Read West Ambae ROM 15 Bible Online

ROM 15 - West Ambae bible

ROM 15

¹I kita tau hauhuri u madi u taritarisa kwara tana hago maira hinea rahe huira tea lo noga hauhuriana, ta kwali na noga hagohago mava. Ta hatu domi hurikita siboda.

²Vae vatavatahakikita tana domi huri rabelada, tana vai kinau hinea rau lagwa luna, ne hago maira, kwara rana huira vakevake lo noga hauhuriana,

³huri i Kraes* he domi huria tea sibona. A leo hika lo Uliuli* Kokona mo kworo luna, hi mo viti “A noga leo hati ramo toko vitira vovohiko, rau vitira vovohiau.”

⁴Savi na leo hinea rau ulira lo Uliuli Kokona tuai, u uliana kwara rana huhuikita, kwara vae a domida ne tu luga, huri a leo hi lo Uliuli Kokona u rakati na domida u vai na domida mo bua.

⁵A tangaroa karea hika lakwakamu. I God hinea u vai na domimiu mo bua, u rakati na domimiu, vae ne hago maikamu kwara tulu ne domidomi katukwale, huri hi tulu huri na tanoigaru i Jisas Kraes.

⁶Vunu doluakikamu tabulutaki tulu ne kwahakwaha katukwale tulu ne kaluhaki God hinea a God a Tama na noda Hugwe i Jisas Kraes.

⁷Tulu lailai tabetabekikamu, hokinia i Kraes* u lai tabetabekikamu ba. A doridori aia hi ne tabe hakeki na hina i God.

⁸Na viti lakwakamu kwara i Kraes u mulemai kina tangaloi boloki mo hago mana gwaloana noi Isrel*. U vai kwehi kwara ne hago mana gwaloana noi Isrel, ne vosangira kwara i God aia u kwiribibi na leona tigwaravu, luna hi mo vai na nona tulikileo mo kworo hinea mo vitira tuai lakwai ratubumai.

⁹Vunu vake mo vai kwehi kwara vae ne vai na hala huri na tangaloi tavalavarea tina gwaloana noi Isrel rana vai lai rana kaluhaki God huri na nona domi hahakavi. Hokinia a Uliuli Kokona mo viti kwara, “Vae nari lagwakinigo lo nako na tangaloi tavalavarea tina gwaloana noi Isrel. Nari kaho kaluhaki na hinamu.”

¹⁰Vunu a Uliuli Kokona mo viti taliku kwara, “I kamu a tangaloi tavalavarea tina gwaloana noi Isrel, ne havutikamu mana tangaloi noi God hinea u mataira ba.”

¹¹Vunu taliku mo viti kwara, “Vunuvunuhikamu hi a tangaloi tavalavarea tina gwaloana noi Isrel, tulu kaluhaki na Hugwe i God. Vunuvunuhi na tangaloi tulu kaluhakinia.”

¹²Vunu a tangaloi* duruduruki i Aesaea u viti vake kwara, “A gwaloana noi Sese vae ne vanamai. I God ne tabea huri kwara ne hugwe koro na tangaloi tavalavarea tina gwaloana noi Isrel, vae aira ranari tau na noga domidomi ne madi luna.”

¹³A tangaroa karea hika lakwakamu. I God hinea u vaikamu tulu mo tau na nomiu domidomi mo madi luna ne vaikamu, ne havutikamu haburu, vake ne bete na magemuana lakwakamu, huri tulu hauhuri luna. Vunu a nomiu domidomi ne tu ne madi luna, vae ne huira vakevake lalahi na huirana na Tanungwe Kokona.

¹⁴Rabelagu. I nau nu kikilai kwara i kamu a tangaloi karea, tulu kikikila haburu, vae tulu vai lai kwara tulu ne huhuhuikamu muleki.

¹⁵Vae lo leta hika nu kwaha u madi huri nu lengaia kwara tulu ne domidomi lo leo aira vano hi taliku. Nu taritarisa kwara nana kwaha maikamu hokinia hi, huri lo domi tabetabe lakua noi God

¹⁶mo rivukiau kwara na vai na bolokiana noi Jisas Kraes* maikamu a tangaloi tavalavarea tina gwaloana noi Isrel*. Nu vai boloki hoki na tangaloi* lingilingi, nomo heretuvaki na Roro Karea hi u vanamai ti God, kwara vae i kamu a tangaloi tavalavarea tulu ne hoki na hilehile lakwai God. A Tanungwe Kokona u vaikamu tulu mo kokona, vae i God ne lai tabetabekikamu.

¹⁷U taritarisa kwara na domidomiau lo nogu bolokiana lakwai God, huri nu hariki lui Jisas Kraes.

¹⁸Na kwaha ne madi maikamu, vae na kwaha kehekeheki lo kinau hinea i Kraes mo vaira lalahiau huri kwara na turukikamu a tangaloi tavalavarea kwara tulu ne rongohuri God. I Kraes u boloki lalahi na nogu leo mana nogu bolokiana.

¹⁹U boloki lalahi na huirana na kaivosangi mana vaisea mana huirana na Tanungwe Kokona. Vae hokinia nomo tinakaki lo gwatuivanua lakua Serusalem nomo vano vaki Ilirikam, vae tigwaravu lo halagu nomo toko heretuvaki na Roro Karea huri Kraes u taritarisa lo vitivitiki.

²⁰A domigu u huira tigwaravu kwara na toko heretuvaki na Roro Karea hi lolo vanua aira hinea rahe rongo i Kraes te radu nga, huri kwara vae na hatu tabe ingwa lo tanotano hi a tangaloi dolua aia u vai raraia ba.

²¹Hokinia a Uliuli* Kokona mo viti kwara, “A tangaloi aira hinea a tangaloi tikei kwara ne viti huria lakwara, vae rana tagaia. Aira hinea rahe rongo na rorona te radu nga, vae rana rongoa rana kikilai.”

²²Vakarusa a bolokiana vano hi ramo vai koroau, vae nohe venatu lai te vaki maikamu.

²³Vae hika nu vai vunuhi na nogu bolokiana lo vanua laliki hike. Vunu vake nu lengaia haburu kwara na venatu na tagaikamu a hukao rusa rau vano ba.

²⁴Vae huri hi, nu domi kwara nehe tuai tea na venatu na tagaikamu lo halagu vaki Sven. Nu lagwa kwara na hugu maikamu a vula te kairua. Vunu diko nomo ngwalua tikamu, tulu neri hago maiau lo halagu vaki takwa-hi.

²⁵Vae hika lai nga na va vaki Serusalem na vai boloki lakwa na tangaloi noi God takwa-hi.

²⁶Na vai kwehi huri savi na kwarelua* lo vanua Masetonia maia Gris rau domi utu ba kwara rana bete a hilehile kwara ne hago mana tangaloi noi God lo gwatuivanua lakua Serusalem hinea rau kakaravika.

²⁷Aira kehekeheki rau domidomi luna ba kwara rana vai kwehi. Vae kareaki aia hokinia kwara a bukuga eia maira, huri a tangaloi tavalavarea tina gwaloana noi Isrel rau hagwe na tokaana karea lui God lo gwaloana noi Isrel. Vae hikani u taritarisa kwara aira rana hago mana gwaloana noi Isrel lo kinau karekarea hinea ramo hagwe lo noga tokaana lo varamana hika. Vae hokinia hi rana vai utuhi na bukuga hi.

²⁸I nau nari bete vunuhi na mane* hi lakwara hinea a tangaloi tavalavarea ramo vohokinia. Vae na vai na bolokiana hi ne rovo, vunu nari vano vaki Sven. Lo halagu vaki takwa-hi nari tagaikamu.

²⁹Nana maravuti maikamu, vae nu kikilai kwara na lavi na karekarea noi Kraes* hinea rau lalakua karakara, na betera lakwakamu.

³⁰Rabela. Nu seseaka hurikamu lo hina na noda Hugwe* i Jisas Kraes, vake kina lagwaana hinea a Tanungwe Kokona u bete. Na viti lakwakamu kwara tulu ne hariki maiau lo tiutangaroa. Tulu tiutangaroa ne huira lakwai God huriau.

³¹Tulu tiutangaroa kwara ne tu koro na ngwera Sutia hinea rahe hauhuri te lui Kraes kwara rana hatu kwohi mateiau. Vake tulu tiutangaroa kwara a nogu bolokiana lo gwatuivanua lakua Serusalem ne taritarisa lo nako na tangaloi noi God takwa-hi, vae rana lagwa luna.

³²Lo hala hokinia hi, diko lo domikiana noi God, na maravuti maikamu ne havutiau haburu, vae na lagwalagwa, na mabu maikamu kwara na huira taliku.

³³A tangaroa karea hika lakwakamu. I God a gwataki na noda magemuana ne hago maikamu doluaki. Amen*.