Read West Ambae 1 KORIN 10 Bible Online

1 KORIN 10 - West Ambae bible

1 KORIN 10

¹Rabela. Nu lengaia kwara tulu ne domidomi lo bohiana noi ratubumai tuai lo taro i Mosis. Aira vunu hi rau hugu tavuti na taenalangi, vake rau lakao utuhi na Tahi Memea.

²Lolo taenalangi hikani maia lolo tahi hi, aia hokinia kwara aira vunu rau lai bavtaes hinea u vosangi kwara rau huri i Mosis.

³Aira vunu rau kani lo hinaka katukwale hinea i God mo bete lakwara.

⁴Aira vunu rau inu lo kwai katukwale vohoki, hinea i God mo bete lakwara, huri rau inumi na kwai hi u vanamai tina nona Vatu Lakua hinea u tuku lakao laliki maira vataha na vanua. A Vatu Lakua hi aia i Kraes*.

⁵Aira vunu rau vai kwehini, vae u rusa tiura i God he lagwa te maira, vae rau mate, a tarabehiga rau saro laliki lo vanua vuroki hi.

⁶Hikani savi na kinau aira hika aira hoki na kaimatai lakwakita kwara rana vakaradakikita. Vae ta hatu lengahuri na kinau hati hokinira.

⁷Vake ta hatu kaluhaki na takaro vuroki maira hokinira ratuaki ramo toko vai. A Uliuli* Kokona u viti hurira kwara, “A tangaloi vano hi ramo hugu ramo kanikani ramo inuinu, vunu ramo maraka ramo vai hakwana, ramo vai doridori rahe karea tea.”

⁸Ta hatu vai a doridori hati hokinira ratuaki ramo toko vai. Huri hi a tangaloi u tari vakangavu kairua ngavu kaitoluki kaitolu [9] rau mate lo rani katukwale vohoki.

⁹I kita ta hatu vaivai rongohi na Hugwe* hokinira ratuaki ramo toko vai, vae a ngwata ramo kati matemateira.

¹⁰Vake ta hatu kwaha ruturutu ki God hokinira ratuaki ramo toko vai, vae a kaihora na vai mate tangaloi mo vanamai tina taetae mo vai matemateira.

¹¹A kinau vano hi hinea ramo vai na tangaloi vano hi, aira hoki na kaimatai lakwa na tangaloi ratuaki. Vake rau ulibibiana kwara rana vakaradakikita hinea i kita tau toka lo taro hika, hinea a taro ki rovonaki.

¹²A tangaloi hinea u domi kwara u tu madi, vae ne tagahuri ne karea, vae ne mai sovi.

¹³A kinau hinea ramo toko vai rongohikamu rau taritarisa vohoki mana kinau hinea rau tuku vaivai rongohi na tangaloi savia. Vae i God u kwiribibi na nona tulikileo, vae nehe tiraki na kinau tea kwara te katukwale kwara ne vai rongohikamu hinea u huira haburu lakwakamu. Vae lo taro bakotoki hinea a kinau hi ne vai rongohikamu, i God ne vai na hala lakwakamu kwara tulu ne kwalao tiua, tulu nehe sovi tea vae tulu ne tu ne madi.

¹⁴Rabelagu. Vae huri na kinau hi, he karea te kwara tulu ne tiutangaroa lakwa na takaro vuroki maira.

¹⁵Nu kwaha maikamu hi a tangaloi kikikila. U karea kwara tulu ne viviloki na leogu hinea nomo vitira.

¹⁶?Kworohokinia mana laha kokona na Kanikani Kokona hinea tau tuku lai noda lagwaana lakwai God huri? Tau inu lo laha hi vae tau mulemai katukwale mai Kraes lo daina. ?Kworohokinia mana bereti hinea tau tuku volo utuutuhia? Tau kani na bereti hi vae tau mulemai katukwale mai Kraes lo tarabehina.

¹⁷I kita tau rusa vae a bereti katukwale vohoki, vae i kita vunu tau kani lo bereti* hi. Vae huri hi, i kita vunu tau mulemai hoki na tarabehi katukwale vohoki.

¹⁸Tulu domidomi lo bohianamai i kami a gwaloana noi Isrel*. Keu kani na boboroa hinea keu kwohi mateira lo voda[10] kwara kena kaluhaki God kinira, vae keu mulemai kina tangaloi katukwale lo voda hi.

¹⁹?A leogu hi a domianaki kworohokinia? Nu viti hokinia hika kwara a boboroa hinea a tangaloi ramo kwohi mateira kwara rana tiutangaroa lakwa na takaro vuroki maira, aira a kinau vuroki. A takaro vuroki vano hi vake, aira a kinau vuroki.

²⁰Vae nu viti kwara a tangaloi vano hi rau vai na hura boniboni lakwa na takaro vuroki maira aia hoki na Uliuli* Kokona u viti kwara, “Rau tuku vai na hura boniboni lakwa na tanungwe hati maira, hete lakwai God.” Vae nahe lengaia te vohoki kwara tulu ne mulemai katukwale mana tanungwe hati.

²¹I kamu tulu nehe inuinu lai tea lo laha na noda Hugwe* vunu kwara tulu ne inuinu taliku lo laha nona tanungwe hati maira. I kamu tulu nehe vai lai tea kwara tulu ne kanikani lo tevo na noda Hugwe, vunu kwara tulu ne kanikani taliku lo tevo nona tanungwe hati.

²²?Kworohokinia? ?Tulu lengaia kwara tana vai kadi na Hugwe? ?Tulu domi kwara tau huira siletia?

²³I kamu tulu tuku viti kwara, “Ta vai lai kwara tana vai na kinau haro nga.” Io, vae hete kinau savia hinea rau karea kwara tana vai. Tulu tuku viti kwara, “Ta vai lai kwara tana vai na kinau haro nga.” Io, vae hete kinau savia kwara ne hago maikita.

²⁴He taritarisa tea kwara a tangaloi ne soro haro na hala kwara ne hago maia sibona kehekeheki. Tana soro haro na hala kwara tana hago mana tangaloi ratuaki vake.

²⁵Tulu ne kani lavi na biki hinea tulu voli lo tanotanoki. Vae he karea tea kwara tulu ne uduhuri kwara u karea diko hetea, huri vae a domimiu ne mai kwalao laliki kinia.

²⁶A Uliuli* Kokona u viti kwara, “A varamana hika mana kinau savia luna aira a nona Hugwe i God.”

²⁷Diko te tangaloi katukwale hinea he hauhuri tea lui God mo kwarekamu kwara tulu ne kanikani tatana, vae diko tulu masinge kwara tulu ne vano, u karea. Tulu ne vai lai tulu ne kani a havakinau hinea ne bete lakwakamu. Vae he karea tea kwara tulu ne uduhuri kwara u karea diko hetea, huri vae a domimiu ne mai kwalao laliki kinia.

²⁸Vae diko te katukwale mo viti lakwakamu kwara, “A biki hi, a tangaloi rau hilea ba lakwa na takaro vuroki maira,” u karea, tulu hatu kania. Tulu ne domi huri na tangaloi hinea mo vitia, vae tulu ne hatu kania kwara tulu ne hatu vai na domina mo kwalao laliki.

²⁹Aia hete kwara a domimiu ne kwalao laliki kinia, vae a domi na tangaloi hi ne kwalao laliki kinia. A tangaloi katukwale ne viti kwara, “?Kworohokinia? ?A domidomi na tangaloi dolua ne gwarubibiau hokinia kwara i nau nahe vai lai te havakinau nu lengaia?

³⁰I nau nu lagwaki God huri na kagu kinau. ?Kworohokinia hi a tangaloi dolua ne arekiau huri na kagu kinau hinea nu lagwaki God huri u rovo ba?”

³¹Io, vae lo havakinau hinea tulu mo kani tulu mo inu, vake lo bohianamiu savia, tulu ne tabe hakeki na hina i God luna.

³²Tulu toka ne taritarisa tigwaravu. Tulu nehe vai te kinau vohoki hinea kwara ne vai na gwaloana noi Isrel* diko a tangaloi tavalavarea tina gwaloana noi Isrel diko a kwarelua* noi God rana rongo hati kikamu.

³³Lo bohianagu, tigwaravu nu vai kwara a tangaloi savia rana lagwa mana kinau savia hinea nomo toko vai. Nohe toko vai na kinau tea kwara ne karea lakweau kehe nga. Nu tuku vai na kinau hinea kwara ne karea lakwa na tangaloi doluaki, huri kwara vae i God ne vakahikinira.