Read West Ambae 1 KORIN 7 Bible Online

1 KORIN 7 - West Ambae bible

1 KORIN 7

¹Hikani nu lengaia kwara na duvi na nomiu leo uhiuhi hinea tulu mo uli lakweau. U karea kwara a ngwera nehe laki tea.

²Vae huri a tangaloi rusa rau vai a doridori hati u taritarisa kwara vatavataha na ngwera i vavinehiga ne eia, vunu vatavataha na ravavine i tuaga ngwarasea ne eia.

³A ngwera ne bohibohi mai vavinehina ne taritarisa lo hala na lakiana, vunu a vavine ne bohibohi mai tuana ngwarasea hokinia vake kwara ne taritarisa lo nogaru lengalengahuri.

⁴Hete vavine kehekeheki kwara ne hugwe koro na tarabehina sibona, vae i tuana ngwarasea u hugwe koroa. Vunu lo hala hokinia hi, hete ngwera kehekeheki kwara ne hugwe koro na tarabehina sibona, vae i vavinehina u hugwe koroa.

⁵A ngwera mai vavinehina raru ne hatu tu kororarua muleki huri na nogaru lengalengaiana sibogaru. Vae diko a ngwera mai vavinehina raru ne masinge kwara raru ne tiraki na hala na lakiana te gwanugwanu vohoki kwara a taro ne eia lakwararua kwara raru ne tiutangaroa, hokinia hi u karea. Vunu vaki takuni raru ne mule vaki lo hala na lakiana taliku. Tulu ne vai kwehi kwara i Setano* nehe hagwe na hala tea kwara ne sinakamu huri tulu he huira tea kwara tulu ne kwiribibikamu sibomiu.

⁶A leo hi nomo viti, aia hete korokoro luna, vae nu viti kwehini kwara ne hago maikamu.

⁷Kwara vae diko i kamu vunu tulu he laki tea, vae tulu hugu kahekamu hokiau, kwara vae na lagwa vohoki. Vae i God u bete a hilehile doludolua kehe nga lakwa na tangaloi. Lakwa na tangaloi ratuaki u bete a huirana kwara rana vai hokinia hi, vae lakwa na tangaloi ratuaki u bete a huirana lakwara kwara rana vai ne dolua tiua hi.

⁸Hikani nu viti lakwakamu hinea tulu he laki tea, vunu lakwa na gwati maira vake, kwara u karea kwara tulu ne hugu kahekamu hokiau.

⁹Diko tulu lengaia haburu kwara tulu ne laki, tulu laki. A lakiana u karea sileti na doridori hinea tigwaravu a ngwera u lengai na vavine haburu.

¹⁰Lakwakamu hinea tulu laki ba, a tulikileo nana vitia hete leogu vae a leo na noda Hugwe*, kwara a vavine ne hatu kwalao ti tuana ngwarasea.

¹¹Vae diko a vavine u kwalao ti tuana ngwarasea, u karea kwara ne hugu kwehini, nehe laki te kina tangaloi dolua. Diko hetea, ne mule vaki mai tuana ngwarasea taliku. Vae vake, a ngwera ne hatu talahi na nogaru lakiana.

¹²Lakwara tuaki a leo nana vitia aia a nogu leo sibogu, hete nona Hugwe. Diko te ngwera katukwale tikamu hinea u hauhuri lui Kraes, i vavinehina he hauhuri tea, vae a vavine hi u masinge kwara ne hugu butu maia, a ngwera hi ne hatu talahi na nogaru lakiana. A vavine hi, hinea he hauhuri tea, aia hoki na vavine hinea u bakoto lo nako i God huri u bulu mai tuana ngwarasea hinea u hauhuri lui Kraes*. Vunu diko te vavine katukwale tikamu hinea u hauhuri lui Kraes, i tuana ngwarasea he hauhuri tea, vae u masinge kwara ne hugu butu maia, a vavine hi ne hatu kwalao ti tuana ngwarasea. A ngwera hi, hinea he hauhuri tea, aia hoki na ngwera hinea u bakoto lo nako i God huri u bulu mai vavinehina hinea u hauhuri lui Kraes. Kwara vae hete hokinia hi, i raranatugaru rana hoki na natu na tangaloi hinea rahe kikilai i God tea. Vae hikani i raranatugaru rau kokona, aira a noi God.

¹³

¹⁴

¹⁵Vae lo lakiana hokinira hi, diko aia hinea he hauhuri tea u lengaia kwara ne tirakinia hinea u hauhuri, u karea, ne vai lai hokinia hi. A ngwera hinea u hauhuri diko a vavine hokinia hi vake, a kinau tikei kwara ne kwiribibia. Ne vai a havakinau hinea u lengaia. I God u kwarekita kwara tana toka lo magemuana.

¹⁶?Diko i nigo a vavine hinea ku hauhuri lui Kraes, ku kikilai kworohokinia kwara konahe hago lai te mai tuamu ngwarasea kwara ne bohi? ?Vunu diko i nigo a ngwera hinea ku hauhuri lui Kraes, ku kikilai kworohokinia kwara konahe hago lai te mai vavinehimu kwara ne bohi? [5]

¹⁷I kita vunu tana kwiribibi na doridori karea hinea i God mo bete lakwakita tuai, hinea tamo kwiribibia lolona hinea aia mo kwarekita. Aia hi a tangwata katukwale hinea nu tuku huhui na kwarelua* doluaki kinia.

¹⁸Diko te tangaloi u lai a kaimatai lo siosio ba lolona hinea i God u kwarea, ne hatu vai kwara ne vai letiuki na kinau hi. Diko te tangaloi i God u kwarea lolona hinea he lai te a kaimatai* lo siosio radu nga, ne hatu lai a kaimatai lo siosio.

¹⁹Vae diko te tangaloi tea u lai a kaimatai lo siosio, diko hetea, vae venaha a kinau vuroki. Aia a kinau haburu kwara tana rongohuri na tulikileo noi God.

²⁰Lolona i God mo kwarekita, i kita hinea a tangaloi boloki haro vuroki, diko i kita hinea a noda masi tikei, vae lo noda tokaana lui Kraes* u taritarisa kwara tana toka hokinia hi.

²¹Lolona hinea i God mo kwareko, diko i nigo a tangaloi boloki haro vuroki tavuti na masi katukwale, vae ko hatu domi huri. Vae diko a hala eia kwara kona materi, karea, ko huri na hala hi. [6]

²²A tangaloi hinea u boloki vuroki tavuti na masi vae a noda Hugwe* u kwarea, aia u mulemai kina tangaloi materi na noda Hugwe. Vunu vake, a tangaloi hinea he boloki vuroki tea tavuti na masi, vae i Kraes u kwarea, aia u mulemai kina nona tangaloi* boloki vuroki.

²³I God u volitukuhikamu ba kina kaivoli lakua vohoki, vae huri hi tulu hatu mulemai kina tangaloi boloki vuroki tavuti na tangaloi.

²⁴Rabela. Hikani u taritarisa kwara tana bulubulu mai God tigwaravu, tana kwiribibi na hava boloki hinea tamo toka luna lolona i God mo kwarekita.

²⁵Hikani na duvi na leo uhiuhi huri na tangaloi hinea rahe laki tea. A leo tikei tina Hugwe* lakweau, vae i nau nu viti lakwara hokinia hinea nomo domiki. Vae huri a Hugwe u hago maiau kina nona lagwaana tulu ne hauhuri lai lo leo hika.

²⁶Lolona nomo tagai na taro madi hika tamo hagwea, nu domi kwara u karea kware rana hugu kwehini.

²⁷I nigo hi i vavinehimu eia, ko hatu talahi na nomiru lakiana. Vunu i nigo hi i vavinehimu tikei, ko hatu soro vavine.

²⁸Vae diko ku laki aia hete vaivai hati. Diko a vavine ngwalagelo u laki aia he vai na vaivai hati tea. Vae aira hi rau laki rau hagwe na rongoana hati lo noga tokaana. Vae nohe lengaia tea kwara tulu ne hagwe na rongoana hati hi.

²⁹Rabela. A leo hi a domianaki aia hika. A taro gwanugwanu vohoki mo eno maikita. Vae huri hi, u karea kwara a ngwera hinea u laki ba ne bohibohi hoki na ngwera hinea i vavinehina tikei.

³⁰A tangaloi hinea u rongo hati, u karea kwara ne bohibohi hoki na tangaloi hinea he rongo hati tea. A tangaloi hinea u lagwalagwa, u karea kwara ne bohibohi hoki na tangaloi hinea he lagwalagwa tea. A tangaloi hinea u tuku volivoli, u karea kwara ne bohibohi hoki na tangaloi hinea a nona vivilagoki tikei.

³¹Vunu a tangaloi hinea u bihubihu lo varamana, u karea kwara ne domi kwara a kinau vano hi a kinau vuroki. Nu viti hokinia hi huri a varamana hika mana doridoriki, vae nehe tuai tea ne va sala.

³²Nu lengaia kwara a domimiu ne hatu kwalao laliki huri na varamana hika. A ngwera hinea he laki tea, u domidomi haburu huri na bolokiana nona Hugwe kwara ne vai na Hugwe ne lagwa.

³³Vae a ngwera hinea u laki, a domina u kwalao laliki huri na kinau na varamana huri u lengaia kwara ne vai i vavinehina ne lagwa,

³⁴vae hi u vai lengalengakinia. A vavine hinea he laki tea, diko a vavine toka kokona, u domidomi haburu huri na bolokiana nona Hugwe. U lengaia kwara a tarabehina mana tanungwena rana ngwasara rana kwareki a nona Hugwe. A vavine hinea u laki ba, a domina u kwalao laliki huri na kinau na varamana huri u lengaia kwara ne vai i tuana ngwarasea ne lagwa.

³⁵Nu viti hokinia hi kwara na hago maikamu. Nohe lengaia tea kwara na tau na tangwata lumiu ne madi, vae nu lengaia kwara tulu ne bohibohi ne taritarisa, tulu ne betekamu vunuhia lakwa na Hugwe kwara tulu ne boloki nona, vae a domidomi dolua ne tikei kwara ne reveikamu.

³⁶Diko a ngwera katukwale u taubibi nona vavine kwara ne laki maia, vae raru domidomi kwara raru ne hugu ba, vunu a ngwera hi u lengai na nona vavine haburu, u rongo kwara ne vai a kinau he karea tea maia, diko u lengaia kwara raru ne laki, u taritarisa kwara ranaru laki lo hala bakoto. Aia hi hete vaivai hati.

³⁷Vae diko te ngwera hokinia hi he lengaia tea kwara ne laki, hete kwara a tangaloi u suria, aia a domina sibona kwara ne hatu laki ba, vae a domina u karea, he vai na kinau hati tea mana nona vavine, vae diko he laki tea u karea.

³⁸Hikani a ngwera hinea u laki u vai u karea, vae aia hinea he laki tea u vai u karea siletia hi. [7]

³⁹A vavine hinea u laki ba aia nehe vai lai tea kwara ne tiraki tuana ngwarasea hinea u ahi radu nga. Vae diko i tuana ngwarasea ne mate ne vai lai kwara ne laki mana hava tangaloi u lengaia. A kinau katukwale vohoki, aia kwara a tangaloi hi ne kwareki a noi Kraes*.

⁴⁰Vae i nau lolo domigu nu domi kwara diko nehe laki tea taliku ne lagwa siletia hi kwara ne laki taliku. Nu domi kwara a Tanungwe noi God aia u bete na domidomi hika lakweau.