Read West Ambae 2 KORIN 10 Bible Online

2 KORIN 10 - West Ambae bible

2 KORIN 10

¹I nau i Pol, nu viti lakwakamu kwara tulu ne rongohuri na leo hika hinea na viti huriau sibogu. A tangaloi rau tuku viti kwara diko nu hugu maikamu nu lailai hivokiau, vae diko nu hugu vakahao tikamu nu vai madikikamu. Vae i nau nu kwaha tabetabe maikamu lo hina i Kraes* hinea u hivokinia, a hahakavina eia huri na tangaloi. Na viti lakwakamu kwara,

²na maravuti maikamu, vae tulu hatu vaiau kwara na kwaha madikikamu. Nu viti kwehi huri a tangaloi tuaki rau viti kwara i kami keu tuku vai kinau lo doridori na tangaloi vohoki. Vae nu kikilai kareaki kwara na vai lai na vai madikinira kareaki.

³Kareaki i kami a tangaloi na varamana, vae keu vai vuro hete kwara kena huri na domidomimai hinea keu vai lo doridori na tangaloi.

⁴A vivilagoki na vai vuro vano hi kemo vai vuro kinira, aira hete a vivilagoki na varamana, vae aira a noi God hinea rau huira huri kwara vae kena magaraki lavi na ingwa kinira, hinea a ingwa na vai vuro rau madi. Hikani keu tuku vai magaraki na leo kurakura rusa hinea a tangaloi ramo toko vitira huri vae ramai tu koro na vitikareaki.

⁵Keu reve surisuri savi na kinau hinea a tangaloi ramo rivukira kina langilangi hinea ramo tu koro na tangaloi kwara rana hatu kikilai God. Keu bohiki savi na domidomi hati nona tangaloi, kemo vaira ramo rongohuri Kraes.

⁶I kamu hi tulu betekamu ba lakwai Kraes kwara tulu ne rongohuria tigwaravu. Vae diko tuaki tikamu rau galo lo leo hi taliku, i kami keu rarai kwara kena vai kadira huri.

⁷I kamu tulu tuku tagai na bohiana na tangaloi noi Kraes, vae tulu tuku taga tavalavarea vohoki. Nu domi kwara tuaki tikamu rau domi kwara aira a tangaloi noi Kraes. U karea kwara aira hi rana domidomi taliku kwara i kami vake kwehi, i kami a tangaloi noi Kraes.

⁸Vae i nau diko nu kwaha domidomiau haburu mana huirana hinea a noda Hugwe* u betea ba lakwakami a kaihora* kokona, vae nahe maemae lai te huri. A nomai huirana hi huri kwara ne vaikamu tulu ne huira vakevake, tulu ne lalakua vakevake, hete huri kwara ne reve hivokikamu taliku.

⁹Nohe lengaia tea kwara tulu ne domi kwara nu vai kwara nana vaikamu tulu ne mataku kina nogu leta vano hi.

¹⁰A tangaloi tuaki rau viti kwara, “A leo i Pol lo leta vano hi rau huira haburu vake rau mava, vae lolona hinea u hugu maikita u keokeo, a leona rau vuroki vohoki.”

¹¹U karea kwara a tangaloi vano hi rau tuku viti na leo hi rana kikilai na kinau hika. A bohibohianamai hi lolona kena maravuti maikamu, vae ne taritarisa hokinia lo leo vano hi kemo toko vitira lo leta hinea keu hugu vakahao tikamu radu nga.

¹²A tangaloi tuaki hike rau domi kwara aira a tangaloi hahaburuka. Vae i kami keu maemae kwara kena tu maira kena taga kwahekikami kwara ihe maira rau karea siletira hi ratuaki. Vae a tangaloi vano hi rau reraka. Aira siboga rau tau noga dumu kwara ihe u aulu, ihe u evina. Aira kehekeheki rau kwahekinira lo noga domidomi siboga.

¹³Vae i kami, i God u tau a nomai dumu kwara kena kwaha domidomikami mana nomai bolokiana, vae kenahe vano te sileti na dumu hi. Kena kwaha domidomikami huri na nomai bolokiana kehekeheki hinea i God u betea lakwakami kwara kena vaia, vae a boloki hinea keu vai maikamu aia a duvi na nomai bolokiana hi.

¹⁴Vae huri hi, lolona hi kemo venatu vaki maikamu, kehe vano te sileti na dumu, huri i kami tomua halaradu kemo lavi na Roro Karea noi Kraes* vaki maikamu.

¹⁵Vae hokinia, lolona kemo kwaha domidomikami lo nomai bolokiana maikamu, i kami kehe vano tea sileti na dumu na bolokiana hinea i God mo betea lakwakami. I kami kehe toko kwaha domidomikami tea mana bolokiana nona tangaloi dolua. Vae keu tau na nomai domidomi luna hika kwara a nomiu hauhuriana ne huira vakevake, vunu vake kwara kena vai te bolokiana te maikamu ne lakua vakevake. Vae kehe lengaia tea kwara kena vano sileti na dumu hinea i God mo taua.

¹⁶Vunu takuni tiua kena vano kena heretuvaki na Roro Karea lo vanua ratuaki tavaluki tikamu. Vae hokinia kenahe boloki tea lo vanua hinea a tangaloi dolua u boloki eia ba, vae kenahe kwaha domidomikami tea mana bolokiana nona tangaloi dolua.

¹⁷Vae a Uliuli* Kokona u viti kwara, “Ihe te hinea u lengaia kwara ne kwaha domidomia, ne kwaha domidomia mana kinau hi vohoki hinea a noda Hugwe* u vai lakwae.”

¹⁸A tangaloi hinea u tuku kalukinia sibona, aia hete tangaloi vitivitihuri, vae a tangaloi hinea a noda Hugwe u kalukinia, aia hi kareaki a tangaloi vitivitihuri.