Read West Ambae ROM 11 Bible Online

ROM 11 - West Ambae bible

ROM 11

¹A nogu leo uhiuhi katukwale taliku. ?I God u tau na bulana tangaloi tivarea, vae nehe lavira te taliku? Hetea. I nau a gwaloana noi Isrel*. Nu gwalo vanamai lo gwatuidamu lui Bensamen hinea a gwaloana lui Evraham.

²I God he tautau uluki na bulana tangaloi te tivarea hinea u mataira lo tinatinakakiki. Vae i kamu tulu kikilai na leo na Uliuli* Kokona, lo tanotano i Elaesa mo toko kwahakwaha mai God, mo toko viti huri na hatiana nona gwaloana noi Isrel.

³Mo viti “Hugwe i God. A tangaloi vano hika rau kwohi matematei na nomu tangaloi* duruduruki, vake rau reve suri na nomu voda.[4] Hikani nu hugu i nau kaheau vohoki, vae rau tuku vai kwara rana kwohi mateiau vake.”

⁴?Vae i God mo daraki kworohokinia lakwae? I God mo viti kwara, “I nau nu kwiribibi na bulagu tangaloi u tari vakaibitu radu nga hinea rahe sovi hivo tea vovohi na takaro vuroki hi i Bal.”

⁵Lo taro hika aia hokinia hi vohoki. A tangaloi kukwehu eia hinea i God u mataira ba lo nona domi tabetabe lakua.

⁶I God u matai na bulana tangaloi kina nona domi tabetabe lakua vohoki, hete lo noga boloboloki hini ramo toko vai. Kwara vae diko u mataira hokinia hi lo noga boloboloki hi ramo toko vai, a nona domi tabetabe lakua ne mulemai ki kinau vuroki.

⁷?Vae kworohokinia? A gwaloana noi Isrel aira vunu rahe hagwe na kinau tea hinea ramo toko soro haroa. Aira kukwehu hinea i God u mataira ba, vae rau hagwea. Ratuaki a rongorongoga rau vono, rahe rongo na kwarekware te noi God.

⁸Hokinia a Uliuli Kokona mo viti kwara, “I God u vai na domiga mo vonovonoka vae vaki lo rani hika, rahe vai lai te kwara rana taga kikilaki, vake rahe vai lai te kwara rana rongo kikilaki.”

⁹I Devit mo viti kwara, “U karea kwara a noga kanikani* ne mule hoki na kabe mana vuna. U karea kwara rana kona luga, rana kwali na kakadiki.

¹⁰U Karea kwara a mataga ne dodo kwara vae ranahe taga lavi na kinau tea. U karea kwara rana rongo hati tigwaravu kina noga hagohago rau mava.”

¹¹U karea, hikani nogu leo uhiuhi katukwale. ?Lolona hi a gwaloana noi Isrel* ramo tatu, vae rau sovi halaraduki diko hetea? Hetea, rahe sovi halaraduki tea. Vae huri ramo sovi i God mo vakahiki na tangaloi tavalavarea tina gwaloana noi Isrel kwara ne vai na gwaloana noi Isrel ne kadira huri.

¹²A vaivai hati nona gwaloana noi Isrel mo lavi na karekarea lakua lakwa na tangaloi na varamana savia. I God mo bete na karekarea lakua lakwa na tangaloi tavalavarea, huri a gwaloana noi Isrel ramo sovi. Vae lo taroki i God ne lavi na gwaloana noi Isrel savia rana mulemai vaki maia taliku, vae ne bete na karekarea lakua vakevake lakwa na tangaloi tavalavarea.

¹³Hika i nau nu kwaha maikamu, i kamu hi a tangaloi tavalavarea tina gwaloana noi Isrel. I God u rivukiau nomo kwareki a kaihora* kokona lakwakamu hi a tangaloi tavalavarea, vae luna hi nu lagwa haburu mana boloki hi mo betea lakweau.

¹⁴Nu domi kwara luna hi vae na vai na nogu tangaloi hinea lo vanuagu ne kadira, vae lo hala hi i God ne vakahikinira ratuaki.

¹⁵Lolona i God mo taura tivarea mo lavi na tangaloi na varamana ramo bulubulu maia taliku. Vunu lo taroki hinea i God ne lavira mulemai taliku aia a kinau haburu. Ne hoki na tangaloi hinea ramo mate, vae ramo ahi taliku.

¹⁶Diko a bereti tomuaki u beteana lakwai God u kokona, vunu a bereti* hi doluaki u kwareki a nona vake. Diko te kakwari na vikai rau beteana lakwai God rau kokona, vunu a rangaki rau kwareki a nona vake.

¹⁷Aia hokinia hi i God mo tai utuhi na ranga na bulana vikai a violev*, vunu mo lavikamu, i kamu hoki na ranga na violev na bubu, mo harikikamu tilo bulana vikai hi. Vae hika tulu lavi na huirana nona gwaloana noi Isrel* lo tokaana karea noi God hoki na nubunubu na violev hi.

¹⁸Huri hi, tulu hatu taga bulakiki na ranga na vikai hinea i God mo tai utuhira. Tulu hatu domidomikamu. I kamu hoki na ranga na vikai vohoki. I kamu tulu he kwiribibi na kakwariki tea, a kakwari u kwiribibikamu.

¹⁹Vae i kamu tulu ne viti lai kwara, “Io, a ranga hi i God mo tai utuhira kwara ne hile a tanotano lakwakami.”

²⁰Aia kwehi kareaki. Mo tai utuhira huri rahe hauhuri tea. Vae i kamu tulu hariki luna huri tulu hauhuri. Tulu hatu domidomikamu luna hi, vae tulu mataku.

²¹A gwaloana noi Isrel aira a rangaki bakotoki, vae i God he kokolokinira tea, u vai kadira. ?I kamu tulu domi kwara i God ne kokolokikamu, nehe vai kadikamu tea? Hetea, ne vai kadikamu.

²²Luna hi tau taga kikilaki kwara i God u vaivai karea mana tangaloi, vake u vai kinau u madi mana tangaloi. Aira hi rau sovi ba, u vai kinau u madi maira, vae aia u vaivai karea maikamu. Diko i kamu tulu ne tu ne madi lo nona hala, ne vaivai karea maikamu, vae diko hetea, ne tai utuhikamu vake.

²³Vae diko a gwaloana noi Isrel rana tiraki na doridoriga hi rahe hauhuri tea, i God neri harikinira taliku vaki lo tanotanoga, huri i God u vai lai kwara ne harikinira taliku.

²⁴I kamu hinea a tangaloi tavalavarea tina gwaloana noi Isrel, i kamu hoki na ranga na vikai hi a violev na bubu, vae i God u harikikamu ba tilo bulana violev. A vikai he toko mauri te kwehi. Vae u magemu siletia hi kwara i God ne lavi na gwaloana noi Isrel hinea aira a rangaki bakotoki ne harikinira tilo viuki taliku.

²⁵Rabela. A vitikareaki eia u eno hinea i God u tavunikinia tuai. Vae nu lengaia kwara tulu ne kikilaia, huri he karea te kwara tulu ne domidomikamu kwara tulu kikikila haburu. A leoki u viti hikwe kwara a gwaloana noi Isrel* a gwatuga rau madi, vae nehe eno te kwehi vaki tuai. Ne eno tarisaki a valuvalumiu, i kamu a tangaloi tavalavarea hinea tulu ne vanamai vaki mai God, ne taritarisa lo valuvaluki vunu neri rovo.

²⁶Vunu i God ne vakahiki na gwaloana noi Isrel doluakinira, hoki na Uliuli* Kokona mo viti lo leoki aia hika kwara, “A Kaivakahi neri vanamai tina gwatuivanua Serusalem, vunu ne lai savi na vaivai hati tiura aira hi lo gwaloana lui Sekov.

²⁷Aia hi a leo harikiana hinea na vai maira lo taro hi na lai letiuki na noga vaivai hati tiura.”

²⁸Aira rau bega kina Roro Karea, vae huri hi ramo kwareki a tavaluivuro noi God. Mo vaiana hokinia hi kwara ne hago maikamu a tangaloi tavalavarea. Vae huri i God u mataira ba u lagwa maira radu nga, huri u lagwa mai ratubuga tuai.

²⁹I God he bohi na domina tea tiura aira hinea u mataira ba, diko aira hi u vai tabetabekinira ba.

³⁰I kamu hi a tangaloi tavalavarea tina gwaloana noi Isrel, tuai tulu he rongohuri i God tea, vae hika i God u hakavikamu mo hago maikamu, huri a gwaloana noi Isrel rahe rongohuria tea.

³¹Lo halaki hokinia hi, huri i God mo hakavikamu mo hago maikamu, vae hika a gwaloana noi Isrel rahe rongohuri i God tea, kwara vae i God ne hakavira ne hago maira vake.

³²I God u gwarubibi na tangaloi savia lo doridoriga hinea rahe rongohuria tea. Mo vai kwehi huri kwara vae ne hakavira ne hago maira aira vunu.

³³!A hava na karekarea lakua noi God! !Hava na nona domisea mana nona kikikila! ?Ihe ne viti lavi na nona domiana? ?Diko ihe ne kikilai lavi na halana?

³⁴Hokinia a Uliuli* Kokona mo viti kwara, “?Ihe hi u kikilai na domi na Hugwe i God? ?Ihe hi u vai lai kwara ne haharae?

³⁵?Ihe hi u bete a hilehile lakwai God kwara vae i God ne harikinia lakwae taliku?”

³⁶A kinau savia aia u taura. Vunu savira rau tu lo nona huirana kehekeheki kwara rana kaluhakinia. Vae a hinana ne tabe hakekiana tigwaravu vaki tuai. Io, kareaki.