Read West Ambae ROM 6 Bible Online

ROM 6 - West Ambae bible

ROM 6

¹?U Karea, vae i kita tana viti kworoho? ?Tana viti kwehi kwara tana toko va hugu madimadi lo hatiana kwara i God ne hago maikita vakevake lo nona domi tabetabe lakua?

²!Hete vohoki! I kita hokinia tau mate ba tina vaivai hati. A vaivai hati nehe vai lai tea kwara ne vaikita tana vai na vaivai hati taliku. Vae he karea tea kwara tana hugu madimadi lo vaivai hati.

³Kareaki tulu kikilai kwara diko tau lai a bavtaes kwara tana bulu mai Jisas Kraes*, a bavtaes hi tau lavia huri kwara tana bulu maia lo nona mateana.

⁴Lo noda bavtaes hi, hokinia rau tanomikita ba haragoki mai Kraes. Tau bulu maia ba lo nona mateana, huri kwara vae i kita tana lavi na ahiana karagwa. I Tamada u rakati Kraes tina mateana kina nona huirana hinea u karea haburu. Vae lo hala aia hi i kita vake tana toka lo ahiana karagwa.

⁵Vae diko i kita tau bulu haragoki mai Kraes* lo nona mateana, hi a domianaki kwara tau mate hokinia nga. Vae lo halaki hokinia hi tana bulu maia lo nona marakaana kwara i God ne betekita kina ahiana karagwa, hokinia mo bete lakwai Kraes mo rakatia tina mateana.

⁶I kita tau kikilai kwara a doridorida hi tuai rau hati, vae rau duruana lo kaibetu mai Kraes, huri kwara vae i God ne magaraki na huirana na doridorida hi rau hati kwara rana hatu hugwe korokita taliku.

⁷Lolona hi a tangaloi u mate he hugu te tavuti na huirana na vaivai hati taliku.

⁸Vae diko tau mate haragoki mai Kraes, tau hauhuri vake kwara vae tana ahi maia.

⁹I kita tau kikilai kwara i Kraes u maraka tina mateana, vae nehe mate lai tea taliku. A huirana na mateana he kwiribibi lavia te taliku.

¹⁰U mate vakatukwale, nehe mate lai te taliku. Vae mo mate hokinia, he hugu te tavuti na huirana na vaivai hati. Lo nona tokaana mo toka luna hika u tabe hakeki na hina i God.

¹¹Vae lo hala hokinia hi, tulu ne domi hurikamu hokinia kwara tulu mate ba, vae a huirana na vaivai hati nehe vaikamu te taliku. I kamu tulu hariki lui Jisas Kraes, vae tulu toka kwara tulu ne tabe hakeki na hina i God.

¹²Tulu hatu tiraki na hatiana mo hugwe korokamu kwara tulu ne rongohuri na lengalengahuri hati a domi mo lengaia.

¹³Tulu hatu tiraki na tarabehimiu vaki lo hatiana kwara diko tulu ne vai na hatiki. Vae tulu tirakikamu lakwai God hoki na tangaloi hinea u mate ba, vae i God mo vaia mo ahi taliku. Tulu tiraki doluaki na tarabehimiu mana domimiu savia lakwai God kwara ne boloboloki lumiu, tulu ne vai na bolokiana hinea rau bakoto.

¹⁴A hatiana ne hatu hugwe korokamu, huri i kamu tulu he hugu tea tavuti na tangwata, vae tulu hugu tavuti na domi tabetabe lakua noi God.

¹⁵?U karea, vae kworohokinia? Hikani i kita tahe hugu tea tavuti na tangwata, vae i kita tavuti na domi tabetabe lakua noi God. ?Huri hi, tulu domi kwara u karea kwara tana toko vai na hatiki? Hete vohoki.

¹⁶A kinau hika tulu kikilai vunuhia ba. Diko tulu taukamu tilo kaba na tangaloi katukwale kwara tulu ne rongohuria, a tangaloi hi ne hugwe korokamu, vae tulu ne kwareki bulana tangaloi, tulu ne rongo huria tigwaravu. Vae hika diko a hatiana u hugwe korokamu, vae tulu ne mate luna. Vae diko a rongorongohuri u hugwe korokamu, i God ne vaikamu tulu ne bakoto lo nakona,

¹⁷Vae tau lagwa haburu mai God tulu mo bohi. Tomua, a hatiana u hugwe korokamu tulu mo boloki tavutina. Vae hika tulu rongohuri na vitikareaki kina domimiu savia, tulu mo hugu tavuti na huhuiana hinea i God mo betea lakwakamu.

¹⁸I kamu tulu ahi tina huirana na hatiki, vae hika a bakotoana u hugwe korokamu.

¹⁹Nu tuku kwaha lo leo rau matangwasara kwara tulu ne kikilai, huri i kamu a tangaloi na varamana, a nomiu huirana tikei. Tomua tulu taukamu tavuti na huirana na hatiki mana doridori hinea rahe karea tea, vae rau hugwe korokamu tulu mo vaira. Vae hika lo hala hokinia hi, tulu ne taukamu tavuti na huirana na bakotoana kwara ne hugwe korokamu, vunu tulu ne vai na kinau hinea rau bakoto, rau ngwasara.

²⁰Tomua, a hatiana u hugwe korokamu tulu mo boloki tavutina. Lo taro hi tulu he hugu te tavuti na bakotoana.

²¹?I kamu tulu lai te havakinau tina nomiu hugwe tomua? Tulu tuku vai na kinau hinea a maemaeana luga kehekeheki. A kwai na doridori aira hini a mateana luga.

²²Vae hika i God u tirakikamu ba tina huirana na hatiana. I kamu a tangaloi boloki bulai God kehekeheki, vake a kwai na kinau hika aia hi tulu mo kokona tulu mo kwareki a tangaloi noi God. Vunu vaki takuni tulu ne hagwe na ahiana noi God vaki tuai.

²³A kaivoli hi a tangaloi rana lavia huri rau vai na vaivai hati, aia hi a mateana luna. Vae a hilehile hi i God u betea lakwa na tangaloi, aia a ahiana noi God vaki tuai huri rau hariki lui Jisas Kraes* a noda Hugwe*.