Read West Ambae 1 KORIN 15 Bible Online

1 KORIN 15 - West Ambae bible

1 KORIN 15

¹Rabela. Nu lengaia kwara na viti huri na Roro Karea hi taliku lakwakamu hinea nu viti huria lakwakamu u rovo ba. A Roro Karea hi i kamu tulu lavia ba, vae a nomiu hauhuriana u tu u madi luna radu nga.

²Diko tulu hauhuri u madi lo Roro Karea hi u taritarisa hokinia hi nomo vitia lakwakamu, vake diko tulu hauhuri luna kareaki, vae i God ne vakahikikamu lalahi na Roro Karea hi.

³Nu viti na kinau vano hika lakwakamu ba hinea nomo lavira, vae rau haburu sileti na kinau savia. Aira hika kwara i Kraes* u mate huri na noda vaivai hati hokinia a Uliuli* Kokona mo viti.

⁴Rau taua lo gwaru-malanga. Lo rani kaitoluki i God mo rakatia tina mateana mo taritarisa hokinia a Uliuli Kokona mo viti.

⁵Vunu i Kraes mo maravuti mai Pita, i Pita mo tagaia, vunu mori maravuti mana nona kaihora* kokona hangavulu dongwana kairua ramo tagaia.

⁶Vunu takuni tiua mo maravuti mana nona tangaloi rau siletia vidolua vakailima hinea rau bulu tabulutaki, vae aira vunu rau tagaia vakatukwale lo taro hi. Ratuaki lo bulubulu aia hi rau mate ba vae u rusa rau ahi radu nga.

⁷Vunu takuni tiua hi, mote maravuti mai Semis, i Semis mo tagaia, vunu mori maravuti mana nona kaihora kokona savia ramo tagaia.

⁸Vunu vaki takuni tina tangaloi vano hi mote maravuti maiau nomo tagaia, vae i nau hoki na natu hinea u vora utu vula.

⁹I nau evina karakara tina kaihora kokona savia, vae hokinia nahe taritarisa tea kwara rana kwarekiau kwara a kaihora kokona katukwale, huri tuai nomo toko vai bulakiki na kwarelua* noi God.

¹⁰Vae huri i God mo hago maiau kina nona domi tabetabe lakua, nomo mulemai hokinia hika. Vae a domi tabetabe lakua hinea i God mo hago maiau kinia, hete huri kwara ne va rovo kwehi, vae a kwaiki rau eia. Vae i nau nu boloki u huira sileti na kaihora kokona savira. Vae kareaki hete kwara i nau kehekeheki nu boloki, vae i God u hago maiau kina nona domi tabetabe lakua, mo boloki lalahiau.

¹¹Venaha diko i kamu tulu lavi na Roro Karea tiau diko tiura, vae a Roro Karea hi aia hi vohoki hinea i kami vunu keu heretuvakinia, vunu vake aia hi vohoki hinea tulu mo hauhuri luna.

¹²Lo nomai heretuva tigwaravu lakwakamu keu tuku viti kwara i Kraes* u maraka tina mateana. ?Vae kworohokinia ratuaki tikamu ramo toko viti kwara a tangaloi hinea rau mate ranahe maraka te taliku?

¹³Diko a leomiu hi u kareaki u vosangi kwara i Kraes he maraka te tina mateana,

¹⁴vake diko i Kraes he maraka te tina mateana keu heretuva haro vuroki vohoki, vunu i kamu tulu hauhuri haro vuroki vake.

¹⁵Vunu hivoulu lo kinau hi, a leomiu vano hi rau vosangi kwara i kami keu viti huri God lo leo kurakura, huri keu hago leo maia kwara aia u rakati Kraes tina mateana. Vae diko a leomiu u kareaki kwara a tangaloi hinea rau mate ranahe maraka lai tea, i Kraes vake, i God he rakatia te tina mateana.

¹⁶Diko a tangaloi ranahe maraka te taliku tina mateana, i Kraes vake, i God he rakatia te tina mateana.

¹⁷Diko i Kraes he maraka te tina mateana, vunu i kamu tulu hauhuri haro vuroki, vake tulu hugu radu lo nomiu vaivai hati.

¹⁸Vunu vake, kwara vae diko a leomiu hi tulu viti u kareaki, kwara vae a tangaloi hinea rau hauhuri lui Kraes rau mate ba, rau sala.

¹⁹Kwara vae diko tau tau na domida u madi lui Kraes huri na noda tokaana lo varamana hika kehekeheki, aia hi u hati vohoki. Kwara vae hokinia hi, u taritarisa kwara a tangaloi rana hakavikita haburu u siletia hi rana hakavi na tangaloi savia hike lo varamana.

²⁰Vae a vitikareaki u dolua. I Kraes u maraka tina mateana ba. Aira hinea rau mate ba, vae aia u maraka tomua tiura, vae aia a kaimatai lakwakita kwara kareaki aira vunu hinea rau mate, rana maraka taliku vake.

²¹A mateana aia a kinau hinea a tangaloi katukwale u lavia vanamai vaki lo varamana, vae hokinia, a marakaana tina mateana vake, aia a kinau hinea a tangaloi katukwale u lavia vanamai.

²²A tangaloi doluaki rau vora vanamai lui Atam, vae rau mate. Vae lo hala hokinia hi, aira vunu hinea rau vora taliku lui Kraes, vae rana ahi taliku.

²³Vatavataha na tangaloi rana maraka taliku lo taroga bakotoki. I Kraes u maraka tomua halaradu, vunu lolona ne mulemai taliku a nona tangaloi savia rana maraka vake.

²⁴Vunu takuni tina kinau hi a gwereki vae ne vanamai. Vae a tangaloi noi Setano* hinea rau lalakua, mana kavman, maira hinea a noga huirana eia, vae i Kraes ne gui savira. Vunu ne tiraki na bolokiana na hugwe lakwai God a Tamaki.

²⁵Vae tomua i Kraes ne hugwe koro na tangaloi savia tarisaki i God neri gui savi na nona tavaluivuro ne taura tavutina.

²⁶A tavaluivuro rovonaki aia a mateana, vae i God neri guia.

²⁷A Uliuli* Kokona u viti kwara, “I God u tau savi na kinau tavutina.” Vae u matangwasara kwara a leo vano hi “savi na kinau” rahe viti huri God tea hinea u tau savi na kinau tavuti na huirana noi Kraes.

²⁸Tomua i God ne tau savi na kinau tavuti na huirana noi Kraes. Vunu takuni tiua hi i Kraes hinea i Natu i God, vae aia kehekeheki ne taua sibona tavuti na huirana noi God hinea tomua mo tau vunuhi na kinau tavuti na huirana noi Kraes. Vunu i God kehekeheki ne hugwe koro na kinau savia kina nona huirana.

²⁹?Vunu taliku diko a mateana ranahe maraka te taliku, vae kworohokinia a tangaloi ramo lai bavtaes lo tanotano na tangaloi hinea rau mate rahe lai te bavtaes radu? ?A domianaki kworohokinia? ?A tangaloi vano hi rau lai bavtaes lo tanotanoga huri naha?

³⁰Rabela. Tulu domidomi luna hika. ?I kami keu rarai tigwaravu kwara kena tiraki na mamaurianamai huri naha? Keu vai kwehini huri keu kikilai kwara vae kena maraka taliku. Nu viti kareaki lakwakamu kwara vataha na rani i nau lo hala na mateana. Nu viti kwehi huri nu domidomiau maikamu huri tau hariki lui Jisas Kraes a noda Hugwe*.

³¹

³²Lo gwatuivanua hi Evesas hokinia nu vai vuro mana boboroa ovi maira. ?Vae huri naha? Kwara vae diko a mateana ranahe maraka te taliku, vae nanahe lavi na kinau tea. Kwara vae kwehi u karea kwara tana huri na leo katukwale hinea mo viti kwara, “Ta va kanikani, ta va inuinu, huri mavuko tana mate.”

³³I kamu tulu hatu tiraki na tangaloi rana sinakamu. Lo leoki katukwale mo viti kwara, “A tangaloi hinea rau bakoto, a noga buluana hinea rahe bakoto tea rana magaraki na bohibohianaga karea.”

³⁴Tulu vai a domimiu rana bakoto, tulu tiraki na doridorimiu hinea rau hati. I kamu tuaki tulu he kikilai God te vohoki. Nu viti kwehi, vae aia a maemaeana lakua lakwakamu.

³⁵Karea, vae a tangaloi tuaki rana uduhuri kwara, “?A tangaloi rana maraka kworohokinia tina mateana taliku? ?A tarabehiga rana hoki na havakinau?”

³⁶I kamu tulu reraka haburu. Diko tulu rivu a biu tilolo tano, vae a vinuki he madamada tea, vae a biu nehe mauri lai tea.

³⁷Vake a biu hinea tulu mo rivukia tilo tano, tulu tagaia u dolua tina tubuki. Diko a biu na sila, diko a biu na hava rivurivu tea, vae tulu rivuki na biu kehekeheki.

³⁸Vae i God u vaia mo tubu hokinia hi aia u domiki, vunu a biu u mulemai kina tubu hinea u taritarisa maia.

³⁹A vihiko gwatu na rusa rau doludolua kehe nga. A vihiko na tangaloi u dolua, a vihiko na boboroa u dolua, a vihiko na manu u dolua, vake a vihiko na ika u dolua.

⁴⁰Vunu a kinau hinea rau eno lolo taetae rau dolua tina kinau hinea rau eno lo varamana. A karekarea na kinau lolo taetae u dolua tina karekarea na kinau lo varamana.

⁴¹A hahaviada na mataniaho u dolua, a hahaviada na vula u dolua, a hahaviada na vitu rau dolua, vunu a hahaviada na vitu ratuaki rau doludolua tiura ratuaki.

⁴²Lo taroki hinea a tangaloi rana maraka taliku tina mateana, vae ne hoki na leo aira vano hi. A tarabehi hinea tau tanomia vae ne madamada, vae a tangaloi ne maraka taliku, a tarabehina nehe madamada lai tea.

⁴³A tarabehi hinea tau tanomia u hati vohoki, vake he huira tea. Vae ne maraka taliku ne karea vohoki, ne huira.

⁴⁴A tarabehi hinea tamo tanomia, aia a tarabehi huri na mauriana lo varamana. Vae lo taroki a tangaloi ne maraka taliku a tarabehina ne dolua, vae neri ahi mai God. A tarabehi huri na mauriana lo varamana eia, vunu a tarabehi huri na ahiana mai God eia vake.

⁴⁵A Uliuli* Kokona u viti kwara, “A tangaloi tomua halaradu i Atam, i God u taua, vae u bete na mauriana na varamana hika lakwae,” vae i Atam rovonaki, aia a Tanungwe Kokona, aia u bete na ahiana.

⁴⁶A ahiana hi a Tanungwe Kokona mo bete he vanamai te tomua, vae a mauriana hi lo varamana aia u vanamai tomua, vunu vari a ahiana na Tanungwe mori vanamai.

⁴⁷A tangaloi hi tomua halaradu i God u kihia kina tano, vae aia a tangaloi na varamana, vae a tangaloi kairuaki hi, aia u vanamai tina taetae.

⁴⁸A tangaloi na varamana savia aira hoki na tangaloi hinea i God u kihia kina tano tomua halaradu. A tangaloi na taetae savia aira hoki na tangaloi hinea u vanamai tina taetae.

⁴⁹Hikani i kita hoki na tangaloi hinea i God u kihia kina tano, vae lo hala hokinia hi, tanari hoki na tangaloi hinea u vanamai tina taetae.

⁵⁰Rabela. A nogu leo aira vano hi a domianaki aia hika. A tarabehi hika, a vihikona eia, a daina eia, vae nehe soro lai te tilolo Vanua Karagwa hinea i God u hugwe koroa. A tarabehi hika aia a tarabehi na mateana. Vae a tarabehi hi nehe kwiribibi lavi na ahiana tea hinea a mateana tikei luna.

⁵¹Tulu taga. Hika a leo hinea u eno tavuniki. Hete kwara i kita vunu tana mate. Vae a tavui na rani ki rovonaki ne tangi, vakatukwale vohoki hokinia tamo mataru, i God ne bohiki na tarabehida i kita vunu. A tavui hi ne tangi a mateana rana maraka vae ranahe mate lai te taliku. Vunu i kita hinea tau ahi radu, i God neri bohiki na tarabehida vake.

⁵²

⁵³A tarabehida hinea rau tuku hati, vae rana bohi rana mulemai kina tarabehi hinea ranahe hati lai tea. Vunu vake a tarabehida hinea rau tuku mate, vae rana bohi rana mulemai kina tarabehi hinea ranahe mate lai tea.

⁵⁴Vae ne mule luna hokinia hi, a tarabehida hinea rau mate lai hika, rana bohi, rana mulemai kina tarabehi hinea ranahe mate lai tea. Vunu a leo hika lo Uliuli Kokona ne mule luna hinea mo viti kwara, “A mateana, i God u magarakinia. !U guia u rovo ba!

⁵⁵?Mateana, kona gui kworohokikami? ?Mateana, kona magaraki kworohokikami?”

⁵⁶A mateana u lavi na nona huirana tina vaivai hati kwara ne magarakikita. A vaivai hati u lavi na nona huirana tina Tangwata*.

⁵⁷Vae tau lagwaki God hinea u hago maikita tamo gui na hatiki lalahi na noda Hugwe* i Jisas Kraes*.

⁵⁸Rabelagu. Vae huri hi tulu tu ne madi tulu hatu kilukilu. Tulu boloki karakara tigwaravu lo nomiu bolokiana lakwa na noda Hugwe, huri tulu kikilai kwara vatavataha na kinau tulu vai lo bolokiana nona Hugwe, vae a kwaiki ne eia.