Read West Ambae ROM 13 Bible Online

ROM 13 - West Ambae bible

ROM 13

¹U taritarisa kwara a tangaloi savia rana rongohuri na kavman, huri a kavman savia rau tu, huri i God kehekeheki u tiraki na huirana hi lakwara. A kavman vano hi rau tu huri i God aia u rivukira.

²Vae ihe maira hinea rau bega rongohuri na kavman, rau bega kina huirana hinea i God mo rivukia. Vae diko te katukwale ne vai hokinia hi, aia u vaia sibona kwara ne kwali na kakadiki huri.

³A tangaloi hinea rau vai kinau karea, ranahe mataku te kina kavman. Vae aira hinea kehekeheki rau tuku vai kinau hati tigwaravu rana mataku kinia. Vae diko i kamu tulu he lengaia tea kwara tulu ne mataku kina kavman, vae tulu vai kinau rana karea, vunu aia ne kalukikamu,

⁴huri a kavman aia a tangaloi boloki noi God, u boloboloki kwara ne hago maikamu. Vae diko tulu vai na kinau hati tea, vae tulu ne mataku kinia, huri a nona huirana kwara ne vai kadi na tangaloi, u kareaki. I God u lologuteki na tangaloi hinea rau tuku vai kinau rahe karea tea, vae a kavman aia a tangaloi boloki noi God kwara vae ne vai kadi na tangaloi vano hi hokinia i God u lengaia.

⁵Vae huri hi, tulu rongohuri na kavman. Tulu ne vai kwehi huri tulu mataku ki God, vae ne mai arekikamu. Vae silesiletia hi tulu ne rongohuri na kavman kwara a domimiu ne hatu kilukilu, vae tulu ne kikilai kwara tulu he vai na kinau hati tea.

⁶Vake huri na kinau hi, u taritarisa kwara tulu ne voli nomiu takis. A kavman savia rau vai noga bolokiana, rau tuku boloki lakwai God.

⁷Tulu vai tabetabeki bukumiu lakwara. Aira hi rau vile a takis, tulu voli lakwara. Aira hi rau lai huri hala na vivilagoki, tulu voli lakwara. Tulu rongohurira, tulu vai mavakinira aira vunu.

⁸Tulu hatu bukuka mana tangaloi. A kinau katukwale vohoki aia hoki na buku, u tu hi u tu ba, aia hi kwara tulu ne lagwalagwa maikamu. Ihe te hinea u lagwa mana tangaloi laliki, u tabe na leo na Tangwata* doluakinia.

⁹A korokoro eia rau viti kwara, “Ko hatu balu vavine. Ko hatu uaua mate tangaloi. Ko hatu babalu. Ko hatu lengalengahuri kinau nona tangaloi.” A korokoro aira vano hi mana tangwata rusa vake, vae a tangwata katukwale u gui doluakinira, aia hi u viti kwara, “Ko lagwa mana tangaloi laliki hokinia komo lagwa maiko sibomu.”

¹⁰Ihe te hinea u lagwa mana tangaloi laliki nehe vai na kinau hati te vohoki vovohira. Vae huri hi, a tangaloi hinea u lagwa mana tangaloi laliki, u tabe na leo na Tangwata doluakinia.

¹¹Vae i kamu tulu vai hokinia hika, huri tulu kikilai na taro haburu hika tamo hugu luna. A taroki u vanamai ba kwara tulu ne rada, tulu hatu maturu taliku, huri a taroki kwara tana ahi luna u garagarani u siletia hinea tuai lolona tamo hauhuri tomua halaradu.

¹²A bongi u livu kwara ne rani, a rani u garagarani kwara ne maravuti maikita. Vae ta tiraki na bohibohi na dodoki, ta lai noda lagolago na vuro kwara tana vai vuro lolo leleha.

¹³Ta bohibohi ne karea, hoki na tangaloi hinea rau hugu lolo leleha. Ta hatu vai kanikani hinea rahe huri na halaki tea, ta hatu inu giroki tamo reraka kinia. Ta hatu vaivai hati mana ravavine, ta hatu vai doridori hinea rahe bakoto tea. Ta hatu viroviroro, ta hatu domi varibuka.

¹⁴Vae tulu lavi na noda Hugwe* i Jisas Kraes* ne kwareki a vulavulamiu huri na vuro kwara ne tu koro na hatiki tikamu. Tulu hatu domidomi lo kinau hati hinea a domimiu rau lengaia, tulu hatu vaira taliku.