Read West Ambae ROM 9 Bible Online

ROM 9 - West Ambae bible

ROM 9

¹I nau a tangaloi katukwale noi Kraes* hinea nahe kurakura tea. A Tanungwe Kokona u hugwe koroau, vae nu kikilai lo tarabehigu vake kwara nahe kurakura tea.

²A domigu u mava haburu, vake tigwaravu nu rongo hati haburu

³huri na gwaloana noi Isrel* vano hikani, hinea rau kwareki ratuagu hinea i kami hoki na bela bakotoki. Kwara vae i God ne kwaheki laviau ti Kraes kwara ne vai na hala na tangaloi aira hi rana bulu mai Kraes, vae i nau nu lagwa diko na va sala vae a tangaloi aira vano hi rana ahi.

⁴A gwaloana noi Isrel vano hi i God u mataira mo tabuira kwara ki raranatuna. Mo vosangi na nona hahaviada lakwara kwara rana kikilai kwara aia maira. Mo vai na leo harikiana maira kwara rana kwareki a bulana tangaloi aia ne kwareki noga God, vake mo bete na Tangwata* lakwara. I God mo vosangira kina hala bakoto kwara rana kaluhakinia luna, mo vai na tulikileo u rusa lakwara kwara ne tagahurira ne karea.

⁵Aira rau gwalo vanamai lui ratubumai aira hinea a tangaloi noi God tuai. Vake i Kraes aia katukwale tiura, u vanamai lo gwaloana hi, vae aia i God, u lakua karakara sileti na tangaloi doluaki, vae tana toko tabe hakeki na hinana tigwaravu vaki tuai. [3] Io, kareaki.

⁶Nahe viti tea kwara a leo i God u sovi, huri hete gwaloana noi Isrel savia hinea rau kwareki a gwaloana noi Isrel bakotoki noi God.

⁷Vake lo halaki hokinia hi hete tubutubu i Evraham savia hinea rau kwareki raranatu i God bakotoki, I God u viti lakwai Evraham kwara, “A tubutubumu bakotoki rana vanamai ti Aesik kehekeheki.”

⁸A leo hika a domianaki kwara a raranatu hi rau vora lo hala na voraana kehekeheki, aira hete i raranatu i God. A sakwarigi vano hi rau vora hokinia hi lo tulikileo hinea i God mo taua, aira a tubutubu i Evraham bakotoki.

⁹I God u tau na nona tulikileo lakwai Evraham lo leo hika, hinea mo viti kwara, “Lo taroki bakotoki vae na mulemai taliku, i Sera ne hagovi na natu a ngwera.”

¹⁰Vae a leoki hi he rovo te takwa-hi. I raranatu i Rebeka kairua, i rarua a natu malava, i tamagaru katukwale, aia hi i tubumai i Aesik.

¹¹Vae i God u lengaia kwara ne matai na natu kairuaki lo nona domidomi kehekeheki. Lolona hi raru he vora te radu nga, raru he vai na kinau te kwara u karea, vake raru he vai na kinau te kwara u hati, vae i God mo kwaha mai Rebeka. Mo viti “I natumu a natu tomua, vae ne boloki lakwai natumu hi vaki takuni.” A kinau hikani u vosangi kwara diko i God u matai na tangaloi he kwarera te huri na kinau ramo vai, vae u kwarera huri na nona domidomi kehekeheki.

¹³Hika hokinia a Uliuli* Kokona mo viti kwara, “I nau nu matai Sekov, vae i Iso hetea.”

¹⁴?Karea, vae tana viti kworoho? ?Tana viti kwara i God u vai kinau rahe bakoto tea? Hetea. U vai kinau rau bakoto kehe.

¹⁵U viti lakwai Mosis ba kwara, “Diko nu lengaia kwara na hakavi na tangaloi tea, vae na vai hokinia hi. Diko nu lengaia kwara na vai tabetabeki na tangaloi tea, vae na vai hokinia hi.”

¹⁶Hokinia i God u matai na tangaloi hete huri kwara a tangaloi hi u lengaia, diko hete huri na kinau hinea mo vai, vae huri na hahakaviana noi God kehekeheki.

¹⁷Lo Uliuli Kokona i God u viti lakwai Vero kwara, “Lo kinau aia hika vohoki nomo tauko komo mulemai kina hugwe lakua. Komo mulemai kina hugwe lakua huri kwara na boloki lumu, ne kwareki a kaivosangi na nogu huirana, vake kwara ne vai na tangaloi savia lo varamana rana kikilai na hinagu.”

¹⁸A leo hika a domianaki kwara, lolona i God mo lengaia kwara ne hakavi na tangaloi, u vai hokinia hi u lengaia. Vake hokinia u lengaia kwara ne vai na tangaloi a gwatuga rana madi, u vai hokinia hi.

¹⁹Nu domi kwara tuaki tikamu vae rana uduhuri kiau kwara, “?Diko ne hokinia hi, vae kwara kworohokinia i God ne viti kwara, ‘A tangaloi hika a nona hatiana eia’? ?Ihe tangaloi hi ne vai lai kwara ne tu koro na kinau hi i God mo lengaia?”

²⁰Vae rabela, i kamu a tangaloi vohoki. Tulu he taritarisa tea kwara tulu ne kwaha darami God hokinia hi. A laha tano nehe uhi lavi na tangaloi tea hi mo kihia kwara, “?Kworoho komo vaiau hokinia hika?”

²¹Tagaia. A tangaloi hinea u tuku kihi na laha tano, aia u taritarisa kwara ne dumuki na tanoki hokinia hi u lengaia. Diko a tano katukwale, vae u lengaia kwara ne kihi na laha tano kairua luna, ne kihi banikinia kairuaki huri kanikani lalakua kehekeheki, kairuaki huri hahalakwai haro nga lolona, a tangaloi hi aia u taritarisa kwara ne vai hokinia hi.

²²Vae i God u vai hokinia hi vohoki. U lengaia kwara ne vosangi kwara u lologute kina doridori na tangaloi hinea rau tuku vaivai hati, vake u lengaia kwara ne vai na tangaloi savia rana kikilai kwara a nona huirana eia. Hikani mo vai na domina mo bua huri na tangaloi aira hinea mo lologute kinira, aira hinea u taritarisa kwara rana va sala.

²³Vake u lengaia kwara ne vosangi na nona ahiana karea na taetae tivarea, hinea u karea haburu. U lengaia kwara ne bete na nona ahiana hi lakwakita hinea mo hakavikita, mo vaikita tamo rarai kwara tana lavi na ahiana karea hi.

²⁴I kita hini i God u kwarekita ba, tuai ratuaki tikita a gwaloana noi Isrel*, vunu ratuaki a tangaloi tavalavarea.

²⁵Lo buku* nona tangaloi* duruduruki i Hosea i God u viti kwara, “A tangaloi hinea tuai aira hete bulagu, vae na kwarekinira kwara ‘A bulagu tangaloi.’ Vake a tangaloi aira hi hinea tuai nohe lagwa te maira, vae na kwarekinira kwara ‘A bulagu tangaloi hinea nu lagwa maira haburu.’

²⁶Vake lo tanotanoki bakotoki hi hinea tuai nu viti lakwara kwara, ‘I kamu hete bulagu tangaloi,’ vae takwahini na kwarekinira kwara ‘I raranatugu, i nau i God Tatoka.’ ”

²⁷A tangaloi duruduruki i Aesaea mo kwahakwaha huri na gwaloana noi Isrel mo viti “Diko a gwaloana noi Isrel rau rusa haburu hoki na one na tahi, vae a Hugwe i God ne vakahikinira te kukwehu tiura.

²⁸A Hugwe i God nehe vaivai ta tuai tea, vae ne vai kadi na tangaloi savia lo varamana ne taritarisa lo vitivitiki.”

²⁹A kinau hika u taritarisa lo leo i Aesaea hinea mo viti terekakinia tuai. Mo viti “Kwara vae diko i God hinea u hugwe koro na kinau doluaki he tiraki tea kwara a noda vakabela tuaki rana ahi, vae tana kwali na kakadiki hoki na tangaloi lo gwatugwatui-vanua lalakua Sotom maia Gomora vohoki.”

³⁰?U karea, vae i kita tana viti kworoho? Tana viti hokinia hika. A tangaloi tavalavarea tina gwaloana noi Isrel* rahe vai tea kwara rana kwareki tangaloi bakoto lo nako i God tomua, vae i God u vaira rau bakoto ba lo nakona huri rau hauhuri lui Kraes*.

³¹Vae a gwaloana noi Isrel hinea i God u mataira ba u bolokinira haburu lo kinau hinea kwara vae rana kwareki tangaloi bakoto lo nako i God, vae rahe vai lai tea huri rahe vai vunuhi na kinau tea hinea a Tangwata mo viti.

³²?Vae kworohokinia rahe vai lai tea? Rahe vai lai tea huri u bolokinira haburu, vae rahe hauhuri tea kwara ne madi lui God, rau vai kwara rana huri na doridori karea kehekeheki. Rau tatu lo “vatu na tatutatu”,

³³hoki na Uliuli* Kokona u viti huria ba kwara, “Tulu tagaia. I nau nu tau na vatu katukwale lo gwatuivanua Serusalem, kwara vae a tangaloi rana tatu luna, a vatu hi vae rana sovi luna. Vae aira hinea rau hauhuri luna, ranahe maemae tea.”