Read West Ambae ROM 8 Bible Online

ROM 8 - West Ambae bible

ROM 8

¹Vae hika a tangaloi tikei kwara ne areki lavikita hinea tau hariki lui Jisas Kraes*, ne viti kwara tana kwali na kakadiki,

²huri a huirana na Tanungwe Kokona u kwiribibikita hinea tau hariki lui Jisas Kraes, mo vaikita tamo ahi. Vae hikani a huirana na Tanungwe Kokona u kasatukuhiau tina huirana na hatiki hinea mo vai kwara ne laviau vaki lo mateana.

³I God u areki na hatiana ba hinea lo doridori na tangaloi, mo viti kwara vae ne magarakinia. A Tangwata* noi God he gui lavi na hatiana tea, huri a lengalengahuri hati nona tangaloi rau magaraki na huirana na Tangwata hi ba. Vae i God u areki na hatiana hi ba. Mo hokaki Natuna vohoki, vae lolona mo vanamai, a tarabehina mo hoki na tarabehida, a tarabehi na vaivai hati. I Natuna hi mo vanamai kwara ne mate ne lavi na noda hatiana letiu.

⁴I God u vai hokinia hi kwara vae i kita tana vai doluaki na kinau hinea a Tangwata u viti kwara u bakoto kwara tana vaira. Hikani a doridori rahe karea tea hinea tau lengaia kwara tana vai, vae tahe vaira tea, vae tau vai na kinau hinea a Tanungwe Kokona u lengaia.

⁵A tangaloi hinea rau tuku vai na hatiki hinea aira siboga rau lengaia kwara rana vai, a hatiki hi u kwiribibi na domidomiga. Vae aira hinea rau tuku vai na kinau karea hinea a Tanungwe Kokona u lengaia kwara rana vai, vae a Tanungwe Kokona u kwiribibi na domidomiga.

⁶Diko a lengalengahuri hati u kwiribibi na domidomi na tangaloi, vae ne mate luna. Vae diko a Tanungwe Kokona u kwiribibi na domidomi na tangaloi, vae ne ahi luna, vake a magemuana ne eno maia.

⁷Hokinia lolona a lengalengahuri hati u kwiribibi na domidomi na tangaloi, a tangaloi hi u kwareki a tavaluivuro noi God. Tigwaravu he vai na kinau tea hinea a Tangwata noi God mo viti. Nehe vai lavira te vohoki.

⁸A tangaloi aira hi rau vai na hatiki hinea aira siboga rau lengaia, ranahe vai lavi na kinau te vohoki hinea kwara i God ne lagwa luna.

⁹Vae hika i kamu tulu he vai na hatiki tea hinea i kamu sibomiu tulu lengaia. Vae tulu vai na kinau hinea a Tanungwe Kokona u lengaia, huri a Tanungwe hi noi God u toka lumiu. Ihe tea hinea a Tanungwe noi Kraes u tikei luna aia hete tangaloi noi Kraes.

¹⁰Vae huri i Kraes u toka lumiu u kareaki kwara a tarabehimiu hokinia rau mate ba kina hatiana, vae a Tanungwe noi God u vaikamu tulu mo ahi huri i God u vaikamu tulu mo bakoto lo nakona.

¹¹A Tanungwe noi God hinea mo rakati Jisas tina mateana u toka lumiu, vae huri hi tulu mo ahi. Vae i God hinea mo rakati Jisas tina mateana ne vai na tarabehimiu rana ahi vake, lalahi na nona Tanungwe hinea mo toka lumiu.

¹²Rabela. Vae huri na kinau hi, u taritarisa kwara tana toka hokinia a Tanungwe Kokona u lengaia, vae tana hatu vai na hatiki hinea i kita siboda tamo lengaia.

¹³Diko tulu tuku vai na hatiki hinea i kamu sibomiu tulu lengaia, vae tulu ne mate kinia. Vae diko lo huirana na Tanungwe Kokona tulu ne gui na hatiki lumiu, vae tulu ne ahi.

¹⁴Aira hi a Tanungwe noi God u turukinira, rau kwareki i raranatu i God.

¹⁵A Tanungwe hi i God u betea ba lakwakamu, hete kwara ne vaikamu tulu ne kwareki tangaloi* boloki vuroki noi God kwara tulu ne mataku kinia. U bete na Tanungwe hi huri kwara ne vaikamu tulu ne kwareki i raranatu i God. Vunu lo huirana na Tanungwe hini tau tuku kware doro i God tau viti “!Mama, Tamagu!”

¹⁶A Tanungwe hi noi God u hariki lolo domida kwara ne viti matangwasaraki kwara i kita i raranatu i God.

¹⁷I kita tau kwareki raranatuna, vae huri hi tana lavi na karekarea hinea i God mo tau terekakinira huri na bulana tangaloi. Tana bulu tabulutaki mai Kraes* lo nona karekarea hinea i God mo tau terekakinira kwara a nona. Vunu huri tau bulu mai Kraes lo nona rongoana hati, vae tana bulu maia vake, tana toka maia lo nona karekarea lolo taetae.

¹⁸A nogu domidomi aia hika. Lolona tamo toko domidomi huri na ahiana karea hinea lolo taetae kwara vae i God ne bete lakwakita, doluaki na kinau hinea lo taroki hika ramo toko vaikita tamo rongo hati haburu luga, rau hoki na kinau vuroki vohoki.

¹⁹A varamana mana kinau doluaki hinea i God mo taura, rau hugu tara na taroki hi, huri rau lengaia haburu kwara rana taga kwara i God ne matangwasaraki raranatuna.

²⁰A domidomi noi God huri na varamana hika, kwara a kinau savia hinea mo taura luna, vae rana toko madamada. Hete doridori na varamana kwara aia kwehi, vae i God vohoki aia u lengaia kwehi. Vae i God u domi kikilaki kwara vae lo taroki a kinau vano hi, vae ne vaira rana bohi.

²¹Lo taro hika aia hokinia kwara a varamana u tuku kwali na kakadiki, huri tigwaravu savi na kinau luna rau tuku madamada kehe. Vae i God u tau na nona domidomi lo rani hi, vae ne tirakinira tina hatiki hi, hokinia ne tiraki raranatuna tina hatiana savia, vae aira vunu rana hagwe na tokaana karea na taetae.

²²Vae vaki na hika, i kita tau kikilai kwara a kinau vano hi savia i God mo taura, rau rongo hati haburu hoki na vavine hinea a lolona mo kadia kina natu.

²³Vae hete a kinau aira vano hi kehekeheki hinea i God mo taura ramo toko rongo hati kwehi. I kita hi a Tanungwe Kokona mo vai na nona bolokiana tomua halaradu luda ba, i kita vake tau tuku rongo hati kwehi. Lolona tamo toko hugu tara kwara i God, vae ne tabuikita kwara tana kwareki i raranatuna, hokinia ne kasatukuhikita tina hatiki savia tana materi tina kaigwaruda doluaki, vae lo taro hi tau rongo hati lolo domida radu nga.

²⁴I God u vakahikikita ba, huri a domida u huira luna. Vae diko tau lavi na kinau hinea tomuaki a domida u huira luna, vae tanahe domidomi te luna taliku. Hete tangaloi kwara a domina ne huira huri na kinau hinea u lavia ba.

²⁵Vae diko tau tau na domida u huira lui God huri na kinau hinea he vanamai te radu nga, vae tana hugu tarae kina domi bua.

²⁶Lo halaki hokinia nga, a Tanungwe Kokona vake u hago maikita, huri a noda huirana tikei. Tahe kikilai tea kwara tana tiutangaroa kworohokinia, vae a Tanungwe Kokona sibona aia u rongo hati maikita mo tiutangaroa noda lakwai God, vae a leo tikei hinea u taritarisa kwara ne viti huri na leona.

²⁷I God hinea u tuku taga tilolo domi na tangaloi, u kikilai na domidomi nona Tanungwe Kokona, huri a Tanungwe hi u tiutangaroa lakwai God huri na tangaloi noi God u taritarisa luna hi i God mo lengaia.

²⁸Tau kikilai na kinau hika ba. I God u tuku boloki lo vataha na kinau hinea rau tuku vanamai lo noda tokaana kwara ne tabekita hi tau lagwa maia. [2] I kita hi i God mo kwarekita lo hala hinea mo mataia.

²⁹Tuai lo tinatinakakiki i God u mataikita mo vaikita tamo kokona, kwara vae vaki takuni tana mulemai tana hoki Natuna hi, i Jisas Kraes*. I God u vai kwehi huri kwara vae i Natuna hi ne kwareki Nakoi-natu lakwai ratuana hinea rau rusa.

³⁰Vae hikani i God u kwarekita hinea u mataikita ba. I kita hi mo kwarekita, u vaikita tau kwareki tangaloi bakoto ba lo nakona. I kita hinea tau bakoto ba lo nakona, vae tau bulu maia lo nona ahiana karea.

³¹?Tau tuku domidomi lo kinau vano hika, vae tana viti kworoho? I God aia maikita, vae a tangaloi tikei kwara ne gui lavikita.

³²I God he uti Natuna vohoki te kikita, vae u tirakinia mo mate kwara ne vakahikikita doluaki. Mo tiraki Natuna vohoki kwara ne vakahikikita, vae kareaki nehe uti na kinau te kikita, aia ne hokoraki vunuhira lakwakita.

³³?Ihe hi ne viti lai kwara, “A tangaloi hinea i God mo mataira rahe bakoto tea”? I God sibona aia u viti ba kwara tau bakoto lo nakona.

³⁴A tangaloi tikei kwara ne areki lavikita, huri i Kraes*, aia hi mo mate, vunu mo maraka taliku vaki lo ahiana, u hugu lo matuai God, vae aia u tuku kwahakwaha mai God hurikita.

³⁵A tangaloi tikei kwara ne kwahekikita tina lagwaana noi Kraes. Diko i kita tau rongo hati, diko a taro madi lakwakita, diko a tangaloi rau vai bulakikikita, vae venaha. Diko u marakatikita, diko tau kakaravika, diko i kita lo hala na mateana, diko a tangaloi rau kwohi mateikita, vae a kinau vano hi ranahe kwaheki lavikita tea ti Kraes.

³⁶Hikani hoki na Uliuli* Kokona mo viti kwara, “God. Tigwaravu, vataha na rani, a tangaloi rau vanamai ramo ua matemateikami ratuaki huri na hinamu. A tangaloi rau tagaikami hoki na sivsivi hinea kwara rana kwohira.”

³⁷Vae venaha. I Kraes hinea u lagwa maikita haburu u vaikita tamo gui savi na kinau vano hi tigwaravu.

³⁸I nau nu kikilai ba kwara a kinau tikei vohoki kwara ne kwaheki lavikita tina lagwaana noi Kraes. Diko tau mate diko tau ahi, vae nehe kwaheki lavikita tea tina nona lagwaana. A kaihora tina taetae diko a hugwe na hatiki lolo mahaleki, diko a huirana lolo mahaleki, vae ranahe vai lai tea. A kinau hinea rau vanamai ba diko kwara rana vanamai te lo taroki, vae ranahe kwaheki lavikita tea tina nona lagwaana.

³⁹A kinau aulu sea tina mahaleki diko tavuti na varamana, vae ranahe vai lai tea. Kareaki a kinau hinea i God mo taura, vae hete kwara te katukwale ne kwaheki lavikita tina lagwaana hinea i God mo vosangi lakwakita lalahi Jisas Kraes, a noda Hugwe*.