Read West Ambae 2 KORIN 11 Bible Online

2 KORIN 11 - West Ambae bible

2 KORIN 11

¹Nu lengaia kwara tulu ne tirakiau na kwaha rerera te kelekele. Tulu tirakiau na vai kwehi.

²I nau nu taga korokamu, vae a domigu u ngwangwavi hurikamu kwara tulu ne kwareki a tangaloi noi God kehekeheki hokinia hinea aia u lengaia. Nu tagaikamu hoki na vavine takwae hinea u ngwasara, u toka kokona, vae i nau nu vai bakotoki na kinau huria kwara ne laki mana tangaloi katukwale vohoki, aia hi i Kraes*.

³Nu mataku huri vae a domidomimiu ne mai hogora. Nu mataku huri vae tulu mai tiraki na nomiu lagwaana vovohi Kraes, hinea tulu mo lagwa maia haburu lo hala u bakoto vohoki u ngwasara. Nu mataku huri vae tulu mai sovi, hoki na vavine tomua halaradu hi i Iv hinea mo sovi, a ngwata mo sinae kina nona leo kurakura.

⁴I kamu tulu lagwa kehe nga kwara tulu ne tiraki na tangaloi dolua rana vanamai rana heretuva lakwakamu. A tangaloi tuaki rau heretuva rau viti i Jisas, u dolua tiua hini i kami kemo viti, vae tulu rongohuri na leoga. Tuaki rau lavi na tanungwe vanamai u dolua tina Tanungwe Kokona hinea tulu mo lavia tomua, vae i kamu tulu lavia. Vunu tuaki rau matangwasaraki na roro karea u dolua tina Roro Karea hinea tulu mo rongoa tikami, vae tulu hauhuri luna.

⁵I nau nohe domi tea kwara nu evina tina kaihora* kokona vano hi, hinea tulu mo toko vitira kwara aira rau hahaburuka.

⁶Venaha diko nu sekulu he karea te lo kwahakwaha, vae nohe gwanugwanu te lo nogu kikikila. A kinau hi keu vaia u matangwasara lakwakamu vataha na taroki lo kinau vatahae hinea kemo toko vai maikamu.

⁷Vae lolona nomo heretuvaki na Roro Karea noi God lakwakamu nohe vaikamu tea kwara tulu ne voli. I nau kehekeheki nu hivokiau kwara na tabe hakekikamu. ?Vae kworohokinia? ?Tulu domi kwara nu vai he bakoto tea hokinia hi?

⁸Lolona nomo toko boloki lo livukamiu, a kwarelua* dolua aira rau voliau. Aia mala kwehini kwara nu tuku balu tiura kwara vae na hago maikamu.

⁹Lolona nomo hugu maikamu vae nomo gwanugwanu lo mane*, vae nohe viti te kwara tulu ne hago maiau. I rabelada hinea rau ngwalua tina vanua Masetonia rau vanamai rau lai kinau hinea nomo gwanugwanu luga. A doridori hinea nu vai ba, vae nana kwiribibia. Vae nanahe tau na hagohago mava te lumiu kwara vae tulu ne hago maiau.

¹⁰Lo vitikareaki noi Kraes hinea u eno lugu, na viti kareaki lakwakamu hika. Nomo kwaha domidomiau mana hala na mane, vae a tangaloi tikei laliki lo vanua Gris kwara ne tu koroau luna, te lo taroki.

¹¹Nu viti kwehini hete kwara nu begu kikamu. I God u kikilai kwara nu lagwa maikamu.

¹²Vae nana vano nga lo hala hinea nomo toko vai hika, huri kwara vae na tu korora hinea rau viti kwara aira a kaihora kokona. Nahe lengaia tea kwara na bete mahao lakwara kwara rana toko kwaha domidomira, rana toko viti kwara rau boloki lo hala hinea u taritarisa hokinia i kami kemo toko vai luna.

¹³A tangaloi aira vano hi aira hete kaihora kokona kareaki, aira a kaihora kurakura. Rau tuku kura hinea ramo viti huri na noga bolokiana, vunu rau bohiki na doridoriga kwara rana vai na tangaloi rana tagaira kwara aira a kaihora kokona kareaki noi Kraes.

¹⁴Vae tana hatu idila kina kinau hi. I Setano, vae ne vai lai kwara ne bohiki na doridorina huri kwara vae a tangaloi rana tagaia kwara aia a kaihora na leleha tina taetae.

¹⁵Vae huri na kinau hi, tana hatu idila kinia diko a tangaloi boloki noi Setano* rau bohiki na doridoriga kwara a tangaloi rana tagaira kwara aira a tangaloi boloki hinea rau boloki huri na bakotoana. Vae lo gweregwereki rana lavi na kaitakwe aia hi u taritarisa mana kinau vano hi ramo toko vaira.

¹⁶Na viti taliku, he karea tea kwara tulu ne domi kwara i nau a rera. Vae diko tulu tuku domi kwehi, karea, tulu tirakiau na vai na doridori na rera te kelekele vunu na kwaha domidomiau te kelekele.

¹⁷A nogu leo hika aia hete kinau kwara a noda Hugwe* u viti lakweau kwara na viti. Lo hala hinea nomo toko kwaha domidomiau nu tuku kwaha hoki na rera vohoki.

¹⁸Vae huri a tangaloi rusa rau tuku kwaha domidomira mana doridoriga, i nau vake na vai kwehi.

¹⁹I kamu tulu kikikila haburu, vae huri hi tulu lagwa kwara a rera rana tuku kwaha nga.

²⁰I kamu tulu tuku tiraki na tangaloi haro nga kwara rana toko gwarubibikamu hokinia i kamu a bulaga tangaloi boloki vohoki. Rau tuku balu tikamu, rau livutikamu kwara rana magarakikamu, rau taga hivokikamu, rau rabakamu, vae tulu he domi huri tea.

²¹I nau nu maemae kwara na viti i kami keu mala mataku kwara kena vaikamu kwehini. I nau nu kwaha hoki na rera, vae a havakinau a tangaloi vano hi rau rarai kwara rana kwaha domidomira luna, vae i nau vake nu rarai kwara na vai kwehini.

²²?Kworohokinia? ?Kwara aira a Hibru*? I nau vake a Hibru. ?Aira a gwaloana noi Isrel*? I nau vake a gwaloana noi Isrel. ?Aira a gwaloana lui Evraham? I nau vake a gwaloana lui Evraham.

²³?Aira a tangaloi boloki noi Kraes*? Nu kwaha hoki na rera, vae i nau a tangaloi boloki karea noi Kraes nu sileti na tangaloi vano hi. Nu boloki u madi siletira, nu vano vaki lolo ingwa na gwarugwaru vakarusa u siletira. A tangaloi rau takwiliau siletira, vae vakarusa u garagarani kwara na mate.

²⁴A gwaloana noi Isrel rau takwiliau kina karo hala na vakailima, vae lo taro katukwale kehe nga nu kwali na noga kaitakwili ngavu kaitolu dongwana kaihikwa. [4]

²⁵Vakaitolu a ngwera Rom rau sanguniau kina ngwasa kehe nga, vunu vakatukwale rau vohoiau ki vatu. Hala na vakaitolu i nau lo aga hinea rau takwaka lo karata kehe nga, vunu vakatukwale nu halehale lo karata a bongi katukwale a rani katukwale.

²⁶Tigwaravu nu tuku lakao laliki nomo vai na bolokiana hi, vae i nau lo hala na mateana, huri na kwai rau huki lalakua, huri na tangaloi babalua, huri na ngwera tatagu a gwaloana noi Isrel, vunu vake huri na tangaloi tavalavarea tina gwaloana noi Isrel. I nau lo hala na mateana lo gwatuivanua lalakua, lolo bubu, lo livuka na tahi. I nau lo hala na mateana huri na tangaloi hinea rau viti kwara aira a nogu buluana, vae rau kura.

²⁷Nu boloki haburukiau vohoki, vae a tarabehigu rau kadikadiau. Vakarusa nu tuku boloki lolo bongi, nahe maturu tea. Taroki tuaki u marakatiau, nu madoku, vakarusa a kagu hinaka tikei, a tanotanogu tikei kwara na hili eia, vake a lugwagu tikei.

²⁸A kinau ratuaki nahe vitira tea, vae na vitia hika vohoki. Tigwaravu nu rongo hoki na kinau u mava lugu, huri vataha na rani nu domidomi haburu huri na kwarelua vataha na vanua.

²⁹Diko te tangaloi katukwale u keokeo, i nau nu keokeo vake. Vunu diko te tangaloi u sovi tilo vaivai hati, i nau nu rongo hati.

³⁰Diko nana kwaha domidomiau, vae na kwaha domidomiau mana kinau vano hi hinea rau vosangi kwara i nau a nogu huirana tikei.

³¹I God, hinea a God a Tama na noda Hugwe i Jisas Kraes, hinea tamo toko tabe hakeki na hinana tigwaravu, aia u kikilai kwara nohe kura tea.

³²Lolona nomo hugu Damaskes, a Kavman hinea u hugu tavuti na hugwe lakua i Aretas mo lengaia kwara ne kwiribibiau, vae mo tau na nona kaitagahuri kwara rana tu koro na matakihala na titiba na gwatuivanua lakua hi.

³³Vae i rabuluigu ramo tauau lo kete lakua, ramo tuli duruhiau lo kwido na titiba hi, ramo tirakiau hivo vaki lo tano, nomo kwalao tina Kavman hi.