Read West Ambae A Bolokiana 9 Bible Online

A Bolokiana 9 - West Ambae bible

A Bolokiana 9

¹Lo taro hi i Sol u kwaha madi radu nga kwara ne kwohi matematei na ngwalagelo nona Hugwe*. Mo vano vaki mana hugwe na tangaloi* lingilingi

²mo uduhuri kinira huri a uliuli na matangwasarakiana lakwa na gwaloana noi Isrel* lolo vale* na noga tiutangaroa lo gwatuivanua lakua Damaskes, kwara diko ne hagwe na tangaloi tea rau tuku huri na Hala na Hugwe takwa-hi, ne kwiribibira, a ngwera mana ravavine, ne lavira taliku vaki Serusalem.

³Lo halana vaki Damaskes, hokinia mo garagarani mana gwatuivanua hi, heheriki mo vila vanamai tina taetae mo kwaka dalidalia.

⁴Mo sovi hivo tilo tano mo rongo na dilao mo kwaha maia mo viti kwara, “!Sol, Sol! ?Kworoho komo vai bulakikiau?”

⁵Aia mo uduhuri mo viti kwara, “?Hugwe, i nigo ihe?” A dilao mo kwaha mo viti kwara, “I nau i Jisas hinea komo vai bulakikiau.

⁶Vae ko maraka ko vano vaki lo gwatuivanua lakua, vae te tangaloi neri viti te kinau lakwako komo vai.”

⁷Hikani a tangaloi aira hi ramo lakao harago mai Sol ramo tu butu, rahe malangaki na leo te vohoki. Rau rongo na dilao vae rahe tagai na tangaloi te vohoki.

⁸I Sol mo maraka tina tano mo rada vae he taga hokoti na kinau tea. Hokinia ramo hago kabana ramo lavia vaki Damaskes.

⁹Vae a rani kaitolu he tagataga lai tea. Lo taro hi he kani na hinaka tea, vake he inumi na kinau te vohoki.

¹⁰A ngwalagelo noi Jisas katukwale lo gwatuivanua Damaskes a hinana i Ananaeas. U taga lo vakatabobo kwara a Hugwe u kwaha maia mo viti kwara, “Ananaeas.” Aia mo daraki mo viti “Hugwe, i nau hika.”

¹¹A Hugwe mo kwaha maia mo viti kwara, “Ananaeas. Ko maraka ko vano vaki lo hala lakua hinea rau kwarekinia A Hala Bakoto. Lolo ingwa i Sutas komo uduhuri na tangaloi tina gwatuivanua Tasas a hinana i Sol. Lo vakatabobo u tagaiko komo vanamai tilolo ingwa komo tau na kabamu luna kwara vae ne tagataga taliku. Vae hika u tuku tiutangaroa.”

¹³I Ananaeas mo daraki mo viti kwara, “Hugwe. A tangaloi rusa rau viti lakweau huri na tangaloi hika, mo toko vai bulakiki na nomu tangaloi lo gwatuivanua lakua Serusalem.

¹⁴Vae aia u vanamai vaki Damaskes mana huirana tina tangaloi* lingilingi lalakua kwara ne kwiribibi savira hinea rau tiutangaroa lo hinamu.”

¹⁵A Hugwe mo viti lakwae kwara, “Ko vano, huri i nau nu mataia kwara ne boloki nogu, ne viti huri na hinagu lakwa na tangaloi tavalavarea tina gwaloana noi Isrel mana hugwe lalakua, mana gwaloana noi Isrel vake.

¹⁶Vunu i nau nari vosangia kina kinau savia hinea neri rongo hati luna huriau.”

¹⁷Hikani i Ananaeas mo vano mo soro tilolo ingwa mo tau na kabana lui Sol. Mo viti kwara, “Tua Sol. A Hugwe i Jisas sibona u horeau, aia hi mo vosangia lakwako komo tagaia lo hala hi komo vanamai hike. U horeau kwara vae kona tagataga taliku vunu kona kukwere kina Tanungwe Kokona.”

¹⁸Heheriki vake a kinau hoki na kari na ika mo sovi tina mata i Sol, vunu mo tagataga lai taliku. Aia mo maraka hake mo lai bavtaes.

¹⁹Vunu mori kanikani mo huira taliku. I Sol u hugu a rani te kairua mana ngwalagelo noi Jisas lo gwatuivanua Damaskes.

²⁰U hena vaki lolo vale* na tiutangaroa mo tinakaki mo matangwasaraki Jisas, mo viti kwara aia i Natu i God.

²¹Aira hi ramo rongoa rau idila haburu rau viti kwara, “!Ii! A tangaloi hi aia kareaki lo gwatuivanua lakua Serusalem mo toko kwohi matei na tangaloi hinea rau tiutangaroa lo hina i Jisas. U vanamai hike huri na kinau hi vohoki kwara ne kwiribibi na tangaloi aira vano hi, ne lavira taliku vaki mana tangaloi lingilingi lalakua. ?Vunu hikani mote rongo kworoho kwara ne heretuva?”

²²Vae i Sol a nona heretuva mo huira vakevake, u vosangi matangwasarakinia kwara i Jisas aia i Vurae* vae a gwaloana noi Isrel* hi ramo toka Damaskes rahe daraki lavia tea.

²³A rani rusa rau vano ba, a gwaloana noi Isrel ramo vileki tabulutaki ramo tovoki haro na halaki kwara vae rana kwohi matei Sol.

²⁴Vae u durukiana lakwae a havakinau hi ramo tovo kwara rana vai. Ramo tagataga koro na matakihala na titiba na gwatuivanua lakua hi rani bongi kwara vae rana kwohi mateia.

²⁵Vae lolo bongi vakatukwale a nona ngwalagelo ramo taua lolo kete lakua ramo tuli duruhia vaki tavalatitiba hi ramo hivokinia.

²⁶I Sol u vano vaki Serusalem u vai rongo kwara ne bulu mana ngwalagelo noi Jisas. Vae aira rahe hauhuri tea kwara aia a ngwalagelo noi Jisas, aira vunu rau mataku kinia.

²⁷Vae i Banabas mo lavia mo matangwasarakinia lakwa na kaihora* kokona. Mo matangwasaraki lakwara kwara i Sol u tagai na Hugwe* lo hala, a Hugwe mo kwaha maia. Vunu vake u viti lakwara kwara i Sol u heretuva u huira lo hina i Jisas lo gwatuivanua lakua Damaskes.

²⁸Hokinia hi i Sol mo hugu maira mo lakao laliki takwa-hi Serusalem, mo heretuva lo hina na Hugwe he mataku tea.

²⁹U kwahakwaha mana gwaloana noi Isrel* hi rau kwahakwaha lo leo Gris ramo vireve maia lo leoki. Hikani rau vai kwara rana kwohi mateia.

³⁰A ratua ramo kikilaia, ramo lavia tegetano vaki lo gwatuivanua lakua Sisaria ramo hokakinia tiura vaki lo gwatuivanua lakua Tasas.

³¹Vae hika a kwarelua* noi Jisas doluaki lo vanua Sutia maia Galili* maia Sameria* rau hugu u tangwatahakinira. Rau toka tavuti na Hugwe ramo domi mavakinia. A Tanungwe Kokona mo hago maira mo rakatira ramo huira vakevake, vae a tangaloi ramo hauhuri mo rusa vakevake.

³²Hikani i Pita u lakao vataha na mahagweki, vae vakatukwale mo vano kwara ne tiroki na tangaloi noi God ramo toka lo gwatuivanua Lita.

³³Takwahini mo hagwe na tangaloi a hinana i Aeneas, a tarabehina rau mate, u ngwalulu kehe nga a hukao kaikwalu.

³⁴I Pita mo kwaha maia mo viti kwara, “Aeneas, i Jisas Kraes* u vaiko komo rongo karea. Maraka ko lulu gwanamu.” Vae i Aeneas mo maraka vakatukwale.

³⁵A tangaloi savia hi ramo toka lo gwatuivanua Lita, maira hi ramo hugu Seron hinea a vanua tavola lakua, ramo tagaia, ramo halebohi vaki mana Hugwe*.

³⁶Lolo gwatuivanua Sova, takwahini a vavine katukwale a hinana i Tabita, aia a tangaloi hauhuri lui Jisas. A hinana lo leo Gris, i Dokas, a domianaki a dia hinea a boboroa katukwale. Tigwaravu i Tabita u tiraki nona taro lo boloki karekarea vake u hago mana kakaravi.

³⁷Lo taro hi u lenga vae mo mate. Ramo kwasu na tarabehina mo rovo, vunu ramo lulukinia lo tanotano aulu radu.

³⁸A gwatuivanua Sova he vakahao te tina gwatuivanua Lita. Vae hikani a ngwalagelo noi Jisas lo gwatuivanua Sova ramo rongo kwara i Pita aia lo gwatuivanua Lita, ramo hora na ngwera kairua vaki maia mana leo kwara, “Heheri, ko vanamai vaki maikami.”

³⁹Hokinia mo lagolago nona, mo hurirarua. Mo maravuti ramo lavia vaki lo tanotano aulu. A gwati savia ramo visusuni dalia, ramo vitangiki ramo vosangia kina lugwa hinea i Dokas mo vai lakwara lolona hi u ahi radu nga.

⁴⁰I Pita mo horara tivarea, mo titiugwao hivo mo tiutangaroa, vunu mo halebohi vaki mana tarabehina mo viti kwara, “Tabita, ko maraka.” Hikani mo rada mo tagai i Pita mo maraka mo hugu.

⁴¹Vunu i Pita mo hokaki na kabana mo tabea mo tu. Vunu mo kware na tangaloi noi God mana gwati, mo vosangia lakwara kwara u ahi.

⁴²A roro huria mo vano doluaki na gwatuivanua Sova, vunu a tangaloi rusa ramo hauhuri lo Hugwe*.

⁴³Takuni tiua hi, i Pita mo hugu takwa-hi a rani u rusa lo gwatuivanua Sova, lo tata i Saemon, a tangaloi tuku kihikihi kinau lo vinu na boboroa.