Read West Ambae 1 KORIN 12 Bible Online

1 KORIN 12 - West Ambae bible

1 KORIN 12

¹Rabela. Nu lengaia kwara tulu ne kikilai na hilehile na huirana ne karea hinea a Tanungwe noi God mo toko bete.

²Tuai, lolona tulu hugu lolo dodoki radu nga, a takaro vuroki maira hinea rahe kwahakwaha lai tea rau reveikamu tulu mo hurira, vae tulu he tu koro lavira tea.

³Vae huri hi nu lengaia kwara tulu ne kikilai na kinau hika. Hete tangaloi kwara a Tanungwe noi God u tomuakinia vae ne tiutangaroa hati ki Jisas. Vake hete tangaloi kwara ne viti lai kwara “I Jisas aia a nogu Hugwe*,” vae kehekeheki a Tanungwe Kokona ne tomuakinia.

⁴A hilehile na huirana noi God a gwatuki u rusa, vae a Tanungwe noi God aia katukwale vohoki mo betera lakwakita.

⁵A noda boloki a gwatuki u rusa kwara tana vaira, vae a noda Hugwe katukwale vohoki hinea tamo boloki lakwae.

⁶Vunu a noda kikikila a gwatuki u rusa kwara tana vai na boloki vano hi, vae a noda God aia katukwale vohoki hinea mo toko bete na kikikila vano hi lakwakita vatavatahakikita kwara tana vai na boloki vano hi.

⁷I God u bete na nona Tanungwe lakwakita katukwale kehe nga kwara tana hago mana tangaloi doluaki.

⁸Lakwa na tangaloi tuaki a Tanungwe hi u bete na leo na lolorani. Vunu lakwa na tangaloi tuaki a Tanungwe aia hi taliku u bete na leo na kikikila lakwara.

⁹Vunu lakwa na tangaloi tuaki a Tanungwe hi u bete na hauhuriana lakwara, vunu lakwara tuaki vake u bete na hilehile rusa huri na vakahiki lengeana.

¹⁰A Tanungwe hi u bete na huirana lakwa na tangaloi tuaki kwara rana vai na vaisea rusa, vunu lakwa na tangaloi tuaki u bete na huirana kwara rana duruki na leo ti God. Lakwara tuaki u bete na huirana kwara rana taga kwaheki na bolokiana na Tanungwe Kokona mana bolokiana na tanungwe hati maira. Lakwara tuaki a Tanungwe Kokona hi u bete na huirana kwara rana kwaha lo leo mataroi, vunu lakwara tuaki u bete na huirana kwara rana matangwasaraki na leo vano hi.

¹¹A Tanungwe aia hi katukwale vohoki u vai na boloki vano hi savia. U bete na hilehile rau doludolua kehe nga lakwa na tangaloi vatavatahakinira hokinia hi aia u lengaia.

¹²A tarabehi na tangaloi, katukwale vohoki, vae a mamahangaki u rusa. A mamahangai-tarabehi vano hi rau doludolua kehe, vae rau mulemai kina tarabehi katukwale. Vae lui Kraes* aia hokinia hi vohoki.

¹³Tuaki tikita a gwaloana noi Isrel*, tuaki a tangaloi tavalavarea tina gwaloana noi Isrel, tuaki a tangaloi hinea rau boloki vuroki tavuti na masi, tuaki a noga masi tikei, vae hikani i kita vunu tau mulemai kina tarabehi katukwale vohoki. Tau lai bavtaes ba, vae lo bavtaes hi a Tanungwe Kokona aia hi katukwale vohoki, aia u harikikita vunu tilo tarabehi hi. Vae i God u bete na Tanungwe aia hi lakwakita vunu, kwara tana lavi na ahiana tiua.

¹⁴A tarabehi, a mamahangaki hete kwara katukwale, vae u rusa.

¹⁵Vae diko a garu ne viti kwara, “Huri i nau hete kaba, i nau hete duvi na tarabehi,” vae aia hete kwehi, aia a duvi na tarabehi hi.

¹⁶Vake diko a gwero ne viti kwara, “Huri i nau hete mata, i nau hete duvi na tarabehi,” vae aia hete kwehi, aia a duvi na tarabehi hi.

¹⁷?Diko a tarabehi savia aia a mata, vae ne rongorongo kworohokinia? ?Diko a tarabehi savia aia a gwero, vae ne rongo na boniboni na kinau kworohokinia?

¹⁸Vae hete hokinia hi, huri i God u tau na mamahangai-tarabehi rau doludolua kehe nga hokinia hi aia mo domiki.

¹⁹Kwara vae diko a mamahangai-tarabehi aira vunu rau taritarisa, vae a tarabehi ne tikei.

²⁰Vae aia hete kwehi. A tarabehi katukwale, vae a mamahangaki u rusa.

²¹A mata nehe viti lai te lakwa na kaba kwara, “Nohe lengaiko tea.” Vake a gwatu nehe viti lai tea lakwa na garu kwara, “Nohe lengaiko tea.”

²²Aia hete kwehi. a duvi na tarabehida hinea tau domi kwara a noga huirana tikei, vae rau eno huri a noga boloki eia.

²³A mamahangai-tarabehi hinea tahe domi te hurira haburu tau vai tabetabekinira. Vae a tarabehi hinea tau maemae maira tau vakavulara u taritarisa.

²⁴Vae a mamahangai-tarabehida hinea rau karea, rahe lengai na lugwa tea. I God u hariki na tarabehi tabulutaki lo halaki hokinia hi mo domiki. A mamahangai-tarabehida hinea tahe domi te luga haburu, vae i God u bete na bolokiana lakwara u taritarisa maira katukwale kehe.

²⁵Vae lo hala hokinia hi a mamahangai-tarabehida ranahe makwahekwahe tea. Vatavataha na mamahangaki rana tagahuri ne karea kwara rana hagohago mana mamahangai-tarabehi ratuaki.

²⁶Vae diko te katukwale ne rongo hati, aira vunu rana rongo hati. Diko a tangaloi rau kaluki na mahangai-tarabehi te katukwale, vae a mamahangai-tarabehi savia ne havutira.

²⁷I kamu a tarabehi i Kraes, vae vatavatahakikamu tulu kwareki a duvi na tarabehina.

²⁸Vae lo kwarelua*, i God u tau na tangaloi savia lo tanotanoga. Lo tanotano tomua halaradu u tau na kaihora* kokona. Lo tanotano kairuaki u tau na tangaloi* duruduruki, vunu kaitoluki u tau na tangaloi huhuhui, vunu mo tau na tangaloi hinea rau vai na vaisea. Vunu mo tau na tangaloi hinea rau vakahiki na lengeana, vake aira hinea rau hago mana tangaloi, vake aira hinea rau tuku tagahuri na bolokiana na kwarelua, vake a tangaloi hinea rau kwaha lo leo mataroi.

²⁹Hete aira vunu kwara aira a kaihora kokona, diko aira a tangaloi duruduruki, diko aira a tangaloi huhuhui. Hete aira vunu kwara rau vai na vaisea,

³⁰diko rau lavi na hilehile rusa huri na vakahiki lengeana. Hete aira vunu kwara rau kwahakwaha lo leo mataroi, diko hete aira vunu kwara rau matangwasaraki na leo mataroi vano hi.

³¹Vae huri hi tulu ne tau na domimiu ne madi luna hika kwara tulu ne lavi na hilehile na huirana hinea rau haburu. Vae hika na matangwasaraki na halaki lakwakamu hinea u karea karakara.