Read West Ambae 1 KORIN 2 Bible Online

1 KORIN 2 - West Ambae bible

1 KORIN 2

¹Rabela. Lolona hini nomo vanamai vaki maikamu nomo matangwasaraki na domidomi noi God hinea tomua u eno tavuniki. Vae nohe vitia tea kina leo lalakua mana kikikila sea nona tangaloi.

²Lolona nomo hugu maikamu nu tau na nogu domidomi u madi lo kinau katukwale vohoki. Nu domidomi lui Jisas Kraes* vohoki, vunu aulu karakara nu domidomi lo nona mateana lo kaibetu.

³Lolona nomo hugu maikamu a nogu huirana tikei vohoki. Tigwaravu nu mataku, a huigu u ruru kinia.

⁴A nogu huhuiana mana nogu leo nohe vitira tea kina leo na kikikila nona tangaloi kwara na reveikamu kinira. Vae a leogu u vosangi na huirana na Tanungwe noi God

⁵kwara a nomiu hauhuriana nehe tu tea lo leo na kikikila nona tangaloi, vae ne tu lo huirana noi God kehekeheki.

⁶Kareaki, a nomai leo na kikikila eia, vae keu huhui na tangaloi hinea rau ngwarasea madi lo noga tokaana mai Kraes* kina leo na kikikila hi. Vae aia hete kikikila nona tangaloi na varamana hika. Vake hete kikikila nona tangaloi hinea a noga huirana eia, rau hugwe koro na varamana. Aira hi, vae a noga huirana ne va titikeiki.

⁷Vae a leo na kikikila i kami keu viti huria aia a leo na kikikila noi God hinea u tavunikinia tomua, a tangaloi rahe kikilaia tea. Aia hi a domikiana noi God tomua halaradu lolona a varamana he tauana te radu, kwara ne tabe hakekikita kina kikikila hi.

⁸A tangaloi lalakua na varamana aira vunu rahe kikilaia tea. Kwara vae diko rau kikilaia, ranahe duru na noda Hugwe* te tilo kaibetu hinea aia a Hugwe na taetae.

⁹Vae a Uliuli* Kokona u viti “I God u tau rarai na kinau rusa ba hurira hinea rau lagwa maia haburu. A tangaloi rahe tagai na kinau vano hi te kina mataga, rahe rongo na roroga te kina gweroga, vake rahe domidomi te luga lolo domiga.”

¹⁰Vae i God u matangwasarakinira lakwakita kina nona Tanungwe. A Tanungwe hi noi God u taga haro savi na kinau hinea rau eno tavuniki. A domidomi tavuniki noi God hinea a tangaloi rahe kikilaira tea, vae a Tanungwe u matangwasaraki lavira.

¹¹A havakinau hinea a tangaloi u domidomi luna, vae aia kehekeheki u kikilai lo domina, a tangaloi dolua rahe kikilai tea. Vae lo hala hokinia hi a havakinau hinea i God u domidomi luna, vae a Tanungwe noi God kehekeheki u kikilai.

¹²A Tanungwe hi, hinea tau lavia ba, hete tanungwe na varamana. Aia a Tanungwe noi God hinea i God u hokakinia vaki maikita kwara tana kikilai savi na hilehile hinea mo bete lakwakita.

¹³Vae huri hi, a leo hinea kemo toko vitira, hete kwara a huhuiana nona tangaloi, vae a huhuiana nona Tanungwe noi God hinea mo huhuikami kinira. Vunu kemo matangwasaraki na huhuiana nona Tanungwe hi lakwara hinea rau lavi na Tanungwe noi God. [2]

¹⁴A tangaloi hinea a Tanungwe noi God u tikei luna aia nehe lai lavi na hilehile nona Tanungwe tea. Nehe kikilaira te vohoki. Ne rongora hoki na leo reraka, huri a Tanungwe noi God kehekeheki u vai na tangaloi ramo kikilai na nona hilehile hinea mo toko betera.

¹⁵A tangaloi hinea a Tanungwe noi God luna aia u vai lai kwara ne taga kwaheki savi na kinau kwara rau karea diko rau hati, vae a tangaloi tikei kwara u taritarisa kwara ne arekinia.

¹⁶A Uliuli Kokona u viti “?Ihe u kikilai na domidomi na Hugwe i God hinea a noda Hugwe? ?Ihe u vai lai kwara ne huhuia?” Vae i kita tau lavi na domidomi i Kraes ba.