Read West Ambae 2 KORIN 1 Bible Online

2 KORIN 1 - West Ambae bible

2 KORIN 1

¹I nau i Pol hinea lo domikiana noi God mo rivukiau kwara na kwareki a kaihora* kokona noi Jisas Kraes*. I kamirua mai belada i Timoti keru uli na leta hika lakwakamu a kwarelua* noi God lo gwatuivanua lakua Korin, vake lakwakamu a tangaloi noi God savia laliki lo vanua Gris.

²A tangaroa karea hika lakwakamu. I God i Tamada mai Jisas Kraes a noda Hugwe* raru ne hago maikamu kina nogaru domi tabetabe lakua, vake raru ne bete na magemuana ne eno maikamu.

³Ta lai noda lagwaana lakwai God hinea a God a Tama na noda Hugwe* i Jisas Kraes*. Aia i Tamada hinea a nona hahakaviana eia, aia a God hinea a gwataki na hagoana savia.

⁴U hago maikami lo nomai rongoana hati rusa hokinia kwara vae i kami kena hago lai maira hinea a rongoana hati a gwatuki u rusa mo kihira. Keu hago maira kina hagoana aia hini i kami kemo lavia ti God.

⁵I kami keu hagwe na rongoana hati rusa, aira hi i Kraes mo rongo hati luga. Vae lo hala hokinia hi, lalahi Kraes keu hagwe na hagoana lakua noi God, vae keu vai lai kemo hago mana tangaloi dolua.

⁶Diko i kami keu rongo hati, vae aia hi kwara vae ne hago maikamu kwara i God ne vakahikikamu. Diko i God u hago maikami keu rongo karea, vae aia hi vake kwara ne hago maikamu kwara tulu ne tu ne madi. Vunu tulu mo rongo hati hokikami, a domimiu ne bua vae nehe sovi tea.

⁷Vae huri hi, a nomai domidomi lumiu he kilukilu te vohoki huri keu kikilai ba kwara tulu bulu ba maikami lo rongoana hati hini kemo rongo hati luna. Vunu lo hala hokinia hi vake, tulu bulu maikami lo hagoana hinea kemo lavia.

⁸Rabela. Keu lengaia kwara tulu ne domihagwe na rongoana hati hinea tuai mo kihikami lo vanua Esia*. A hagohago u tauana lumai u lakua, u mava haburu, keu domi kwara kenahe ahi lai tea.

⁹Keu rongo hokinia hi kwara i kami hika rau tovo na leo na mateana u rovo ba vovohikami vae kena mate. U vaiana hokinia hi kwara i kami kena hatu domi tilumai sibomai, vae tilui God kehekeheki aia hi u rakatira hinea rau mate.

¹⁰U vakahikikami tina mateana hinea u hati vohoki, vae hika ne vakahikikami taliku. Hikani keu tau na nomai domidomi tiluna kwara aia ne vakahikikami taliku.

¹¹Vae tulu ne hago maikami kina nomiu tiutangaroa. Vunu a tangaloi rusa rana lai noga lagwaana lakwai God hurikami, huri mo vai tabetabekikami lalahi na noga tiutangaroa rusa.

¹²A kinau katukwale u vaikami tigwaravu kemo domidomikami luna. Lo bohibohianamai hinea kemo toko vai lakwa na tangaloi laliki lo varamana, vae silesiletia hi lakwakamu, keu huri na hala hi i God mo vaia. Keu viti kinau, keu viti bakotoki, a bohibohianamai u taritarisa. Vae hika keu rongo kikilaki lo tarabehimai kwara kehe vakasile te lo bohibohianamai. Keu vai kwehi, hete lo kikikila nona tangaloi, vae keu vai huri i God mo hago maikami kina nona domi tabetabe lakua.

¹³Keu uli na kinau kehekeheki lakwakamu, aira hini kwara tulu ne valu lai tulu ne kikilaia. Hikani tulu kikilai na nomai leo duviki vohoki, vae nu tau na nogu domidomi luna kwara vae tulu neri kikilai vunuhia. Vunu lo Rani na noda Hugwe* i Jisas [1] vae tulu ne domidomikamu maikami, hokinia hi i kami kena domidomikami maikamu.

¹⁵Nu kikilai tabetabeki savi na kinau vano hini, vae huri hi nomo domikinia kwara lo halagu vaki Masetonia nana tirokikamu tomuaki, vunu lo halagu mulemai tina vanua Masetonia nana tagaikamu taliku. [2] Vae luna hi nana tirokikamu vakairua, vae na vaikamu tulu ne lagwalagwa vakevake. Vunu tulu neri hago maiau lo halagu vaki lo vanua Sutia*.

¹⁷?Lolona nomo viti terekaki na nogu domidomi hokinia hi, tulu domi kwara a domigu u tuku bohi laliki? Lo taro nomo viti terekaki na nogu domidomi, nahe vai te lo domidomi na tangaloi kehekeheki. Nahe viti lai te kwara, “Io”, “Hetea” vakatukwale.

¹⁸Hokinia i God u viti kareaki tigwaravu, nu viti lakwakamu kwara lo nogu tulikileo hinea nomo vitia lakwakamu nohe sarisari kinau tea.

¹⁹I nau, i Saelas, mai Timoti keu heretuvaki i Jisas Kraes* i Natu i God lakwakamu. Vae a nona leo he kairua tea kwara, “Io, hetea”, A nona leo u viti “Io” tigwaravu.

²⁰Aia a kaidaraki hinea mo viti kwara, “Io” lakwa na tulikileo savira hinea i God u vitira ba. Vae huri hi, lalahi Jisas Kraes tau daraki tamo viti “Io, aia hi kareaki” kwara tana tabe hakeki na hina i God.

²¹I God sibona u vaikami, vake u vaikamu tamo kikilai kareaki kwara tau hariki lui Kraes. I God sibona mo vuraekita tamo kokona,

²²mo tau na nona kaimatai luda hinea u vosangi kwara tau kwareki a nona. Mo tau na nona Tanungwe Kokona tilolo domida, u kwareki a kaimatai kwara vae savi na nona tulikileo lakwakita rana mule luna kareaki.

²³I nau nu kware i God hokinia a nogu hagoleo, nahe kura tea. Nakwaiha nohe venatu te vaki Korin huri na kinau katukwale vohoki, nohe lengaia te kwara na vaikamu tulu ne rongo hati.

²⁴I kami kehe vai te kwara kena bibirikamu kwara tulu ne hauhuri te lo hava leo. Keu kikilai kwara tulu tu madi lo nomiu hauhuriana ba. Vae keu boloki maikamu kwara ne havutikamu.