tangaloi Tovotovo lalakua vunuhira ramo hugu tabulutaki, ramo tagataga huri Steven, ramo tagai na nakona hoki na nako na kaihora tina taetae.