Read West Ambae ROM 3 Bible Online

ROM 3 - West Ambae bible

ROM 3

¹?Vae kworohokinia maikami a gwaloana noi Isrel*? ?I God he vaivai karea te maikami sileti na tangaloi tavalavarea? ?I God he hago te maikami luna hi kemo lai a kaimatai* lo siosio?

²Hetea. Tigwaravu u hago maikami haburu lo hala rusa. A kinau haburu mo vaia, aia hi mo tau na nona leo lakwakami.

³?Vae diko ratuaki tikami rahe kwiribibi na leo hi tea, vae hi tulu domi kwara i God nehe kwiribibi na leona tea?

⁴Hetea. A leona u tu tigwaravu. Diko a tangaloi savira aira a tangaloi kurakura, vae i God aia a kareaki he kurakura tea. Hokinia a Uliuli* Kokona mo viti huri God kwara, “Diko ku kwahakwaha, ko vosangi kwara i nigo a tangaloi bakoto. Diko rau tau na leo lumu vae ko guira.”

⁵?Vae diko a doridorimai hini keu tuku vaira rahe taritarisa tea, u vosangi kwara a doridori i God rau taritarisa tigwaravu, vae kena viti kworoho? ?Kena viti kwara i God u vai vakasile hini mo vai kadikami? Hetea. A leo hika hoki na leo na tangaloi vohoki.

⁶He taritarisa tea kwara kena viti kwehi. ?Kwara vae diko i God he bakoto tea, ne areki kworohoki na tangaloi na varamana?

⁷?Vae diko nu kurakura vae a doridorigu hi u tuku tabe hakeki na hina i God huri u matangwasaraki kwara u viti na kinau rau kareaki tigwaravu, vae kworohokinia maiau? ?U taritarisa kwara i God ne arekiau huri, ne viti kwara na kwali na kakadiki huri, diko he taritarisa tea kwehi? U taritarisa kwara ne arekiau huri.

⁸Kwara vae diko i God he areki laviau te huri, vunu tana viti lai kwara, “Go. Ta vai na kinau lo hatiki, vae a kinau hinea u karea ne vanamai luna.” A tangaloi tuaki kareaki rau kwaha bulakikiau luna hi ramo toko uveau lo kinau aia hi vohoki. Vae i God ne arekinira kwara vae rana kwali na kakadiki huri, hokinia u taritarisa kwara ne vai.

⁹?Tulu domi kwara i kami a gwaloana noi Isrel keu karea sileti na tangaloi tavalavarea? Hete vohoki. Nu vosangi ba lakwakamu kwara a gwaloana noi Isrel* mana tangaloi tavalavarea raru taritarisa, aira vunu tavuti na huirana na vaivai hati.

¹⁰Hokinia a Uliuli* Kokona mo viti kwara, “A tangaloi tikei hinea kwara u bakoto, a tangaloi tikei vohoki.

¹¹A tangaloi tikei hinea kwara u rongo kikilaki God, a tangaloi tikei kwara u soro haroa.

¹²Doluaki na tangaloi rau bohi ti God, rau vano saloi na hala. A tangaloi tikei hinea kwara u vai na kinau u karea, hete kwara te katukwale.

¹³A kwakwaga aira hoki na gwaru na tangaloi hinea rahe tanomia tea, vunu a kinau hati ramo toko vanamai tivarea tiua. A meaga rau tuku viti na kurakura kehe nga. A leo hinea ramo ngwalua tina kwakwaga, aira hoki na kinau hi a mateana luna hinea u ngwalua tina kwakwa na ngwata hati.

¹⁴A kwakwaga u kukwere kina leo rusa hinea rau hati, rau kelikeli.

¹⁵Rau vaivai heheri kwara rana kwohi na tangaloi a daiga ne hale, rana ua mateira.

¹⁶Takwanahavaki hinea ramo lakalakao rau magaraki na vanua, rau magaraki na domi na tangaloi vake.

¹⁷Rahe kikilai na magemuana te vohoki,

¹⁸vake rahe huhui tea kwara rana vai mavaki God.”

¹⁹Hika tau kikilai kwara vatavataha na kinau lo Tangwata* u tauana lakwara hi rau hugu tavuti na Tangwata. A Tangwata hi u tu kwara ne tu koro na leo nona tangaloi savira, vake kwara ne vai na hala kwara i God ne areki na tangaloi na varamana doluaki.

²⁰Hete tangaloi kwara u bakoto lo nako i God lo hala hinea u vai na kinau a Tangwata mo viti. A bolokiana nona Tangwata aia hika, u vai na tangaloi mo kikilai kwara a nona hatiana eia.

²¹Vae hika i God u matangwasaraki na nona hala ba kwara ne vai na tangaloi rana bakoto lo nakona. Venaha a leo na Tangwata* mana leo na tangaloi* duruduruki rau hago leo luna, aia he vaia te vohoki kwara te lo hala na Tangwata.

²²I God u vai na tangaloi rau bakoto lo nakona huri rau hauhuri lui Jisas Kraes*. I God u vai na kinau hi lakwara aira vunu hinea rau hauhuri lui Kraes, huri a tangaloi doluaki rau taritarisa.

²³A tangaloi vunuhia a noga vaivai hati eia, rau vakahao tina karekarea noi God.

²⁴Vae lo domi tabetabe lakua noi God, i God u bete na nona hilehile lakwara, u vaira rau bakoto lo nakona, huri rau bulu mai Jisas Kraes hinea mo kasatukuhira tina noga vaivai hati.

²⁵I God u tirakinia kwara ne mate, vae kina daina u vai na hala lakwa na tangaloi kwara vae i God ne domidomi koro na noga hatiana, huri rau hauhuri lui Kraes. I God u vai kwehi kwara ne vosangi kwara aia u bakoto, huri tuai, a domina u bua, vake u taga lakaura mana noga hatiana.

²⁶Vae lo taro hikani i God u lai leletiuki na hatiana rusa nona tangaloi savia kwara ne vosangi lakwara kwara aia u bakoto. Lo halaki aia hi i God mo vosangi kwara aia u vai na kinau rau bakoto, vunu u vai na tangaloi savia hinea rau hauhuri lui Jisas rau bakoto lo nakona.

²⁷?Karea, tana domidomikita mana havakinau? A kinau tikei vohoki kwara tana domidomikita luna. ?Vae a havakinau kwara ne tu korokita tana hatu domidomikita? Diko tau vai kwara tana kwiribibi savi na Tangwata, vae a doridori hi he tu koro lavikita tea kwara tana hatu domidomikita. Aia a noda hauhuriana kehekeheki ne tu koro lavi na domidomi hi.

²⁸Tau kikilai ba kwara i God u vai na tangaloi rau bakoto lo nakona huri rau hauhuri kehekeheki, nehe vaira tea kwara rana bakoto kina Tangwata.

²⁹Kwara vae diko hete kwehi, a domianaki kwara i God a God nona gwaloana noi Isrel* kehekeheki. Vae hete kwehi. I God aia a God nona tangaloi tavalavarea vake.

³⁰I God aia a God katukwale vohoki. Mo toko vai na gwaloana noi Isrel ramo bakoto lo nakona huri rau hauhuri lui Jisas Kraes. Vake mo vai na tangaloi tavalavarea hokinia nga.

³¹?Vae kworohokinia mana Tangwata hika? ?A noda hauhuriana ne vaikita tana tau na Tangwata letiu? Eheo, hete kwehi. Tau vai na Tangwata kwara ne tu ne madi lo tanotanoki.