Read West Ambae ROM 7 Bible Online

ROM 7 - West Ambae bible

ROM 7

¹Rabela. A kinau hika na vitia lakwakamu tulu kikilaia ba. I kamu vunu tulu kikilai na hala na tangwata. A tangwata u hugwe koro na tangaloi hinea u ahi radu nga.

²A kaivosangiki aia hoki na vavine hinea u laki, u hugu lo tangwata tavuti tuana ngwarasea lolona u ahi radu nga. Vae diko i tuana ngwarasea u mate tiua, a tangwata na lakiana hi raru mo hugu luna, u rovo tiua.

³Vae diko u hugu mana tangaloi dolua vake lolona hi i tuana ngwarasea u ahi radu nga, a vavine hi u veveki rera ki tuana ngwarasea. Vae diko i tuana ngwarasea u mate tiua, vunu a tangwata na lakiana he hugwe koroa tea. Vae diko ne laki mana tangaloi dolua he veveki rera te ki tuana ngwarasea tomua.

⁴Rabela. I kamu hokinia vake. Tulu hariki lui Kraes*, vae tulu kwareki a duvi na tarabehina, vae hokinia hi tulu mate ba haragoki maia. Hika a Tangwata* he hugwe lai te korokamu, vae i kamu a tangaloi noi Kraes hinea i God mo rakatia tina mateana. Hikani lo noda tokaana tana vai na bolokiana noi God.

⁵Tuai tamo toko huri na doridori na tangaloi kehekeheki, vae lo taro hi a Tangwata hi mo vaikita tamo lengai na lengalengahuri hati hinea a domi u lengaia. Vae huri hi, tamo toko vai na kinau aira hi rau hati, a mateana luga.

⁶Vae hika a Tangwata he gwarubibikita tea taliku. Aia hokinia tau mate ba tiua, a nona huirana tikei. Hika tau boloki noi God lo hala karagwa hinea tau rongohuri na nona Tanungwe, vae nehe hokinia te tuai tamo rongohuri na Tangwata hinea ramo ulibibia.

⁷?Vae i kita tana viti kworoho? ?Tana viti kwara a Tangwata* u hati? Hetea. A Tangwata aia u vaiau nomo kikilai kwara a vaivai hati aia hoki na havakinau. Kwara vae a Tangwata he viti te kwara, “Ko hatu lengahuri na kinau nona tangaloi dolua,” vae nanahe kikilai tea kwara u hati nomo vai kwehi.

⁸Vae a hatiana mo hagwe na hala kwara ne vaiau na lengahuri na kinau vatahae nona tangaloi dolua, luna hi mo vaiau nomo domidomi lo korokoro hi. Mo vai kwehi huri diko a korokoro tikei, a hatiana a huiranaki u tikei.

⁹Tomua, lolona hinea nohe kikilai na tangwata te radu nga, nu ahi. Vae a korokoro mo vanamai, a hatiana mo maraka, a huiranaki mo eia, nomo galo lo tangwata,

¹⁰vunu nomo mate kinia. A korokoro hi mo maravuti kwara ne vai na tangaloi rana ahi, vae lugu u vaiau hokinia nu mate nga.

¹¹Vae a hatiana mo hagwe na hala mo sineau lo korokoro, mo vai mateiau kinia.

¹²Hokinia a Tangwata aia a kinau kokona hinea i God mo taua, vunu a korokoro aia vake u kokona, u bakoto, u karea.

¹³?Vae lo leogu aira vano hi nu viti kwara a Tangwata u vai mateiau? Hetea. A Tangwata u karea. Vae a hatiana aia u vai mateiau. Aia u lalahi na Tangwata hinea u karea kehe nga mo vai mateiau, kwara ne vosangi ne matangwasara kwara a hatiana u hati haburu. Hikani a hatiana u lalahi na korokoro, vae huri hi a korokoro u matangwasarakinia kwara a hatiana u hati vakevake.

¹⁴Tau kikilai kwara a Tangwata*, i God u taua. Vae i nau a tangaloi na varamana, a nogu huirana tikei. I nau hoki na tangaloi hinea u boloki vuroki tavuti na masi, a hatiki u hugwe koroau.

¹⁵Nahe kikilai tea kwara kworohokinia nomo toko vai na kinau hika, huri a kinau hi nu lengaia kwara na vai, vae nahe vaia tea, vunu a kinau hinea nu begu kinia, nu vaia.

¹⁶Lolona nu vai na kinau hinea nahe lengaia tea kwara na vai, hi u vosangi kwara nu daraki luna kwara a Tangwata aia u bakoto.

¹⁷Vae hete i nau vohoki nomo toko vai na kinau hika, vae a hatiki aia hi mo toka lugu.

¹⁸Nu kikilai kwara a vaivai karea he toka te lugu. A domianaki kwara hete doridorigu kwara na vaivai karea, huri i nau a tangaloi na varamana. Kareaki a nogu domidomi aia kwehi kwara nana vaivai karea, vae hetea, nahe vai lai tea.

¹⁹A kinau hi u karea hinea nu lengaia kwara na vai, vae nahe vaia tea, aia vae a hatiki hinea nahe lengaia tea kwara na vai, nu vaia.

²⁰Diko nu vai na hatiki aia hi nahe lengaia tea kwara na vai, hi u vosangi kwara hete i nau kwara nu vai na kinau vano hi, vae a hatiki aia hi mo toka lugu.

²¹Hokinia nu taga kwara a hatiki u boloki lugu. Lolona nu lengaia kwara na vai na kinau hinea u karea, vae tigwaravu nu tuku va domia kwara na vai na hatiki kehe.

²²Lolo domigu nu lagwa haburu mana Tangwata noi God.

²³Vae nu taga kwara a doridorigu u dolua. A doridorigu u vai vuro vovohi na Tangwata noi God, vae lolo domidomigu nu lagwa mana Tangwata hi. A huirana na hatiki u tuku gwaruau kina doridorigu hinea rau hati.

²⁴I nau nahe rongo karea tea vohoki. ?Ihe ne vakahiki laviau tina doridorigu hi rau hati vae ramai laviau vaki lo mateana?

²⁵Vae nu lagwa haburu mai God mo lalahi na noda Hugwe* i Jisas Kraes* mo vakahiki laviau. Karea, a doridorigu aia kwehi. I nau sibogu lolo domidomigu kehekeheki nu huri na Tangwata noi God, vae lo doridorigu nu huri na hatiki.