Read West Ambae 1 KORIN 13 Bible Online

1 KORIN 13 - West Ambae bible

1 KORIN 13

¹Diko nu kwaha lo leo na tangaloi rusa mana leo na kaihora lolo taetae, vae a lagwaana tikei lugu, a leogu aia hoki na roro vuroki vohoki. I nau hoki na tingitingi, diko a belo hinea rava toko tatangi haro vuroki.

²Diko nu lavi na hilehile na huirana kwara na duruki na leo ti God, vae a lagwaana tikei lugu, i nau a kinau vuroki. Diko nu lavi na kikikila savia, vake nu rongo kikilaki na kinau savia hinea i God mo tavunikinira, vae a lagwaana tikei lugu, i nau a kinau vuroki vohoki. Vake diko a nogu hauhuriana u madi lui God kwara nu taritarisa na kusaki lavi na vuti lalakua, vae a lagwaana tikei lugu, i nau a kinau vuroki vohoki.

³Diko nu bete vuroki savi na nogu vivilagoki lakwa na tangaloi kakaravi, vake nu tiraki na nogu tavaluivuro kwara rana huraiau lo kabu huri i nau a tangaloi noi Kraes*, vae a lagwaana tikei lugu, vae nehe hago te maiau vohoki.

⁴A tangaloi hinea u lagwa mai God, vake u lagwa mana tangaloi, a domina u bua, u vai tabetabeki na tangaloi, a kinau he kadikadia tea, he domidomi hakekinia tea, he domidomia tea.

⁵A tangaloi hinea u lagwa haburu mai God, vake u lagwa mana tangaloi, he nakonako-vonoka tea, he domi huria te sibona, he lologute te vuroki, he kwiribibi na lologute tea kwara ne tuai.

⁶A tangaloi hinea u lagwa haburu mai God, vake u lagwa mana tangaloi, he lagwa tea mana hatiki vae u lagwa mana vitikareaki kehekeheki.

⁷A tangaloi hinea u lagwa haburu mai God, vake u lagwa mana tangaloi, a domidomina he sovi tea. Tigwaravu u hauhuri u madi lui God, u tau na domina u madi lui God. Te hava rongoana hati u kihia vae u tu madi, a domina he sovi tea.

⁸A lagwaana nehe tikei lai tea. A leo durukiana ti God, vae ne rovo. A tangaloi rau kwaha lo leo mataroi, vae a leo vano hi, a taroki ne vanamai, a tangaloi ranahe vitira te taliku. A tangaloi rau viti na leo na kikikila, vae a kikikila hi ne rovo.

⁹A leo na kikikila eia, vae tanahe kikilai savi na kinau tea. Tau duruki na leo ti God, vae tau durukinia duviki vohoki.

¹⁰Vae a taroki ne vanamai hinea a kinau rana taritarisa rana bakoto, vae lo taro hi a doridori vano hi hinea tau tuku vai duviduviki vohoki, rana rovo rana tikei.

¹¹Lolona i nau a natu radu nga nu kwahakwaha hoki na natu, nu kikilai na kinau hoki na natu, nu domidomi hoki na natu. Vae hikani nomo ngwarasea nu tiraki na doridori na natu.

¹²Hikani tau tagai na doridori i God, vae aia hokinia kwara tau titiro lo gelas hinea u viaviara. Vae lo taro hinea ne vanamai tana taga vinakonako. Hikani hokinia nu kikilai na duviki vohoki, vae lo taro hi nari kikilai savia ne karea, hokinia i God u kikilaiau karea lo bohianagu savia.

¹³Vae hikani a doridori aira kaitolu rau eno. A tangaloi u hauhuri lui God, a tangaloi u tau na domina tiluna, vunu u lagwa mai God mana tangaloi. Vae tiura hi kaitolu hinea u haburu, aia hi, a lagwaana.