Read West Ambae ROM 1 Bible Online

ROM 1 - West Ambae bible

ROM 1

¹I nau i Pol, a tangaloi boloki noi Jisas Kraes*. I nau a kaihora* kokona katukwale, hinea i God u kwareau mo mataiau kwara na heretuvaki na nona Roro Karea.

²Tuai sea, i God u tuliki na Roro Karea hika lalahi na tangaloi* duruduruki rusa ramo ulibibia lo Uliuli* Kokona.

³A Roro Karea hi aia hinea mo toko viti huri i Natu i God, i Jisas Kraes a noda Hugwe*. Lolona mo mulemai kina tangaloi mo vora vanamai lo gwaloana noi Devit.

⁴Vunu vake luna hi mo kwareki a tangaloi kokona noi God, i God u vosangia kina nona huirana lakua kwara i Jisas aia i Natuna, luna hi mo rakatia taliku tina mateana.

⁵Lo domi tabetabe lakua noi God, i God aia u lalahi Kraes huri kwara ne vaikami kena kwareki a kaihora kokona kwara kena tabe hakeki na hina i Kraes. U vai kwehi kwara kena boloki nona, vae kena tomuaki na tangaloi savia vataha na vanua rana hauhuri luna vake rana rongohuria.

⁶A bolokiana hi u hagwekamu vake lo gwatuivanua lakua Rom hinea i God u kwarekamu ba kwara tulu ne kwareki a tangaloi noi Jisas Kraes.

⁷Vae hokinia hi ramo uli na leo hika lakwakamu doluaki takwa-hi Rom hinea i God u lagwa haburu maikamu, mo kwarekamu kwara tulu ne kwareki bulana tangaloi kokona. A tangaroa karea hika lakwakamu. I God i Tamada mai Jisas Kraes a noda Hugwe, raru ne hago maikamu kina nogaru domi tabetabe lakua, vake raru ne bete na magemuana ne eno maikamu.

⁸Tomuaki nu lengaia kwara na viti, nu lagwaki na nogu God lo hina i Jisas Kraes hurikamu doluaki, huri a tangaloi savia lo varamana rau rongo kwara tulu hauhuri lui Jisas Kraes*.

⁹I God aia hi nomo boloki nona kina domigu doluaki, nomo heretuvaki na Roro Karea huri Natuna, aia neri matangwasaraki lakwakamu kwara a havakinau hi nu viti rau kareaki. U kikilai kwara tigwaravu nu tuku domihagwekamu lo nogu tiutangaroa.

¹⁰Tigwaravu nu tuku uduhuri ki God kwara diko u masinge, aia neri vai na halagu tea nari vanamai nomo tirokikamu te hika lai nga.

¹¹Nu lengaia haburu kwara na tirokikamu kwara tulu ne lavi na hilehile hinea a Tanungwe Kokona ne bete lalahiau, vae ne vaikamu tulu ne huira.

¹²Vunu vake nu lengaia kwara na bulu maikamu kwara i kamu tulu ne rakati na domigu kina nomiu hauhuriana, hokinia i nau vake nana rakati na domimiu kina nogu hauhuriana.

¹³Rabela. Nu lengaia kwara tulu ne kikilai kwara tigwaravu nu tuku domidomi kwara na vanamai na tirokikamu, vae a kinau ra va vaivai koroau, vae nahe vai lai tea. Nu lengaia kwara a nogu boloki vae a kwaiki ne eia lo gwatui-vanuamiu hokinia hinea a kwai na nogu boloki mo eia mana tangaloi tavalavarea tina gwaloana noi Isrel* ratuaki.

¹⁴Nu rongo u mavatiau hoki na buku tea nga, kwara na vai bukua, na hago mana tangaloi savia, aira hinea a tangaloi na gwatuivanua lalakua, mana tangaloi hinea lo utaki, a tangaloi kikikila, vake mana tangaloi hinea rahe kikikila tea.

¹⁵Vae huri hi nomo lengaia haburu kwara na heretuvaki na Roro Karea lakwakamu vake takwa-hi Rom.

¹⁶I nau nohe maemae tea vohoki kina Roro Karea hika, huri aia a huirana noi God, vae ne vakahiki na tangaloi savia hinea rau hauhuri luna, a gwaloana noi Isrel tomuaki, vunu vake a tangaloi tavalavarea.

¹⁷A Roro Karea u matangwasaraki kwara i God mo vai kworohoki na tangaloi ramo bakoto lo nakona. U vai kwehi huri na noga hauhuriana kehekeheki, u tinakaki lo tinatinakakiki vaki lo gwereki. Hokinia a Uliuli* Kokona mo viti kwara, “A tangaloi hinea u bakoto lo nako i God huri u hauhuri, vae aia ne ahi.”

¹⁸I God u matangwasaraki kwara u lologuteki na tangaloi huri na doridoriga hinea rahe domi mavakinia tea, vake rau vai a kinau rau hati haburu, vae ne vai kadira huri. A noga hatiana hi u tu koro na vitikareaki.

¹⁹I God ne vai kadira, huri a kinau aira hinea a tangaloi kwara rana kikilai God luna, rau matangwasara ba, huri i God kehekeheki u matangwasarakinira ba lakwara.

²⁰Tahe taga lavi na kinau tea aira hika kina matada. I God aia i God Tatoka, a nona huirana nehe rovo tea, u eno vaki na tuai. Vae mo tinakaki lolona i God mo tau na varamana vaki na hika, i God mo matangwasarakinia sibona lakwakita kwara tana taga kikilakinia lo kinau mo taura lo varamana hika. Huri hi, ranahe viti lavi na kinau te vohoki.

²¹Aira rau kikilai God, vae rahe domi mavakinia tea hokinia u taritarisa lakwara kwara rana vai huri aia i God, vake rahe bete te noga lagwaana lakwae. Vae a domidomiga u reraka, a kinau tikei lolo gwatuga, a domidomiga u kukwere kina dodoki.

²²Rau viti kwara rau kikikila, vae hetea rau reraka haburu.

²³U taritarisa kwara rana domi mavaki i God Tatoka, vae rau maraka rau domi mavaki na takaro vuroki hinea a tangaloi vohoki rau tai dedeki. A kihidede vano hi ratuaki aira hoki na tangaloi hinea vae rana mate lai. Ratuaki aira hoki na manu, ratuaki aira hoki na boboroa, ratuaki aira hoki na ngwata.

²⁴Vae huri a tangaloi rau reraka kwehi, i God u tirakinira kwara rana toko vai na kinau hinea rau hati lo hala na domiga hi rahe karea tea, rana toko vai na maemaeana rusa lakwara muleki.

²⁵Ramo tau na vitikareaki huri God letiu, ramo hauhuri lo leo kurakura. Ramo domi mavaki na kinau aira hinea i God mo taura, ramo toko boloki lakwara. Vae rahe domi mavaki God tea hinea mo tau na kinau vano hi, vake rahe boloki tea lakwae. Vae aia kehekeheki u bakoto kwara tana tabe hakeki na hinana tigwaravu. Amen.

²⁶Vae huri na kinau vano hi, i God u tirakinira ramo huri lo domiga hinea a maemaeana luna. A ravavine rau bohiki na doridori karea na vavine mana ngwera, ramo toko vai na doridori hi rahe karea tea.

²⁷Vake lo doridoriki hokinia nga, a ngwera vake rau tiraki na doridori karea nona ngwera mana vavine, ramo lengai na ngwera dolua vake. A ngwera rau tuku vai na doridori hi mana ngwera dolua, a maemaeana vohoki. Vae huri na doridori aia hi, rau hagwe a rongoana hati luga, hinea u taritarisa mana doridori vano hi rau hati, ramo toko vaira.

²⁸I God mo tiraki na tangaloi kwara rana vano lo domiga hi rau hati, rana vai kinau rahe taritarisa tea, huri rau bega kwiribibi lolo domiga a havakinau rau kikilai kwara u kareaki huri God.

²⁹Hikani rau kukwere kina doridori hati vatahae, rau vai kinau rau hati, rau lengai na kinau vatahae, rau vai bulabula vovohi na tangaloi. Tigwaravu a kinau u kadikadira, rau uaua mate tangaloi, rau vai vuro mana tangaloi. Rau kurakura, vake rau domi bulakiki na tangaloi, rau kurakuraki leo.

³⁰Rau kwahakwaha hati mulekinira, rau bega ki God, rau barabarahi, rau domidomira, vake tigwaravu rau kwaha kwetukwetutu. Tigwaravu rau domi haro na hala na hatiki dolua vake kwara rana toko vai. Rahe rongohuri tamaga mai retahiga tea.

³¹Rau galo lo tangwata vae rahe domi huri tea, vake rahe kwiribibi na noga tulikileo tea. Rahe vai tabetabe tea mana tangaloi dolua, vake a hahakaviga tikei.

³²Rau kikilai ba kwara a tangwata noi God u viti kwara a tangaloi hinea u tuku vai na doridori hokinia hi, vae ne mate kinia. Vae ra va madimadi lo doridori vano hi ratoko va vaira. Vunu siletia hi, ramo lagwa lo doridori na tangaloi dolua vake hinea rau tuku vai kinau hokinira.