Read West Ambae 2 KORIN 2 Bible Online

2 KORIN 2 - West Ambae bible

2 KORIN 2

¹Hokinia nu domia ba kwara na hatu venatu vaki maikamu taliku nomo vaikamu tulu mo rongo hati.

²I kamu kehekeheki tulu vaiau u havutiau, vae diko i nau nu vaikamu tulu ne rongo hati, vae a tangaloi tikei kwara ne vaiau ne havutiau.

³Nomo uli na leta hi tomua lakwakamu, huri nohe lengaia te kwara na venatu vaki maikamu kwara tulu ne vaiau na rongo hati. I kamu hi vohoki tulu ne vaiau ne havutiau. Nu kikilai tabetabeki kwara diko ne havutiau, i kamu vunu vake ne havutikamu.

⁴Nu uli lakwakamu kina rongoana hati lakua, a domigu u kwalao laliki, nu tangi haburu, hete kwara na vaikamu tulu ne rongo hati, vae kwara tulu ne kikilai kwara nu lagwa haburu maikamu, i kamu vunu.

⁵A tangaloi hinea mo vaikamu tuaki tulu mo rongo hati he vai te vovohiau, vae u vai vovohikamu kehekeheki. U vai na rongoana hati lakwakamu, i kamu vunu tulu mo rongo hati, vae lakwakamu tuaki, u vai na rongoana hati siletia hi mo vai lakwakamu ratuaki. Nahe lengaia tea kwara na vai ne madi haburu lakwae.

⁶Aia vae a sasanguniana hinea rusa tikamu tulu mo bete lakwae u rusa te ba.

⁷Vae hikani u karea kwara tulu ne domidomi koro lakwae, tulu ne hago maia kwara tulu ne rakati na domina, vae ne hatu rongo hati haburu. Vae a domina ne mai sovisovi ulu.

⁸Vae hokinia nu viti lakwakamu kwara tulu ne vaia ne kikilai kwara tulu lagwa maia haburu.

⁹Nu uli na leta hi lakwakamu huri na kinau hika vohoki, kwara na kahi haro na domimiu na tagaikamu kwara tulu rarai tigwaravu kwara tulu ne rongohuri na nogu leo savia diko hetea.

¹⁰Diko tulu domidomi koro te lakwa na tangaloi huri na havakinau hi mo vai, vae i nau vake nu domidomi koro lakwae. Diko a kinau te eia kwara na domidomi koro lakwae luna, vae nu domidomi koro lakwae ba. Nu vai kwehini hurikamu koro na nako i Jisas Kraes*

¹¹kwara na tu koro i Setano* kwara ne mai guikita, huri tau kikilai na nona domidomi ba.

¹²Lolona nomo maravuti lo gwatuivanua Troas kwara na heretuvaki na Roro Karea huri Kraes*, nomo taga kwara a noda Hugwe* u takahi na hala huri na nogu boloki takwa-hi.

¹³Vae a domigu u kwalao laliki haburu huri nohe hagwe i belada i Taetas tea. Hokinia nomo duduli na tangaloi takwahini, vunu nomo vano vaki lo vanua Masetonia.

¹⁴Vae tau lai noda lagwaana lakwai God, huri i Kraes* aia hoki na hugwe lakua hinea u gui na nona tavaluivuro ba, vunu mo toko lakao kwara ne mulemai vaki tatana. Vae huri i kita tau hariki lui Kraes, tigwaravu i God u vaikita tamo hariki lui Kraes lo hinana lakua. Vunu tigwaravu i God u lalahikita kwara ne vai na tangaloi vataha na mahagweki rana kikilai Kraes. A tangaloi rau rongoa hokinia rau rongo na boniboni na sede hinea a boniki u karea.

¹⁵I kita hoki na kabuiahu na kinau* boniboni hinea a boniki u karea, hinea i Kraes mo toko hura kwara ne kaluhaki God kinia. A kabuiahuki u ahu laliki vake mana tangaloi hinea i God u tuku vakahikinira, maira hinea vae rana sala.

¹⁶Lakwara hi vae rana sala, a kabuiahu hi aia hoki na boni na mateana hinea u vai mateira. Vae lakwara hinea i God u tuku vakahikinira, aia hoki na sede hinea u boniboni, ne vaira rana ahi. ?Vae ihe hi u taritarisa mana bolokiana hi?

¹⁷I kami hete hoki na tangaloi ratuaki hinea rau tuku vai na leo noi God hoki na hala na bihubihu mane*. Vae huri i God mo rivukikami, keu kwaha kina vitikareaki lo nakona huri i kami a tangaloi boloki noi Kraes.