Read West Ambae ROM 16 Bible Online

ROM 16 - West Ambae bible

ROM 16

¹Na viti tabetabeki lakwakamu huri hagweda i Vibi aia a vavine hinea a kaihago na kwarelua* lo gwatuivanua Kegeria.

²Vae u karea kwara tulu ne lai tabetabekinia lo hina na Hugwe* hokinia hinea u taritarisa kwara a tangaloi noi God rana vai. U taritarisa kwara tulu ne hago maia lo havakinau te mo lengaia, huri aia u hago mana tangaloi u rusa, vunu maiau vake.

³Nu hokaki nogu lagwaana lakwai Akwila mai vavinehina i Prisila, i rabuluigu hinea raru boloki maiau lo bolokiana noi Jisas Kraes*.

⁴Raru tiraki na mamaurianagaru kwara raru ne hago maiau. Nu lagwa haburu mairarua, vae hete i nau kehekeheki, vae a kwarelua tiura hi a tangaloi tavalavarea tina gwaloana noi Isrel* hokinia vake.

⁵Vunu buluiki vake nu bete nogu lagwaana lakwa na kwarelua hinea ramo toko bulu tabulutaki tatagaru. A nogu lagwaana vake lakwa na nogu buluana karea i Evaenetas hinea aia a tangaloi tomua halaradu lo vanua Esia* mo hauhuri lui Kraes.

⁶A nogu lagwaana vake lakwai Meri hinea mo rahakinia haburu hurikamu.

⁷A nogu lagwaana vake lakwai Adronikas mai Sunias, i kami a gwaloana noi Isrel vae keu hugu tabulutaki lolo ingwa na gwarugwaru tuai. I rarua a kaihora* kokona hinea a tangaloi rusa rau kikilairarua, vake raru kwareki a tangaloi noi Kraes tomuakiau.

⁸A nogu lagwaana lakwai Abliatas, a nogu buluana karea lo bulubulu nona Hugwe.

⁹A nogu lagwaana lakwai Obanas hinea u bulu maikami lo bolokiana noi Kraes, vake lakwai Stakis a nogu buluana karea.

¹⁰A nogu lagwaana lakwai Aveles hinea u vosangi kareaki kwara u tu madi mai Kraes. A nogu lagwaana lakwara vake hinea rau hugu tata i Aristovulus.

¹¹A nogu lagwaana lakwai Herotion i kamirua a gwaloana noi Isrel, vake lakwa na ratua lui Kraes hinea rau hugu tata i Nasisas.

¹²A nogu lagwaana lakwa na ravavine kairua i Trivaena mai Trivosa, hinea raru boloki lo bolokiana nona Hugwe, vake lakwai hagwegu lui Kraes i Perisis hinea nu lagwa maia haburu. U rahakinia haburu lo bolokiana nona Hugwe.

¹³Nu hokaki nogu lagwaana vake lakwa na ngwera hi i Ruvas, hinea u bolokinia haburu lo bolokiana nona Hugwe, vake lakwai retahina hinea u vai tabetabekiau tigwaravu hokinia kwara i nau i natuna vohoki.

¹⁴A nogu lagwaana lakwai Asingkritas, i Vlegon, i Heremes, i Patrobas, mai Heremas, mana ratua doluaki vake hinea rau hugu maira.

¹⁵A nogu lagwaana vake lakwai Vilologas mai hagwegu lui Kraes i Sulia, vunu lakwai tuagu lui Kraes i Nereas mai hagwena. A nogu lagwaana vake lakwai Olibas, mana tangaloi doluaki noi God hinea rau hugu maira.

¹⁶Tulu hahavakikamu muleki kina boboniana [6] hokinia tulu vituatua. Savisavi na kwarelua noi Kraes rau hokaki noga lagwaana lakwakamu.

¹⁷Rabela. Nu lengaia haburu kwara tulu ne tagahuri ne karea, huri a tangaloi aira hinea rau vai na tangaloi ramo makwahekwahe, vake rau magaraki na hauhuriana nona tangaloi, vae ramai sinakamu. Rau kwahakwaha hati vovohi na huhuiana hini tulu mo lavia. Tulu vano vakahao tiura.

¹⁸A tangaloi hinea rau tuku vai kinau kwehi, rahe vai te boloki noi Kraes* a noda Hugwe*, vae rau huri na noga domidomi hinea rahe karea tea. A noga leo rau karea, vae rau kwaha ki ringoga vohoki, vunu rau sina na tangaloi aira hinea rahe kikilai na kinau tea, rau magaraki na domidomiga.

¹⁹Doluaki na tangaloi rau rongo kwara tulu tu madi lo Roro Karea, vae huri hi nu lagwa u havutiau hurikamu. Nu lengaikamu kwara vae tulu ne kikikila lo hala bakoto, vae tulu nehe vano te vohoki lo hala hinea rau hati.

²⁰Nehe tuai tea i God a gwataki na noda magemuana ne vai suri Setano* tulu ne bile raharahakinia. A tangaroa karea hika lakwakamu. A noda Hugwe i Jisas ne hago maikamu kina nona domi tabetabe lakua.

²¹I Timoti hinea u boloki maiau, u hokaki nona lagwaana lakwakamu. Vunu i Lusias, i Seson mai Sosivata, i kami a gwaloana noi Isrel*, rau hokaki noga lagwaana lakwakamu vake.

²²I nau, i Tosias, nu uli na leta hika noi Pol, nu bete na nogu lagwaana lui Kraes lakwakamu.

²³I nau i Pol nu hugu tata i Gaeas hinea a kwarelua* rau tuku vileki tabulutaki tatana. Aia u hokaki nona lagwaana lakwakamu. I Erastas vake, a tangaloi tagahuri mane* lolo gwatuivanua lakua hike, u hokaki nona lagwaana lakwakamu. Vunu i Kwotas i tuada lui Kraes, u vai kwehi nga vake. [7]

²⁵Ta tabe hakeki na hina i God tigwaravu. Aia kehekeheki ne vai lai ne vaikamu tulu ne tu ne madi lo nomiu hauhuriana. A leo hi nomo toko vitia u taritarisa mana Roro Karea hinea nu tuku heretuvakinia, nu tuku viti huri i Jisas Kraes*. U taritarisa vake mana leo tavuniki noi God hinea u tavunikiana tuai, vae hika i God u matangwasarakinia.

²⁶I God Tatoka u lavi na leo tavuniki hi vaki na ngwasara kina leo hinea a bulana tangaloi* duruduruki ramo ulia tuai. Aia u tuliki na leo hika mo viti kwara a leo hi ne vano lakwa na tangaloi na vanua savira kwara rana hauhuri luna rana rongohuria.

²⁷Hikani tau hariki lui Jisas Kraes kwara tana tabe hakeki na hina i God aia hi katukwale vohoki, vake aia kehekeheki u kikikila sea. A hinana ne tabe hakekiana tigwaravu, vaki tuai. Amen*.[8]